పవిత్ర్ బైబిల్‍
లూకా 14
ఆరామ్ను ధన్నె యేసు స్వస్థతకర్యొ
ఆరామ్నూ ధన్నే యో ధాన్‍ ఖావనాటేకె పరిసయ్యుల్మా ఏక్‍ అధికారి ఘర్కనా జవమా, యూవ్నే యేసు ఏజ్గా ష్యాత్‍ కర్షేకి కరి ఏన్‍ కర్తు ర్హయూ. ఆంగ్తన్‍ మొత్తం పులీనీర్‍ భరైహుయు రోగ్వాల ఏక్‍ అద్మిఇనా మే ఆయిన్‍ హూబ్ర్యు.
ఆరామ్నూ ధన్నే రోగ్వాళనా ఖుద్రవనూ న్యాయం కాహేన్నా?
కాని, బోలకోయినీతింమ్‍ యూవ్నే గఛ్చుప్‍ థా. తెదె యో రోగ్వాళనా కంధే బులైన్‍ ఇనా రోగ్నా క్హూద్రైన్‍ బోలిమొక్‍ల్యొ. తుమారమా కీనూబి ఛయ్యోతోబి, ధాండొతోబి ఆరామ్నూ మా పడీగయు తేదె యగ్గీస్‍ ఇనా ఉఫర్‍ కాడ్‍స్యు కున్నా? కరి బొల్యొ. ఆ వాతేవ్‍నా యూవ్నా కాయిబి బోలానా కోహూయుని.
య్హాను ఖాణమా ఆయుతె
ధాన్‍ ఖావనటేకె బులైమాంగాయితే అద్మీయే యూవ్నే ఆగడీ బేహ్‍ఃనూ కరి దేఖూకరతే యూవ్నా దేఖీన్‍, యేసు ఏక్‍ ఉపమాన్‍ బోల్యొ. తూన కోన్బి య్హానూ ధాన్‍ ఖావనా బులాయుతో ఏజ్గా అగ్రస్థాన్‍మా నకో బేఖో, తూన బులాయోతే యో ఏక్‍ వఖాత్‍ అజు తారేతిబి మోటోనా బులావజాయ్‍; యో తారకనా ఆయిన్‍, ఆనా జొగోధాకరీ తారేతి బోల్యుతో, తేదె తూ షరంతీ పీటే జైన్‍ బేహ్‍ఃనూ పడ్‍స్యే. ఇనటేకె తున బులాయుతో ఆఖరీనుజొగొమా బేక్హ్, ఇమ్‍ కర్యోతో తూనా బులాయోతే యో ఆయిన్‍, మారో దోస్ ఉట్టీన్ ఖామే బేహ్‍ః కరి బోల్‍స్యే, తేదె ఏజ్గా బేట్యూతే అద్మీయేమా తూనా అచ్చు నామ్‍ ర్హసే. ష్యానకతో ఇనూ యోస్‍ మోటోహోను కరి దేఖవాళు తగ్గాయిలీసే, తగ్గాయిలేవాళు హేచ్చింపబడ్‍సే.
బుజు యో ఇనా విందు ఖాడవనా బులాయోతే ఇనేతి ఆమ్‍ బోల్యొ, కేధేబి రాత్నూ ర్హవో ధన్నూ ర్హవో విందు కర్తవొక్హత్‍ తారు దోస్తుల్‍నా, భైయ్యేవ్‍నా, బందుల్‍నా, దౌలత్‍ వాళనా నకోబులైస్‍; యూవ్నా బులాయోతో యూవ్నేబి తున బులవుస్యే, తేదె తూ కర్యోతే ఉపకార్‍నా యూవ్నేబి ఉపకార్‍ కర్‍సే. ఇనఖాజే తూ విందు కర్తీవోఖత్‍ గరీబేవ్‍నా, పాంగ్లేవ్‍నా, లంగడవ్‍నా, ఖాణవ్‍నా బులైన్‍ ఖాఢవో. తేదె తున రుణం పేఢనా యూవ్నాకన ఖాయిబి కోర్హాసేని. ఇనటేకె తూ ధన్యుడ్ హూయిస్‍. మరీగయూతే నీతినూ అద్మీయే పునరుధ్దానంధన్మా తెదె దేవ్‍ తునకర్యోతే అచ్చు కామ్‍నా బహుమానం మళ్‍స్యే.
గొప్ప విందును ఉపమాన్‍
(మత్త 22:1-14)
యత్రస్‍మా ఇనకేడె ఖావనా బేట్హుతే యూవ్నామా ఏక్‍ జణో యో వాతే ఖమ్జీన్‍, దేవ్‍నూ రాజ్యంమా ధాన్‍ ఖవళు ధన్యుడ్ కరి ఇనేతి బోలమా.
తేదె ఇనేతి ఆమ్‍ బోల్యొ; ఏక్‍అద్మి మోటు విందు కర్నూ కరీన్‍ కేత్రాకీ జణానా బులాయో. విందునూ వొహఃత్‍ హాంకె హాఃరు సిద్దం హూయిరూస్‍ ఖావనా ఆవో కరి బులైమాంగాయితే యూవ్నేతి బోలాన ఏక్‍ దాసుడ్‍నా బోలిమొక్‍ల్యో. యూవ్నే హాఃరూబి ఏక్నూఏక్ సాకుల్‍ బోల్యా. ఆగళ్యోకీసికి మే ఖేతర్‍నా మోల్‍ లీధో ఇనా జైన్‍ దేకేనూ; ఇనటేకె మన మాప్‍ కర్‍ కరి బొల్యొ. అజేక్‍ జణో మే పాఛ్‍ జోడ ధాండొనా లిధొ యో భరోభర్‍ కామ్‍ కరుకరాస్‍కీ కోయినికి దేఖాన జౌంగ్రుస్‍, మన మాప్‍కర్‍ కరి బోల్యొ. వుజేక్‍ జణో మే య్హా కర్‍లీదో. ఇనటేకె మన ఆవాన కోహూస్యేని కరి బోల్యొ.
ఇమ్‍ యూవ్నే క్హారు బోల్యుతే వాత్నా లీన్‍ జైన్‍ ఇనా మాలిక్తి బోల్యు. యో ఛండాల్‍ ఖైన్‍, తూ యగ్గీస్‍ జైన్‍ క్హాయార్‍ని గల్లీయేమా, గొమ్ధీయేమా ఛాతే గరీబేవ్‍నా, లంగఢా పాంగళ్యేవ్‍నా, ఖాణవ్‍నా అజ్గ బులైల్యావ్‍ కరి ఇనా దాసుడ్‍తి బోల్యొ. ప్రభు తూ బోల్యొతిమ్మస్‍ కర్యొ పన్కి, అజుబి జోగొ ఛా కరి బోల్యొ. యజమానుడ్‍ ఇను దాసుడ్‍తి బోల్యొ, క్హయర్‍మా మారు ఘర్‍ భరవా ఖార్‍ఖు తూ జైన్‍ ఖేతర్‍మా, జైయిన్‍ ఎజ్గా రైతే అద్మీయేనా బులైల్యావ్‍ కరి బోల్యొ. మే ష్యాత్‍ బోలుకరుస్‍ కతో మే హాంకేతోడీ బులాయోతే యూవ్నామా ఏక్‍ జనోబి మారు విందుమా ఖాసే కోయిని కరి బోల్యొ.
సిష్యుల్‍ హువనటేకె హిమ్మత్‍
(మత్త 10:37-39)
జనాల్‍ క్హారుజణు యేసునాకేడె జౌంగ్రతోతేదె యో యూవ్నా మ్హణీపరీన్‍, కోన్బి ఏక్జణో మారకనా ఆయిన్‍, ఇనా ఆయా, భా తీబి, బావణ్‍న లఢ్కాతిబి, భేనె, భైనా ఇనజాన్‍నాబి, ఇను యో నా ద్యేషించతో యో మారో సిష్యుడ్‍ కోహూస్యేని. ఇమ్మస్‍ కోన్బి ఇను సిలువనా పల్లీన్‍, స్రమపఢీన్‍, మర్రిజైయిన్‍, సిద్దంహుయీన్‍ మారకేడె నాఆయుతో యోమారో షిష్యుడ్‍ కోహూసేని.
మ్హఢీ
తుమారమా కోన్బి ఏక్‍ మ్హాడీ భాంద్నూకతో, యో భ్హాంధనా కేత్రా రఫ్యా హూవస్కీ, ఇనా కనా ఏత్రా రఫ్యా ఛాకీ కోయిని కరి యో దేఖిలీస్యే కున్నా? ఇనాకనా రప్యాఛ్చాకి కొయిన్‍కి నాధేఖీన్‍ భాంద్యుతో యో కామ్‍ ఆధాక్‍ఫర్‍ భిరి జాస్యే. దేఖావళు ఖారుబి ఆ అద్మిఆదూ భాందీన్‍, ఆదూ మ్హేందూదు కరి బోలీన్‍ ఇనూ షరం కాడ్‍స్యే.
ఏక్‍ రాజో బుజేక్‍ రాజోతి యుధ్దంనా జానూ కతో ఇనాకనా ఛాతే దఖ్‍ః హజర్‍ సైనిక్‍తి యుధ్దం కర్‍స్యేతే యూవ్నూ ఈఖ్‍ః హజర్‍ సైనికుల్‍తీ యుధ్దంమా జీత్సునాకరీ సోఛ్‍స్యేకోయిన్నా? ఇనమా లఢనూ తాఖాత్‍ నా ర్హైతో యూవ్నే దూర్‍ఫర్‍ ర్హతివోఖత్‍ సందేష్‍ బోలిమోక్లీన్‍ దుష్మన్‍ కోయిన్‍తిమ్‍ మళీజస్యే. ఇమ్మస్‍ తుమ్నాఛాతే ఖారు నా మ్హేంధాతో మారు సిష్యుల్‍ కోహూస్యుని.
ఖారు కొయింతే మీట్
(మత్త 5:13; మార్కు 9:50)
మీట్ అష్యలస్, పన్కి ఇన్మనూ ఖారు ఛలిగుతో అజు కినేతి ఫాచు యో ఖారు ఆవ్సె. యో జమీన్‍నాబి, ఎరువునాబి కామే కోఆవాని, అజు ఇనా ఫేకీదేనూస్‍ పడస్‍. ఖంమ్జనా కాణ్‍ రవ్వాలు జత్తన్‍తి ఖంమ్జో కరి యూవ్నేతి బోల్యొ.
పవిత్ర్ బైబిల్‍. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.