పవిత్ర్ బైబిల్‍
యోహా 17
యేసు ఇనా సిష్యుల్‍నాటేకె ప్రార్థన కర్యో
యేసు ఆ వాతెహాఃరి బోలిన్‍ ఇనపాసల్‍ ఆబ్‍ మ్హాడి డోలో పడిన్‍ అమ్‍ బోలిన్‍ భా మార వఖాత్‍ ఆయిరుస్‍ తారొ ఛియ్యో తునా మహిమా పరచాఖార్కు తార ఛీయ్యానా మహిమా పరాచ్‍; తూ తరా ఛీయ్యానా దిదొతె ఇవ్నా హాఃర్వాన మే నిత్యజీవమ్‍న అనుగ్రహించతింమ్‍ అద్మియే హాఃరవ్పర్‍ ఇనా అధికార్‍న దీరాక్యోస్‍ అద్వితియానో హాఃఛి దేవ్‍ హూయోతె తునా, తూ బోలిమోక్లోతె యేసు క్రీస్తునా గుర్తుధరనుస్‍ నిత్యజివమ్‍ కరనాటేకె తూ మన దిదొతె కామ్‍ మే సంపూర్ణంతి జామిన్‍పర్‍ తునా మహిమా పరచ్యో. భా ములక్‍ పైదాహువనా అగాఢి థూస్‍ తరాకన మన కెహూ మహిమా తుకి యో మహిమాతి మన హంకె తరకనా మహిమా పర్చిలా.
ములక్‍ మాతు తూ మన దీరాక్యోతె అద్మియోనా తరా నామ్తీ మహిమపరుచుకరస్, ఇవ్నే తారు హుయిన్‍ ర్హాయూ, తూ ఇవ్నాబి మన దెవ్వాడిరాక్యోస్‍; ఇవ్నే తారి వ్యాకంనా మాలంకరిన్‍ ఛా. అనటెకె తూ మన దీరాక్యోతె ఖారూబి తారువలనస్‍ హుయుకరి ఇవ్నేహంకె మాలంకరిన్‍ ఛా! థూ మన దీరాక్యోతె వాతెన ఇవ్నా దీరాక్యోస్‍; ఇవ్నేయోవాతేనా ఒప్పిలీన్ మే తారకంతూ నికిన్‍ ఆయోకరి హాఃఛితి ఎంచీన్‍ తూ మన మొక్లోకరి ఇవ్నే నమ్ముకారస్.
మే ఇవ్నటెకె ప్రార్ధననా కరుకరూస్‍; ములక్నటెకె ప్రార్ధన కొకరుకరుని పన్కి, తూ మన దెవ్వాడిరాక్యోతె ఇవ్నేతారువాలకరి బోలీన్‍ ఇవ్నే ఖాజేస్‍ మే ప్రార్ధననా కరుకరూస్‍ మారు ఖారుబి తారు, తారు ఖారూబీ మారు; ఇవ్నమా మే మహిమమా హుయ్‍రోస్‍.
మే ఆ ములక్మా బుజు కోరహీస్‍ని పన్కి అవ్నే ములక్మా ఛా; మే తారకన వలాంకరూస్‍ పరిసుద్దుడ్‍హుయోతె మారో భా అప్నె ఏక్‍ హుయిన్‍ రయ్యేతింమ్‍ ఇవ్నేబి ఏక్‍హుయిన్‍ ర్హానుతింమ్‍ తూ మన దీరాక్యోతె తారు నామ్మాతి ఇవ్నా బఛ్చావ్‍ మే ఇవ్నేకనా రవ్వమా తూ మన దిదోతె తారు నామ్మాలిన్‍ ఇవ్నా బఛ్చాయో. అనటెకె లేకనాల్‍ నెరవేర్చతింమ్‍ నాస్‍హువన బరాబ్బర్‍నో తప్ప, ఇవ్నేమా బుజు కోన్బీ నాస్‍నహోనుకరి మే ఇవ్నా జత్తన్‍కర్యో హంకె మే తారకనా వలాంకరూస్‍; మారు ఖుషాల్‍ ఇవ్నవలా కొదువాహోనుకరి, ములక్మా ఆవాత్‍ బోలుకరూస్‍ ఇవ్నా తారు వాతేనా దిరాక్యోస్‍ మే ములక్ను సంబందహుయొ కాయేతిమ్‍ ఇవ్నేబీ ములక్ను సంబందహుయుకాహె అనటెకె ములక్‍ ఇవ్నా దావ్వోకరూకరస్‍.
తూ ములక్‍మతూ ఇవ్నా బులాలిజాకరి మే ప్రార్ధనా కరుకరాకొయిని పన్కి దుష్మాన్కంతూ బఛ్చావ్‍కరి ప్రార్ధననా కరుకరుస్‍ మే ములక్ను సంబందిహుయొ కాహే, తుమేబి ములక్న సంబందిహుయా కాహే. హాఃఛిమా ఇవ్నా ప్రతిష్ఠ పర్చను; తారు వాక్యమస్‍ హాఃచి. తూ మన ములక్మా మొక్లోతిమ్మస్‍ మేబి ఇవ్నా ములక్మా బొలిమొక్లొ. ఇవ్నేబి ఖాఛిమా ప్రతిష్టబడ్నుతింమ్‍ ఇవ్నహాఃజె మారుమేస్‍ తున ప్రతిష్ఠ కర్‍లెంకురుస్‍
ఇవ్ని వచన్‍టేకె మారకనా విష్వాస్‍న రాఖవాల హఃరూబి ఏక్‍హుయిన్‍ ర్హానుకరి ఇవ్నటెకె కాహే గాని అవ్ను వాతెవ్న ఖాంజ్యతే ఇవ్నాటెకె మే ప్రార్ధన కరూకరాస్‍ బుజు తూ మన మొక్లోకరి ములక్‍ నమ్మనుతింమ్‍; భా, మారకన తూబి, తారమా మేబి ర్హంకరతెతింమ్‍; ఇవ్నేబి అప్నమా ఏక్‍హుయిన్‍రానుకరి ఇవ్న ఖాజేస్‍ మే ప్రార్ధన కరుకురుస్‍; అప్నె ఏక్‍హుయిన్‍ ఛియ్యేతింమ్‍ ఇవ్నేబి ఏక్‍హుయిన్‍ ర్హానుకరి తూ మన దెవ్వాడిరాక్యోతె మహిమమా మే ఇవ్నా దిదో. ఇవ్నకన మేబి మారకనా తూబి రయ్యతొ ఇవ్నే సంపూర్ణుతరా హుయిన్‍ ఏక్నితరా ఛియ్యెకరి తూ మన మొక్లోకరి, తూ మన ఫ్యార్ కరోతిమ్మస్‍ ఇవ్నబి కర్యాకోస్కరి, ములక్ను మాలంకరతింమ్‍ మన అనుగ్రహించొతె ఫ్యార్ ఇవ్నాదిదొ
భా మే కెజ్గారవుస్కీ ఎజ్గా తూ అనుగ్రహించితె ఇవ్నేబి మారకెడె ర్హానుస్‍కరి, తూ మన అనుగ్రహించుతె మారు మహిమనా ఇవ్నే దేక్నూకరి కోరిలెంక్రుస్‍ సానకతో ములక్‍ ఫైదాహుయుకొయింతె అగాడిస్ తూ మన ఫ్యార్ కర్యాకోస్‍.
నీతి స్వరూపుడ్‍హుయోతె భా, ములక్ను తున మాలంకర్యూకొయుని; మే తున మాలంకర్యో; తూ మన మొక్లోకరి అవ్నేమాలంకరిన్‍ ఛా! తూ మారప్పర్‍ రాక్యోతె ఫ్యార్‍నా ఇవ్నకన ర్హానుతింమ్‍ మే ఇవ్నకన ర్హానుతింమ్‍ ఇవ్న తారు నామ్నా మాలంకర్యాయో అజుబి మాలం కర్యాస్‍కరి బోల్యొ.
పవిత్ర్ బైబిల్‍. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.