పవిత్ర్ బైబిల్‍
యాకో 4
ములక్తి దోస్తి కరను
తుమారమ లడ్డాయి కరనటేకె కారణం సాత్‍? తుమారు అవయంమా లడ్డాయివాలో తుమరు సుఖాల్నాటేకెస్‍ కాహేన? తుమ్నా ససాత్‍కి వోనుకరి తుమ్నా మల్యుకొయిని; హత్య కర్సు మత్సరపడ్సు పన్కి సంపాదించుకొయిని; లడ్డాయికర్సు జఘణకర్సు పన్కి దేవ్నా నా మగితో తుమ్నా సాత్బి మాల్సేకొయిని. తుమే మంగితోబి తుమరు సుఖభోగల్నాటేకె వాడిలేవనుటేకె ఉద్దేషంతి మంగ్సు పన్కి తుమ్నా సాత్బి మల్సేకొయిని. నమ్మాకం కొయినతే వాలా, ఆ ములక్ను స్నేహం దేవ్తి వైరికరి తుమ్నా మాలంకొయినా? అనటేకే కొన్బి ఆ ములక్తి స్నేహంనా కర్నుకరి ర్హహిజాస్‍కి యో దేవ్నా వైరిహుయిన్‍ ర్హాసే. హుయితొబి అప్నమా నివసించుకురాతె దేవ్ను ఆత్మ మత్సరపడతిం కోరిలిదుతే కరి లేఖనం బోలుకరతె వ్యర్థకరి ర్హాహిజొంకొరస్నా? కాహెపన్కి, యో ఘను కృప దిదో; అనటేకె దేవ్ హంకర్‍వాలన ఎదిరించిన్‍ దీనుల్నా కృప్నా అనుగ్రహించే కరి లేఖనం బోలుకురస్‍.
అచ్చు సేవకుడ్‍
అనటేకే దేవ్నా లోబడిన్‍ ర్హవో, సైతాన్‍నా ఎదిరించో, తెదే యో తుమర కంతు మిలైదిసే. దేవ్నాకన ఆవో, తెదె యో తుమరకన ఆవ్సే, పాప్‍వాల, తుమరు హాత్నా సుభ్రంకర్లేవో; భేదిల్‍వాల, తమరు హృదయల్నా పరిసుద్ధ్ కర్లేవో. దుఃఖించొ, రోవొ, రోదనా కరో, తుమరు ఖుషిన చింతనా బద్లాయ్‍లెవొ. ప్రభువు డోళమా తుమ్నా తుమేస్‍ తగ్గించిలెవొ. తెదె యో తుమ్నా ఉప్పర్‍పడ్సే.
భైయ్యేనా న్యావ్‍ కరను బారెమ
భైయ్యే భేనె, ఎక్నా విరోధంతి ఏక్జణు వాత్‍ నొకొబోలొ. ఇను భైయ్యేన విరోధంతి వాత్‍బోలిన్‍ ఇను భైయ్యేన న్యావ్‍ తీర్చవాలొ ధర్మషాస్త్రంనా వ్యతిరేకంతి వాత్‍బోలిన్‍ ధర్మషాస్త్రంనా న్యావ్‍ కరూకురస్‍. తూ ధర్మషాస్త్రంనా న్యావ్‍ తీర్చిచొతో ధర్మషాస్ర్తంనా నెరవేర్చేవాలోకాహేతిం న్యాయంన విధించేవాలోహుయో. దేవ్ ఎక్కస్‍జనొస్ ధర్మషాస్ర్తంనా నియమించిన్‍ న్యాయంనా విధించేవాలో. యోస్‍ బఛ్చాడనటేకె నషింపకరనటేకెబి తాహాఃత్‍వాలొహుయిన్‍ ఛా; అలాదవ్నా న్యావ్‍ తీర్చన తూ కోన్‍?
మాహాన్‍ బొల్లేవాలన హెచ్చరికా
హాఃమ్జో, కోన్బి రేపైనను ఏక్నుయేక్ నంగర్మా జాయిన్‍ ఎజ్గా ఏక్‍ వరహ్ః ర్హహియిన్‍ వ్యాపాపర్‍కరీన్‍ లాభమ్‍ సంపాదించియెకరి బోల్లేస్‍, కాల్‍ సాత్‍ వుసేకి తుమ్నా మాలంకొయిని. తుమారు జీవ్ను కెజాత్ను? తుమే తోడువహఃత్‍ దెఖ్కాయిన్‍ ఎత్రమా‍స్‍ మాయంహుజాయితె బఫారో ఎజాత్నావాల. ఇనా బదులుతి తుమే ప్రభువు చిత్తంన జీవిన్‍ ర్హహిన్‍ ఆ యో కర్సేకరి బోల్ను. హంకె హుయుతో తుమే డాంబికుల్‍హుయిన్‍ హాంకర్తి వాత్‍బోల్లెంకరాస్‍. ఎజాత్ను హంఖార్‍ హాఃరబ్‍.
అనటేకె మేల్‍హుయుతె ఇనా మాలంకరిన్బి ఇమ్మస్‍ కరవాలన పాప్‍ కలగ్సే.
పవిత్ర్ బైబిల్‍. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.