పవిత్ర్ బైబిల్‍
హెబ్రీ 12:1
Verse 1 is marked below, with the whole chapter around it. Read from the start
ప్రభువును సిష్యుల్‍
అత్రు మహాన్‍ సాబుత్ను గళ్లో మబ్బుతార అప్నా ఆవరించీన్‍ర్హావమ, అప్ను హాఃమె బేందిరాక్యుతె పందెంమా ఓపికతీ మిలాయే. అప్నేబి హార్యేక్ భారంనా, హల్కునితరా చిక్కుల్‍ మ్హేందతే పాప్‍నా మ్హెందీన్‍, అప్నహాఃమే రాక్యుతె పందంమా ఓపికతి మీలయే. అప్నో విష్వాసంన కర్తబి ఇనా కొనసాగించవాలో యేసుబణే దేక్తో, యో ఇనాహాఃమే ర్హాక్యుతె ఖుషినటేకె అవమానంనా లెక్కకరకోయిన్తిం, సిలువనా సహించిన్‍, దేవ్ను సింహాసనంనూ ఖవ్వాత్‍ బణే ఆసీనుడుహుయిన్‍ ఛా.
తుమే థాకిజవాకోయిన్తిం తుమారు జాన్నా విసుకుర్హానకోయిన్తిం, పాప్‍వాలన ఇనా వ్యతేరేకంతి కరిన్‍ హాఃరుబి నోకొకరి ఓర్చులీన్‍ ఇనా గురించి హాఃయాల్‍కరో. తుమే పాప్‍తి లడ్డాయికర్తా లోహి చువ్వాడతోడి అజు ఇనా ఎదిరించకొయిని. ఛియ్యాతి ఛోరినావాత్‍బోల్యోతిమ్‍ తుమరేతి వాత్‍బోల్యోతే ఇను హెచ్చరికనా బులిగా?
అజు మార ఛీయ్యా, ప్రభువు కరాతే షిక్చనా తృణికరించో,
యో తునా గుర్కాయోతెదే నోకొవిసుక్‍జో
సానకాతో ప్రభువు ఇనా ఫ్యార్‍కరవాలన హాఃడక్‍ కరిన్‍,
యో స్వీకరించోతే హార్యేక్ ఛీయ్యాన షిక్చిస్తాడు కరి
షిక్చనుఫలమ్‍ పొందనటేకె తుమే సహించుకురాస్‍; దేవ్‍ ఛీయ్యాతార తుమ్నా ద్యేకుకురాస్‍. భా షిక్చింపకోయిన్తే ఛీయ్యాకోన్‍ ఛా? ఛీయ్యాహుయాతే హాఃరవ్నా షిక్చమా భాగ్‍హుసేకరి, తుమే నాపొంద్యాతో అలాదను ఛీయ్యా పన్కీ ఛీయ్యా కాహే. అజు ఆంగ్తాను సంబంధుహుయిన్‍ భాయే అప్నా షిక్చించవాలనితరా హుయిర్హాస్‍. ఇవ్నాకన భయభక్తుల్‍ హుయిన్‍ ఛీయే; ఇంహుయుతో ఆత్మల్నా భా హుయోతే ఇనా అజు హాఃను లోబడిన్‍ జీవ్ను కాహేన? ఇవ్నే తోడు ధన్‍తోడి ఇవ్ను ఇష్టంహుయుతిం అప్నా షిక్చించాపన్కి అప్నే పరిషుద్ధల్తి భాగ్‍వోనుకరి అప్ను అష్యాల్నటేకె ఇను షిక్చంచుకరాస్‍. అజు హాంకే అప్నా సమస్త షిక్చబి దుఃఖ్‍నితరా దెఖ్కావస్‍ పన్కి ఖుషీతార సాత్‍ ర్హాసేకోయిని. హుయుతో యో షిక్చణ పొంద్యేహో ఇవ్నా యో బాద్మా నీతిబి షాంతిహుయుతే ఫలితాన్నా దిసే.
దేవ్ను కృప నోకొకరి బోల్యు ఇవ్నా హెచ్చరికలు
అనటేకే డిలాపడిగతే హత్‍నా1 ఉపార్‍ పాడ్డో. హాఃజోర్‍తార హుయుతే గుడ్‍క్యేనా బలపర్చో. అజు లంగోడోగోడ్డాన నాబెన్కు కోయినితిమ్‍ అష్యాల్‍హువతిం తుమారు హఃడక్ వాట్పర్ చాలీన్ అష్యాల్‍ కర్లేవొ.
హాఃరతి సమాధనంతి పరిసుద్ధతి కలిగిన్ ర్హావన ప్రయత్నించో. పరిషుద్ధతకోయిన్తిం కోన్బి ప్రభువునా దేక్సేకోయిని. తుమారమా కోన్బి దేవ్ను కృపనా పొందకొయినితిమ్‍ చుఖ్కాయ్‍జాస్‍సికీ జాతన్‍ ర్హావో. కడుహుయుతె జాడ్‍ కేవుబి ఉట్టిన్‍ కలవరపర్యుచుతో గనజణ అపవిత్రుహుయిన్‍ జాస్‍సికీ దేఖిలెవొ, ఏక్‍ పూట ధాన్‍టేకె ఇను మోటుదయుతె హక్కునా ఏచి నాకిదిదోతే ఏషావుతార భ్రష్టుహుయో వ్యభిరిహుయిన్‍ ఛా హుసేకరి, జత్తన్‍ ర్హావో. ఏషావు ఇన బద్మా ఆషీర్వాదం పొంద్నుకరి ఆంజూ చువ్వాడ్తో ఇనాటేకె ష్రద్ధతి డుండ్యొతోబి, దిల్‍బద్లావను పొందనా అవకాషం మల్యుకోయిని ఇను విడిచిపెట్టబడెనుకరి తుమ్నా మాలం.
చిమాతేహాత్తి సినాయ్‍ను పహాడ్న హాఃదే, బలుకురాతె రహేతే ఫ్హాడ్‍నా హాఃదే, ఘాను అంధారమా హాఃదే, సంగటననా హాఃదే న్హాహితో ఏక్‍ తుఫాన్‍ హాఃదే తుమే అయాకోయిని. బూర ఆవాజ్‍ హాఃజిన్‍, వాత్‍నా ఆవాజ్‍ హాఃజీన్‍ తుమే అజు కేవు వాత్‍బి ఇవ్నేతి బోల్యకోయినికరి బతిమాలిలీదా. సానకాతో ఇవ్నే యో బోల్యుతే ఆజ్ఞానల్‍నా హాఃజనా సహించాకోయిని, ఫాడ్‍న ఛీమ్యుతో జీన్‍వార్‍బి ఫత్రతి మరను. అజు యో దేఖ్యోతె భయంకరంతి ర్హావమా మోషే మే ఘాను ఢర్యొ కాప్తూకుర్తుథూ బోల్యొ.
హాంకే హుయుతో సీయోను ఫాడ్‍నా జీవంహుయోతె దేవ్నా నంగర్నా, కాతో పరలోకంను యెరూషలేంకనబీ హజార్‍హజార్‍ దేవ దూతకనా ఆయా. పరలోకమా లీఖ్యురాక్యుతిమ్‍ దేవ్ను అగాడిను ఛీయ్యేను సంఘంనా, ఇవ్ను మహోత్సవంనా, హాఃరను న్యాయాధిపతిహుయోతే దేవ్‍కన, సంపూర్ణసిద్ధి పొంద్యతే నీతివాలన ఆత్మల్‍కన ఆవ్సు, నావు నిబంధన్నా ఇచ్మావాలోహుయోతే యేసుకన హేబెల్‍కన అజు ష్రేష్ఠంహుయుతే లోహికన తుమే ఆయిరాస్‍.
తుమ్నా బుద్ధి బోలుకురతే ఇనా నిరాకరింపకోయిన్తిం దేక్హిలేవో. ఇవ్నే జమిన్పార్తు బుద్ధిబోల్యతో ఇనా నిరాకరించతెదే ఇవ్నే నాచుహాఃయి గాయోతో, పరలోకంమాతు బుద్ధిబోలుకురాతే ఇనా మేందిన్‍ అప్నే కిం బచిన్ జాసుకరి హాఃచికాయేనా? తెసుస్తుంది. తెదే యో ఆవాజ్‍ జామిన్నా హాలయిన్‍ పన్కి హాంకే మే అజెయేక్తార జామిన్నాస్‍ కాహే ఆకాష్‍నాబి కంపించిస్‍ కరి వాత్‍ దిర్హాక్యోస్‍. అజేయేక్తార యో వాత్‍ హాలకోయిన్తె ఉబ్రిర్హావనాటేకె హాలతేఇనా దేవ్‍ షృష్టించోతె ఇనా ఖణాకిదిసెకరి అర్ధం దేంకొరాస్‍.
అనటేకే అప్నే నిష్చలంహుయుతే రాజ్యంనా పొందిన్‍, దేవ్నా కృతాజ్ఞానత కలిగిన్ ర్హాసు. యో కృతాజ్ఞానత కలిగిన్ వినయంతి భయభక్తి దేవ్నా ప్రీతీకరం హుయుతే సేవకర్సు, కింకతో అప్నొ దేవ్‍ బలుకరతే ఆగ్నితార ఛా.
Source notes (1)
- Footnote మూల
పవిత్ర్ బైబిల్‍. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.