పవిత్ర్ బైబిల్‍
2కొరింథీ 7
లాఢ్‍హుయతెవాలా, అప్న ఆ వాగ్దనల్‍ ఛా అనటేకె దేవ్ను ఢర్‍తీ పరిసుద్ధతనా పరిపూర్ణంకర్లీన్‍, ఆంగ్తాన్‍ను ఆత్మనకలుగుతే హాఃరు పాప్‍మతూ అప్నె పవిత్రులనితర హుయే.
పౌల్ను ఖుషి
హామన తుమరు దిల్మా రాఖిలేవొ, హామే కినా అన్యాయం కర్యాకొయిని, కినాబి మోసం కోకర్యాని. తుమారఫర్‍ షిక్చవిధి కారణంహుయుతేస్‍ పరిచర్యాస్‍, మహీమ కలిగ్యుహుతో నీతినా కారణంహుయుతే పరిచర్యా కెత్రూకి జాహఃత్‍ మహిమా కలగస్‍. నిందా ఆవ్నుకరి మే అమ్‍ కోబొలొని, తుమే హమారు దిల్మా ఛా తుమారకేడె మారనహో జీవనహో సిద్ధం ఛియ్యేకరి మే అగాఢీస్‍ బోల్యొ. తుమ్న లీన్‍ మే ఘను హిమ్మత్తి బోలుకరూస్‍ తుమ్నలీన్‍ మన ఘను అతిషయపడ్డుకురూస్‍, ఆదరణతి భారైరోస్‍, హామారుబదల్‍ హాఃరతీబి మించీన్‍బి జాహఃత్‍ ఆనందంపోంగి జంవుంకరేస్‍.
హమె మాసిదోనియానా ఆయాతెదె హమారు ఆంగ్తాన్‍నా జరాబి ఆరమ్‍ కోమల్యుని, ఎజ్గా ఆయతెదె హమ్న మిన్హత్‍ కల్గు బాధర్‍ లఢాయే మహీ ఢర్‍ థూ. పన్కి క్రుంగివాల ఆదరించావలో దేవ్‍, తీతు ఆవనవల హామ్నా ఆదరించో. తీతు ఆవనా బారెమా కాహెతిమ్‍ యో తుమారకనా పొందొతె ఆదరణ బారెమాబి దేవ్‍ హమ్నబి ఆదరించొ, మారఫర్‍‍ఛాతె తుమారు అభిమానం, మారబారెమా తుమారు దుఃఖమ్‍ మారవాత్మ తుమార ఆయుతె హమ్నా మాలంకరాయో, ఇనటేకె మే వుజు ఘను ఖుషీహుయో.
మే లిఖ్యొతె పత్రికమా తుమ్నా దుఃఖమ్‍ దిదుతే ఇనా, మన విచారమ్‍ ఆయుతోబి యో పత్రికనా తుమ్న థోడు వహఃత్‍తస్‍ దుఃఖమ్‍ హుసేకరి మాలంకర్యాక్యొయోస్‍. తుమే బాధపడుకరస్‍కరి ఖుషికోహుయోని పన్కి తుమె బాధపడీన్‍ దిల్‍బద్లైయిలీన్1 లిదుకరి హంకే ఖుషి హువుంకరూస్‍ కింకతొ కెహూ విషయంమాబి హమారబారెమా తుమ్నా నష్టమ్‍ నాఆవునుతిమ్‍, దేవ్ను చిత్తానుసారమ్‍తీ దుఃఖపడుకరాస్‍. దేవ్ను చిత్తానుసారమ్నుహుయూతె దుఃఖమ్‍ బఛ్చాడనహుయుతే దిల్‍నా బద్లాయ్‍లేవను హుసె; ఆ దిల్‍బద్లాయ్‍లేవనూ దుఃఖంనా కల్గించకొయిని. హుయ్తో ములక్‍ను సంబంధంహుయూతె దుఃఖమ్‍ మరణ్‍నా కల్గావ్సె. తుమే దేవ్ను చిత్తంప్రకరామ్‍ పొంద్యుతె ఆ దుఃఖంనా కిమ్ను జాగ్రుత్‍ కిమ్ను దోష్‍ నివారణటేకె ప్రతివాదమ్‍ కిమ్ను ఖీజ్‍ కిమ్ను ఢర్‍నా కిమ్ను అభిలాషనా కిమ్ను ఆషక్తిన కిమ్ను ప్రతిదండ్నా తుమారమా ఫాయిదొ కరస్కి దేఖొ, యో కార్యమ్నాలీన్ హాఃరి వాత్మా తుమే నిర్దోష్యుల్‍హుయిన్‍ ఛాకరి రుజువూ కర్లిదా.
మే తుమ్న లిక్యోతె యో కార్యంకర్యోతే ఇన నిమిత్తంతి కోలిఖ్యొని ఇనబారెమా అన్యాయంహుయుతే ఇవ్నష నిమిత్తంతిబీ కోలిఖ్యొని హామారవుప్పర్‍ తుమ్నా ఛాతె ఆషక్తీ దేవ్నహాఃమె తుమార ఇచ్మా బాధ‍ర్‍నాఖీన్‍ లిఖ్యొ. ఇనహాఃజె హమే ఆదరించబడ్యా థా. హమ్న ఆ ఆదరణ హుయుతెదె తీతునూ ఆత్మన తుమె హాఃరతి ఆరమ్‍మలనబారెమా ఇను ఖుషినా దేఖిన్‍ అజు జాహఃత్‍ హమే ఖుషీ హుయా. కిమ్కతో మే ఇన హాఃమె తుమారు విషయంమాహో కెహూ బడ్డాయునూ వాతెవ్నా బోల్యొతోబి మే షరమ్‍హుయోకొయిని హామే కిమ్‍ హాఃరు తుమారేతి హాఃచి బోల్యకి ఇమ్మస్‍ హామె తీతునా హాఃమె తుమారు వాత్మ బోల్యొతెవాతె హాఃఛికరి దెఖ్కాయు. బుజు తుమె ఢర్‍తిహో వణక్తాహుయిన్‍హో ఇన చేర్చిలిదాకరి యో తుమారహారవ్ను ఇమాన్‍తీబి హఃయల్‍ కరిలెంకరాతెదె, ఇను అంతఃకరణమ్‍ బుజు ఘను తుమార మ్హడి ఛా. హర్యేక్‍ వాత్మా తుమారబారెమా మన నమ్మకంహుయీన్‍ ఆంకరస్‍ ఇనటేకె ఖుషి హుంకరూస్‍.
Source notes (1)
- Footnote పాప్‍మతూ పరీన్‍
పవిత్ర్ బైబిల్‍. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.