పవిత్ర్ బైబిల్‍
1థెస్స 2
థెస్సలోనికలో పౌలు ప్రచార్‍
భైయ్యే, భ్హేనె తుమారకనా హమే ఆవనూ పాల్తు కోహుయూని, పన్కి తుమె సోఛ్చాతిమ్మస్‍ హమే ఫిలీప్పి నంగర్‍మా అగాడి మినఃత్‍పఢీన్‍ ఇజ్జాత్నాపొందీన్‍, కెత్రేకి విరోదంమా దేవ్ను సువార్తనా తుమ్న బోధించునాటేకెస్‍ అప్ను దేవ్మా హిమ్మత్‍ లాయిల్ధాకరి తుమ్న మాలంహుయ్రూస్‍. కిమ్కతొ హమారు ఉపదేష్‍ కపటంహుయూతె కాహే, అపవిత్రంహుయూతె కాహే, మోసంహుయుతేబి కాహే పన్కి; సువార్తన హమ్నా ధరాయ్‍ దెవ్వాడనాటేకె యోగ్యుల్‍కరి దేవ్నుబాreమా చునాయ్‍రాక్యహుయీన్‍, అద్మియేనా ఖుషీకరవాలా నార్హహీన్‍, దిల్నా పరీక్చాకరతే దేవ్నాస్‍ ఖుషీ కరవాలహుయిన్‍ బోధించుకరియేస్‍. తుమ్నా మాలంఛ్చాతిమ్‍ హమే పాల్తువాత్నాతోబి, ధవ్లత్నాలోభితరా లపాఢిరాఖను పెరాహొఃనాతోబి, కెదేబి వాఢ్యకొయిని; అనా దేవస్‍ సాబుత్‍. బుజు హమే1 సమర్థుల్‍ ర్హయ్యాతోబి, తుమరేతిహో, పార్లేవ్‍తిహొ, అద్మియేతి హువతె మహాన్నా హమే కోకర్యాని. హమే క్రీస్తునూ అపొస్తల్‍హుయీన్‍ హుయితో ప్హైదాకరతే ఆయా ఇనూ సొంత లఢ్కావ్నా, లఢ్కవ్‍నా హఃమ్జావతె తిమ్‍, హమే తుమార ఇచ్మా సిష్యుల్‍ హుయిన్‍ ఛియ్యే. తుమె హమ్నా ఘను లాఢ్‍వాలాహుయిన్‍ థా. అనటేకే తుమారమా విసేషాపేక్చావాలహుయిన్‍ దేవ్ను సువార్త యోస్‍ కాహేతిమ్‍ హమారు జాన్‍నాబి తుమ్నా దేవనాటేకె తయార్‍హుయీన్‍ థా. ఓహొ భైయ్యే హమారు ప్రయాసనబీ, మిన్హత్‍బి తుమ్నా హఃయాల్‍ ఛాని కాహేనా. హమే తుమారమా కినాహుయ్తోబి భోజొ నార్హానుకరీ రాత్‍ధన్నాక్కూ మిన్హత్‍ కరీన్‍ జీవ్ను కర్తహుయిన్‍ తుమ్నా దేవ్ను సువార్త ప్రచార్‍కర్య థా.
హమే విష్వాస్‍హుయాతె తుమార హాఃమె కెత్రేకి పవిత్రంతీనితరా, నీతినితరా, నిందకొయినీతిమ్‍ చాల్యకీ ఇనా తుమేస్ సాబుత్‍. దేవ్బి సాబుత్‍. భా ఇను లఢ్కావ్తి చాలుకరతె తిమ్‍ తుమారమా హర్యేక్‍ జణనాకనా హమే చాల్యాకరీ తుమ్నా మాలంహుసె. ఇనా రాజ్యమ్‍నాబి మహిమానబి తుమ్న బులాంకరాతె దేవ్నాబి బోలతిమ్ తుమె చాల్నుకరి హామె తుమారమా హర్యేక్‍జణనా గుర్కాంకరూస్‍, హిమ్మత్‍ కర్తాహుయీన్‍ సాక్చ్యమ్ దేతాహుయీన్‍,
ఆ కారణ్‍తీ, తుమే దేవ్ను బారెమ వర్తమాన్ వాక్యంనా హమారటేకె ఒప్పిలిదాతెదె, అద్మియేను వాక్యమ్‍కరి నొకొసోచొతిమ్‍ యో హాఃఛి ఛాకరీ దేవ్ను వాక్యమ్‍కరయ ఇనా ఒప్పిరాక్యస్‍. యోవాక్యమస్‍ విష్వాస్‍సుల్‍ హుయతె తుమారమా కామ్‍కర్తూ ర్హంకరస్‍. అనహాఃజె హమేబి నాబుల్నూతిమ్‍ దేవ్న కృతజ్ఞతాస్తుతుల్‍ ఫేడుకరుయేస్‍. హో భ్హేనె, భైయ్యే తుమే యూదయమా బారేమ అనుభవించతె తెజాత్నూ మినఃత‍స్‍ తుమారు ఖుద్నుదేఖ్‍ క్రీస్తుయేసుమా ఛాతే దేవ్ను సంఘాల్నానితరా చాలతే ఇవ్నిగోని హుయిరాస్‍ ఇవ్నే యూదుల్నా భరించుతె మిన్హతస్‍ తుమేబి తుమారు హుఃద్ను దేహ్క్ వాలవ్‍తీస్‍ అనుభవించతా. యోయూదుల్‍ ఇవ్ను పాపల్నా కెదేబి సంపూర్తి కరనాటేకె ప్రభు హుయోతె యేసునా, ప్రవక్తల్నా మర్రాఖిదీన్‍ హమ్నా హింసకరీన్‍, యూదుల్‍ కాహెతెవాలబి బఛ్చిజావనాటేకె ఇవ్నేతి హమే వాత్‍ నాబోల్నుతిమ్‍ హమ్న ఆటకంకర్తూ, దేవ్న ఇష్టంకొయింతె ఇవ్నెబి అద్మియే హాఃరనాబి విరోధుల్‍హుయీన్‍ ఛా. దేవ్ను ఖీజ్‍ ఆఖరినా ఇవ్నఫర్‍ ఆయూ.
పౌల్‍ ఇవ్న దేక్నుకరి అజేక్‍ చోట్‍ ఆవనా ఆహ్క్
భైయ్యే హమే ఆంగ్తాన్‍నా బట్టీన్‍ థోడధన్‍ తుమ్న బెందీన్‍ దూర్‍ ర్హయతోబి, దిల్నా బట్టీన్‍ తుమార ఖందెర్హైయిన్‍, ఘను ఆహ్‍ఃతి తుమారు మ్హోడు దేక్నుకరి బుజు జాహఃత్‍ కోషిస్‍ కర్యా థా. అనటేకె హమే తుమారకనా ఆవ్నుకరి థా పౌల్‍కరి మే కెత్రూకి ఛోట్‍ ఆవ్నుకరి థొ. పన్కి సైతాన్‍ హమ్నా ఆటంకం కర్యుతూ. కింకతో హమారు నిరీక్చణా హుయితోబి, ఖుషిమాహో అతిషయకిరీటం హుయుతె క్యా? అప్నొ ప్రభుహుయోతె యేసును ఆవనూ వహఃత్మా ఇనా హాఃమేస్‍ తుమేస్ కాహెనా? ఖచ్చితనంగా తుమేస్ హమారు మహిమబీ ఖుషిహుయీన్‍ ఛా.
Source notes (1)
- Footnote క్రీస్తునూ అపోస్తుల్‍హుయీన్‍ ఛియ్యేకరీ అధికార్‍ కరనాటేకె
పవిత్ర్ బైబిల్‍. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.