పవిత్ర్ బైబిల్‍
1పేతు 4
బద్లిగుతె జీవ్ను
క్రీస్తు ఆంగ్తాన్‍తీ మిన్హత్ పడ్యో పన్కి, తుమేబి ఎజాత్ను దిల్నావాల హుయీన్‍ ర్హవొ. సానకతో ఆంగ్తాన్‍ను విషయంమా మిన్హత్ కరవాలో ఇవ్నమా పాప్‍ ర్హాసెకొయిని. హంకేతు జమీన్‍ ఫర్‍ అద్మీయేను ఆహ్‍ః తీర్చలేవొ నొకొతిమ్‍ దేవ్ను ఇష్టంతి జీవించో. అప్నె పోకిరినుకామ్‍, దురాహ్‍ః, దారు పియ్యాను, అల్లరితి కర్తు ఖేలను గీదె, పీయవాలాను విందుమా, కరకొయినంతె మూర్తినుపూజా, కేత్రూకి చాల్తూహుయీన్‍, అన్యజనాభో ఇష్టమ్నా నెరవేర్నాటేకె హుయుగుతె ధన్‍ భైయిస్. మితంకోయింతె ఆ హఃరాబ్‍పారమ్ ఇవ్నాకేడె తుమె మిలాయిన్‍ నాజావమా ఇవ్నె అష్యంహోతూ తుమ్నాబి గాలయ్‍ దిదా. హుయుతో జివ్తొవునబీ మరిగుతేఇవ్నబి న్యావ్‍ తీర్చనటేకె సిద్ధంగా ఛాతేదేవ్నా లెక్కబోలవాల హుయిరాస్‍. ఆ కారణంతి మరిగుతె ఆంగ్తాన్‍ విషయమ్‍మా అద్మినురీత్య న్యావ్‍ లీస్ ఆత్మవిషయమ్‍మా దేవ్నుబట్టి జింకొరాతె ఇవ్నేబి సువార్త ప్రకటించబడ్యూ.
దేవ్ను బహుమానంటేకె అఛ్చు కామ్‍ కరవాలు
హుయుతె హాఃరు హాఃతమ్‍ హాఃదె ఆయుత్రు పన్కి తుమే సిద్ధిపడిన్‍ స్వస్థ‍దిమాక్‍ వాలహుయిన్‍ ర్హావో, తెదే ప్రార్ధనా కర్సు. ఫ్యార్‍ కెత్రుకి పాప్‍నా మూచే పన్కి హాఃరుమా తూబి ముఖ్యమ్‍ ఏక్నా పార్‍ ఏక్ ఘాణు ఫ్యార్‍తి ర్హాను. భణకను కొయింతిమ్‍ ఏక్నాఏక్‍ ఆతిథ్యమ్‍ కరొ. దేవ్నా కేత్రువిధమ్‍గా కృపను విషయమ్‍హుయిన్‍ అష్యల్‍తి ఘేర్‍ బందనా నిర్వవాకుల్ ర్హవొ, ఏక్నాఏక్‍ కృపవరం పొందతిమ్ ఏక్నాఏక్‍ ఉపచారామ్‍ కరో. ఏక్జను బోధించొతొ దేవోక్తుల్నా బోధించొతిమ్‍ బోధించును; ఏక్జను ఉపచారమ్ కరితొ దేవ్ దిదోతె హాఃఖతేనాలిన్‍ కార్నూ, అనాటేకె దేవ్ హాఃరామా యేసుక్రీస్తు తిస్ మహిమాపరచబడ్సే, పిడిపిడినా మహిమాబి ప్రభావమ్‍ ఇనాస్‍ హుసె, ఆమేన్‍.
క్రీస్తునితరా మిన్హత్ పఢను
లాఢ్‍హుయతెవాలా, తుమ్నా సోధానకారానటేకె తుమేనా హుస్‍తె ఆగ్‍తారా మొట్టుష్రమను గుర్చి తూనాసాత్‍కి ఏక్ వింత హుస్ ఆష్చర్యపడొనొకొ. క్రీస్తు మహిమా మాలంకార్‍లిదుతో తుమే ఘానునందమ్‍తి ఖుషితి నిమిత్తమ్, క్రీస్తు స్రమమాతూ తూమేబి భాగ్‍వాలాహుసు ఖుషితి రావో. క్రీస్తు నామ్‍మా నిమిత్తమ్ తూమేబి గాలైపడ్యాతో మహిమాస్వరూపిహుయోతె ఆత్మ, అనగా దేవ్ను అత్మ, తుమారాపార్‍ రాస్ పాన్కి తూమే ధన్యులు. తూమారామా కోన్బి నరహంతకుడు పాన్కి, చోర్‍తారా పాన్కి, దుర్మార్గుల్‍ పాన్కి, అలాదుఅద్మినాజోలినా జావాలొ పాన్కి బాధ అనుభవింపా హుస్‍కొయిని, కోన్బి క్ర్తెస్తవుడ్తెనా బాధ అనుభవించితొ యో సార్‍మ్‍కొయితిమ్‍, ఆ నామ్‍ బట్టిని దేవ్ను మహిమాకార్‍నూ.
న్యావ్‍ దేవ్ను సొంత అద్మీయేకంతు సురుహుస్ కాలమ్ ఆయిహుస్; యో అప్నాకంతుస్ సురుహుయుతో దేవ్ను సువార్తనా అవియధేయుహుస్‍తె ఇవ్నే గతి సాత్‍హుస్‍కి? అజు
నీతిమంతుడూస్‍ బఛ్చిజావను కష్టంహుయుతో,
భక్తికొయింతెవాళొబి, పాపిబి సాత్‍హుయిజాసె?
అనటేకె దేవ్నా చిత్తప్రకారమ్‍ బాధపడావాల అష్యల్ కరవాలహుయిన్‍ నమ్మకమ్ హుయోతే సృష్టకర్తనా ఇనాయోస్‍ అప్పగించిలెనో.
పవిత్ర్ బైబిల్‍. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.