పవిత్ర్ బైబిల్‍
1కొరింథీ 3
దేవ్ను సేవకుల్‍
భైయ్యె, భేనె ఆత్మసంబంధంహుయ్తె అద్మియేతి వాతె బోలతిమ్‍ మే తుమారేతి వాతెబోలన కోహుయూని. ఆంగ్తాన్‍ సంబందహుయుతె అద్మిస్‍కరి, క్రీస్తుకన అఢ్డాని లడ్కనితరా, కరి తుమారేతి వాతె బోలంతరహుయు. తెదెమా తుమ్నా కువ్వత్‍ నాపూరిజావమా దూధ్‍తీస్‍ తుమ్నా పాల్యొ పన్కి, ఖానుతి తుమ్నా పాల్యొకొయిని. తుమె హంకెబీ ఆంగ్ను సంబంధంహుయిన్‍ రవ్వానబారెమా హంకెబీ తుమె కంజోర్‍హుయిన్‍ ఛా కాహేనా? తుమారమా ఖీజ్‍బి జగఢాబి రవ్వమా తుమె ఆంగ్తాన్‍ను సంబంధంహుయూతె అద్మినుజోడ్మా ఛాలవాల కాహెనా? ఏక్జనొ “మే పౌల్‍వాలొ” కరి, బుజేక్జనొ “మే అపొల్లోవాలో” కరి బోల్యాతెదె తుమె ప్రకృతి సంబంధహుయు అద్మియే కాహెనా?
అపొల్లో కోన్‍? పౌల్‍ కోన్‍? ప్రచార్‍కరవాలస్‍ కాహెనా? ఏక్‍యేక్‍ జనణా ప్రభు దీరాక్యొతె ప్రకార్‍ ఇవ్నా బన్తీ తుమె విష్వాస్‍ కర్యథా. మే గాఢ్యొతొ, అపొల్లో పాని నాక్యు, భడాయోతె దేవస్‍. అనటేకె బఢావాళో, దేవ్‍మస్‍ పన్కి, గాఢవాలమాతోబి పానినాఖవాలమాతోబి కాయ్‍బికొయిని ఇవ్నె ఎక్కస్‍. హర్యేక్‍ జనూ యో కర్యొతె కామ్‍ పట్టీన్‍ జీతంనా లీలేస్‍. హమే దేవ్ను జోడ్మా కామ్‍కరవాలహుయీన్‍ ఛియ్యే తుమె దేవ్ను ఖేతర్‍వాడనబీ దేవ్ను ఘర్‍హుయిన్‍ ఛా.
దేవ్‍ మన దీరాక్యొతె కృపచొప్పన మే నేర్పరిహుయితె షిల్పకారుల్‍ఘోని బేస్‍1నా నాక్యొథొ, బుజేక్‍జనో ఇనప్పర్‍ బాందుకరస్‍. హర్యేక్‍జను ఇనఫర్‍ కింమ్‍ బాందుకరస్కి జాతన్తి దేఖిలేను.
నాక్యురాక్యుతె తప్ప, జుజేక్‍ బేస్నా కోన్బి నాక్చెకొయిని ఆ పునాది యేసుక్రీస్తుస్‍. కోన్బి ఆ బేస్‍నుప్పర్‍ ఘేణు, రూపు, మోల్ను ఫత్రా, గుంజా, గాహ్ః, ఖూకైయియుతే గాహ్ః, థోడుబోత్‍తి బాంద్యతొ, ఇవ్ను ఇవ్నూ కామ్‍ దెక్కావ్‍సే, యోధన్‍ యో హాఃరు తేటపర్చే, యో ఆగ్తీ బాధర్‍పడిజాసే, బుజు ఇను ఇనూ కామ్‍ బట్టీన్‍ ఆగాస్‍ పరీక్చకర్సె. బేస్నా ఉప్పర్‍ ఏక్జను బాంద్యొతె కామ్‍ ఉబ్రిగుతో యో జీతంనా లీలిసె. ఏక్ను కామ్‍ బల్లాక్యుతో తెదె ఇన నష్టమ్‍ హుసె ఇను ఇనతోడి బచ్చిజాసె పన్కి ఆగ్మతూ చుక్కాయిగయోతిమ్‍ బచ్చిజాసె.
తుమె దేవ్ని ఆలయంహుయిన్‍ ఛా కరి, దేవ్ను ఆత్మ తుమారమా జింకరస్‍కరి తుమె మాలంకరకొయిన్నా? కోన్బి దేవ్ను ఆలయంనా ఖర్రాబ్‍ కర్యతొ దేవ్‍ ఇన ఖర్రాబ్‍ కర్సె. దేవ్ను ఆలయమ్‍ పరిసుద్ధహుయిన్‍ ఛా; తుమె యో ఆలయంహుయిన్‍ ఛా.
కోన్బి ఇనూయోస్‍ మోసం నా కర్లేను. తుమారమ కోన్బి ఆ ములక్‍ఫర్‍ యో జ్ఞానికరి రైగుతో, జ్ఞాని హువతిమ్‍ ఫాగల్‍వాలొ హోను. ఆ ములక్‍ను జ్ఞానం దేవ్ను డోళమా ఫాగలస్‍. జ్ఞానుల్ను ఇవ్ను కుయుక్తిమా యో దర్లిసె బుజు జ్ఞానుల్ను హఃయలే ఫాల్తుస్‍కరి ప్రభువ్న మాలంహువస్‍కరి లిఖ్కాయిన్‍ ఛా. అనటేకె కోన్బి అద్మియేనా హాఃమె బడ్డాయ్‍నామార్ను; సమస్తమ్‍ను హాఃరు తుమారూస్‍. పౌల్‍హుయోతోబి, అపొల్లోహుయోతోబి, కేఫాహుయోతోబి, ములక్‍ను హుయోతోబి, జాన్‍హుయ్‍తోబి, మరణ్‍హుయ్‍తోబి, హంకెఛాతె హుయుతోబి, అగాఢిఛాతె హుయుతోబి, ఆవ్సెతెహుయుతోబి సమస్తమ్‍హాఃరు తుమారూస్‍. తుమె క్రీస్తువాల, క్రీస్తు దేవ్నొ వాలొ.
Source notes (1)
- Footnote పౌల్‍ కొరింథీమా సేవా సురుకర్యొ, ఇనె నాఖ్యొతె బేస్‍ఫర్‍ అలాద్‍నా బాంద్యొ. యో పునాది క్రీస్తు.
పవిత్ర్ బైబిల్‍. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.