Vagiri Vathe Bible
ఆది 5
ఆదామ్‌ను జాత్‍
(1దిన 1:1-4)
ఆదామ్‍ జాత్‍ గ్రంథమ్‍ ఆస్. దేవ్‍ ఆదామ్‍నా బణాయోతె ధన్‍ దేవ్‍ ఇను జోడ్నుతర ఇనా కర్యో; మరద్మానోతరా రాంఢ్‍తరా ఇవ్నా బణాయిన్‍ ఇవ్నే బణాయోతె ధన్నా ఇవ్నా ఆదించిన్‍ ఇవ్నా అద్మియే కరి నామ్‍ మ్హేంద్యొ. ఆదామ్‍ ఏక్ హొః ఢోడీహ్ః వరహ్ః జీయ్యో ఇను జోడ్నుతరా ఇను ఛియ్యాన ఫైదాకరీన్‍ ఇనా షేతుకరి నామ్‍ మ్హేంద్యొ. షేతునా ఫైదాకరనా బాద్మా ఆదామ్‍ జియ్యోతె ధన్నే ఆఠ్‍ హోః వరహ్ః, ఇనె ఛియ్యవ్నా ఛోరియేనా ఫైదాకర్యొ. ఆదామ్‍ జీయోతే ధన్‍ హాఃరు నౌహోః ఢోడిహ్ః వరహ్ః, తెదే యో మరిగో. షేతు ఏక్ హోః పాఛ్‍ వరహ్ః జివీన్‍ ఎనోషున్‍ ఫైదాకర్యొ. ఎనోషున్‍ ఫైదాహువనా బద్మా షేతు ఆఠ్‍హొః వరహ్ః జివీన్‍ ఛియ్యావ్నా ఛోరియేనా ఫైదాకర్యొ. షేతు జివ్యోతె ధన్‍ హాఃరాబి నౌహోః భార వరహ్ః; తెదెయో మరిగొ. ఎనోషు హాఃడ్చారీహ్ః వరహ్ః జీవిన్‍. కేయినాన్‍ జాణ్‍యో. కేయినా జాణ్యుతె బద్మా ఎనోషు ఆఠ్‍హోః పంద్రా వరహ్ః జివీన్‍ ఛియ్యావ్నా ఛోరియేనా ఫైదాకర్యొ. ఎనోషు ధన్‍ హాఃరు నౌహొః పాఛ్‍ వరహ్ః; తెదె యో మరిగొ. కేయిననా హాఃడ్తీన్‍ యీహ్‍ః జివీన్‍ మహలలేలునా ఫైదాకర్యొ. మహలలేలునా ఫైదాకరనా బాద్మా కేయినాను ఆఠ్‍హోః చాలిహ్ః వరహ్ః జివీన్‍ ఛియ్యావ్నా ఛోరియేనా ఫైదాకర్యొ. కేయినానా ధన్‍ హాఃరు నౌహొః ధహ్ః వరహ్ః, తెదె యో మరిగొ. మహలలేల్‍ చాచుఫర్‍ తీనిహ్ః వరహ్ః జివీన్‍ యెరెదునా ఫైదాకర్యొ. యెరెదునా ఫైదాకర్యొ బాద్మా మహలలేల్‍ ఆఠ్‍హోః డోఢీక్‍ వరహ్ః జివీన్‍ ఛియ్యావ్నా ఛోరియేన ఫైదాకర్యొ. మహలలేల్‍ ధన్‍ హాఃరు ఆఠ్‍హోః పాచుఫర్‍ హఃడ్చారీహ్ః వరహ్ః తెదె యో మరిగో. యెరెదు ధన్‍ హాఃరు ఏక్ హొః బేఫర్‍ తీనిహ్ః వరహ్ః జివీన్‍ హనోకునా ఫైదాకర్యొ. హనోకునా ఫైదాకర్యొతె బాద్మా యెరెదు ఆఠ్‍ హోః వరహ్ః జీవిన్‍ ఛియ్యావ్నా ఛోరియేన ఫైదాకర్యొ. యెరెదు ధన్‍ హాఃరు నౌ హొః బేఫర్‍ తీనిహ్ః వరహ్ః, తెదె యో మరిగొ. హనోక్‍ పాచుఫర్‍ తీనిహ్ః వరహ్ః జీవిన్‍ మెతూషెలనా ఫైదాకర్యొ. హనోక్‍ మెతూషెలనా ఫైదాకర్యొ బాద్మా తీన్‍ హోః వరహ్ః దేవ్మా ర్హయీన్‍. ఛియ్యావ్నా ఛోరియేన ఫైదాకర్యొ. హనోక్ను ధన్‍ హాఃరు తీన్‍ హొః పాచుఫర్‍ తీనిహ్ః వరహ్ః. హనోక్‍ దేవ్మా చాలిన్‍, బాద్మా దేవ్‍ ఇనా లీన్గయో పన్కి యో దెఖ్కాయోకొయిని. మెతూషెల్ ఏక్ హోః హాఃతుఫర్‍ చారీహ్ః వరహ్ః జీవిన్‍ లెమెకునా ఫైదాకర్యొ. మెతూషెల్ లెమెకునా ఫైదాకర్యొతె బాద్మా హాఃత్‍ హొః బేఫర్‍ ఛారీహ్‍ః వరహ్ః జీవిన్‍ ఛియ్యానా ఛోరియేన ఫైదాకర్యొ. మెతూషెల ధన్‍ హాఃరు నౌ హోః ఏకమ్‍ హఃడ్‍ తీనిహ్ః వరహ్ః, తెదె యో మరిగొ. లెమెకు ఏక్ హోః బేఫర్‍ చారీహ్ః వరహ్ః జీవిన్‍ ఏక్ ఛియ్యాన ఫైదాకర్యొ. జమీన్నా యెహోవా షపించనా బారెమా హుయూతె అప్ను హాత్ను మీన్హత్ను విషయంమా అప్ను కామ్ను విషయంమాబి అనె అప్నా ఆరామ్ కరీన్‍ ఇనా నోవహు కరి నామ్‍ మ్హేంద్యొ. లెమెకు నోవహుక్‍ ఫైదాకర్యొతె బాద్మా పాచ్ హొః పాచుఫర్‍ హఃడ్చారీహ్ః వరహ్ః జీవిన్‍ ఛియ్యానా ఛోరియేనా ఫైదాకర్యొ. లెమెకు ధన్‍ హాఃరు హాఃత్‍ హొః హాఃత్తుఫర్‍ హఃడ్తీనీహ్ః వరహ్ః, తెదె యో మరిగొ. నోవహు పాచ్ హొః వరహ్ః వాలొహుయీన్‍ షేమునా యాపెతునా ఫైదాకర్యొ.
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.