Vagiri Vathe Bible
ఆది 2
ఆకాష్యే, ధర్తి ఇన్మా ఛాతే హాఃరుబి ముక్చయ్దిన్ కర్యో. దేవ్ యో కర్యోతె ఇను కామ్ హాఃత్మాను ధన్తోడి ముక్చయ్దిన్ కరిన్, యో కర్యోతె ఇను హాఃరుకామ్ మాతు హాఃత్మాను రోజ్ ఆరమ్ లీదొ. అనటేకె దేవ్ యో హాఃత్మాను ధన్ ఆషీర్వదించిన్ పరిషుద్ధం కర్యో; కింకతో ఇన్మా దేవ్ యో కర్యోతే హాఃరు, బణయోతే హాఃరు ఇను కామ్ హాఃరమాతు ఆరమ్ కర్యో.
ఏదేను బాగ్
దేవ్హుయుతే యెహోవా జమిన్ ఆకాష్నా కర్యోతె ధన్ జమిన్ ఆకాష్నా కర్యొతె ధన్నే ధర్తి ఆకాష్ బణయో తేదె ఇనుఇను సృష్టిను తారిక ఆస్. జమిన్ పర్ ఇనఅగాడి బదర్ కేవు ఢాగ్ కోయిని, కెవు ఝాడు ఉట్ట్యు కోయిని. సానకాతో దేవ్ హుయుతే యెహోవా జమిన్ పర్ పాణి వార్ఖాయోకోయిని, జమీన్ ఖేతార్ వాడికరన కేవు అద్మి కోయిని. హుయుతో బఫరో జమీన్ పర్ ఉట్టిన్ జమిన్ హాఃరన బిజయూ. దేవ్హుయుతే యెహోవా మాట్టితి అద్మినా బణాయిన్ ఇను నాక్మా జాన్ను వాయ్రో పూఖమా అద్మి జాన్వాలో హుయో. దేవ్హుయోతే యెహోవా ఓంద్యే బణే ఏదెనుమా ఏక్ బాగ్ నాఖిన్ యో బణాయోతే అద్మినా ఇన్మా ర్హాకో. అజు దేవ్హుయోతే యెహోవా డోలమా కుప్సురత్తర, ఖావన అష్యాల్కరి హార్యేక్ ఝాడున ఎజ్గా జమిన్మా మాతు పుట్టాడ్యో. అజు యో బాగ్ను ఇచ్మా జీవను ఝాడున, కేవు అష్యాల్, కేవు హాఃరబ్ మాలంకరవతే ఝాడనబి జమీన్ మాతు పూట్టాడ్యో. అజు యో బాగ్మా బిజవానటేకె ఏదెను మాతు ఏక్ నది ఎజ్గాతూ ఫాట్టిన్ ఛార్ భాగ్హుయు. అగాఢిను నామ్ పీషోను; యో హవీలా దేహ్ః హాఃరు బజు చాలుకురాస్; ఎజ్గా ఘేణు ఛా. యో దేహ్ః ఘేణు అష్యాల్ను; ఎజ్గా గూగల్ మోతీ మలాస్. బేమ్మాను నది నామ్ గీహోను; యో కూషు1 దేహ్ః హాఃరు బజు చాలుకురాస్. తీన్మాను నది నామ్ హిద్దెకెల్; యో అష్షూర్ ఓంద్యే బణే చాలుకురాస్. ఛార్మాను నది యూఫ్రటీసు అజు దేవ్హుయుతే యెహోవా అద్మినా లిన్ ఏదెను బాగ్మా కావ్లి ఖాహాఃనటేకె, ఖేతార్ వాడి కరన ఇన్మా రాక్యో. అజు దేవ్హుయుతే యెహోవా ఆ బాగ్మా ఛాతే హార్యేక్ ఝాడను పండనా థూ ఖావజాయ్; హుయుతో, అష్యాల్ ఖారబ్ అక్కల్ దేయితే ఝాడ్ను పంఢా నాఖాను కరి; థూ ఇనా ఖాదోతే ధనేస్ హాఃచ్చిస్ మరిజాస్ కరి అద్మినా అజ్ఞానదిదో. అజు దేవ్హుయుతో యెహోవా అద్మి ఏకేలు రవ్వాను అష్యల్ కాహే కరి; ఇనా బొరబర్హుయుతే జోడున ఇనాటేకె కర్నుకరి ర్హహిగో. దేవ్హుయోతే యెహోవా హార్యేక్ జమీన్ జాన్వార్నా హార్యేక్ ఆకాష్ను జిన్వార్న జమీన్మాతు బణాయిన్, ఆదామ్ ఇనా కేవు నామ్ మేందనాటేకె ఇనాకన ఇవ్నా బోలయిన్. జాన్ ఛాతే హార్యేక్నా ఆదామ్ కేవు నామ్ మేంద్యోకి యోస్ నామ్ ఇన హుయు. తేదె ఆదామ్ హాఃరు దాంఢోవ్నా ఆకాష్ను జీన్వార్ హాఃరు జమీన్ జాన్వార్నా నామ్ మేంద్యో. హుయుతొబి ఆదామ్నా బొరబర్హుయుతే జోఢు ఇనా కోయిన్తింహుయు. తేదె దేవ్హుయోతే యెహోవా ఆదామ్నా అష్యాల్నునిందర్ లయిన్ యో నిందర్ లెంకోరతేదె ఇను బగల్ను హాడ్క్యుతి ఎక్నా కాడిన్ యోజోగొ బోటితి ముచిన్హాకినాదో. ఇనబద్మా దేవ్హుయోతే యెహొవా యో ఆదామ్ మాతు కాడ్యోతే బగల్ను హాడ్క్యుతి బాయికోన బణాయో ఇనా ఆదామ్ కన లీన్ ఆయో. తేదె ఆదామ్ అంబోల్యో మారు హాడ్క్యుమా ఏక్ హాడ్క్యు మారు బోటిమా బోటి ఆ బావ్రిమాతు కర్యోకరి అనటేకె బావణ్ బోలవ్షె. అనటేకె మర్దమనో ఇను భాన ఇను ఆయా మేందిన్ ఇను బాయికొతి హాఃదే కర్లిషే; ఇవ్నే ఏక్ ఆంగ్తాన్ హుయున్ హుసే. తెదె ఆదామ్ ఇని బావణ్ బేజనా ఉగాఢ థా; హుయుతో ఇవ్నే షరమ్ మాలంకోయినితిమ్ థా.
Source notes (1)
- Footnote మేసపటోమియా అజు హేత్యోపియా
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.