Vagiri Vathe Bible
ఆది 17
సున్నతి కరి నిబంధన హాఃనద్
అబ్రామ్నా హాఃడ్చారీహ్ః ఫర్ నౌవ్ వరహ్ః యెహోవా ఇనా దేఖాయిన్ “మే హాఃరు తాహాఃత్ ఛాత్ దేవ్. మార హాఃమే పర్తో నిందకొయినితిం రా. తేదె మన తూన ఇచ్మా ఛాతే నిబంధన్నా మే ఉబ్రార్హాకిస్. తారు ఖాందన్ ఘాను కరిస్” కరి బోల్యో. అబ్రామ్ హాఃలమ్ కరమా ఇను మోడునా జమీన్ ఫర్ జుకాయిన్ థో, దేవ్ అజు అమ్ బోల్యో. “ దేక్, మే తారేతి నిబంధన కర్యో. తూ కెత్రుకి జాతుల్నా మూలనో భా హుయిస్. హాంకేతు తారు నామ్ అబ్రామ్ కాహే. తూన కెత్రుకి జాతుల్నా భా తార నియమించుకురుస్ అనటేకె హాంకేతు తారు నామ్ అబ్రాహామ్1 హుస్. తున ఘాణు భడ్డాయిస్. తారు సంతానమ్ కెత్రుకి జాత్ హువనితార కరిస్. తారు సంతానంమా రాజా ఆవ్సే. మే తూన తారు బాద్మా తారు సంతానంనా దేవ్తరా ర్హావనుతిమ్, మన తున ఇచ్మాతె, తారు బాద్మా ఇవ్ను పీడిమా తారు సంతానంనా ఇచ్మాతే మారు నిబంధననా ఉబ్బర్ ర్హాకిస్. యో కేదెబి నిబంధనతార ర్హాస్. తున తారు బద్మా తారు సంతానంనా హాంకే తూ పరదేసితార ఛాతే జమీనా, కాతో కనాన దేహ్ః హాఃరు దిస్. ఇనా కేదెబి ఆస్తితర దిన్ ఇవ్నా దేవ్తార ర్హాహిస్.” దేవ్ అజు అబ్రాహామ్తి అమ్ బోల్యో. “తారు తోడి తూ మారు నిబంధన పాటించ్. తుస్ కాహే, తారు బాద్మా తారు సంతానమ్ ఇవ్ను పీడిపిడినా మారు నిబంధనమా ఛాల్ను. మన తున ఇచ్మాతే , తారు బద్మా తారు సంతానమ్నా ఇచ్మా ఛాతే నిబంధన ఆస్. తుమరమా హార్యేక్ మర్దమాన సున్నతినా పాటించును. కాతొ తుమే తుమరు హాఃతాల్ను ఉపార్ ఛాంబ్డు కత్రాను. యో మన తుమ్నా ఇచ్మా ఛాతే నిబంధన్నా హాఃనద్తార ర్హాసే. తారు జానభో పిడీ హాఃరజణ మర్దామన అఠ్మాను ధనే సున్నతి కర్ను. యో తారు ఘెర్మా ఫైద్దాయోతే ఇవ్నా, తారు సంతానమ్ కాహేతిమ్ తుమే మోల్ దిన్ కేవు అలాదు దేహ్ఃవాళు హుయుతె ఇనాకన లీలా ఇవ్నా ఛెల్సే. తారు ఘెర్మా ఫైద్దాయోతే ఇవ్నా, తుమే మోల్ మేందిన్ లిదాతే ఇవ్నా జారురి సున్నాతి కర్ను. ఇంనితరా మారు నిబంధననా తుమరు అంగ్తానమా కేదెబి ర్హాయితె నిబంధనతరా ర్హాసే. సున్నతి పొందకొయిన్తే మర్దమనో, కతో కిను హాఃతాల్ను ఉపార్ ఛాంబ్డు సున్నతి హుయుకొయినికి ఇనా జాత్మాతు బాదర్ మోక్లిదేను. యో మారు నిబంధననా కర్యోకొయిని అనటెకె దేవ్ అబ్రాహామ్తి అమ్ బోల్యో.” “తారి బావణ్ హుయుతే సారయినా హాంకేతు సారయి కరి బోలవ్నోకో. హాంకేతు ఇను నామ్ సారా2 మే ఇనా ఆషీర్వదించిన్, ఇను బణేతు తూన ఛీయ్యాన దిస్. యో కేత్రుకి జాత్నా ఆయా హుస్. యో కంతు కేత్రుకి జాత్ను రాజా ఆవ్సే.” తెదే అబ్రాహామ్ ఇను మౌఢాన జమీనా జోకాయిన్ ఇను దిల్మా అహ్ఃలిన్ “ఎక్ ఆద్మినా హోః వరహ్ఃమా లడ్డాక పేద్దావ్సేనా? హాఃడ్ ఛారీహ్ః వరహ్ః సారా లడ్డాక్ అవ్నా జాన్సేనా?” కరి దిల్మా ర్హాహిగో. అబ్రాహామ్ “ఇష్మాయేల్నా అష్యాల్ దేక్యాతో బయిస్ యోస్ మన దాహ్ః హాజార్” కరి దేవ్తి బోల్యో. తెదే దేవ్ అమ్ బోల్యో. “ఇమ్ కాహే. తారి బావణ్ హుయితే సారా కచ్చితంతి తునా ఛియ్యో జాన్సే. ఇనా థూ ఇస్సాక్ కరి నామ్ మేందిస్. ఇనేతి మారు నిబంధననా గట్ట్ కరిస్. ఇనా బద్మా ఇనా వారసుల్ హాఃరన్నా యో కెదేబిహుయుతే నిబంధన్నా ర్హాస్. ఇష్మాయేల్ గూర్చి థూ కర్యోతె ప్రార్థన మే హాఃజో. దేఖ్, మే ఇనా ఆసీర్వదించిస్. ఇను సంతానంనా ఘాణు కరిస్. యో ఘాణు భడ్డాయిస్. యో భార జాత్ రాజనా మూల మర్దమానో హుస్. ఇనా ఏక్ మోటు జాత్తరా కరిస్. అజు అవ్సేతే వరహ్ః ఆ వహాఃత్ సారాన తూన ఫైద్దావ్సేతె ఇస్సాక్తి మారు నిబంధననా స్థిరపరిచిస్.” అబ్రాహామ్తి వాత్ బోలను హాఃతంహుయు బాద్మా దేవ్ ఇనా కంతు ఉపార్ ఛాలిగో. తెదే అబ్రాహామ్ యోస్ ధన్ ఇనా ఛియ్యా ఇష్మాయేల్నా, ఇను ఘేర్మా ఫైద్దాయేతె ఇవ్నా హాఃరవ్నా, ఇమాస్ యో మోల్ దిన్ లిదోతే హాఃరవ్నా ఇను ఘెర్మా హార్యేక్ మర్దామాన లీలిన్ హాఃరవ్నా ఇవ్నా హాఃతాల్ను ఉపార్ ఛాంబ్డు సున్నతి కర్యో. అబ్రాహామ్ హాఃతాల్ను ఉపార్ ఛాంబ్డు సున్నతి హుయుతెదే ఇనా హాఃడ్ చారీహ్ః ఫర్ నౌవ్ వరహ్ః. ఇనా ఛియ్యా ఇష్మాయేల్ సున్నతి హుయుతెదే ఇనా తేర వరహ్ః. అబ్రాహామ్ ఇను ఛియ్యో ఇష్మాయేల్ ఎక్కస్ ధన్నే సున్నతి పొంద్యా. ఇను ఘెర్మా ఫైదాహుయుతే ఇవ్నే, బాదర్ దేహ్ఃవాల కన మోల్ దీన్ లీలిదొ ఇవ్నే, అజు ఇనా ఘెర్మా మరద్మానా హాఃర సున్నతి పొంద్యా.
Source notes (2)
- Footnote అబ్రాహామ్ కతో కెత్రుకి జాత్న భా కరి అర్థమ్
- Footnote సారా కతో కెత్రుకి జాత్న రాణి కరి అర్థమ్
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.