Vagiri Vathe Bible
అపొ 6
హాఃత్‍ అద్మి మద్దత్‍ కరవాలు
యో ధన్నువ్‍మా సిష్యుల్‍నూ గల్లో భడ్తుజోంగ్రతేదె హార్‍ రోజ్‍ పరిచర్యమా యూవ్నామనూ రఫా బగ్పడి దేవానిజోగొ పక్చపాతం దేఖడుకరి హేబ్రిల్‍నా ఫర్‍ గ్రీక్‍ భాష బోలావాళు భణ్‍ఖనూ సురుకర్యా. తెదె భార జణా అపోస్తుల్‍ యువ్నా కనా సిష్యుల్‍ అఖ్కావ్‍నా బులైన్‍ హామే దేవ్నూ వాక్యంనా బోలను మ్హేంధిన్‍, రఫ్యా, ఖాణుస్‍ బాగ్‌పాడిన్‌1 దేవాను అసేల్‍ కాహే. ఇనహాఃజే భైయ్యేవో, ఆత్మతీ అఖ్కాల్‍తి భరైరరిన్‍ అచ్చునామ్‍ కమైరాక్యు హూయునా హాఃత్‍ జణా అద్మీయేనా తూమారమణ్‍తూ ఏర్పరచో. హామే యూవ్నా ఆ కామ్‍నా ఎన్నుకొనుడి; తెదె హామే హమారు వఖాహత్‍మాబి ప్రార్థనమా వాక్యంనూ బోధించడంలోను ర్హస్యు కరి బోల్యా.
ఆ వాత్‍ హాఃరవ్‍నా నచ్చ్యు, ఇనహాఃజే యూవ్నే విష్వాసంమాబి, పవిత్రాత్మతి భరైరోతే స్తెఫన్‍, బుజు ఫీలిప్పు, ప్రోకోరు, నీకానోరు, తీమోన్‍, పర్మేనాసు, యూదా మతంమా భద్లీగయోతే అంతియొకయమా ర్హవ్వాళో నీకోలాసు కరి యూవ్నా ఏంచీలీదా. యూవ్నా అపొస్తుల్‍నా హఃమే రాఖ్యా. అపోస్తుల్‍ ప్రార్ధనా కరీన్‍ యూవ్నాఫర్‍ హాత్‍ మ్హేంద్యా.
దేవ్నూ వాక్యం ఏత్రేనా ఏత్రే ఫైలాయిన్‍, యెరూషలేమా సిష్యుల్‍నూ సంఖ్య భఢీగయు. యాజకుల్‍మాబి ఘణా అద్మీయే విష్వాసించ్యు.
సైఫన్నా దర్లీన్‍ బాందను
స్తెఫన్‍ దేవ్నూ కృపతి, థాకత్‍తి భరైన్‍ ప్రజల్నా ఇఛ్మా అధ్బుతాల్‍బి, ఆర్చ్యక్రాయల్‍ కరూకరాస్‍. లీబెర్తీను కరి బోలాతె గల్లోమాహో, కురేనీయుల్‍నూ గల్లోమాహో, అలెగ్జాండ్రియను గల్లోమాహొ, కిలికియమథూ, ఆసియామథూ ఆయుతే ఇవ్నామతూ, థోడుజణు ఆయిన్‍ స్తెఫన్‍థి వాదించ్యా పన్కీ, హుయుతో ఇనా అఖ్కల్‍నూ వాతేనా, ఇనేతి బోలాయుతే ఆత్మనా యూవ్నే వాదించనా కోహుయిని. తెదె యూవ్నే, యో మోషేఫర్‍బి, దేవ్‍ఫర్‍బి దూషణ్‍నూ వాతె బొలానూ హామే హఃమ్జాకరీ బోలావనా హాఃజే థోఢా అద్మీయేనా ఇంబోలనా పైసాలిదు, ప్రజల్నా ష్యాణవ్‍నా షాస్త్రుల్‍నా వూషికరైన్‍ ఇనాఫర్‍ ఆయిన్‍, ఇనా ధర్లీన్‍ మహాసభనా హఃమే లీన్‍ ఆయా. తెదె ఇవ్నే ఆ అద్మి కెధేబి అప్ను పవిత్ర గుడి, ధర్మసాస్త్రంనా విరోధంగస్‍ వాత్‍ బోల్తోర్హస్‍. ఆ నజరేయుడ్‍నో యేసు ఆ గుడికరీన్‍, మోషే అప్నా దిదోతే ఆచారాల్‍నా భద్‍లాయినాక్‍స్యే కరి ఆ బోలమా హామే హఃజా కరి బోల్యా. సభమా భేఠూతే యూవ్నే హాఃరా ఇనా భణీ ఠర్కీన్‍ దేఖమా, ఇను మ్హోఢు దేవదూత్‍నూ మ్హోఢాంతర దేఖాయు.
Source notes (1)
- Footnote మూలభాషమా బల్లలజనా పరిచర్యాకరను
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.