Skip to content
BibleKenya

Vagiri Vathe Bible

అపొ 21

పౌల్ యేరుషలేమ్‍ జావను

హామే యూవ్నా మ్హేందిన్‍ జ్జాజ్‍ ఛడీన్‍ ఏజ్గాతు హాఃఢాక్‍ కోసుకునా, బుజాధన్నే రోదుకునా, ఏజ్గాతూ పతరకునా ఆయా. తెదె ఫేనికేనా జావానూ ఏక్ జ్హాజ్‍నా దేఖిన్‍ ఇనాఫర్‍ ఛడీన్‍ గయా. కుప్రనా హఃమే కరీన్‍, ఇనూ ఢవాత్నూ బాజుమా మ్హేందీన్‍, సిరియమ్హణి జైన్‍, తూరుమా ఉత్ర్యా. ఏజ్గా జ్హాజ్‍నూ మాల్‍ ఉత్రావనూ థూ. హమె ఎజ్గా సిష్యుల్‍నా మాలంకరీన్‍, యూవ్నా కనా హఃత్‍ ధన్‍ ర్హయా. యూవ్నే పౌలుథీ తూ యెరూషలేమ్‍మా నకోజాకరి మ్హేందీస్‍ కరి ఆత్మతిస్ బోల్యా. యో ధన్‍ హఃరు గుజారీన్‍ ఏజ్గాతూ నీకానూ వోహఃత్‍, ఇవ్ను భావణ్‍థీ, లఢాక్వాథీ హమార కేడె ఆయిన్‍ హఃయార్నూ కనారి తోడి ఆయిన్‍ బోలిమొక్‍లానా హాఃజె ఆయా, ఏజ్గా హామే హాఃరా మలిన్‍ గుడ్గేఫర్‍ బేసిన్‍ ప్రార్థన కరీన్‍, ఏక్నా ఏక్తీ జైయేస్‍ కరి బోల్లిదా. తెదె హామే ఘాజ్‍ ఛడీగయా, ఇవ్నే ఇవ్ను ఘర్‍ ఛలీగు. హామే తూరుథూ కర్యాతే ప్రయాణంనా ఖతం కరీన్‍, తొలెమాయినా ఆయిన్‍, ఏజ్గాను భైయ్యేవ్‍నా కిమ్‍ ఛాకీ పుఛాయిన్‍ ఇవ్నా కనా ఏక్ ధన్ ర్హయా. తినా బుజా ధన్నే ఏజ్గాతూ నాకీన్‍ కైసరయనా ఆయిన్‍, హాఃత్‍జణామా ఎక్నా యేరుషలేమ్‍ సువార్త కరవాళో ఫిలిప్పునూ ఘర్మా జైన్‍ ఇనాకనా ర్హయా. ఇనా ఛార్‍ కవారీ ఛోరీయే, ఇవ్నే ప్రవచనాల్‍ బోలావాళియే. ఏజ్గా హామే కెత్రాకీ ధన్‍ ర్హవమా, యూదయ దేహ్ః మతూ అగబు కరి ఏక్ ప్రవక్త ఆయో. యో హామార కనా ఆయిన్‍ పౌలును కంభార్నో కాఛో లీన్‍ ఇనూ హాత్‍ గోఢానా భంద్‍లిన్‍, యెరూషలేమ్‍నూ యూదుల్‍ ఆ కంభార్ను కాఛో వాళానా ఆం భాందిన్‍, యూదుల్ కాహేతే ఇన్నా హాత్మా ఒప్పావ్‍స్యే కరి పరిషుద్ధాత్మ బోలుకరాస్‍ కరి బోల్యు.

ఆ వాతె హాఃజ్యాతెదే ఇనా హామే ఏజ్గా ఛాతే ఇవ్నే యేరూషలేమ్‍ నకోజాకరీ బతిమాల్యా పన్కి, పౌలు ఆం ష్యాన రోయిన్‍ మారు దీల్‍ దుఃఖవా హాఃరుకు కరాస్‍నా? మేతో ప్రభు హుయోతే యేసునూ నామ్‍నాటేకె యెరూషలేమ్‍మా బంధింప బడనస్‍ కాహే పన్కి మరానబి సిద్ధంగా ఛౌ కరి బోల్యొ.

హామే కెత్రూ బోల్యుతోబి యో నా ఒప్పామా “ప్రభును చిత్తమస్‍ హూవాదే” కరి షోపొ హూయిగయా.

యో ధన్నానా బద్మా హమ్నా హూనుతే రాఛా పళ్ళీన్‍ యెరూషలేమ్‍నా గయా. బుజు కైసరయథూ థోడు జణా సిష్యుల్‍, ఆగడీతూ సిష్యుడ్‍నితర ర్హయోతే కుప్రీయుడ్నో మ్నాసోను ఘర్మా హామే ర్హనూ కరి హూఃజ్‍తీ ఇనా కేడె లీన్‍ హామార కేడె ఆయా.

పౌల్‍ యాకోబ్నా మలను

హామే యెరూషలేమ్‍నా ఆయాతేదె భైయ్యే హామ్నా హూఃషీతి చేర్సాయి లిదు. బుజా ధన్నే ష్యాణా అద్మీయే హఃరు ఏజ్గా ఆయి ర్హవమా పౌలు హామార కెడే యాకోబ్‍ కనా ఆయో. యో యూవ్నా కిమ్‍ ఛాకీ పుచ్‍తాచ్‍ కరీన్‍, ఇనూ సేవతి దేవ్‍ యూదుల్‍ కాహేతే ఇవ్నా కర్యోతే ఇనా వివరించిన్‍ బోల్యొ. ఇవ్నే యో హఃరూ హఃమ్‍జీన్‍ దేవ్నా మహిమ కర్యా, ఇనా దేఖీన్‍ భై, యూదుల్‍మా విష్వాసుల్‍ హూయూతే కెత్రూ హజార్ అద్మీకి తూ దేఖూ కరాస్‍ కున్నా? యూవ్నే హాఃరు ధర్మషాస్ర్తంని వాతేనా హాఃజిన్‍ ఘాణు ఆహ్‍ఃతి ర్హవాళు. యూదుల్‍ కాహేతే ఇవ్నే ఛాతే యూదుల్‍ ఇవ్ను లడ్కవునా సున్నతి నాకరావ్ను కరి, అప్ను ఆచారాల్మా ఛాతిం నాఛాల్నుతిం తూ బోల్యొతేథి ఇవ్నే హఃరూ మోషేనా మ్హేందేనూ కరి తూ బోలుకరా తిమ్‍, ఆవ్నే తారటేకెను ఖభార్‍ హాఃజీరాక్యస్‍. ఇనహఃజే అప్నె ష్యాత్‍ కరీయే? తూ ఆయోతె వాత్‍బి ఇవ్నే ఖాంజ్యా. ఇనహఃజే తూ హామే బోలాతిమ్ కర్. మొక్కుబడి కర్‍రాక్యతే యూవ్నే ఛార్‍జణా మారకనా ఛా. తూ యూవ్నా కేడె లీన్‍ జైన్‍ యూవ్నేతి మలిన్‍ సుద్ధి కరైలిన్‍, యూవ్నా ముఢ్‍క్యాను కేహూ కఢవానా తార రఫ్యా ఇనా హూషేతే; తెదె తారటేకెను హాఃమ్‍జ్యుతే వాతె హాఃఛీ కాహే కరీన్‍, బుజు తూబి మోషేనూ ధర్మషాస్ర్తంనా పాటించిన్‍, ఇనా ప్రకార్‍ చాలుకరాస్‍ కరీన్‍ మాలంకర్‍స్యే. హుయుతో విష్వాసించ్యుతే యూదుల్ కాహేవాలు గూర్చి ఇవ్నే మూర్తేవ్‍నా బలి దిదాతే జీన్‍వార్ లోహినా, లండి దాబిన్‍ మార్యుతే జీన్‍వార్‍హుయుతోబి, జారత్వంనా భైకీజానూ కరి నిర్ణయించిన్‍ ఇవ్నా లిఖ్కీ రాక్యాస్‍ కరి బోల్యా.

ఎత్రమా పౌలు బుజా ధన్నే యో అద్మీయేనా కేడె లీన్‍ జైన్‍, ఇవ్నా కేడెస్‍ సుద్ధి కరాయిలిన్‍, ఆలయంమా జైన్‍ ఇవ్నామా హార్యేక్‍జణ హాఃజే కానుకల్‍ అర్పించతోడి సుద్ధినూ ధన్‍కరీయే కరి బోల్యొ.

పౌల్నా ఆలయంను హాఃమే బంధిచాను

హుయుతో హఃత్‍మనూ ధన్నే ఆసియామథూ ఆయూతే యూదుల్‍ ఆలయంమా ఇనా దేఖీన్‍, హాఃరవ్నా కలవర్‍ కర్రాఖీన్‍ ఇనా జభర్‍జస్థీథీ ధర్లిన్‍, ఇష్రాయేల్‍ వాళా, మదత్‍ కరన ఆవో; ప్రజల్నా ధర్మషాస్త్రంనా ఆ జోగోనా విరుద్ధంథీ హాఃరౌనా హాఃరూస్‍ బొలీదేంకరాతే యో ఆస్‍. బుజు ఆ యుదుల్ కాహే వాలనా ఆలయంమా లీన్‍ ఆయిన్‍, ఆ పవిత్ర జోగోనా అపవిత్ర కర్‍నాఖ్యో కరి కైఖార్‍ మ్హేంద్యు. కింకతో ఎఫెసీయుడ్‍నో త్రోఫిమునా ఆనా కేడె హఃయార్‍మా ఆనేతి ఆగడీ యూవ్నే దేఖ్యాథా, ఇనహఃజే పౌలు ఆలయంమా ఇనాబి లీన్‍ ఆయో హూసే కరి సోచ్యా.

హాఃయార్‍ అక్కు గ్హణు గంధార్‍ గోళ్‍ హుయిగు. అద్మియేనూ గల్లో గల్లోంతర నాఖ్ థూ ఆయిన్‍, పౌలునా ధర్లీన్‍ ఆలయంమాథూ ఇనా భాధర్‍ ఖేఛా; తెదె యగ్గిస్‍మా ధర్వాజ ముచిన్వాకు. యూవ్నే ఇనా మర్రాక్నూ కరి దేఖూకరాతో యెరూషలేమ్‍ అక్కు గంధార్‍ గోళ్‍ హూంకరాస్‍ కరి రోమను స్తెన్యంను ఉపార్‍ అధికారినా ఖభార్‍ మొక్‍ల్యా. యగ్గిస్‍మా యో భటుల్నా, సైనికుల్ను అధికారి కేడె లీన్‍ ఇవ్నా కనా నాహ్‍ఃతో హుయిన్‍ ఆయో. ఇవ్నే ఉఫర్లో అధికారినా, సైనికుల్‍ ఆవాను దేఖిన్‍, పౌలునా మారనూ భంద్‍కర్రాక్యు. యో అధికారి ఇవ్నా ఖందే జైన్‍ ఇనా ఖంకల్‍తి భాందో కరి ఆజ్ఞాదిన్‍, ఆ కోన్‍? ఆ ష్యాత్‍ కర్యో? కరి పుఛావమా, యో అద్మియేమా థోడుజణు, థోడుజణు ఇం ఛీఖార్తూర్హవమా ఇనా హఃఛీ ష్యాత్‍కీ మాలంకరాన కోహుయుని, కోఠడ్‍మా ఇనా లీన్‍ జవో కరి హుకుందిదు. పౌలు కిట్కీనూ ఉఫర్‍ ఆయోతెదె అద్మియేను గల్లో హఃరూ భరైన్‍ బలవంతం కర్తుర్హవమా సైనికుల్నా ఇనా ఢోహ్‍లీన్‍ జావహఃర్‍కు హుయు. కింకతో అద్మీయే హఃరు ఇనా మర్రాక్ను కరి కైఖార్‍ మ్హేన్‍థూ హుయిన్‍ ఇవ్నా కేడె గయూ.

పౌల్‍ ఇనె బదలను బారెమా బోలను

ఇవ్నే పౌలునా కోఠడ్‍మా లీ జౌంకరాతో యో సైనికా అధికారినా దేఖిన్‍, మే తారేతి ఏక్ వాత్‍ బోలాజైనా? కరి పుచ్చా యో. అనటేకె యో తునా గ్రీక్‍ను వాతెబి ఆవాస్‍నా? ఆ ధన్నావ్‍నా ఆగడీ రాజద్రోహాంనా హూసీకరైన్‍, హాంతకుల్ హూయిర్హయాతే ఛార్‍ హజార్‍ అద్మీయేనా ఝాడీమా కేడె లీన్‍గయోతే తూ ఐగుప్తుడ్‍నో కాహేనా? కరి పుఛ్చాయో.

ఇనాహఃజే పౌలు మే కిలికియమనూ తార్సునో యూదుడ్‍; యో మోటో హఃయార్‍నో అద్మి. మన అద్మీయేతి వాత్‍ బోలాన ఆజ్ఞా దాకరీ వేడిలెంగ్రస్‍ కరి బోల్యు.

ఆధికారి ఆజ్ఞా దేవాదిన్‍ పౌలు ఖీట్కిఫర్‍ హీబ్రిన్‍ హాత్‍తి సైగ్‍ కర్యో, తెదె యూవ్నే షోపొ హుయిజవామా, యో హెబ్రీ భాషమా ఆం బోల్యొ.

Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.