Vagiri Vathe Bible
అపొ 11
పేతురు బారెమా యెరూషలేమ్‍మా ఛాతె సంఘంనా బోలను
యూదుల్‍ కాహెతె దేవ్‍ని వాతేనా హాఃజీన్‍ ఓప్పిలిదు కరి అపొస్తుల్‍బి, యూదయాను భైయే హాఃజ్యు. పేతురు యెరూషలేమ్‍మా ఆయో తెదె సున్నతి లీదుతే యూవ్నే వాదించి బోల్యు, “తూ సున్నతి కోయింతే అద్మీయేకనా జైన్‍ యూవ్నేతి ఖాణు కాధోకరీ ఇనేతి బోల్యా.”
ఇనటేకె పేతురు జర్‍గ్యుతే హాఃరు అమ్‍ ఖూల్లా కరీన్‍ బోల్యొ.
మే యొప్పె హాఃయార్‍మా ప్రార్దన కరుకరుతో మన ఏక్ దర్షన్ ఆయు. యో ష్యాత్ కతో ఛార్‍ చేడో ధరైన్‍ ఉత్రుతే ఏక్ మోటు గోధిడీనూ జోణ్‍నూ ఏక్ థాళి ఆకాష్‍తూ ఉత్రీన్‍ మారకనా ఆయు. ఇనామ్హణీ మే ఠర్‍కీన్‍ ధేఖిన్‍ ఏన్‍కరమా జమీన్‍ఫర్‍ రవళు ఛార్‍ గోఢాను జీన్వార్‍, జమీన్‍ఫరాస్‍ హాఃవ్‍ళావళు కీఢా, జాఢనూ హరేక్‍ జిన్వార్‍ ఉఢాతే జీన్వార్‍ మన దేఖాయు. తెదె పేతురునా “తూ వుటీన్‍ ఇనా మారీన్‍ ఖా” కరీన్‍ బోలిన్‍ ఏక్ ఆవాజ్‍ మారేతి బొలానూ మే హాఃమ్‍జ్యొ. పన్కీ మే నకో ప్రభు నిషిద్దంనూ, అపవిత్రంనూ హఃయుబి మే కెధేబి మోఢమా గ్హాలో కోయిని కరి బోలమా బెంమ్మనూ వోహాఃత్‍బి యో ఆవాజ్‍ ఆకాష్‍తూ దేవ్‍ మే పవీత్రం కర్యోతే ఇనా నిషిద్దంనూఅపవి కరి నకో ఎంచ్‍ కరి ఉత్తార్‍ ఆయు. ఇమ్మస్‍ తీన్‍ వొహఃత్‍ హుయు. ఇనబాద్‍మా యో హాఃరు ఫాఛు ఆకాష్‍మా పడైగయు. ఏగ్గిస్‍మ కైసరయాతూ మార కనా బోలిమొక్‍లాయుతే తిన్‍ అద్మి మే ఛౌతే ఘర్‍ కనా ఆయిన్‍ భిర్యు. తెదె ఆత్మ తూ కాయ్‍బి బేధం నాబోల్‍నూతిమ్‍ యూవ్నే కేడె జాకరీ మారేతి బోల్యొ. ఆ చో జణ భైయే మాకెడే ఆయా; హామే కొర్నేల్ను ఘర్మాగయా. తెదె యో దేవ్నుదూత యొప్పేమా అద్మీయేన్‍ బోలిమొక్లీన్‍ పేతురు కరి సీమోన్‍నఅ బులైమంగౌ. యో బోలాతే వాతె హఃరు తారు ఘర్‍ పరీవార్‍ హాఃరనా భచవ్‍స్యే. మే వాతె బొలాను సురు కర్యోతేదె పరిషుద్దాత్మ అప్నాఫర్‍ అగడీ కిమ్‍ ఆయుకీ ఇమ్మస్‍ యూవ్నాఫర్‍బి ఆయు. తెదె యోహాన్‍ పాణీనూ బాప్తిస్మమ్‍ దిదో పన్కి తుమె పవిత్రాత్మతి బాప్తిస్మమ్‍ లీస్యు కరి ప్రభు బోల్యొతే వాతె మే హాఃయాల్‍ కర్‍లిదొ. ఇనటేకె ప్రభు హూయోతే యేసు క్రీస్తుమా వీస్వాష్‍ ర్హఖతే అప్నా దేవాయ్‍రూతిమ్‍ దేవ్‍ యూవ్నాబి వరం దిరాఖఫర్‍ దేవ్‍నా ఆఢు బోలానా మే కోన్‍?
యూవ్నే ఆ వాతె క్హంజీన్‍ అజు క్హయుబి ఆడు నాబోలిన్‍, ఇమ్‍హూస్యేతో దేవ్‍ యూదుల్‍కాహెతెనబి దిల్‍భద్‍లాలీన్‍ రక్చణ లేవాను దయకర్‍రాక్యోస్‍, కరి బోల్లేతుహుయిన్‍ దేవ్‍నా మహిమ కర్యు.
అంతియొకయమా సంఘం
స్తెఫన్‍నా విషంమ హుయుతే మీన్హాత్‍ నాటేకె భిగిడిగయుతే యూవ్నె యూదుల్‍నా తప్ప బుజు కినాబి వాక్యం నాబోల్‍నుతిమ్‍ ఫేనికే, కుప్ర, అంతియొకయమ చెద్రిగయు. పన్కి కుప్రియుల్‍ను థోడుజణు, కురేనియుల్‍మ థోడుజణుబి ఇవ్నమతు. అంతియొకయమ ఆయిన్‍ యూదుల్‍కాహెతె ఇవ్నేతి వాతె బోల్తుహుయిన్‍ ప్రభు యేసును సువార్తనా ప్రచార్‍ కర్తర్హయ. ప్రభును హాత్‍ షక్తి యూవ్నా కేడేస్‍ రయు ఇనటేకె విష్వాసించ్యుతే యూవ్నే హాఃరుస్‍ ప్రభుమ్హణీ ఫర్యు.
యూవ్నా గూర్చీన్‍ ఖభార్‍ యెరూషలేమ్‍మా ఛాతే సంఘంమచాతే యూవ్నే హఃమ్జీన్‍ బర్నబానా అంతియొకయ బోలిమొక్‍ల్యా. యో ఆయిన్‍ దేవ్ను గణు ఆషిర్వధం దేఖీన్‍ సంతోష పడీన్‍ ప్రభుమా ఆనిలిన్‍ నిలకడ్‍తి ర్హవో కరి హాఃరవ్‍నా సిఫారత్‍ కర్యో. యో పరిషుద్ధాత్మతి, విష్వాసంతి భరైరోతే అషల్ అద్మీనితరా రవమా; కెత్రూకి జణు ప్రభుమఫర్యు.
యో సౌలునా దేఖనహాఃజె తార్సునా గయో. ఇనా మాలంకరీన్‍ అంతియొకయానా బులాలీన్‍ ఆయో. ఇవ్నే మళిన్ ఏక్ వరఖ్‍ః అక్కు సంఘంమా ర్హైన్‍ కెత్రాకీ జణానా వాక్యం బోలిధిదా. ఫైలీవోహఃత్‍ అంతియొకయామా విస్వసియే క్రైస్థవులుకరీ బోలాయి గయా.
అంతియొకయ
యో ధన్నువ్‍మా థోడుజను ప్రవక్తల్‍ యెరూషలేమ్‍తూ అంతియొకయానా ఆయు. యూవ్నామా అగబు కరి ఏక్ జణో భిరిన్ ములక్‍ అక్కమా మోటు ఖాళ్‍ ఆవ్‍స్యే కరి ఆత్మతి భరైన్‍ బోల్యొ. యో క్లౌదియ రాజాను ధన్‍మ యో ఖాళ్‍ ఆయూ. తెదె సిష్యుల్‍మ హర్‍ఏక్‍ జణు ఇవును షక్తి ఏత్రె యూదయామ ఛాతే భైయ్యేవ్‍నా సహయం బోలిమొక్‍లానటేకె సోచిల్దు. యూవ్నే సోచాతిమ్‍ బర్నబా, సౌలునా హాతె బోలిమొకల్ను కరి రైగతే ఇనా యూదయమ ఛాతే షాణవ్‍కనా బోలిమొక్‍ల్యా.
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.