Waghri Booli Bible
ರೋಮ 7
ವ್ಯಹಾನಿ ಬಾರೇಮ ವಿಚಾರ್
ಭೈಯೇ ಭೇನೇವೊ, ಧರ್ಮಶಾಸ್ತ್ರನ ಮಾಲುಮ್ ಕರಿರಾಖವಾಳನ ಮೇ ಶಾತ್ ಬೋಲಸ್‍ಕತೊ, ಏಕ್‍ಅದ್ಮಿ ಬಚಿರ‍್ಹಾವಲಗು ಖಲಿ ಧರ್ಮಶಾಸ್ತ್ರ ಇನ ಉಪ್ಪರ್ ಅದಿಕಾರ್ ಕರಸ್‍ಕರಿ ತುಮೂನ ಮಾಲುಮ್ ಛಾ಼. ಉದಾಹರಣೆ ಏಕ್ ವ್ಹೆತ್ತಿ ತಯೇಡ ಇನೊ ಬಾವ್ರಿ ಜಿವ್ತೊರ‍್ಹವಾನಿ ವಖ್ಹ್‌ತೆ ಧರ್ಮಶಾಸ್ತ್ರನಿ ಪರಕ್ಮ ಇನ ಜೋ಼ಡ್ಮ ಬಂಧಣ್‍ಮರ‍್ಹೇಸ್. ಕತೋಬಿ ಬಾವ್ರಿ ಮರಿಗೋತೊ ಇನ ಜೋ಼ಡೆ ಭಂದೈರ‍್ಹೀತೆ ಧರ್ಮಶಾಸ್ತ್ರನಿ ಬಂಧಣ್‍ಥಿ ಛುಟ್ಕಾರ್ ಲೀರಾಖವಾಳಿ ಹುಯಿರ‍್ಹೇಸ್. ಅಮ್ರ್ಹವಾಪರ್, ಇನೊ ಬಾವ್ರಿ ಜಿವ್ತೊರ‍್ಹವಾನಿ ವಖ್ಹತ್‌ಮ ಯೋ ತಯೇಡ ಬಿಜೇಕ್ ಜ಼ಣಾನಿ ಜೋ಼ಡ್ಮ ಸಂಬಂದ್ ರ‍್ಹಯೂತೊ ವ್ಯಬಿಚಾರಿಣಿಕರಿ ಬೋಲೈಜಾ಼ಸ್. ಕತೋಬಿ ಬಾವ್ರಿ ಮರಿಗಯುತೊ ಯೋ ತಯೇಡ ಯೊ ನಿಯಮ್‌ಥಿ ಛುಟ್ಕಾರ್ ಹುಯಿತೆ ಇನಖ್ಹಾಜೆ, ಯೋ ಬಿಜೇಕ್ ಜ಼ಣಾನಿ ಜೋ಼ಡೆ ವ್ಯಹಾಕರಿ ಲಿದಿತೋಬಿ ವ್ಯಬಿಚಾರಿಣಿಕರಿ ಗಣ್ತಿ ಹುವಾಕೊಯ್ನಿ. ಇನಖ್ಹಾಜೆ ಮಾರ ಭೈಯೇ ಭೇನೇವೊ,ಧರ್ಮಶಾಸ್ತ್ರನಿ ಬಾರೇಮ ಬೋಲ್ನುಕತೊ ತುಮೇಬಿ ಕ್ರಿಸ್ತಾನು ಶರೀರ್‌ಮ ಭಾಗ್‌ ಹುಯಿರ‍್ಹಾಸ್ತೆಖ್ಹಾಜೆ ತುಮೇಬಿ ಮರಿರ‍್ಹಾಸ್ ಅಜು಼ ಹಮ್ಕೆ ಮರ‍್ಯಹುಯಮಾಥು ಜಿವ್ತೊಹುಯಿನ್ ಉಠ್ಯೊತೆ ಇನ ಮಳ್ಯಹುಯ ಹುಯಿರಾಸ್. ಅಮ್ ಅಪ್ಣೆ ದೇವ್ನಿ ಸೇವೆಮ ಫಾಯಿದೊ ಹುಯೆಜಾ಼ಯ್‌. ಅಪ್ಣೆ ಅದ್ಮಿನಿ ಖೂಜ಼್‌ಮ ಜಿವ್‍ಕರ್ತಥಾತೆ ತದೆ, ಪಾಪ್‌ಥಿ ಭರೈಹುಯು ಖರಾಬ್ ಆಖ್ಹ್‌ಖ್ಹಾರು ಅಪ್ಣ ಶರೀರ್‌ಮ ಕಾಮ್ ಕರುಕರ್ತುಥು. ಯೊ ಧರ್ಮಶಾಸ್ತ್ರನ ಖ್ಹೂಜ಼್‌ಥೀಸ್ ಹೋತುಥು. ಇನಖ್ಹಾಜೆ ಅಪ್ಣೆ ಕರಾನು ಫಲ್ ಮರಣ್ ಹುಯಿರ‍್ಹುಸ್. ಹಮ್ಕೆತೋಬಿ ಅಪ್ಣುನ ಬಂಧೈರುಥುತೆ ಧರ್ಮಶಾಸ್ತ್ರನ ಭಾಗ್‌ಮ ಮರ‍್ಯಹುಯ ಹುಯಿನ್, ಯೊ ಧರ್ಮಶಾಸ್ತ್ರಥಿ ಛುಟ್ಕಾರ್ ಲೀರಾಖ್ಯಸ್. ಅಮ್ ಲೀಖೈರ‍್ಹೂತೆ ಫಾಚ಼್‌ಲಿ ನಿಯಮ್‌ನಿ ಪರಕ್ಮ ಅಪ್ಣೆ ದೇವ್ನ ಸೇವೆ ಕರ‍್ಯಕೊಂತೆ, ಪವಿತ್ರಾತ್ಮಥಿ ನವಿ ಪರಕ್ಮ ಚಾ಼ಲವಾಳ ಹುಯಿರ‍್ಹಾಸ್.
ಧರ್ಮಶಾಸ್ತ್ರ ಅಜು಼ ಪಾಪ್
ಇಮ್‍ಕತೊ ಅಪ್ಣೆಶಾತ್ ಬೋಲಿಯೆ ಪಾಪ್ ಧರ್ಮಶಾಸ್ತ್ರಸ್ ಹುಯಿರ‍್ಹೂಸ್ಕಿಶು? ಕದೇಬಿ ಕೊಯ್ನಿ. ಕತೋಬಿ ಧರ್ಮಶಾಸ್ತ್ರನ ಮ್ಹೇಲಿನ್ ಬಿಜ಼ ಖೆವೆಥೀಬಿ ಪಾಪ್‍ಕತೊ ಶಾತ್‌ಕರಿ ಮನ ಖ್ಹಮ್‍ಜಿಲ್ಯವಾನ ಹುಯುಹೋತ್ ಕೊಯ್ನಿ. “ಬಿಜೇಕ್ ಜ಼ಣಾನ ರಾಛ಼ನ ತುಮೆ ಆಖ್ಹ್‌ನಾಕರ‍್ನು.” ಕರಿ ಧರ್ಮಶಾಸ್ತ್ರ ಬೋಲ್ಯುತೆ ಇನಖ್ಹಾಜೇಸ್ ಯೋ ಮನ ಮಾಲುಮ್‌ಪಡ್ಯು. ಕತೋಬಿ ಪಾಪ್ ಆ ಹುಕುಮ್‍ನಾಸ್‍ ಪಾಡಿಲೀನ್ ಮಾರಾಮ ಖ್ಹಾರಿಸ್ ಥರಾನು ಆಖ್ಹ್‌ನ ಲಾಯು. ಶನಕತೊ ಧರ್ಮಶಾಸ್ತ್ರ ಕೊಂತೆ ಪಾಪ್ ಮರ‍್ಯುಹುಯು ಹುಯಿರ‍್ಹೇಸ್. ಏಕ್ ವಖ್ಹತ್ ಮೇ ಧರ್ಮಶಾಸ್ತ್ರ ಕೊಂತೆ ಜಿವ್‌ಕರ್ತೊಥೊ. ಕತೋಬಿ ಕೆದೆ ನಿಯಮ್ ಕರಿ ಬೋಲಾನು ಆಯುಕಿತದೆ ಪಾಪ್ ಜೂತುಹುಯು. ಅಜು಼ ಮೇ ಮರಿಗಯೊ. ಜಾನ್‌ಲೀನ್ ಆವಾನ ದೆವೈಗೈತೆ ಹುಕುಮಸ್ ಮಾರಿ ಬಾರೇಮ ಮರಣ್ಣ ಲೀನ್ ಆಯು. ಪಾಪ್ನ ಅವಕಾಶ್ ಮಳ್ಯು ಅಜು಼ ಯೊ ಹುಕುಮ್‌ನ ಪಾಡಿಲೀನ್ ಮನ ಠಗೈನ್, ಅಜು಼ ಮನ ಮರ್‌ನಾಖ್ಯು. ಅಮ್ರ್ಹವಾಪರ್, ಧರ್ಮಶಾಸ್ತ್ರ ಪರಿಶುದ್ ಹುಯಿರ‍್ಹೂಸ್, ಹುಕುಮ್‌ಬಿ, ಪರಿಶುದ್‌ಬಿ, ನ್ಯಾವ್‍ಬಿ, ಅಛ಼್ಛುಬಿ ಹುಯಿರ‍್ಹೂಸ್. ಇಮ್‍ಕತೊ ಅಛ಼್ಛುಸ್ ಮನ ಮರಣ್‌ಲಾಯುಕಿಶು? ಇಮ್ ನಾರ‍್ಹಯುತೊ! ಪಾಪಸ್ ಯೊ ಕರ‍್ಯು ಅಛ಼್ಛಥೀಸ್ ಮನ ಉಪಯೋಗ್ ಕರೀನ್ ಪಾಪ್ನೆ ಮರಣ್ ಆವಾನಿತರ ಕರ‍್ಯು. ಅನೇಥಿ ಪಾಪ್ ಇನು ಖ್ಹಾಚು಼ ಸ್ವಭಾವ್‌ನ ವತಾಳ್ಯು ಇನಖ್ಹಾಜೆ ಹುಕುಮ್‌ಥಿ ಪಾಪ್ ಯೋ ಕೆತ್ರೆ ಕಠೋರ್‌ಕರಿ ಮಾಲುಮ್ ಪಡಾಸ್‌.
ಅಪ್ಣಾಮ ಛಾ಼ತೆ ಕಲಾವ್ಣಿ
ಧರ್ಮಶಾಸ್ತ್ರ ಆತ್ಮೀಕ್ ಹುಯಿರ‍್ಹುಸ್‌ಕರಿ ಮಾಲುಮ್ ಛಾ಼. ಕತೋಬಿ ಅದಮ್‍ಜ಼ಮಾನೊ ಹುಯಿರೋತೆ ಮೇ ಪಾಪ್ನ ಗುಲಾಮ್ನಿತರ ವೇಚೈ಼ಜಾ಼ವಾಳೊ ಹುಯಿರ‍್ಹೋಸ್. ಮೇ ಶಾತ್‍ಕರೂಸ್‍ ಕರಿ ಬೋಲಾನು ಮಾಲುಮ್‌ಕೊಂತೆ ಹುಯಿರ‍್ಹೋಸ್. ಶನಕತೊ ಮೇ ಶಾತ್ ಕರ್ನುಕರಿ ಆಖ್ಹ್‌ಕರೂಸ್ಕಿ ಇನ ಕರುಕೊಯ್ನಿ, ಕೆವ್ಹಾನ ವಹೇರ್‌ಕರುಸ್ಕಿ ಇನಾಸ್ ಕರಾವಾಳೊ ಹುಯಿರ‍್ಹೋಸ್. ಮೇ ಕರಾನ ಆಖ್ಹ್ ಕರುಕೊಂತೆ ತಿನ ಕರಾವಾಳೊರ‍್ಹಯೋತೊ, ಧರ್ಮಶಾಸ್ತ್ರ ಅಛ್ಛು಼ಕರಿ ವತಾಳಸ್‍. ಅಮ್ರ್ಹವಾಪರ್ ಮೇ ಆಖ್ಹ್ ಕರುಕೊಂತೆ ತಿನ ಕರಾವಾಳೊ ಬಿಜು಼ ಮೇಕಾಹೆ, ಮಾರಾಮ ರ‍್ಹೇಸ್ತೆ ಪಾಪಸ್ ಇನ ಕರಸ್. ಮಾರಾಮ, ಕತೊ ಶರೀರ್‌ನ ಅಧೀನ್ ಸ್ವಭಾವ್‍ಥಿ ಅಛ್ಛು಼ಶಾತ್‍ಬಿ ಜಿವ್‍ಕರಾಕೊಯ್ನಿ ಕರಿ ಮಾಲುಮ್‌ಛಾ಼. ಶನಕತೊ ಅಛ಼್ಛು ಕರ್ನುಕರಿ ಬೋಲಾನು ದಿಲ್‍ ಮಾರಾಮ ರ‍್ಹಯುತೋಬಿ ಇನ ಕರಾನ ಮನ ಕೊಹೋಯ್ನಿ. ಶನಕತೊ ಮೇ ಅಛ್ಛು಼ ಕರ್ನುಕರಿ ಆಖ್ಹ್ ಕರುಸ್ತೆ ಇನ ಯೊ ಅಛ್ಛಾ಼ನ ಕರುಕೊಂತೆ ಖರಾಬ್‌ನ ಕರನಾಸ್ ಆಖ್ಹ್ ಕರುಕರೂಸ್. ನಾ ಕರ್ನುಕರಿ ಬೋಲಾತೆ ಕಾಮ್ನ ಮೇ ಕರುಕರುಸ್‍ಕತೊ ಇನ ಕರ‍್ಯೊತೆ ಮೇ ಕಾಹೆ ಮಾರಮ ಜಿವ್‌ಕರಾತೆ ಪಾಪಸ್ ಇನ ಕರುಕರಸ್. ಇನಖ್ಹಾಜೆ ಖಿವು ಅಛ್ಛುಛಾ಼ಕಿ ಇನ ಮೇ ಕರ್ನುಕರಿ ಛೂ಼ ಕತೋಬಿ ಖರಾಬಸ್ ಮಾರಾಮ ಠಿಕಾಣಿ ಹುಯಿರ‍್ಹುಸ್‌ಕರಿ ನಿಯಮ್‌ಥಿ ಮಾಲುಮ್‌ಹುವಸ್. ಶನಕತೊ ಮೇ ಪೂರದಿಲ್‍ಥಿ ದೇವ್ನು ಧರ್ಮಶಾಸ್ತ್ರಮ ಖುಷಿಕರವಾಳೊ ಹುಯಿರ‍್ಹೋಸ್. ಕತೋಬಿ ಮಾರದಿಲ್ಮ ಬಿಜೇಕ್ ನಿಯಮ್ ಮೇ ದೇಖುಕರುಸ್ ಮಾರ ಶರೀರ್‌ಮ ಛಾ಼ತೆ ಪಾಪ್ನ ನಿಯಮ್ಮ ಕೊಂಡೈರ‍್ಹೋಸ್. ಮೇ ಕೆಥ್ರಾನು ಖರಾಬ್ ಹಾಲತ್ನು ಅದ್ಮಿ! ಮನ ಆ ಮರಣ್ಣು ಶರೀರ್‌ಥಿ ಕೋಣ್ ಛೋ಼ಡಾವವಾಳು? ಅಪ್ಣೊ ಪ್ರಭು ಯೇಸುಕ್ರಿಸ್ತಥಿ ಮನ ಬಚಾ಼ಡವಾಳ ದೇವ್ನ ಧನ್ಯವಾದ್ ಕರುಸ್. ಅಮ್ರ್ಹವಾಪರ್ ಮೇ ದೇವ್ನಿ ನಿಯಮ್ನ ಅಕ್ಕಲ್‌ಥಿ ಸೇವೆ ಕರಾವಾಳೊ ಹುಯಿರ‍್ಹೋಸ್, ಕತೋಬಿ ಶರೀರ್‌ನ ಪಾಪ್ನ ನಿಯಮ್‌ಥಿ ಆಳ್‌ ಹುಯಿನ್‌ಬಿ ಚಾ಼ಲುಕರುಸ್.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.