Waghri Booli Bible
ಪ್ರಕಾಶಿತ್ 5
ಪುಂಗ್‌ಳಿ ಅಜು಼ ಮೇಂಢು
ಮೇ ಸಿಂಹಾಸನ್‌ಪರ್ ಬೆಠಹುಯಾನ ಖಾವಹಾತ್ಮ ಏಕ್‌ ಪುಂಗ್‌ಳಿನ ದೇಖ್ಯೊ. ಇನ ಮಹಿನಿ ಬಾಜೂ಼ಮ ಅಜು಼ ಫಾದರ‍್ಲಿ ಬಾಜೂ಼ಮ ಲೀಖೈರೂಥು, ಯೋ ಖ್ಹಾತ್ ಮುದ್ರಾಥಿ ಮುದ್ರೊ ಮರೈರ‍್ಹೂಥು. ಅತ್ರೇಸ್ ಕಾಹೆತೆ ಏಕ್‌ ಶಕತ್ನೊ ದೇವ್ನದೂತನೆ ಊಚಿ ಅವಾಜ಼್‌ಥಿ ಚಿಕ್ರಿನ್ “ಆ ಮುದ್ರಾವ್ನ ಫೋಡಿನ್, ಪುಂಗ್‌ಳಿನ ಛೋ಼ಡಾನ ಕೋಣ್ ಯೋಗ್ಯ?” ಕರಿ ಬೋಲಾವ್‌ಕರ್ತೊಥೊ. ಕತೋಬಿ ಯೊ ಪುಂಗ್‌ಳಿನ ಛೋ಼ಡಾನರ‍್ಹವೊ ಇನಾಮ ದೇಖಾನರ‍್ಹವೊ ಪರ್‌ಲೋಕ್‌ಮ ರ‍್ಹವೊ ಧರ್ತಿಪರ್‌ರ‍್ಹವೊ ಪಾತಾಳ್ಮರ‍್ಹವೊ ಕಿನೇಥೀಬಿ ಕೊಹುಯುನಿ ಪುಂಗ್‌ಳಿನ ಕಾಡನರ‍್ಹವೊ ದೇಖಾನರ‍್ಹವೊ ಯೋಗ್ಯ ಹುಯಿರ‍್ಹಾವಳೊ ಏಕ್‌ ಜ಼ಣುಬಿ ಕೊಮಳ್ಯುನಿಕರಿ ಮೇ ಘಣು ಕುಢಾಪಕರೀನ್‌ ರೋವ್‍ಕರ್ತೊಥೊ. ಶಾಣಾವ್‌ಮ ಏಕ್‌ ಜ಼ಣಾನೆ ಮನ, “ರೊವ್‌ನಕೊ ಯೂದಖೂಮ್ಮ ಪೈದಹುಯೊತೆ ಶುಂಭಾ ದಾವೀದನೊ ಖಾನ್‌ದಾನ್‌ವಾಳೊ ಹುಯಿರೋತೆ ಏಕ್‌ ಜ಼ಣೊ ಜೂತಿರ‍್ಹಾವಾಳೊ ಛಾ಼. ಯೊ ಖ್ಹಾತ್ ಮುದ್ರಾವ್ನ ಫೋಡಿನ್ ಆ ಪುಂಗ್‌ಳಿನ ಛೋ಼ಡ್‌ಶೆ” ಕರಿ ಬೋಲ್ಯು. ಸಿಂಹಾಸನ್‌ಬಿ ಚಾರ್ ಜೀವಿಬಿ ಥೂತೆ ಝಗೋಕನಾಬಿ ಅಜು಼ ಶಾಣುಖ್ಹಾರು ಥೂತೆ ಝ಼ಗೋನ ಇಚ಼್‌ಮ ಏಕ್‌ ಮೇಂಢಾನ ಭಿಯುರ‍್ಹವಾನು ದೇಖ್ಯೊ. ಯೋ ಹಮ್ಕೆ ತದೇಸ್‌ ಬಲೀನಖ್ಹಾಜೆ ರ‍್ಹೇಖ್ಹಯ್‌ ರ‍್ಹಾವನಿತರ ದೆಖವ್‌ಕರ್ತುಥು. ಯೋ ಮೆಂಢಾನ ಚೆಲ್ಕಾನ ಖ್ಹಾತ್ ಶಿಂಗ್ಡು ಖ್ಹಾತ್ ಡೋಳಾವ್‌ಥು. ಆಖ್ಹಾರು ಧರ್ತಿಪರ್ ಮೋಕ್‌ಲೈರ‍್ಹುಥೂತೆ ದೇವ್ನು ಖ್ಹಾತ್ ಆತ್ಮ ಹುಯಿರುಥು. ಯೋ ಮೇಂಢಾನು ಚೆಲ್ಕುಅಯಿನ್ ಸಿಂಹಾಸನ್‌ಪರ್ ಬೆಠೊರ‍್ಹವಾಳಾನ ಖಾವಹಾತ್ಮಥು ಯೊ ಪುಂಗ್‌ಳಿನ ಮಾಂಗಿಲಿದೊ. ಪುಂಗ್‌ಳಿನ ಮಾಂಗಿಲ್ಯವಾನಿ ವಖ್ಹ್‌ತೆ ಯೋ ಚಾರ್ ಜೀವಿ 24 ಜ಼ಣು ಶಾಣುಖ್ಹಾರು ಮೇಂಢಾನು ಚೆಲ್ಕು ಹುಯಿರ‍್ಹವಾಳನ ಪಗ್‍ಪರ್ ಆಡ್‌ಪಡ್ಯು. ಹರೇಕ್‌ಜ಼ಣಕನ ಹಾತ್ಮ ಖ್ಹಾರಂಗೊಬಿ ಖ್ಹಾಲರ‍್ಯಾನು ಢಪ್ಕಾರ್‌ಥಿ ಭರೈರ‍್ಹುಥೂತೆ ಖ್ಹೊನ್ನಾನಿ ಢಾಕ್ಣಿಬಿ ಥು. ಯೊ ದೇವ್ನು ಅದ್ಮಿನು ಪ್ರಾರ್ಥನೆ ಹುಯಿರ‍್ಹುಥು ಇವ್ಣೆ ನವುಗೀದ್ ಬೋಲ್ತುಹುಯಿನ್ ಪುಂಗ್‌ಳಿನ ಮಾಂಗಾನ, ಇನ ಮುದ್ರಾನ ಫೋಡಾನ ತೂ ಯೋಗ್ಯ ಹುಯಿರೊಸ್ ತೂ ರ‍್ಹೇಖ್ಹಯ್‌ಜೈನ್ ಬಲಿದಾನ್‌ಹುಯಿನ್ ತಾರ ಲ್ಹೋಯಿಥಿ ಹರೇಕ್ ಖೂಮ್‌, ಬೋಲಿ, ದೇಖ್ಹ್‌ವಾಳಾನ,ಅಖ್ಖಾಸ್ ಜಾ಼ತ್ನ ಅದ್ಮಿಖ್ಹಾರಾನ ದೇವ್ನಖ್ಹಾಜೆ ಮೋಲ್‌ಲೀರಾಖ್ಯೋಸ್. ಇವ್ಣುನ ಅಪ್ಣ ದೇವ್ನಖ್ಹಾಜೆ ರಾಜ್ಯಕರಿನ್ ಯಾಜಕರ್‌ ಕರಿನ್ ಬಣಾಯೊ, ಇವ್ಣೆ ಜ಼ಮೀನ್‌ಪರ್ ರಾಜ಼್ ಚ಼ಲಾವ್‌ಷೆ”. ಇನಪಾರ್ ಇನು ಸಿಂಹಾಸನ್ನು ಚಾರ್ ಜೀವಿ ಅಜು಼ ಸಬೆನ ಶಾಣಾವ್ನ ಅಶ್‌ಪಿಶ್ ಭಿಯುಥೂತೆ, ಕೈಯೆಕ್ಕಿ ಜ಼ಣು ದೇವ್‌ದೂತರ‍್ನ ಅವಾಜ಼್‌ನ ಖ್ಹಮ್‌ಜೊ. ಇವ್ಣು ಗಣ್ತಿ ಲಾಖೋಲಾಕ್‌ಬಿ ಕರೋಡೊ ಕರೊಡೋಬಿ ಥು.ಬಿಜು಼ಪಾಛು಼ ದೇಖಾನಿ ವಖ್ಹ್‌ತೆ ದೇವ್ನ ದೂತರ್ ಭಿಯೂಥು. ಆ ದೇವ್ನದೂತರ್‌ನೆ ಜೋ಼ರಾನಿ ಅವಾಜ಼್‌ಥಿ, “ಖೂನಿ ಹುಯಿಗೋತೆ ಮೇಂಢಾನು ಚೆಲ್ಕು ಅದಿಕಾರ್‌ನಾಬಿ, ಧನ್‌ದೌಲತ್ನಾಬಿ, ಅಕ್ಕಲ್‌ನಾಬಿ, ಶಕತ್‍ನಾಬಿ, ಮರ್ಯಾದಿನಾಬಿ, ಮಹಿಮೆನಾಬಿ, ಧನ್ಯವಾದ್‌ನ ಲ್ಯಾವಾನ ಯೋಗ್ಯ ಹುಯಿರೊಸ್” ಕರಿ ಗೀದ್‌ ಬೋಲ್ಯು. ಅತ್ರೇಸ್ ಕಾಹೆತೆ ಆಬ್‌ಮಾಬಿ ಜಮೀನ್‌ಮಾಬಿ ಧರ್ತಿನ ಹೇಟ್‌ಬಿ ದಲ್‌ದರ‍್ಯಾವ್‌ಮಾಬಿ ಉಬ್‍ಜೂತೆ ಅಖ್ಖು ಅಮ್ ಬೋಲ್ಯುಕಿ, “ಸಿಂಹಾಸನ್‌ಪರ್ ಬೆಠೊರ‍್ಹಾವಳನಾಬಿ ಮೇಂಢಾನು ಚೆಲ್ಕು ಹುಯಿರ‍್ಹಾವಳನಬಿ, ಧನ್ಯವಾದ್, ಮರ್ಯಾದಿ, ಮಹಿಮೆ, ಖ್ಹಾರಿಅದಿಕಾರ್, ಜ಼ಗ್‌ಜ಼ಮಾನಮಾಬಿ ರ‍್ಹವಾದೆ.” ಕರಿ ಬೋಲಾನು ಮೆ ಖ್ಹಮ್‌ಜೊ. ಯೋ ಚಾರ್ ಜೀವಿ “ಆಮೆನ್” ಕರಿ ಬೋಲ್ಯು. ಶಾಣುಖ್ಹಾರು, ಆಡ್‍ಪಡಿನ್ ಆರಾದನೆ ಕರ‍್ಯು.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.