Waghri Booli Bible
ಪ್ರಕಾಶಿತ್ 22
ಅನಕೇಡೆಥು ದೇವ್ನದೂತನೆ ಫಟಕ್‌ಡಿನಿಘೋಣಿ ಉಜಾ಼ಖ್ಹ್‌ ದ್ಯವಾನು ಜಾನ್ನು ಪಾಣಿನ ನದ್ದೀನ ಮನ ವತಾಳ್ಯೊ. ಯೊ ನದ್ದಿ ದೇವ್ ಬಿಜು಼ ಮೇಂಢಾನ ಚೆಲ್ಕಾನು ಸಿಂಹಾಸನ್‌ಕಂಥು ಉಬ್ಜಿನ್, ಖ್ಹಯೇರ‍್ನಿ ಮೋಟಿ ಗಲ್ಲೀನ ಇಚ಼್‌ಮ ವ್ಹವ್‌ಕರ‍್ತುಥು. ಯೊ ನದ್ದೀನು ಭೇ ಕನಾರಿಪರ್ ಜಾನ್ನು ಝಾ಼ಡುಖ್ಹಾರು ಥು. ಯೊ ವರಖ್ಹ್‌ನ ಭಾರ ಮಹಿನಾಬಿ ಫಲ್ ದೇತುಹುಯಿನ್ ಭಾರ ಮಹಿನಾಬಿ ಭಾರ ಥರಾನು ಪಂಡುಖ್ಹಾರು ದೇಸ್. ಯೊ ಝಾ಼ಡನ ಪಾಂದ್ಡಾನ ದವೈಥಿ ಖ್ಹಾರ ಜ಼ಗ್‌ಜಾ಼ತ್‌ವಾಳಾನ ಖ್ಹುದ್ರಾವಸ್. ದೇವ್‍ಥಿ ಶಾಪ್ ಲಿದುಹುಯು ಖಿವೂಬಿ ಯೊ ಖ್ಹಯೇರ್‌ಮ ಕೊರ‍್ಹಿಶೇನಿ. ಹಿಜ್ಜಾ಼ ದೇವ್ನು ಅಜು಼ ಬಲೀನ ಮೇಂಢಾನ ಚೆಲ್ಕಾನು ಸಿಂಹಾಸನ್ ರ‍್ಹಿಶೆ.ಇನ ಸೇವಕರ್‌ಯಿನ ಆರಾದನೆ ಕರ್ಶೆ. ಇವ್ಣೆ ಇನು ಮ್ಹೋಡು ದೇಕ್‌ಶೆ ಇವ್ಣ ಮುಡ್‌ಕ್ಯಪರ್ ಇನು ನಾಮ್ ಲೀಖೈರ‍್ಹಿಶೆ. ಅಜು಼ ರಾತ್ ಬೋಲಾನುಸ್ ಕೊರ‍್ಹಿಶೇನಿ. ಇವ್ಣುನ ದೀವೊನು ಉಜಾ಼ಳುಬಿ ಚಾ಼ಂದ್‌ನು ಉಜಾ಼ಳುಬಿ ಹೋಣುಕೊಯ್ನಿ. ಪ್ರಭುಹುಯಿರ‍್ಹೋತೆ ದೇವಸ್ ಇವ್ಣುನ ಉಜಾ಼ಳು ಹುಯಿರ‍್ಹಿಶೆ.ಇವ್ಣೆ ಜ಼ಗ್‌ಜ಼ಮಾನಮಾಬಿ ಜಿವಿರ‍್ಹಿಶೆ.
ಯೇಸು ಬಿಜು಼ಪಾಛು಼ ಆವಾನು
ಇನಪರ್ ದೇವ್ನದೂತನೆ ಮನ, ಆ ವಾತೆಖ್ಹಾರು ವಿಶ್ವಾಸ್ ಕರಖ್ಹರ್ಕೂಬಿ ಖ್ಹಾಚೂ಼ಬಿ ಹುಯಿರ‍್ಹುಸ್. ಪ್ರವಾದಿ ಖ್ಹಾರನ ಆತ್ಮಾನ ಪ್ರಭುಸ್ ದೇವ್ ಹುಯಿರೊಸ್. ಒಗ್ಗಿಸ್‌ಮ ಚಾ಼ಲನಯೂತೆ ವಾತೆಖ್ಹಾರಿ ಇನ ಸೇವಕರ್‌ನ ವತಾಳನ ದೇವ್ನೆಯಿನ ದೂತನ ಮೋಕ್ಲಿರಾಖ್ಯೊಸ್. ಖ್ಹಮ್‌ಜೊ಼, ಮೆ ಘಣು ಜ಼ಲ್‌ದಿ ಆವುಸ್! ಆ ಪುಸ್ತಕ್‌ಮ ಲೀಖೈರ‍್ಹೂತೆ ಖ್ಹಾರಿ ವಚನ್ನ ಪಾಡಿಚಾ಼ಲವಾಳೊ ಧನ್ಯ ಹುಯಿರ‍್ಹೊಸ್ ಕರಿ ಬೋಲ್ಯೊ. ಯೋಹಾನಕರಿ ಮೇಸ್ ಆ ಅಖ್ಖಿ ವಾತೆನ ಖ್ಹಮ್‌ಜೊಹುಯೊಬಿ ದೇಖ್ಯೊಹುಯೋಬಿ ಹುಯಿರ‍್ಹೋಸ್. ಮೆ ಅಖ್ಖೀಸ್ ವಾತೆವ್‌ನ ಖ್ಹಮ್‌ಜಿನ್‌ ದೇಖಾಮ, ಆ ಬಾರೆವ್‌ಮ ಮನ ವತಾಳ್ಯೊತೆ ದೇವ್‌ದೂತನ ಖ್ಹಲಾಮ್ ಕರ್ನುಕರಿ ಇನ ಪಗ್‍ಪರ್ ಪಡ್ಯೊ. ಕತೋಬಿ ಯೋ ದೇವ್ನದೂತನೆ, “ಮನ ಖ್ಹಲಾಮ್ ನಕೊಕರ್. ಮೇಬಿ ತಾರಿನಿತರಾಸ್ ಆ ಪುಸ್ತಕ್‌ಮ ಛಾ಼ತೆ ಅಖ್ಖಿ ವಚನ್ನ ಪಾಡಿ ಚಾ಼ಲ್ಯಹುಯ ಅದ್ಮಿನಿತರಸ್. ಅಜು಼ ತಾರ ಭೈಯೇ ಹುಯಿರ‍್ಹಾತೆ ಪ್ರವಾದಿನಿ ಘೋಣಿ ಮೇಬಿ ಖಲಿ ಏಕ್‌ ಸೇವಕ್ ಹುಯಿರ‍್ಹೊಸ್. ತೂ ದೇವ್ನ ಖ್ಹಲಾಮ್ ಕರ್‌” ಕರಿ ಬೋಲ್ಯೊ. ಆನಾಹುಯಿನ್ ದೇವ್ನದೂತನೆ ಮನ, “ಆ ಪುಸ್ತಕ್‌ಮ ಛಾ಼ತೆ ದೇವ್‍ಥಿ ಆವಾನು ವಚನ್ ಅಖ್ಖಾನ ಗಪ್ಲತ್ ನಕೊಕರ್. ಶನಕತೊ ಆ ಅಖ್ಖು ಚಾ಼ಲಾನ ದನ್ ಖನ್ನೆ ಐಗು. ಠಗಾವವಾಳೊ ಅಜೂ಼ಬಿ ಠಗಾವ್ತೊಸ್ ರ‍್ಹವಾದೆ. ಮೈಲು ರ‍್ಹವಾಳೊ ಇನ ಬಿಜೂ಼ಬಿ ಮೈಲು ಕರಿಲಾವದೆ, ನೀತಿವಾಳೊ ಬಿಜೂ಼ಬಿ ನೀತಿವಾಳೊ ಹುವಾದೆ ಅಜು಼ ಪರಿಶುದ್ ಹುಯಿರ‍್ಹಾವಳೊ ಇನ ಅಜೂ಼ಬಿ ಪರಿಶುದ್ ಕರಿಲ್ಯವಾದೆ. ‘ದೇಖ್ ಮೇ ಜ಼ಲ್ದೀಸ್ ವಳ್ಯಾವ್‌ಸ್. ಮೆ ಹರೇಕ್ ಜ಼ಣಾನ ಇವ್ಣ ಇವ್ಣ ಚಾ಼ಲ್‌ನಿತರಸ್ ದ್ಯವಾನಿತರಾನು ಪ್ರತಿಫಲ್ ಮಾರಕನ ಛಾ಼. ಮೇಸ್ ಪಹಿಲೋಬಿ ಖ್ಹರ್ತಿಬಿ, ಪಹಿಲೋಬಿ ಕಡ್‌ಶಿನೋಬಿ, ಶುರುವಾತ್‍ಬಿ, ಖತಮ್‌ಬಿ ಹುಯಿರ‍್ಹೊಸ್. ಇವ್ಣ ಝ಼ಗ್ಗಾವ್‍ನ ದೊಹಿಲಿನ್ ಶುದ್‍ ಹುಯಿರ‍್ಹವಾಳು ಧನ್ಯರ್. ಇವ್ಣೆ ಜಾನ್ನ ಝಾ಼ಡ್‌ನು ಪಂಡು ಖಾವನ ಹಕ್‍ದಾರ್ ಹುಯಿರ‍್ಹಿಶೆ. ಇವ್ಣೆ ಬಾಕಲ್ನ ವಾಟೆಕರಿ ಯೋ ಖ್ಹಯೇರ‍್ನ ಮಹಿ ಜಾ಼ವಳು ಹುಯಿರ‍್ಹಿಶೆ. ಕತೋಬಿ ಕುತ್‌ರ‍್ಯಾವ್‌ನಿತರ ರ‍್ಹವಾಳುಬಿ, ಜಾ಼ದು ಕರವಾಳುಬಿ, ವ್ಯಬಿಚಾರ್ ಕರವಾಳುಬಿ, ಖೂನಿಖ್ಹಾರುಬಿ, ಮೂರತ್ನ ಖ್ಹಲಾಮ್ ಕರಾವಳುಬಿ, ಝೂ಼ಟಾನ ಪ್ಯಾರ್‌ಕರೀನ್ ಚಾ಼ಲವಾಳು ಅಜು಼ ಬೋಲವಾಳು ಯೊ ಖ್ಹಯೇರ‍್ನ ಭಾರ್‌ ರ‍್ಹಿಶೆಕರಿ ಬೋಲ್ಯೊ. “ಯೇಸು ಕರಿ ಮೇಸ್ ಮಾರು ಖ್ಹಾರ ಸಬೇವ್ನಿ ಬಾರೇಮ ತುಮುನ ಸಾಕ್ಷಿ ಬೋಲಾನಖ್ಹಾಜೆ ಮಾರ ದೂತನ ಮೋಕ್ಲಿರಾಖ್ಯೊಸ್. ಮೇ ದಾವೀದನು ಖೂಮ್‌ ಕರಿ ಬೋಲಾನು ಬಡ್ಡೇಥು ನಿಕ್‌ಳ್ಯುತೆ ಚಿಗುರ್‌ಬಿ, ಇನಿ ಸಂತಾನ್‌ಬಿ ಉಜಾ಼ಖ್ಹ್‌ಥಿ ನಿಕ್ಳಾನೊ ಶುಕ್ಕರ್‌ಬಿ ಹುಯಿರೊಸ್. ಆತ್ಮ ಅಜು಼ ವ್ಯತುಲ್ಡೀಬಿ, ಆವ್ಣುಕರಿ ಬೋಲ್‌ಶೆ. ಖ್ಹಮ್‌ಜಾ಼ವಾಳೊ, ಆವ್‌ಕರಿ ಬೋಲಾದೆ. ಠೋಖ್ಹ್‌ ರ‍್ಹವಾಳೊ ಆವಾದೆ, ಆಖ್ಹ್ ರ‍್ಹವಾಳೊ ಜಾನ್ನಪಾಣಿನ ಮೋಲ್‌ಕೊಂತೆ ಫುಗಟ್‍ಥಿ ಲಿಲ್ಯಾವದೆ.
ಖತಮ್
ಆ ಪುಸ್ತಕ್‌ಮ ಲೀಖೈರ‍್ಹೂತೆ ಪ್ರವಾದನೆನು ವಚನ್‌ಖ್ಹಾರು ಖ್ಹಮ್‌ಜಾ಼ತೆ ಹರೇಕ್ ಜ಼ಣಾನಾಬಿ ಮೇ ಬೋಲಾನಿ ಸಾಕ್ಷಿ ಶಾತ್‌ಕತೊ, “ಕೋಣ್‌ತೋಬಿ ಅನಾಮ ಶಾತ್ತೋಬಿ ಮಳಾಯೊತೊ, ದೇವ್ ಇವ್ಣಪರ್ ಆ ಪುಸ್ತಕ್‌ಮ ಲೀಖೈರ‍್ಹುತೆ ಖ್ಹತಾಪ್ಣಿಖ್ಹಾರು ಆವಾನಿತರ ಕರ್ಶೆ. ಖಿವೊತೋಬಿ ಆ ಪ್ರವಾದನೆನು ವಚನ್‌ಮ ಏಕ್ನತೋಬಿ ಕಾಡಿನಾಖ್ಯೊತೊ, ಆ ಪುಸ್ತಕ್‌ಮ ಬೋಲೈರ‍್ಹುಸ್ತೆ ಜಾನ್ನ ಝಾ಼ಡಮಾಬಿ ಪರಿಶುದ್ಧ ಖ್ಹಯೇರ್‌ಮಾಬಿ ಇನಛಾ಼ತೆ ವಾಟಾನ ದೇವ್ ಕಾಡಿನಾಕ್‌ಶೆ. ಆ ಬಾರೇಮ ಸಾಕ್ಷಿ ಬೋಲವಾಳೊ, “ಒಹೊ, ಮೇ ಖ್ಹಾಚಮಾಸ್ ವಗ್ಗಿಸ್ ಆವುಸ್” ಕರಿ ಬೋಲಾಸ್. ಆಮೆನ್. ಪ್ರಭು ಹುಯಿರ‍್ಹೋತೆ ಯೇಸು, ಆವ್. ಪ್ರಭು ಹುಯಿರ‍್ಹೋತೆ ಯೇಸುನಿ ವಾರ್‌ಖ್ಹೊ ಅಖ್ಖಾಸ್ನಿ ಜೋ಼ಡ್ಮ ರ‍್ಹವಾದೆ. ಆಮೆನ್!
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.