Waghri Booli Bible
ಮತ್ತಾಯ 14
ಬ್ಯಾಪ್ತಿಸ್ಮ ದ್ಯವಾಳೊ ಯೋಹಾನ ಮರ‍್ಯೋತೆ ಬಾರೇಮ
(ಮಾರ್ಕ 6:14-29; ಲೂಕ 9:7-9)
ಯೋ ದನೂಮ, ಹೆರೋದ ಗಲಿಲಾಯಮ ರಾಜ಼್‌ಭಾರ್‌ ಚ಼ಲಾವ್‍ ಕರ್ತೊಥೊ, ಅದ್ಮಿಖ್ಹಾರು ಯೇಸುನಿ ಬಾರೇಮ ಬೋಲುಕರ್ತುಥೂತೆ ಇನೆ ಖ್ಹಮ್‌ಜೊ. ಇನಖ್ಹಾಜೆ ಇನೆ ಇನ ಸೇವಕರ್‌ನ, “ಖ್ಹಾಚಮಾಬಿ ಯೇಸುಸ್‌ ಬ್ಯಾಪ್ತಿಸ್ಮದ್ಯವಾಳೊ ಯೋಹಾನ ಹುಯಿರ್‍ಹೊಸ್, ಯೋಸ್ ಪಾಛೊ಼ ಜಿವ್ತೊಹುಯಿನ್ ಐರ‍್ಹೋಸ್. ಇನಖ್ಹಾಜೇಸ್ ಆ ಖ್ಹಾರು ಅದ್ಭುತ್ ಕರಾನ ಶಕತ್ ಮಳಿರ‍್ಹೀಸ್ತೆ” ಕರಿ ಬೋಲ್ಯೊ.
ಹೆರೋದನೆ ಹೆರೋದ್ಯನಖ್ಹಾಜೆ ಯೋಹಾನ್ನ ಧರೈನ್, ಭಂದೈನ್, ಜೇಲ್‌ಮ ಕೋಂಡಿ ಘಲಾಯೋಥೊ. ಆ ಹೆರೋದ್ಯ ಹೆರೋದನೊ ಮೋಟೊ ಭೈ ಫಿಲಿಪ್ಫನಿ ಬಾವಣ್‍ ಹುಯಿರ‍್ಹೀಥಿ. ಯೋಹಾನ ಹೆರೋದಾನ, “ತೂ ಹೆರೋದ್ಯನ ರಾಖಿರಾಖ್ಯೋತೆ ನ್ಯಾವ್‌ಕಾಹೆ” ಕರಿ ಬೋಲ್ತೊರ‍್ಹೇತೋಥೊ. ಹೆರೋದ ಯೋಹಾನ್ನ ಮರೈನಾಕ್ಣು ಕರಿ ಥೊ, ತೋಬಿ ಅದ್ಮಿಖ್ಹಾರು ಯೋಹಾನ ಏಕ್‌ ಪ್ರವಾದಿ ಕರಿ ಮಾನ್‌ತುಥೂತೆ ಇನಖ್ಹಾಜೆ, ಅದ್ಮಿನ ಡರ್‌ಥಿ ಇನ ಮರಾಯೊ ಕೊಯ್ನಿ.
ಹೆರೋದನೊ ಪೈದಾಖ್ಹ್‌ನೊ ದನ್ಮ, ಹೆರೋದ್ಯನಿ ಛೋ಼ರಿ ಹೆರೋದ ಅಜು಼ ಇನ ಮೆಹೆಮಾನ್ನ ಖ್ಹಾಮ್ಣೆ ನಾಚಿನ್ ವತಾಳಿ. ಅನೇಥಿ ಹೆರೋದನ ಘಣು ಖ್ಹುಶಿ ಹುಯು. ಇನಖ್ಹಾಜೆ ಇನೆ, “ತೂ ಶಾತ್ ಬೋಲಿಲಿದಿತೋಬಿ, ಮೇ ತುನ ದೆವುಸ್‌” ಕರಿ ಯೋ ಛೋ಼ಕ್ರಿನ ವಾಗ್ದಾನ್‌ದಿದೊ
ತದೆ ಇನಿ ಆಯ ಶಾತ್ ಮಾಂಗಿಲೆವ್ಣು ಕರಿ ಇನ ಬೋಲಿದಿದಿ. ತದೆ ಇನೆ, “ಹಮ್ಕೆ, ಹಜ್ಜಾ಼ಸ್ ಬ್ಯಾಪ್ತಿಸ್ಮದ್ಯವಾಳೊ ಯೋಹಾನನು ಮುಡ್‌ಕ್ಯು ಪತ್ತರ್‌ಮ ಮಂಗೈನ್, ಮನ ದೇವ್ಣು” ಕರಿ ಬೋಲಿ.
ಯೋ ವಾತೇಥಿ ರಾಜಾ಼ನ ದುಖ್ ಹುಯು, ತೋಬಿ ಇನೆ ಇನ ಮೆಹಮಾನ್ ಅಖ್ಖಾನ ಖ್ಹಾಮ್ಣೆ ಆಣ್ ದಿದೋತೆ ಇನಖ್ಹಾಜೆ, ಇನೆ ಮಾಂಗಿತೆ ಇನ ದೇವ್ಣುಕರಿ ಹುಕುಮ್ ದಿದೊ. ಅಜು಼ ಆಳ್‌ನ ಮೋಕ್ಲಿನ್, ಜೇಲ್‌ಮ ಕೋಂಡಿ ಘಾಲಿರಾಖ್ಯುತೆ ಹಿಜ್ಜಾ಼ ಯೋಹಾನನು ಮುಡ್‌ಕ್ಯು ಕತ್ರಾಯೊ. ಇವ್ಣೆ ಯೋಹಾನ್ನ ಮುಡ್‌ಕ್ಯಾನ ಪತ್ತರ್‌ಮ ಲೈನ್‌, ಯೋ ಛೋ಼ಕ್ರಿನ ದಿದು. ಇನೆ ಯೋ ಮುಡ್‌ಕ್ಯಾನ ಇನಿ ಆಯಕನ ಲೀಗೈ. ಯೋಹಾನನು ಶಿಷ್ಯರ್‌ ಆಯಿನ್, ಇನು ಧಡ್‌ನ ಪಳ್ಳಿಜೈ಼ನ್‌, ಘವಿಮ ಘಾಲ್ಯು. ಅನಕೇಡೆಥು ಇವ್ಣೆ ಯೇಸುಕನ ಜೈ಼ನ್‌, ಚಾ಼ಲ್ಯುತೆ ಬಾರೇಮ ಬೋಲ್ಯು.
ಯೇಸುನೆ ಪಾಚ಼್ ಹಜಾ಼ರ್‌ ಅದ್ಮಿನ ಖಡಾಯೋತೆ
(ಮಾರ್ಕ 6:30-44; ಲೂಕ 9:10-17)
ಯೇಸುನೆ ಯೋಹಾನ್ನಿ ಬಾರೇಮಾನು ಖಬರ್‌ನ ಖ್ಹಮ್‌ಜಿನ್‌, ಯೋ ಝ಼ಗೋನ ಮ್ಹೆಂದಿನ್, ಡೋಣ್‌ ಚ಼ಢೀನ್, ಎಕ್ಕಸ್ ಜ಼ಣೊ ಉಜ್ಜಾ಼ಡಿ ಝ಼ಗೋನ ಚ಼ಲೆಗಯೊ. ಅನ ಖ್ಹಮ್‌ಜಿನ್‌ ಅದ್ಮಿಖ್ಹಾರು, ಇವ್ಣ-ಇವ್ಣ ಗಾಮ್‌ನ ಮ್ಹೆಂದಿನ್, ಗೋಡೇಥೀಸ್‌ ಚಾ಼ಲಿನ್ ಯೇಸುನ ಪೀಠೆಗಯು. ಯೇಸು ಡೋಣ್‌ಮಾಥು ಭಾರ್‌ ಆಯಿನ್, ಅದ್ಮಿನಿ ಘಣಿ ಮೋಟಿ ಭೀಡ್‌ಣ ದೇಖಿನ್‌, ಇವ್ಣಾಪರ್ ಗೋರ್‌ಖೈನ್, ರೋಗ್‌ಮ ರ‍್ಹವಾಳಾನ ಖ್ಹಾರು ಅಛ್ಛು಼ ಕರ‍್ಯೊ.
ಖ್ಹಾಂಜ಼್ ಹುವ್ವಾದೀನ್, ಇನ ಶಿಷ್ಯರ್‌ ಇನಾಕನ ಐನ್, “ಆ ಉಜ್ಜಾ಼ಡಿ ಝ಼ಗೊ, ಅಜು಼ ವಖ್ಹತ್‍ಬಿ ಘಣಿ ಹುಯಿಗೈ. ಆ ಅದ್ಮಿಖ್ಹಾರು ಇವ್ಣಖ್ಹಾಜೆ ಖಾಣನು ರಾಛು಼ ಲ್ಯವಾನಟೇಕೆ, ಇವ್ಣುನ ಗಾಮೆ ಬೋಲಿಮೋಕಲ್‌” ಕರಿ ಬೋಲ್ಯ.
ಯೇಸುನೆ ಇವ್ಣುನ, “ಅದ್ಮಿಖ್ಹಾರು ಜಾ಼ವಾನು ನಕೊ, ತುಮೇಸ್ ಇವ್ಣುನ ಖಾವಾನ ಶಾತ್‌ತೋಬಿ ದೆವೊ!” ಕರಿ ಬೋಲ್ಯೊ.
ತದೆ ಶಿಷ್ಯರ್‌ನೆ, “ಹಜ್ಜಾ಼ ಹಮಾರಕನ ಪಾಚ಼್ ರೋಟಾ ಅಜು಼ ಬೇ ಮಾಛ಼್‌ಲಾ ಎತ್ರುಸ್ ಛಾ಼ತೆ” ಕರಿ ಜವಾಬ್‌ ದಿದಾ.
ತದೆ ಯೇಸುನೆ, “ಇನ ಹಜ್ಜಾ಼ ಮಾರಕನ ಲೀನ್, ಆವೊ” ಕರಿ ಬೋಲ್ಯೊ. ಅಜು಼ ಅದ್ಮಿ ಖ್ಹಾರಾನ ಘಾಖ್ಹ್‌ಪರ್‌ ಬೇಖ್ಹೊ ಕರಿ ಬೋಲಿನ್, ಯೋ ಪಾಚ಼್ ರೋಟಾ ಅಜು಼ ಬೇ ಮಾಛ಼್‌ಲಾನ ಪಾಡಿಲೀನ್, ಆಬ್‍ಭಣಿ ದೇಖಿನ್‌, ದೇವ್ನ ಧನ್ಯವಾದ್ ಕರೀನ್, ಯೋ ರೋಟಾವ್ನ ತೋಡಿನ್, ಶಿಷ್ಯರ್‌ನ ಹಾತ್‌ಮ ದಿದೊ. ಶಿಷ್ಯರ್‌ನೆ ಅದ್ಮಿನಿ ಝೂ಼ಂಡ್‌ನ ದಿದಾ. ತಮಾಮ್‌ ಅದ್ಮಿ ಖೈನ್ ಬಶ್‌ಹುಯು. ಉಬ್‍ರ‍್ಯುತೆ ಟುಕ್ಡಾವ್‍ನ ಜ಼ಮಾಕರ್ತಖ್ಹತರ್‌ ಭಾರ ಟೋಕ್ರಾ ಭರಾಯು. ಖಾಣು ಖಾದೂತೆ ಇವ್ಣಾಮ ತಯೇಡ ಅಜು಼ ಲಡ್ಕಾವ್ನ ಮ್ಹೆಂದಿನ್, ಪರ್ಖ್ಹಾ ಅದ್ಮಿಸ್‌ ಕಮ್‌ಶಿಕಮ್ ಪಾಚ಼್ ಹಜಾ಼ರ್‌ಜ಼ಣು ಥೂ.
ಯೇಸುನೆ ದರ‍್ಯಾವ್‌ಪರ್ ಚಾ಼ಲ್ಯೋತೆ
(ಮಾರ್ಕ 6:45-52; ಲೂಕ 6:15-21)
ಅನಕೇಡೆಥು ಯೇಸುನೆ ಇನ ಶಿಷ್ಯರ್‌ನ, “ಮೇ ಆ ಅದ್ಮಿನಿ ಭೀಡ್‌ಣ ಮೋಕ್ಲಾನ ಮಹಿ, ತುಮೆ ಡೋಣ್‌ ಚ಼ಢೀನ್, ಪಹಿಲೆ ಪಾರ್ಲಿ ಕನಾರೆ ಜಾ಼ವೊ” ಕರಿ ಬೋಲ್ಯೊ. ಅದ್ಮಿನಿ ಭೀಡ್‌ಣ ಮೋಕ್ಲಾನ ಬಾದ್‌ಮ, ಪ್ರಾರ್ಥನೆ ಕರಾನಖ್ಹಾಜೆ ಯೋ ಎಕ್ಲೋಸ್ ಪಹಾಡ್‌ಪರ್ ಗಯೊ. ದನ್ ಡುಬಾನ ಬಾದ್‌ಮ, ಯೇಸು ಎಕ್ಲೋಸ್ ಹಿಜ್ಜಾ಼ ಥೊ. ಎತ್ರಾಸ್‌ಮ ಡೋಣ್‌ ಜ಼ಮೀನ್‌ಥಿ ಘಣಿ ದೂರ್ ಜೈ಼ರ‍್ಹೀಥಿ, ಅಜು಼ ಖ್ಹಾಮ್ಣೆನೊ ವಹಿರೊ ವಾಗುಕರ್ತೊಥೋತೆ ಇನಖ್ಹಾಜೆ, ಡೋಣ್‌ ದರ್ಯಾವ್ನ ಇಚ಼್‌ಮ ಜ್ಹೋಕಾಳ್ಯನ ಮಾರ್‌ಮ ಖ್ಹಪ್‌ಡಿರ‍್ಹೀಥಿ.
ವ್ಹಾಣ್‌ಖ್ಹತ್ರೆ ಚಾರ್‌ ಘಂಟಾ ಹುಯಿರ‍್ಹುಥು, ತದೆ ಯೇಸು ದರ‍್ಯಾವ್‌ಪರ್ ಚಾ಼ಲ್ತೊಹುಯಿನ್‌ ಶಿಷ್ಯರ್‌ ಭಣಿ ಆಯೊ. ದರ‍್ಯಾವ್‌ಪರ್ ಚಾ಼ಲ್ತೊವಳ್ಯಾವಾತೆ ಯೇಸುನ ಶಿಷ್ಯರ್‌ನೆ ದೇಖಿನ್‌, ಘಬ್‌ರೈಗಯ. ಅಜು಼ ಭೂತ್‌ಕರಿ ಸೋಚಿನ್, ಡರ್‌ಥಿ ಚಿಕ್‌ರ‍್ಯ.
ತದ್‌ನು-ತದ್ದೇಸ್ ಯೇಸುನೆ ವಾತೆ ಬೋಲಿನ್ ಇವ್ಣುನ, “ಹಿಮ್ಮತ್‌ ರ‍್ಹವಾದೆ; ಆ ಮೇಸ್! ಡರೊ ನಕೊ!” ಕರಿ ಬೋಲ್ಯೊ.
ತದೆ ಪೇತ್ರನೆ, “ಪ್ರಭು, ಆ ತೂಸ್ ಉಶೇತೊ, ಮನ ಪಾಣಿಪರ್‌ ಚಾ಼ಲಿನ್ ತಾರಕನ ಆವಾನ ಹುಕುಮ್ ದೇ” ಕರಿ ಬೋಲ್ಯೊ.
ಯೇಸುನೆ ಇನ, “ಆವ್!” ಕರಿ ಜ಼ವಾಬ್‌ದಿದೊ. ತದೆ ಪೇತ್ರ ಯೇಸುಕನ ಜಾ಼ವಾನಖ್ಹಾಜೆ ಡೋಣ್‌ಮಾಥು ಉತ್ರಿನ್, ಪಾಣಿಪರ್‌ ಚಾ಼ಲಲಗ್ಯೊ. ಕತೋಬಿ ವ್ಹಯಿರಾನ ರಪಾಟಾನ ದೇಖಿನ್‌ ಡರಿನ್, ಪಾಣಿಮ ಡುಬಾಲಗ್ಯೊ ಅಜು಼ “ಪ್ರಭು, ಮನ ಬಚಾ಼ಡ್‍!” ಕರಿ ಚಿಕ್‌ರ‍್ಯೊ.
ಯೋಸ್ ವಖ್ಹತ್‌ಮ ಯೇಸು ಹಾತ್‌ ಖ್ಹಾಮ್ಣೆ ಕರೀನ್, ಇನ ಧರೀನ್, “ಏ ಕಮ್‍ವಿಶ್ವಾಸ್‍ವಾಳ! ತೂ ಶನ ಶಕ್ ಕರ‍್ಯೊ?” ಕರಿ ಬೋಲ್ಯೊ.
ಇವ್ಣೆ ಡೋಣ್‌ಮ ಚ಼ಢಾನ ಬಾದ್‌ಮ, ವಹಿರೊ ಭೀರಿಗಯೊ. ತದೆ ಡೋಣ್‌ಮ ಥಾತೆ ಶಿಷ್ಯರ್‌ನೆ, “ಖ್ಹಾಚ಼ಮಾಬಿ ತೂ ದೇವ್‌ನೊ ಛಿಯ್ಯೊ” ಕರಿ ಬೋಲಿನ್, ಯೇಸುನ ಆರಾದನೆ ಕರ‍್ಯಾ.
ಯೇಸುನೆ ಗೆನೆಜರೇತ್‌ಮ ಥೂತೆ ರೋಗ್‌ವಾಳಾನ ಅಛ್ಛು಼ ಕರ‍್ಯೊತೆ
(ಮಾರ್ಕ 6:53-56)
ಇವ್ಣೆ ದರ್ಯಾವ್ನ ಮ್ಹೇಲಿನ್, ಗೆನೆಜರೇತ್‍ ಝ಼ಗೋನಿ ಕನಾರೆಕನ ಆಯಾ. ಯೋ ಝ಼ಗೊವಾಳು ಯೇಸುನಿ ಖ್ಹಣೇದ್ ಧರೀನ್, ಇವ್ಣೆ ಯೋ ಅಶ್‌ಪಿಶ್‌ನು ತಬರ್‌ಖಾಮ ಖ್ಹಾರು ಬೋಲಿಮೋಕ್ಲಿನ್, ರೋಗ್‌ಮ ರ‍್ಹವಾಳ ತಮಾಮ್‌ನ ಯೇಸುಕನ ಬುಲೈ ಮಂಗಾಯು. ಇವ್ಣೆ ಯೇಸುನ, “ಆ ರೋಗ್‌ಮ ರ‍್ಹವಾಳಾನ ತಾರು ಲುಂಗ್ಡಾನು ಕೋಣೊತೋಬಿ ಛೀಮಾನ ಮ್ಹೇಲ್‌” ಕರಿ ಗಿಂಗೈಲಿದು. ಅಜು಼ ಇನು ಲುಂಗ್ಡು ಛೀಮ್ಯೂತೆ ಹರೇಕ್ನ ಅಛ್ಛು಼ ಹುಯು.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.