Waghri Booli Bible
ಯಾಕೋಬ 5
ಶೌಕಾರ್‌ನ ಝೇತಾವ್ಣಿ
ಶೌಕಾರ್‌ವಾಳೊ, ತುಮೂನ ಆವ್‌ಶೇತೆ ಖ್ಹತಾಪ್ಣಿನಖ್ಹಾಜೆ ಆಂಝು಼ನಾಖೊ, ರದನ್ ಕರೊ. ತುಮಾರಿ ಧನ್‍ ದೌಲತ್ ನಾಶ್‍ಹುಯಿಗು. ತುಮಾರ ಲುಂಗ್ಡಾನ ಕಂದ್‌ ಧರಿಲಿದು. ತುಮಾರು ಖ್ಹೊನ್ನು, ರೂಪು ಕಿಲಪ್‍ ಧರಿನ್‍ ಮಾಟಿನ ಬರೋಬರ್ ಹುಯಿರ್ಹುಸ್. ಯೋ ಖ್ಹಾರಾನು ಕಿಲಪ್‍ ತುಮೂನ ವಿರೋದ್. ಸಾಕ್ಷಿ ಹುಯಿರ‍್ಹಿನ್ ಆಗ್‍ನಿತರ ತುಮಾರಿ ಬೋಟಿನ ಭುಂಜಿನಾಕ್‍ಶೆ. ಖ್ಹರ್ತಿನ ದನ್ಮ ಆಯಿಗುತೋಬಿ ದೌಲತ್ ಜ಼ಮಾಕರೀನ್ ತುಮೆ ಮ್ಹೇಲಿರಾಖ್ಯಸ್. ದೇಖೊ ತುಮಾರ ಖೇತರ್‌ಮಾನು ಅನಾಜ಼್ ವ್ಹಾಡ್ಯಹುಯಾನಿ ಕೂಲಿ ದಿದಾಕೊಂತೆ ತುಮೆ ಠಗೈಲಿದಾ. ಯೋ ಕೂಲಿವಾಳನಿ ಕೂಘಾಟಿ ಅಜು಼ ವ್ಹಾಡವಾಳಾನಿ ಚಿಕ್ರಾಣ್ ಆ ಅಖ್ಖಾನ ಕರಾವಾಳೊ ಸೊರ್ಗನು ಡಂಡ್ನೊ ಸರ್ವಶಕ್ತ ದೇವ್ ಪ್ರಭುನ ಕಾನ್ಮ ಟಹುಕೊ ಪಡಿರ‍್ಹುಸ್, ಧರ್ತಿಪರ್ ತುಮೆ ಸುಕ್‍ಭೋಗ್‍ವಾಳ ಹುಯಿನ್ ತುಮಾರಿ ಆಖ್ಹ್‌ನ ಪೂರಕರೈಲ್ಯವಾಳ ಹುಯಿನ್ ಜಿವಿರ‍್ಹಾಸ್‍. ಬಲಿನ ದನ್ನ ಖ್ಹಾಜೆಕಿಶುಕಿ ಕರಿ ತುಮಾರು ದಿಲ್ನ ಫುಲೈಲಿದಾತೆ. ತುಮೆ ನೀತಿವಾಳಾನ ಗಾಳೆದೀನ್ ಖೂನ್‌ಕರಿನಾಖ್ಯ, ಯೊತೋಬಿ ತುಮುನ ವಿರೋದ್ ಕರುಕರಕೊಯ್ನಿ.
ಪ್ರಾರ್ಥನೆ ಅಜು಼ ಖ್ಹಮಾಳಾನು
ಭೇನೆ ಭೈಯೇವೊ, ಪ್ರಭು ಆವಾಲಗು ಖ್ಹಮಾಳಿರ‍್ಹವೊ. ಪಿಕಾವವಾಳಾನ ದೇಖೊ, ಯೋ ಜ಼ಮೀನ್ನು ಮೋಲ್ನ ಜಾ಼ವಾನು ಫಲ್ನಖ್ಹಾಜೆ ಟಿವೈರ‍್ಹೀನ್ ಮುಂಗಾರ‍್ನೊ. ಹಿಂಗಾರ‍್ನೊ ಪಾಣಿಅಖ್ಖು ಆವಾಲಗು ಖ್ಹಮಾಳಿನ್ ರ‍್ಹೇಸ್. ತುಮೇಬಿ ಖ್ಹಮಾಳಿರ‍್ಹವೊ, ತುಮಾರ ದಿಲ್ನ ಘಟ್‍ಕರಿಲೆವೊ. ಶನಕತೊ ಪ್ರಭು ಆವಾನದನ್‍ ಖನ್ನೆ ಹುಯಿಗು. ಭೈಯೇ ಭೇನೆವೊ, ತುಮೆ ಏಕ್‌ನ ಉಪ್ಪರ್ ಏಕ್ ಗಲತ್‌ ನಕೊಬೋಲೊ; ಅನೇಥಿ ನ್ಯಾವ್ನಿ ತೀರ್ಪ್‌ಮ ಪಡಿಜಾ಼ಶು. ಹಂದೇಖೊ ನ್ಯಾವ್‍ನೊ ಅದಿಪತಿ ಬಾಕಲ್‌ನ ಖ್ಹಾಮ್ಣೇಸ್ ಭೀಯೊಸ್‍. ಭೈಯೇ ಭೇನೆವೊ, ವದೇಖ್ಹಾನ ಖ್ಹಮಾಳಿಲ್ಯಾವಾನಿ ಬಾರೇಮ ಪ್ರಭುನ ನಾಮ್‍ಥಿ ವಾತ್ ಬೋಲ್ಯಾತೆ ಪ್ರವಾದಿ ಖ್ಹಾರನಾಸ್ ಯಾದ್ ಕರಿಲೆವೊ. ಹಂದೇಖೊ, ಖ್ಹಮಾಳಿಲ್ಯಾವಾಳನ ಧನ್ಯಕರಿ ಅಪ್ಣೆ ಗಣ್ತಿ ಕರಿಯೇಸ್ ಕೊಯ್ನಿಕಿಶು, ತುಮೆ ಯೋಬಮ ಥೂತೆ ಖ್ಹಮಾಳಿಲ್ಯವಾನಿ ಬಾರೇಮ ಖ್ಹಮ್‍ಜೊ, ಪ್ರಭು ಇನ ಖ್ಹರ್ತಿಮ ಕರ‍್ಯೊತೆ ದೇಖೊ. ಪ್ರಭು ಗೋರ್‌ವಾಳೋಬಿ ಅಜು಼ ದಯಾಕರವಾಳೊಬಿ ಹುಯಿರ್‍ಹೊಸ್ ಕರಿ ಖ್ಹಮ್‌ಜಿರಾಖ್ಯಾಸ್‌.
ಮುಖ್ಯಥಿ ಮಾರೆ ಭೈಯೇ ಭೇನೆವೊ, ಆಣ್ ಕರೋಸ್ ನಕೊ ಆಬ್‌ಪರ್‌ ರ‍್ಹವೊ. ಧರ್ತಿಪರ್ ರ‍್ಹವೊ. ಬಿಜ಼಼ ಶನಾಪರ್‌ಬಿ ರ‍್ಹವೊ ಆಣ್ ಕರೋನಕೊ ಒಹೊ ಕರಿ ಬೋಲಾನು ರ‍್ಹಯಾತೊ ಒಹೊಕರಿ ಬೋಲೊ; ಕೊಯ್ನಿಕರಿ ಬೋಲಾನು ರ‍್ಹಯಾತೊ ಕೊಯ್ನಿಕರಿ ಬೋಲೊ; ಅಮ್‍ರ‍್ಹಯಾತೊ ತುಮೆ ನ್ಯಾವ್ನಿ ಖ್ಹಣೇದ್ ಉಶುಕೊಯ್ನಿ. ತುಮಾರಮ ಕೋಣ್‌ತೋಬಿ ಖ್ಹತಾವಾಳ ಛಾ಼ಕಿ? ಯೋ ದೇವ್ನ ವಿಶ್ವಾಸ್‍ಥಿ ಪ್ರಾರ್ಥನೆ ಕರಾದೆ. ತುಮಾರಮ ಕೋಣ್‌ತೋಬಿ ಖ್ಹುಶಿ ಕರಾವಾಳೊ ಛಾ಼ಕಿ? ಇವ್ಣೆ ದೇವ್ನ ಸ್ತುತಿನು ಗೀದ್‌ ಬೋಲಾದೆ. ತುಮಾರಮ ಕೋಣ್‌ತೋಬಿ ಜಾನ್ನ ಅಛ್ಛು಼ ನಾ ರ‍್ಹವಾಳು ಛಾ಼ಕಿ? ಯೋ ಸಬೇನು ಶಾಣವ್ನ ಬುಲೈನ್ ಪ್ರಾರ್ಥನೆ ಕರಾನ ಬಿಂತಿ ಕರಾದೆ. ಇವ್ಣೆ ಪ್ರಭುನ ನಾಮ್‍ಥಿ ಇನ ತೇಲ್ ಲಗಾಡಿನ್ ಇನದೇಶೆ ದೇವ್ನ ಪ್ರಾರ್ಥನೆ ಕರಾದೆ. ವಿಶ್ವಾಸ್‍ಥಿ ಕರಾತೆ ಪ್ರಾರ್ಥನೆ ರೋಗ್‌ವಾಳನ ಗುಣ್‌ಕರಸ್‌. ಅಜು಼ ಪ್ರಭು ಇನ ಉಠಾಡಸ್, ಯೋ ಪಾಪ್ ಕರಿರಾಖವಾಳೊ ಉಷೇತೊ, ದೇವ್ ಯೋ ಪಾಪ್ ಅಖ್ಖಾನ ಕ್ಷಮಾಕರ್‌ಶೆ. ಅಮ್‍ರ‍್ಹವಾಪರ್ ತುಮೆ ಗುಣ್ ಹೋಣುಕತೊ ತುಮಾರಿ ಪಾಪ್ನಅಖ್ಖಾನ ಏಕ್‌ಥಿಏಕ್ ಹರ್‌ಕೆ ಕರಿನ್ ಏಕ್ ಜ಼ಣಾನಖ್ಹಾಜೆ ಏಕ್‍ಜ಼ಣು ಪ್ರಾರ್ಥನೆಕರೊ. ನೀತಿವಂತಾನು ಪ್ರಾರ್ಥನೆ ಘಣು ಶಕತ್ನು ಹುಯಿರ್ಹುಸ್. ಎಲೀಯ ಅಪ್ಣಿ ಥರಾನಿ ಖ್ಹಯಾಲ್‍ವಾಳೊ ಹುಯಿರ‍್ಹೋಥೊ. ಯೋ ಪಾಣಿ ನಾ ವರಖ್ಹ್‌ಣುಕರಿ ಭಕ್ತಿಥಿ ಪ್ರಾರ್ಥನೆ ಕರಾದಿನ್ ತೀನ್ ವರಖ್ಹ್‌ ಛೋ಼ ಮಹಿನಲಗೂಬಿ ಧರ್ತಿಪರ್ ಪಾಣಿ ವರ್‌ಶ್ಯೊಕೊಯ್ನಿ ಪಾಛೊ಼ ಯೊ ಪ್ರಾರ್ಥನೆ ಕರಾದಿನ್ ಆಕಾಶ್ ಪಾಣಿವರ್‌ಖ್ಹಾಯು. ಜ಼ಮೀನ್ ಫಲ್‍ದಿದು. ಮಾರ ಭೈಯೇಭೇನೆವೊ, ತುಮಾರಮ ಕೋಣ್‌ತೋಬಿ ಖ್ಹಾಚ ಮಾರಗ್‌ನ ಮ್ಹೆಂದಿನ್ ಗಲ್ತಿಥಿ ಚಾ಼ಲುಕರ್ತು ಉಷೇತೊ ಬಿಜೇಕ್ ಜ಼ಣು ಇನ ಅಛ್ಛಮಾರಗ್‍ಪರ್ ಲಾಯುತೊ; ಏಕ್ ಪಾಪಿನ ಗಲತ್‌ ಮಾರಗ್‍ಪರ್‌ಥು ಛು಼ಕೈನ್, ಬದ್‍ಲೈನ್ ಇನ ಆತ್ಮಾನ ಮರಣ್‌ಥು ಬಚಾ಼ಡೀನ್ ಘಣ ಪಾಪ್ನ ಯೋ ಕ್ಷಮಾ ದ್ಯವಾಡವಾಳೊಕರಿ ಮಾಲುಮ್‌ ಕರಿಲ್ಯಾವಾದೆ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.