Waghri Booli Bible
ಇಬ್ರಿ 3
ಮೋಶೇಥಿಬಿ ಯೇಸು ಮಹಾನ್
ಇನಖ್ಹಾಜೆ ಕ್ರಿಸ್ತಮ ಪರಿಶುದ್ಧರ‍್ಹವಾಳ ಭೈಯೇ ಭೇನೆವೊ ಸೊರ್ಗನು ಬುಲಾವ್ಣಿಮ ಭಾಗ್‌ ಲೀರಾಖವಾಳವೊ, ಅಪ್ಣೆ ಮಾನಿರಾಖ್ಯತೆ ಅಪೊಸ್ತಲಬಿ ಅಜು಼ ಮಹಾಯಾಜಕ್‍ಬಿ ಹುಯಿರ‍್ಹೋತೆ ಯೇಸುನಿ ಬಾರೇಮ ಧ್ಯಾನ್ ಲಗಾಡಿನ್ ಸೋಚೊ. ಮೋಶೆ ದೇವ್ನ ಘರ್‌ಮ ವಿಶ್ವಾಸ್‌ವಾಳೊ ಹುಯಿರ‍್ಹೊಥೋತೆ ತಿಮ್ಮಸ್, ಯೊ ಚೂ಼ಣಿರಾಖವಾಳನ ವಿಶ್ವಾಸ್‌ವಾಳೊ ಹುಯಿರ‍್ಹೋಥೊ. ಘರ್‌ಥೀಬಿ ಘರ್‌ಭಾಂದ್ಯೋತೆ ಇನ ಜಾ಼ಖ್ಹತ್ ಮರ್ಯಾದಿ ರ‍್ಹೇಸ್ತೆ ಖ್ಹಾಜೆ ಮೋಶೆಥೀಬಿ ಯೇಸುಸ್ ಜಾ಼ಖ್ಹತ್ ಮರ್ಯಾದಿನ ಯೋಗ್ಯಕರಿ ಚೂ಼ಣೈರ‍್ಹೋಸ್. ಅಖ್ಖಾಸ್ ಘರ್‌ನ ಕೋಣಸ್ಕಿ ಏಕ್ಜ಼ಣೊ ಉಬ್‌ಜೈ಼ರಾಖ್ಯೋಸ್. ಕತೋಬಿ ಹರೇಕ್ನ ಉಬ್‌ಜೈ಼ರಾಖ್ಯೊತೆ ದೇವಸ್. ಮೋಶೆ ದೇವ್ನ ಘರ್‌ಮ ವಿಶ್ವಾಸ್‌ನೊ ಸೇವಕ್ ಹುಯಿರ‍್ಹೊಥೊ. ಇನೆ ಖ್ಹಾಮ್ಣೆ ಬೋಲಾವನಿ ಬಾರೇಮ ಸಾಕ್ಷಿ ಹುಯಿರ‍್ಹೊಥೊ. ಕತೋಬಿ ಕ್ರಿಸ್ತತೋಬಿ ಛಿಯ್ಯೊಹುಯಿನ್ ದೇವ್ನ ಘರ್‌ಪರ್ ಹಕ್‌ವಾಳೊ ಹುಯಿರ‍್ಹೋಸ್. ಅಪ್ಣೆ ಹಿಮ್ಮತ್‍ಬಿನ್ ಭರೋಖ್ಹಾಥಿಬಿ ಖ್ಹರ್ತಿಲಗು ಘಟ್‍ಥಿ ಧರಿರಾಖವಾಳ ಹುಯಾತೊ ಅಪ್ಣೆಸ್ ದೇವ್ನ ಘರ್ ಹುಯಿರ‍್ಹಿಷು.
ದೇವ್ನ ಅದ್ಮಿಯೇವ್‍ನ ಛಾ಼ತೆ ಅರಾಮ್
ಇಮ್ಮಸ್ ಪವಿತ್ರಾತ್ಮ ಬೋಲಾನಿ ಪರಕ್ಮ ತುಮೆ ಆ ದನ್ ದೇವ್ನ ಗಳಾನ ಕಾನ್‌ ಲಗಾಡವಾಳ ರ‍್ಹಯಾತೊ, ತುಮಾರ ಗುರುಗುರಬ್‌ಲ್ಯ ಜ಼ಂಗಳ್‌ಮ ದೇವ್ನ ತರೀಪ್ಷ ಕರ‍್ಯೊತೆ ವಖ್ಹತ್‌ಮ ಇವ್ಣೆ ವಿರೋದ್ ಕರ‍್ಯು. ಇವ್ಣಿಂತ್ರ ಕಠಣ್ ದಿಲ್‌ವಾಳ ನಕೊ ಹುವೊ. ತುಮಾರು ಶಾಣುಖ್ಹಾರು ಗಭ್ಭರ್‌ಥಿ ಮನ ತರೀಪ್ಷ ಕರೀನ್ ಚಾ಼ಳಿಖ್ಹ್ ವರಖ್ಹ್‌ ಮಾರ ಕಾಮ್ನಖ್ಹಾರು ದೇಖ್ಯು. ಇನಖ್ಹಾಜೆ ‘ಮೆ ಆ ಪಿಳ್ಗಿವಾಳಪರ್ ಘಣು ಖೀಜ಼್ ಖೈನ್ ಇವ್ಣೆ ಕೆದೇಬಿ ದಿಲ್‌ ಬದ್‌ಲೈಲ್ಯವಾಳುಬಿ ಇವ್ಣೆ ಮಾರು ಮಾರಗ್‌ನ ಕೊ ಪರಖ್‌ಷೇನಿ’ ಕರಿ ಮೇ ಬೋಲ್ಯೊ. ಅಮ್ ರ‍್ಹವಾಪರ್ ಇವ್ಣೆ ಮಾರಿ ಆರಾಮ್ನಿ ಝ಼ಗೋಮ ಮಳ್‍ಶೇಸ್‍ಕೊಯ್ನಿ” ಕರಿ ಖಿಜೈನ್ ಆಣ್‌ಕರ‍್ಯೊ. ಮಾರ ಭೈಯೇ ಭೇನೇವೊ ತುಮಾರಮ ಖರಾಬ್ ರ‍್ಹವೊ ಜಿವ್ತೊ ಜಾನ್ನೊ ದೇವ್ನ ಮ್ಹೇಲಾನು ಅವಿಶ್ವಾಸ್‌ನೊ ದಿಲ್‌ ಕಿನಾಮಬಿ ನಾರ‍್ಹೇವ್ಣುತೆ ಹೊಷಾರ್‌ಥಿ ದೇಖಿಲೆವೊ. ತುಮಾರಮ ಏಕ್‍ಜ಼ಣೂಬಿ ಪಾಪ್‌ಮ ಖ್ಹಪ್‍ಡಿನ್ ಠಗೈ ನಾಜಾ಼ವ್ಣುತೆ, ಹಮ್ಕೇಬಿ ಕದೇಬಿ ಬುಲೈಲೆಯಿತೆ ವೇಳ್ ಛಾ಼ತೆ ತದೇಸ್‌, ಹರೇಕ್‌ದನ್‌ಬಿ ಏಕ್‌ಥಿ ಏಕ್‍ಜ಼ಣು ಹುಮ್ಮಖ್ಹ್‌ ದೆವೊ. ಶನಕತೊ ಪಹಿಲೆಥೂ ಖ್ಹರ್ತಿಲಗೂಬಿ ಭರೋಖ್ಹಾನ ಘಟ್‌ರಾಖ್ಯಾತೊ ಅಪ್ಣೆ ಕ್ರಿಸ್ತನ ಗಳ್‌ಜೋ಼ಡ್ಮ ಭಾಗ್‌ಲ್ಯವಾಳ ಹುಯಿರ‍್ಹಿಷು. ಪವಿತ್ರ ದಪ್ತರ್‌ಮ ಅಮ್ ಬೋಲಸ್, “ತುಮೆ ಆ ವೇಳ್ಮ ದೇವ್ನ ಗಳಾನ ಖ್ಹಮಜ಼್‌ತಾ ಉಷೇತೊ ತುಮಾರ ಗುರುಗುರುಬ್‌ಲ್ಯ ಇವ್ಣೆ ಘಬ್ಬರ್‌ ಕರಾನಿಘೋಣಿ ತುಮಾರ ದಿಲ್‌ನಾಬಿ ಕಠಣ್ ನಕೊ ಕರಿಲೆವೊ.1 ದೇವ್ನ ಅವಾಜ಼್ನ ಖ್ಹಮ್‌ಜಿನ್‌ ವಿರೋದ್ ಕರ‍್ಯುತೆ ಕೋಣ್? ಮೋಶೇಥಿ ಈಜಿಫ್ಟ್‌ಥು ಬುಲೈರ‍್ಹಯಹುಯ ಕಾಹೆಕಿಶು? ಅಜು಼ ದೇವ್ನೆ ಚಾ಼ಳಿಖ್ಹ್ ವರಖ್ಹ್‌ ಕಿನಾಪರ್ ಜಾ಼ಖ್ಹತ್ ಖಿಜಾ಼ಯೊ? ಪಾಪ್ ಕರಾಪರ್ ಇವ್ಣು ಮುರ್ದುಖ್ಹಾರು ಜ಼ಂಗಳ್‌ಮಾಸ್ ಪಡಿಗಯು ಕೊಯ್ನಿಕಿಶು? “ಮಾರು ಆರಾಮ್ಮ ತುಮೆ ಮಳ್‍ಶೂಸ್ ಕೊಯ್ನಿಕರಿ ಕಿನಿ ಬಾರೇಮ ಇನೆ ಆಣ್ ಕರ‍್ಯೊತೆ? ಯೊ ಗಭ್ಭರ್‌ಕರ‍್ಯುತೆ ಇನಖ್ಹಾಜೇಸ್ ಕಾಹೆಕಿಶು? ಅನಖ್ಹಾಜೆಸ್ ಇವ್ಣೆ ಅರಾಮ್ಮ ಮಳಾನ ಕೊಹುಯುನಿತೆ ಗಯೂತೆ ಇವ್ಣಿ ಅವಿಶ್ವಾಸ್‌ಥೀಸ್ ಕರಿ ಅಪ್ಣೆ ದೇಖೆಸ್2.
Source notes (2)
- Cross-reference ಕೀರ್ತನೆ 95; 7; 8
- Cross-reference ಕೀರ್ತನೆ 95:11
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.