Waghri Booli Bible
ಹಬಕ್ಕೂಕ್ 3
ಹಬಕ್ಕೂಕ್ ನಿ ಪ್ರಾರ್ಥನೆ
ಆ ಪ್ರವಾದಿ ಹುಯಿರೊತೆ ಹಬಕುಕ್‍ನು ಪ್ರಾರ್ಥನೆ.
ಯೆಹೋವ, ಮೇ ತಾರು ವಾತೆಖ್ಹಂಜಿ ಡರಿಗೊ;
ಯೆಹೋವ, ಜಗ್ ಜ಼ಮನಮ ತಾರು ಬಚವಾನು ಕಾಮ್ ಪಚು಼ ಕರ್,
ಜಗ್ ಜ಼ಮನನ ಇಚ್ಮ ಇನ ಕರಿವೊತಳ್;
ಛಂಡಲ್ ಅಯಿತೊಬಿ ನಕೊ ಭೈಕಿಶ್ ಗೊರ‍್ನ
ದೇವ್ ವುಳ್ಯವಸ್ ತೇಮಾನ್‍ಮತು
ಯೋ ಘಣೊ ಪರಿಶುದ್ಧಂನೊ ಪಾರಾನ್ ಫಡ್‍ಮತು.
ಫೈಲಯಿರುಸ್ತೆ ಇನು ಮಹಿಮೆ ಖ್ಹರು ಪರಲೊಕಂ
ಭರೈರುಸ್ ಇನು ಮಹಿಮೆ ಜಮಿನ್ ಅಕ್ಕುಸ್.
ಸೂರ್ಯನಿತರ ಛಾ ಇನು ವುಜಳು
ವುಜಳುಖ್ಹಾರು ಭಾರ್ ವುಳುಜಸ್ ಇನು ಹತ್‍ಮತು
ಇನು ಥಕತ್ ಇಜ್ಜಸ್ ಲಪಿರುಸ್.
ರೊಗ್ ವುಳುಜಸ್ ಇನ ಖ್ಹಾಮೆ
ಮರಣ್ ವುಳ್ಯವಸ್ ಇನ ಪೀಠೆ.
ಜಮೀನ್ ಕಪ್‍ಶೆ ಯೊ ಹುಬಿರಯೊತೊ
ದೇಖ್ಹ್ ಡರ್ಶೆ ಯೊ ದೆಕ್ಯುತೊ
ಫಟಿಜಶೆ ಜಮನನು ಫಡ್‍ಖ್ಹಾರು
ರಡ್ಕಿ ಪಡ್‍ಜಶೆ ಜುನೊ ಫಡ್‍ಖ್ಹಾರು
ಯೊ ಆವಸ್ತೆ ಜಮನನು ಕಲಂಮತುಬಿ ಇಮ್ಮಸ್.
ದೇಖೊ, ಕಷ್ಟಪಡುಕರತೆ ಕೂಷ್‍ನು ಜ್ಹೊಪ್‍ಡಿಖ್ಹರು
ಕಪುಕರಸ್ತೆ ಮಿದ್ಯಾನ್ ಟಬರ್‌ ಕನು ಡೇರನಿಜ್ಹೊಪ್‍ಡಿಖ್ಹರು.
ತಾರು ಇರದೊ ತಲವ್‍ನ ಉಪ್ಪರ್ ಓ ಯೆಹೋವ ದೇವ್?
ತಾರು ಜಿತನು ರಥಂನ ಉಪ್ಪರ್ ತಾರು
ಘೋಡವ್‍ನಿ ಜೊಡ್ಮ ತು ಬೆಖ್ಹಿನ್ ಅವನಿ ವಖ್ಹತ್‍ಮ
ತಲವ್‍ನ ಉಪ್ಪರ್ ಛಂಡಲ್ ನಾ ಬುಜು
ದರ್ಯವ್‍ನ ಉಪ್ಪರ್ ಇರದೊ ನಾ?
ಕಡಿಮ್ಹೆಲ್ಯೊ ಬಣಮಂನ ಭುಜ್‍ಮಥು
ಬೊಲಿಮೊಕ್‍ ಲ್ಯೊ ಇನಮಥು ತಿರ್ನ
ಫಡಿರಖ್ಯೊಸ್ ಜಮಿನ್ನ ಕಲ್ವೊಥಿ.
ಘಬ್ರವಸ್ ಫಡ್ ಖ್ಹರು ತುನ ದೇಖಿನ್‌
ನಖ್ಹಸ್ ಜೊರೆಖ್ಹು ಪ್ರವಾಹಂಖ್ಹರು
ಹಾತ್ ಪಡಿನ್ ಅವಾಜ್ ಮ್ಹೆಲಸ್ ದರ್ಯವ್‍ ಖ್ಹರು.
ವುಡಿನ್ ಮಿಲವುಂಕರಸ್ತೆ ತರು ತಿರ್ನು ಉಜಾಳಮ
ವುಕ್‍ಳು ಕರ್ತುತೆ ತರು ಭಲೊನು ಜ್ಹಮಕ್ ಮ
ಸೂರ್ಯಚಂದ್ರಬಿ ಭಿರಿಜಶೆ ಇವ್‍ಣಿ ಜ್ಹಗೊಮ.
ಜಮಿನ್ನ ಇಚ್ಮಕರಿ ತು ಜೈಶ್ ಛಂಡಲ್‍ಖ್ಹು
ದೇಖ್ಹ್ ನ ತು ಖುಂದ್ಲಿನಕಿದಿಶ್ ಇರದೊಖ್ಹು.
ವುಳೊಜಸ್ ತಾರ ಆದ್ಮಿನ ಬಚವನ ಕಜೆ
ತಾರು ಅಭಿಷೆಕಂ ಲಿರಕ್ಯುಸ್ತೆ ಇನು ಜಾನ್ ಬಚವನ ಕಜೆ.
ಫೊಡಿರಕ್ಯೊಸ್ ಖರಬ್ ಅದ್ಮಿನೊ ಮೊಟನು ಮುಡ್‍ಕ್ಯವ್‍ನ
ಮಟಿಮ ಮಳೈರಖ್ಯೊಸ್ ಇನ ಘರ್ನ.
ಗರಿಬ್ ನ ಲಪಿ ಧಬಿನ್ ಅಹಂಕಾರ್ ಥಿ ಫುಲವಳವ್‍ನಿತರ
ಮನ ಅಲದುಕರನ ಅಯು ಇನು ಯುದ್ದಂ ಕರವಳು ಡುಂಜ್‍ನಿ ತರ
ಇನು ಆಯುಧಂಖ್ಹುಸ್ ಇನು ಮುಡ್ಕ್ಯನ ಮರ್ಯೊ.
ಘೋಡವ್‍ನ ಉಪ್ಪರ್ ಛಡಿನ್ ತೂ ದರ್ಯವ್‍ನ ಪರ್ ಚಲಿಗೊ
ದರ್ಯವ್‍ನು ಬುರ್ಗನು ಘಣುಪಣಿ ನ ಪರ್ ಚಲಿಗಯೊ.
ಅನ ಖ್ಹಂಜಿನ್ ಕಾಪ್ಯು ಮರು ಅಂಗ್ ತಾನ್
ಯೊ ಅವಜ್ಮಖ್ಹು ಮರು ಹೊಟ್ ಕಪಲಗ್ಯು
ಮರ ಹಡ್ಕ್ಯಖ್ಹರು ಸಂಪುರ್ಣಂಖ್ಹು ಖ್ಹಡನಿತರ
ಹುಬಿರಯೊತೆ ಜ್ಹಗೊಸ್ ಮರ ಗೊಡಖ್ಹರು ಕಾಪ್ಯ
ಕಷ್ಟಂ ಶೊಪೊಖ್ಹು ಅವಾಸ್
ಹಮ್ನ ಜೊಟೈಲೆವನ
ಹುಬ್ಯೊರೈಶ್ ಮೆ ತಾಳ್ಮೆಖ್ಹು ಇಜ್ಗೊತೊಡಿ.
ಗುಲ್ಲರ್ ನು ಝಾಡು ಚಿಗರ್ ನಾ ಮ್ಹೆಲ್ಯುತೊಬಿ
ದ್ರಾಕ್ಷಿನುಎಲೊಮ ಪಂಡು ನಾ ಧೆಕೈತೊಬಿ
ತೆಲ್‍ನು ಜ್ಹಡು ಉಬ್‍ಜನು ಭಿರಿಗಯುತೊಬಿ
ಖೆತರ್ನು ಜಮಿನ್ ಫಲಂನ ನಾ ದಿದುತೊಬಿ
ದೊಡ್ಡಿಮ ಮ್ಹೆಂಡ ನಾ ರೈತೊಬಿ
ದೊಡ್ಡಿಮ ಗಯಿ ಚೆಲ್ಕಖ್ಹರು ನಾ ರೈತೊಬಿ,
ಸಂತೋಷಂ ಹುಯಿಶ್ ಮೇ ಯೆಹೋವಾ ಮ
ಆನಂದಂ ಹುಯಿಶ್ ಮಾನ ಬಚವನ ದೇವ್‍ಮಸ್.
ಯೆಹೋವ ದೇವ್ ಮನ ದಿಶೆತೆ ಭರಖ್ಹೊ
ಮಾರ ಗೊಡವ್‍ನ ಹರಣ್ ನಿತರ ಛತುರ್ ಕರವಳೊ
ಕರ್ಶೆ ಮನ ಫಡ್‍ಮ ನಖ್ಹನಿತರ.
ಅಚ್ಚು ಗಿದ್ ಬೊಲವಳು: ಮರು ಡುಂಕುವಾಖ್ಹ್ ಳಿಖ್ಹು ಗಿದ್ ಬೊಲವಳು.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.