Waghri Booli Bible
ಆದಿಕಾಂಡ 7
ಪಾಣಿನು ತೋಫಾನ್
ತದೆ ಯೆಹೋವನೆ ನೋಹಾನ, “ತೂಬಿ ತಾರ ಘರ್‌ವಾಳು ಅಖ್ಖೂಸ್ ಜ಼ಹಾಜ಼್‍ಮ ಪೇಶಿಜಾ಼ವೊ; ಹಮ್ಕೆ ಛಾ಼ತೆ ಅದ್ಮಿನಿ ಖಾನ್‌ದಾನ್‌ಮ ತೂ ಎಕ್ಕಸ್‌ ಜ಼ಣೊ ಮಾರ ಖ್ಹಾಮ್ಣೆ ನಿಯತ್‌ವಾಳೊಕರಿ ದೆಖೈರ‍್ಹೋಸ್. ಖ್ಹಾರೂಸ್ ಶುದ್ ಜಾನ್ವರ್‌ಮ ಖ್ಹಾತ್‌ಖ್ಹಾತ್ ಜೋ಼ಡ ಪರ್ಖ್ಹೋ ತಯೇಡಾವ್ನ ಶುದ್ ಕಾಹೆತೆ ಜಾನ್ವರ್‌ಮ ಬೆಬ್ಬೇ ಜೋ಼ಡ ಪರ್ಖ್ಹೊ ತಯೇಡಾವ್ನ ತಾರಿ ಜೋ಼ಡೆ ಬುಲೈಲೇವ್ಣು. ಜಿನಾವರ್‌ಮಾಬಿ ಖ್ಹಾತ್‌ಖ್ಹಾತ್ ಪರ್ಖ್ಹೊ ತಯೇಡಾವ್ನ ಲೀಲೆವ್ಣು. ಅಮ್ ಯೋಯೋ ಜಾ಼ತ್ನ ಧರ್ತಿಪರ್ ರಾಖಿನ್ ಬಚಾ಼ಡ್‌ನು. ಶನಕತೊ ಇವ್ಣಿ ಪಿಳ್ಗಿ ಜಾ಼ಖ್ಹತ್ ಹುವಾನಖ್ಹಾಜೆ ತೂ ಅಮ್‌ಕರ‍್ನು. ಹಮ್ಕೇಥು ಖ್ಹಾತ್‌ದನ್ನ ವಾರ್‌ ಧರ್ತಿಪರ್ ಮೇ ಧರ್ತಿಪರ್ ಚಾ಼ಳಿಖ್ಹ್‌ ದನ್ ಚಾಳಿಖ್ಹ್ ರಾತ್‌ ವರ್ಖ್ಹಾತ್ನ ವರ್‌ಖ್ಹೈನ್, ಮೇ ಉಬ್‌ಜಾ಼ಯೋತೆ ಜಾನ್‌ರ‍್ಹವಾಳ ಅಖ್ಖಾಸ್ನ ಧರ್ತಿಪರ್‌ಥು ನಾಶ್‌ಕರಿಷ್‌” ಕರಿ ಬೊಲ್ಯೊ. ಯೆಹೋವನೆ ಹುಕುಮ್‌ ಕರ‍್ಯೊತೆ ಖ್ಹಾರೂಸ್ ನೋಹಾನೆ ಕರ‍್ಯೊ. ಧರ್ತಿಪರ್ ಪಾಣಿನು ತೋಫಾನ್ ಹುವಾನಿ ವಖ್ಹ್‌ತೆ ನೋಹ ಚೊ಼ಖ್ಹೋ ವರಖ್ಹ್‌ವಾಳೊ ಹುಯಿರ‍್ಹೊಥೊ. ತದೆ ನೋಹಾನೆ ತೋಫಾನ್‌ಥಿ ಛು಼ಕಿಜಾ಼ವಾನಖ್ಹಾಜೆ ಬಾವಣ್ ಛಿಯ್ಯಾ ವ್ಹವೆ ಖ್ಹಮೇದ್ ಜ಼ಹಾಜ಼್‍ಮ ಪೇಶಿಗಯೊ. ದೇವ್‌ ನೋಹಾನ ಹುಕುಮ್‌ ದಿದೋತೆ ತಿಮ್ಮಸ್ ಶುದ್ಧಾ ಅಶುದ್ಧ ಜಾನ್ವರ್‌ ಅಜು಼ ಜಿನಾವರ್‌ಮಾಬಿ ಕೀಡುಕಮ್‌ಟಮಾಬಿ, ಪರ್ಖ್ಹೊ ತಯೇಡ ಜೋ಼ಡುಜೋ಼ಡು ಹುಯಿನ್ ದೇವ್ನಿ ಹುಕುಮ್‌ನಿತರ ನೋಹಾನಿ ಜ಼ಹಾಜ಼್‍ಮ ಅಯಿನ್ ಪೇಶಿಗಯು. ಯೊ ಖ್ಹಾತ್‌ದನ್ ಹುವಾನ ವಾರ್‌ ಪಾಣಿನು ತೋಫಾನ್ ಧರ್ತಿಪರ್ ಶುರುಹುಯು. ನೋಹಾನಿ ಜಿಂದಗೀನು ಚೊ಼ಖ್ಹೋ ವರಖ್ಹ್‌ನು ಬೇನ ಮಹಿನಾನು ಖ್ಹತ್ರಾನ ರೋಜ಼್‌ಮ ಧರ್ತಿನ ಹೇಟ್‌ನು ದಲ್‌ದರ‍್ಯಾವ್‌ನು ಚೇಜ್‌ಭಾರೊ ನಿಕ್ಳಿಆಯೊ; ಆಬ್‌ನು ತೂಬ್ ಫಾಟಿನ್ ಪಾಣಿ ರಂಚಾ಼ಯು. ಚಾ಼ಳಿಖ್ಹ್‌ರೋಜ಼್‌ ರಾತ್‌ದನ್‌ ಧರ್ತಿಪರ್ ಕಹಾರ್‌ ವರ್‌ಶ್ಯೊ. ಯೊ ದನ್ಮ ನೋಹಾಬಿ ಇನಿ ಬಾವಣ್ ಅಜು಼ ಶೇಮ್‌, ಹಾಮ್‌, ಯೆಫೆತ್‌ಕರಿ ತೀನ್ ಲಡ್ಕಾವ್‌ಬಿ ಇವ್ಣಿ ಬಾವ್ಣೇಬಿ ಜ಼ಹಾಜ಼್‍ಮ ಪೇಶಿಗಯು. ಖ್ಹಾರೂಸ್ ಜಾನ್ವರ್‌ಮ ಕತೊ ಹರೇಕ್ ಜಾ಼ತ್ನು ಜಾನ್ವರ್‌ಬಿ ಕೀಡುಕಮ್‌ಟುಬಿ ಫಾಕ್ಡಿಮಾರವಳು ಹರೇಕ್‌ಥರಾನ ಜೀನ್‌-ಜಿನಾವರ್‌ಬಿ, ಬೆಬ್ಬೆ ಇನಿಇನಿ ಜಾತ್ನಿ ಪರಕ್ಮ ನೋಹಕನ ಐನ್ ಜ಼ಹಾಜ಼್‍ಮ ಪೇಶಿಗಯು. ನೋಹಾನ ದೇವ್‌ನೆ ಹುಕುಮ್‌ ದಿದೋತೆ ತಿಮ್ಮಸ್ ಖ್ಹಾರಸ್ ಜಾನ್ವರ್‌ಮ ಏಕ್‌ ಪರ್ಖ್ಹೋ ಏಕ್‌ ತಯೇಡ ಪೇಶಿಗಯು. ಯೆಹೋವನೆ ನೋಹಾನ ಮಹಿ ಘಾಲಿನ್ ದರ್ವಾಜು ಮೂಚಿನಾಖ್ಯೊ. ಪಾಣಿನು ತೋಫಾನ್ ಚಾ಼ಳಿಖ್ಹ್‌ದನ್‌ ಧರ್ತಿಪರ್ ಪಾಣಿ ಛ಼ಡ್‌ತು ಐನ್ ಜ಼ಹಾಜ಼್‌ ಉಪ್ಪರ್‌ ಪಡಾವಖ್ಹತರ್‌ ಯೊ ಪಾಣಿಪರ್‌ ತೇಲಾವಲಗ್ಯು. ಪಾಣಿ ಘಣು ತಾಖಥ್ಥಿ ಧರ್ತಿಪರ್ ಜಾ಼ಖ್ಹತ್ ಹುವಾಖ್ಹತರ್‌ ಜ಼ಹಾಜ಼್‌ ಇನಪರ್‌ ಚಾ಼ಲಲಗ್ಯು. ಪಾಣಿ ಧರ್ತಿಪರ್ ಘಣೇಥಿ ಘಣು ಜಾ಼ಖ್ಹತ್ ಹುಯುತೆಖ್ಹಾಜೆ ಆಬ್‌ನೊ ಗೋಳಾನ ಹೇಟ್‌ಥೂತೆ ಖ್ಹಾರೂಸ್ ಮೋಟ ಪಹಾಡ್‌ಬಿ ಮುಚೈ಼ಗು. ಪಾಣಿ ಯೊ ಪಹಾಡ್‌ ಅಖ್ಖೇಥಿಬಿ ಪಂಧ್ರಾಹಾತ್‌ ಉಪ್ಪರ್‌ ಜಾ಼ಖ್ಹತ್ ಹುವಾಖ್ಹತರ್‌ ಯೊ ಅಖ್ಖು ಮುಚೈ಼ಗಯು. ಇನಖ್ಹಾಜೆ, ಜಿನಾವರ್‌, ಕೀಡುಕಮ್‌ಟು, ಜಾನ್ವರ್‌ ಅಜು಼ ಅದ್ಮಿಖ್ಹಮೇದ್‌ ಜ಼ಮಿನ್‌ಪರ್ ಚಾ಼ಲವಾಳು ಹರೇಕ್ ಧರ್ತಿನು ಜ಼ಂತ್‌ಖ್ಹಾರೂಸ್ ನಾಶ್‌ಹುಯಿಗು. ದಮ್‌ಲೈತೆ ಧರ್ತಿನು ಜ಼ಂತ್‌ಖ್ಹಾರು ಮರಿಗು. ಅಮ್ ಪಹಿಲೆ ಅದ್ಮಿ, ಜೀನ್‌-ಜಿನಾವರ್‌ ಕೀಡುಕಮ್‌ಟುಬಿ ಧರ್ತಿಪರ್ ಥೂತೆ ಖ್ಹಾರುಸ್ ಮಟಿಗು. ನೋಹಾಬಿ ಇನಿ ಜೋ಼ಡ್ಮ ಜ಼ಹಾಜ಼್‍ಮ ಥೂತೆ ಜೀವಿಖ್ಹಾರು ಖಲಿ ಬಚಿಗು. ತೋಫಾನ್ನು ಪಾಣಿ ಧರ್ತಿಪರ್ ಏಕ್‌ಖ್ಹೊ ಅಡೈವಿಖ್ಹ್‌ ದನ್‌ಲಗು ಉತ್ರಿರ‍್ಹಯುಥು ಕೊಯ್ನಿ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.