Waghri Booli Bible
ಆದಿಕಾಂಡ 50:20
Verse 20 is marked below, with the whole chapter around it. Read from the start
ತದೆ ಯೋಸೇಫನೆ ಇನ ಬಾನ ಮ್ಹೋಡಪರ್ ಪಡೀನ್ ರೊಯಿನ್‌ ಇನ ಬುಚ್ಚಾ಼ಕರ‍್ಯೊ. ತದೆ ಯೋಸೇಫನೆ ಇನ ಪೊಂಡಿತ್‌ನ ಹುಕುಮ್ ಕರೀನ್, ಇನ ಬಾ ಯಾಕೋಬನ ಮಖ್ಹಾಣ್ಯಾನ ವಾಖ್ಹ್‌ನು ತೇಲ್ ಲಗಾಡಿನ್ ತಯ್ಯಾರ್‌ಕರೊ. ಕರಿ ಬೊಲ್ಯೊ. ಪದತ್ತಿನಿ ಪರಕ್ಮ ಚಾ಼ಳಿಖ್ಹ್ ದನ್ ವಾಖ್ಹ್‌ನು ತೇಲ್ ಲಗಾಡ್‌ನುಥು, ಈಜಿಪ್ಟ್‌ವಾಳು ಇನಖ್ಹಾಜೆ ಖ್ಹಡ್‌ತೀನಿಖ್ಹ್ ದನ್‌ಲಗೂಬಿ ಅಂದ್ರೋಖ್ಹ್‌ ಕರ‍್ಯು. ತದೆ ದುಖ್‌ನ ದನ್ ನಿಕ್ಳಿಜಾವಾ಼ದೀನ್‌ ಯೋಸೇಫನೆ ಫರೋಹನ ಅದಿಕಾರಿನ, “ದಯಾಕರೀನ್ ತುಮೆ ಫರೋಹಕನ ಜೈ಼ನ್ ಆ ವಾತೆ ಬೋಲೊ. ಮಾರೊ ಬಾ ಯೊ ಕಾನಾನ್ ದೇಖ್ಹ್‌ಮ ತಯಾರ್ ಕರಿ ರಾಖ್ಯೋತೆ ಝ಼ಗೋಮಸ್‌ ಇನ ಮಖ್ಹಾಣ್ಯು ಕರ‍್ನುಕರಿ ಮರಾನ ಅಗಾಡೀಸ್‌ ಮಾರೇಥಿ ಆಣ್‌ಕರಾಯೊಥೊ. ಇನಖ್ಹಾಜೆ ಮಾರಪರ್ ತುಮುನ ಗೋರ್‌ಉಶೇತೊ ತುಮೆ ಜೈ಼ನ್, ಆ ವಾತೆ ಫರೋಹನ ಖ್ಹಮ್‌ಜಾ಼ಡೀನ್, ಮೇಜೈ಼ನ್ ಬಾನ ಮಖ್ಹಾಣ್ಯು ಕರೀನ್ ಆವಾನ ಹುಕುಮ್ ದೇವ್ಣುಕರಿ ಬಿಂತಿ ಕರಿಲೆವುಸ್‌” ಕರಿ ಬೊಲ್ಯೊ.
ಫರೋಹನೆ ಆವಾತೆ ಖ್ಹಮ್ಜಿನ್ ಯೋಸೇಫನ, “ತಾರೊ ಬಾ ಆಣ್‌ಕರಾಯೊತೆ ಪರಕ್ಮ ತೂ ಜೈ಼ನ್ ಇನ ಮಖ್ಹಾಣ್ಯು ಕರೀನ್ ಆಯೇಜಾ಼ಯ್” ಕರಿ ಹುಕುಮ್‌ದಿದೊ. ಯೋಸೇಫ ಬಾನ ಮಖ್ಹಾಣ್ಯು ಕರಾನ ನಿಕ್ಳಾನಿವಖ್ಹ್‌ತೆ ಇನಿ ಜೋ಼ಡ್ಮ ಫರೋಹನು ಪರಿವಾರ್‌ಖ್ಹಾರೂಬಿ, ಮಹೇಲ್‌ನು ಮುಖ್ಯವಾಳುಬಿ , ಈಜಿಪ್ಟ್‌ನು ಗಲ್‌ಢಖ್ಹಾರುಬಿ, ಯೋಸೇಫನ ಘರ್‌ವಾಳುಖ್ಹಾರುಬಿ , ಭೈಯೇಬಿ, ಬಾನ ಘರ್‌ವಾಳು ಖ್ಹಾರೂಬಿ ಗಯು. ಇವ್ಣೆ ಇವ್ಣಿ ಬಾವ್ಣೆ ಲಡ್ಕಾವ್ನ ಮೇಂಢ ಢಾಂಡವ್ನ ಖಲಿ ಗೋಷೆನ್ ತಬರ್‌ಖಾಮ ಮ್ಹೇಲಿದಿನ್ ಗಯಾ. ಇನಿ ಜೋ಼ಡ್ಮ ರಥ್ ಖ್ಹಾರೂಬಿ, ಘೋಡೊಖ್ಹಾರೂಬಿ ಗಯು. ಯೋಸೇಫನ ಜೋ಼ಡ್ಮ ಘಣು ಝೂ಼ಂಡಸ್‌ ಗಯು. ಇವ್ಣೆ ಯೊರ್ದನ್ ನದ್ದಿನಪಾರ್ ಛಾ಼ತೆ ಆಟಾದ್‌ಕರಿ ಖಳಾಮ ಅಯಿನ್ ಹಿಜ್ಜಾ಼ ಘಣು ರೊಯು. ಯೋಸೇಫ ಇನ ಬಾನ ಖ್ಹಾಜೆ ಖ್ಹಾತ್ ದನ್‌ಲಗು ಅಂದ್ರೋಖ್ಹ್‌ ಕರಾಯೊ. ಯೊ ದೇಖ್ಹ್‌ನು ಅದ್ಮಿಹುಯಿರ‍್ಹೂತೆ ಕಾನಾನ್ಯವಾಳು ಯೊರ್ದನ್ ನದ್ದಿನ ಪಾರ್‌ಥೂತೆ ಆಟಾದ್‌ಕರಿ ಖಳಾಮ ಚಾ಼ಲ್ಯೂತೆ ರದನ್ನದೇಖಿನ್ ಈಜಿಪ್ಟ್‌ವಾಳಾನ ಆಯೂತೆ ಆ ಅಂದ್ರೋಖ್ಹ್‌ ಘಣು ವಿಶೇಷ್ ಛಾ಼ ಕರಿ ಬೋಲ್ಯೂತೆ ಇನಖ್ಹಾಜೆ ಯೊ ಝ಼ಗೋನ “ಅಬೇಲ್‌ಮಿಚ್ರಯೀಮ್” ಕರಿ ನಾಮ್‌ಹುಯು. ಯಾಕೋಬನ ಛಿಯ್ಯಾ ಬಾನಿ ಹುಕುಮ್ನಿಘೋಣಿ ಕರ‍್ಯ. ಇನ ಮುರ್ದಾನ ಕಾನಾನ್ ದೇಖ್ಹ್‌ನ ಢೊಯಿಲೀಜೈ಼ನ್ ಮಕ್ಪೇಲ ಕರಿ ಬಲ್ಡಾನು ಘವಿಮ ಮಖ್ಹಾಣ್ಯು ಕರ‍್ಯು. ಅಬ್ರಹಾಮ್‌ನೆ ಹಿತ್ತಿಯವಾಳೊ ಎಫ್ರೋನ್‌ಥಿ ಮಮ್ರೆಗಾಮ್‌ನ ಮ್ಹೋರೇನು ಯೊ ಘವಿನ, ಅಶ್‌ಪಿಶ್‌ನಿ ಜ಼ಮೀನ್ ಖ್ಹಮೇದ್ ಶೊಂತ್‌ ಮಖ್ಹಾಣ್ಯಾನಖ್ಹಾಜೆ ಮೋಲ್ ಲೀರಾಖ್ಯೋಥೊ. ಬಾನ ಮಖ್ಹಾಣ್ಯುಕರಿ ಹುವಾದೀನ್ ಯೋಸೇಫಬಿ ಇನ ಭೈಯೇಬಿ ಬಾನು ಮಖ್ಹಾಣ್ಯು ದ್ಯವಾನಖ್ಹಾಜೆ ಜೋ಼ಡ್ಮ ಗಯುಹುಯು ಖ್ಹಾರೂಸ್ ಈಜಿಪ್ಟ್‌ನ ಪಾಛು಼ ಫರಿಗಯು.
ಯೋಸೇಫನೆ ಇನ ಭೈಯೇವ್‌ನ ಭರೋಖ್ಹೊ ದಿದೋತೆ.
ಯೋಸೇಫನ ಭೈಯೇ ಬಾ ಮರಿಗಯೋತೆ ದೇಖಿನ್, “ಏಕ್‌ ವೇಳ್ ಯೋಸೇಫ ಹಮುನ ವಹೇರ್‌ಕರೀನ್ ಹಮೆ ಕರ‍್ಯಾತೆ ಕೇಡ್‌ನ ಬದಲ್ ಹಮುನ ನಿಶತ್ ದೇಸ್‌ಕಿಶುಕಿ?” ಕರಿ ಇವ್ಣ ಇವ್ಣಾಸ್‌ಮ ವಾತ್‌ಬೋಲಿಲಿದ. ಇವ್ಣೆ ಯೋಸೇಫನ, ‘ತಾರೊ ಬಾ ಮರಾನ ಪಹಿಲೆ ಹಮುನ ಹುಕುಮ್ ದೀನ್‌ ಶಾತ್ ಬೋಲ್ಯೊಥೊಕತೊ, “ತಾರ ಭೈಯೇ ಹುಯಿರ‍್ಹಾತೆ ಹಮೆ ತುನ ಕೇಡ್‌ಕರ‍್ಯಾತೆ ಖ್ಹಾಚೀಸ್‌. ಕತೋಬಿ ಅಪ್ಣ ಬಾನ ದೇವ್ನ ಅರಾದನೆ ಕರಾವಾಳಬಿ, ಆಳ್‌ಬಿ ಹುಯಿರ‍್ಹಾತೆ ಹಮಾರಿ ಅಪರಾದ್ನ ಕ್ಷಮಾಪಣ್ ಕರ‍್ನುಕರಿ ಬಿಂತಿಕರಿಯೇಸ್” ಕರಿ ಯೋಸೇಫಕನ ಗಿಂಗೈಲೆವೊ ಕರಿ ಬೊಲ್ಯೊ. ಯೋಸೇಫನೆ ಆ ವಾತ್ನ ಖ್ಹಮ್ಜಿನ್ ರೋಯೊ. ಆನಾಹುಯಿನ್, ಭೈಯೇ ಇವ್ಣೇಸ್ ಆಯಿನ್ ಇನ ಖ್ಹಾಮ್ಣೆ ಆಡ್‌ಪಡಿನ್, “ಹಂದೇಕ್ ಹಮೆ ತುನ ಗುಲಾಮ್‌ಹುಯಿರ‍್ಹಾಸ್” ಕರಿ ಬೋಲ್ಯ. ಯೋಸೇಫನೆ ಇವ್ಣುನ, “ನಕೊ ಡರೊ; ಮೇ ಶಾತ್ ದೇವ್ನಿ ಝ಼ಗೋಮ ಛೂ಼ಕಿ ಶು? ತುಮೇತೊ ಮನ ಲುಕ್ಷಾನ್ ಕರ‍್ಯ. ಕತೋಬಿ ದೇವ್ನೆ ಮನ ಅಛ್ಛು಼ಹೋಣುಕರಿ ಖ್ಹೂಜ಼್ ಕರ‍್ಯೊ; ಇನಖ್ಹಾಜೆ ಕೈಏಕ್ ಅದ್ಮಿನೊ ಜಾನ್‌ ಬಚಾ಼ಡಂತರ ಹುಯು. ಹಮ್ಕೆಲಗೂಬಿ ಆ ಕಾಮ್ ಚಾ಼ಲುಕರಸ್. ಇನಖ್ಹಾಜೆ ತುಮೆ ಡರೊನಕೊ. ಮೇ ತುಮುನಾಬಿ ತುಮಾರಕನ ರ‍್ಹಾವಳ ಖ್ಹಾರಾಸ್‌ನಾಬಿ ಪಾಳೂಸ್‌” ಕರಿ ಬೋಲಿನ್ ಇವ್ಣುನ ಖ್ಹೊಪೊರಾಖ್ಯೊ. ಇವ್ಣಿಜೋ಼ಡ್ಮ ಗೋರ್‌ಥಿ ವಾತ್‌ಬೋಲ್ಯೊ.
ಯೋಸೇಫನಿ ಮರಣ್‌
ಅಮ್ ಯೋಸೇಫಬಿ, ಇನ ಬಾನ ಘರ್‌ವಾಳೂಬಿ ಈಜಿಪ್ಟ್‌ಮ ಜಿವ್ಣುಕರ‍್ಯು. ಯೋಸೇಫ ಏಖ್ಹೋದಖ್ಹ್ ವರಖ್ಹ್ ಬಚಿರ‍್ಹೊ; ಎಫ್ರಾಯೀಮನ ಲಡ್ಕಾವ್ನು ನಾತಿಪೋತಿನಾಬಿ ದೇಖ್ಯೊ. ಮನಸ್ಸೆನೊ ಛಿಯ್ಯೊ ಮಾಕೀರನಾಬಿ ಲಡ್ಕ ಪೈದಹುವಾದೀನ್ ಇವ್ಣೇಬಿ ಯೋಸೇಫನ ಮಾಂಡಿಪರ್‌ ಪಳ್ಯ. ಯೋಸೇಫ ಇನ ಭೈಯೇನ, “ಮಾರ ಮರಣ್ಣ ದನ್ ಖನ್ನೆ ಐಗಾ. ಕತೋಬಿ ದೇವ್ ತುಮುನ ಬಚಾ಼ಡಾನ ಆವ್‌ಶೇಸ್‌ ಆವ್‌ಶೆ; ಯೊ ಅಬ್ರಹಾಮ್, ಇಸಾಕ್, ಯಾಕೋಬನ ದೆವುಸ್‌ಕರಿ ವಾಗ್ದಾನ್‌ ಕರ‍್ಯೋಥೋತೆ ದೇಖ್ಹ್‌ನ ತುಮೆ ಜಾ಼ವಾಂತರ ಕರ್‌ಶೆ” ಕರಿ ಬೊಲ್ಯೊ. ಆನಾಹುಯಿನ್ ಯೋಸೇಫನೆ ಇಸ್ರಾಯೇಲ್‌ನ ಲಡ್ಕಾವ್ನ, “ದೇವ್ ತುಮುನ ಗುಮಾನೀಸ್‌ಕೊಂತೆ ಬಚಾ಼ಡಾನ ಆವ್‌ಶೆ; ತದೆ ತುಮೆ ಮಾರ ಪಿಂಜ಼ರ್‌ನ ತುಮಾರಿ ಜೋಡ್ಮ ಢೊಯಿಲೀನ್ ಜಾ಼ವ್ಣು” ಕರಿ ಇವ್ಣೇಥಿ ಆಣ್‌ ಲೆವಾಡ್ಯೊ. ಯೋಸೇಫ ಈಜಿಪ್ಟ್ ದೇಖ್ಹ್‌ಮ ಏಖ್ಹೋದಖ್ಹ್ ವರಖ್ಹ್‌ವಾಳೊಹುಯಿನ್ ಜಾನ್‌ಮ್ಹೇಲ್ಯೊ. ಇನ ಮುರ್ದಾನ ವಾಖ್ಹ್‌ನು ತೇಲ್‌ಖ್ಹಾರು ಲಯಿನ್ ಲಗಾಡಿನ್, ಇನ ಎಕ್ ಪಿಟಾರಾಮ ಘಾಲ್ಯು.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.