Waghri Booli Bible
ಆದಿಕಾಂಡ 5
ಆದಾಮ್ನಿ ಪಿಳ್ಗಿ
(1. ಪೂರ್ವ 1:1-4)
ಆದಾಮ್ನಿ ಪಿಳ್ಗಿನಿ ಪಟ್ಟಿ: ದೇವ್ನೆ ಉಬ್‍ಜಾ಼ವ್ಣಿನ ಹಗಾಮ್ಮ ಅದ್ಮಿನ ಇನೀನಿ ಘೋಣಿಸ್ ಉಬ್‌ಜಾ಼ಯೊ. ಇವ್ಣುನ ಪರ್ಖ್ಹೊ ಅಜು಼ ತಯೇಡ ಕರಿ ಬಣಾಯೊ. ಅಜು ಇವ್ಣುನ ಆಶೀರ್ವಾದ್‌ ಕರೀನ್ “ಅದ್ಮಿ” ಕರಿ ನಾಮ್‌ಮ್ಹೇಲ್ಯೊ, ಆದಾಮ್‌ ಏಕ್‌ಖ್ಹೊ ಡೋಡಿಖ್ಹ್‌ ವರಖ್ಹ್‌ವಾಳೊ ಹುವಾದಿನ್, ರೂಪ್‍ಮ ಇನಿನಿಘೋಣಿನೊ ಛಿಯ್ಯಾನ ಪೈದಕರೀನ್ ಇನ ಸೇತ ಕರಿ ನಾಮ್‌ಮ್ಹೇಲ್ಯೊ. ಇನಕೇಡೆಥು, ಆದಾಮ್‌ನೆ ಪರ್ಖ್ಹೊ ಅಜು಼ ತಯೇಡ ಲಡ್ಕಾವ್ನ ಪೈದಕರೀನ್ ಆಟ್ಖ್ಹೊ ವರಖ್ಹ್ ಬಚ್ಯೊ. ಅಮ್ ಆದಾಮ್‌ನೆ ಒಟ್‌ ನವ್‌ಖ್ಹೊ ಡೋಡಿಖ್ಹ್‌ ವರಖ್ಹ್ ಬಚಿನ್ ಇನ ಪಾಛ಼ಳ್ ಮರ‍್ಯೊ. ಸೇತನೆ ಎಖ್ಹೊ ಪಾಚ಼್ ವರಖ್ಹ್‌ವಾಳೊ ಹುವಾದಿನ್, ಎನೋಷನ ಪೈದಕರ‍್ಯೊ. ಎನೋಷ ಪೈದಹುವಾನ ಬಾದ್ಮ ಸೇತನೆ ಪರ್ಖ್ಹೊ ತಯೇಡ ಲಡ್ಕಾನ ಪೈದಕರೀನ್ ಅಟ್‌ಖ್ಹೊ ಖ್ಹಾತ್ ವರಖ್ಹ್ ಬಚ್ಯೊ. ಅಜು ಸೇತನೆ ಒಟ್‌ ನೌಖ್ಹೋ ಭಾರ ವರಖ್ಹ್ ಬಚೀನ್ ಇನಪಾಛ಼ಳ್‌ ಮರ‍್ಯೊ. ಎನೋಷ್ ಖ್ಹಡ್‌ಚಾರಿಖ್ಹ್‌ ವರಖ್ಹ್‌ವಾಳೊ ಹುವಾದಿನ್ ಕೇನಾನನ ಪೈದಕರ‍್ಯೊ. ಕೇನಾನ ಪೈದಹುವಾನ ಬಾದ್ಮ ಎನೋಷ್ ಪರ್ಖ್ಹೊ ಅಜು಼ ತಯೇಡ ಲಡ್ಕಾವ್ನ ಪೈದಕರೀನ್ ಆಟ್‌ಖ್ಹೋ ಪಂಧ್ರಾವರಖ್ಹ್‌ ಬಚ್ಯೊ಼. ಎನೋಷ್ ಒಟ್‌ ನೌಖ್ಹೋ ಪಾಚ಼್‌ವರಖ್ಹ್‌ ಬಚೀನ್ ಇನ ವಾರ್ ಮರ‍್ಯೊ. ಕೇನಾನ ಖ್ಹಡ್‌ತೀನ್‌ಖ್ಹ್‌ ವರಖ್ಹ್ ಹುವಾನ ಬಾದ್ಮ, ಮಹಲಲೇಲ ಕರಿ ಛಿಯ್ಯೊ ಪೈದಕರ‍್ಯೊ. ಮಹಲಲೇಲ ಪೈದಹುವಾದಿನ್ ಕೇನಾನನೆ ಅಜೂ಼ಬಿ ಲಡ್ಕಾವ್ನ ಪೈದಕರೀನ್ ಆಟ್‌ಖ್ಹೋ ಚಾ಼ಳಿಖ್ಹ್‌ ವರಖ್ಹ್ ಬಚ್ಯೊ. ಕೇನಾನನೆ ಒಟ್‌ ನೌಖ್ಹೋ ದಖ್ಹ್‌ ವರಖ್ಹ್‌ಮ ಮರ‍್ಯೊ. ಮಹಲಲೇಲ ಪಾಚ಼್ಉಪ್ಪರ್ ತೀನಿಖ್ಹ್‌ ವರಖ್ಹ್‌ವಾಳೊ ಹುವಾನ ಬಾದ್ಮ ಯೆರೆದನ ಪೈದಕರ‍್ಯೊ. ಯೆರೆದ ಪೈದಹುವಾದಿನ್ ಮಹಲಲೇಲನೆ ಪರ್ಖ್ಹೊ ಅಜು಼ ತಯೇಡ ಲಡ್ಕಾವ್ನ ಪೈದಕರೀನ್ ಆಟ್ ಖ್ಹೋ ಡೋಡೀಖ್ಹ್‌ ವರಖ್ಹ್ ಬಚ್ಯೊ. ಮಹಲಲೇಲನೆ ಒಟ್‌ ಆಟ್‌ಖ್ಹೋ ಪಾಚ಼್ಉಪ್ಪರ್ ಖ್ಹಡ್ಚಾರೀಖ್ಹ್ ವರಖ್ಹ್ ಬಚೀನ್ ಇನವಾರ್ ಮರ‍್ಯೊ. ಯೆರೆದ ಏಕ್‌ಖ್ಹೊ ಬೇಉಪ್ಪರ್‌ ತೀನಿಖ್ಹ್‌ ವರಖ್ಹ್‌ವಾಳೊ ಹುವಾನ ಬಾದ್ಮ ಹನೋಕನ ಪೈದಕರ‍್ಯೊ. ಹನೋಕ ಪೈದಹುವಾದಿನ್ ಯೆರೆದ ಆಟ್ಖ್ಹೊ ವರಖ್ಹ್ ಬಚಿರ‍್ಹೊ. ಅಜು಼ ಇನ ಲಡ್ಕಾಥ. ಯೆರೆದ ಒಟ್‌ ನೌಖ್ಹೋ ಬೇಉಪ್ಪರ್‌ ತೀನಿಖ್ಹ್‌ ವರಖ್ಹ್ ಬಚಿರ‍್ಹೀನ್ ಇನವಾರ್ ಮರ‍್ಯೊ. ಹನೋಕ ಪಾಚ಼್ಉಪ್ಪರ್ ತೀನಿಖ್ಹ್‌ ವರಖ್ಹ್‌ವಾಳೊ ಹುಯಿನ್ ಮೆತೂಷೆಲಹನ ಪೈದಕರ‍್ಯೊ. ಮೆತೂಷೆಲಹ ಪೈದಹುವಾದಿನ್ ಹನೋಕನೆ ಪರ್ಖ್ಹೊ ಅಜು಼ ತಯೇಡ ಲಡ್ಕಾವ್ನ ಪೈದಕರೀನ್ ದೇವ್ನಿ ಗಳ್‌ಜೋ಼ಡ್ಮ ರ‍್ಹೀನ್ ತೀನ್‌ಖ್ಹೊ ವರಖ್ಹ್ ಬಚ್ಯೊ. ಹನೋಕ ಬಚ್ಯೋತೆ ಒಟ್‌ ಹಗಾಮ್ ತೀನ್‌ಖ್ಹೊ ಪಾಚ಼್ಉಪ್ಪರ್ ತೀನಿಖ್ಹ್‌ ವರಖ್ಹ್. ಹನೋಕ ದೇವ್ನಿ ಗಳ್‌ಜೋ಼ಡ್ಮ ರ‍್ಹೀನ್ ಜಿವ್ಣು ಕರ್ತೊರ‍್ಹವಾನಿ ವಖ್ಹ್‌ತೆ ದೇವ್ನೆ ಇನ ಬುಲೈಲೀದೋತೆ ಇನಖ್ಹಾಜೆ ಕಿನ ಡೋಳೇಬಿ ದೆಖಾಯೊಕೊಯ್ನಿ. ಮೆತೂಷೆಲಹ ಏಕ್‌ಖ್ಹೊ ಖ್ಹಾತ್‌ಉಪ್ಪರ್ ಚಾರೀಖ್ಹ್‌ ವರಖ್ಹ್‌ವಾಳೊ ಹುಯಿನ್ ಲೆಮೆಕನ ಪೈದಕರ‍್ಯೊ. ಲೆಮೆಕ ಪೈದಹುವಾದಿನ್ ಮೆತೂಷೆಲಹನೆ ಪರ್ಖ್ಹೊ ಅಜು಼ ತಯೇಡ ಲಡ್ಕಾವ್ನ ಪೈದಕರೀನ್ ಖ್ಹಾತ್‌ಖ್ಹೋ ಬೇಉಪ್ಪರ್‌ ಚಾರೀಖ್ಹ್‌ ವರಖ್ಹ್ ಬಚಿರ‍್ಹೊ. ಮೆತೂಷೆಲಹ ಒಟ್‌ ನೌಖ್ಹೋ ನೌಉಪ್ಪರ್‌ ತೀನಿಖ್ಹ್‌ ವರಖ್ಹ್ ಬಚಿರ‍್ಹೀನ್ ಮರ‍್ಯೊ. ಲೆಮೆಕ ಏಕ್‌ಖ್ಹೊ ಬೇಉಪ್ಪರ್‌ ಚಾರೀಖ್ಹ್‌ ವರಖ್ಹ್‌ವಾಳೊ ಹುಯಿನ್ ಏಕ್‌ ಛಿಯ್ಯಾನ ಪೈದಕರ‍್ಯೊ. ಇನ ನೋಹಕರಿ ನಾಮ್‌ ಮ್ಹೇಲಿನ್‌, “ಯೆಹೋವನೆ ಶಾಪದಿದೋತೆ ಧರ್ತಿಮ ಮ್ಹಿನತ್ ಕರೀನ್ ಪಡುಕರಿಯೇತೆ ವದೇಖ್ಹ್‌ನ ಆ ಲಡ್ಕೇಥಿ ಅಪ್ಣುನ ಸಮಾಧಾನ್ ಮಳ್‌ಶೆ” ಕರಿ ಬೊಲ್ಯೊ. ನೋಹ ಪೈದಹುವಾದಿನ್ ಲೆಮೆಕನೆ ಪರ್ಖ್ಹೊ ಅಜು಼ ತಯೇಡ ಲಡ್ಕಾವ್ನ ಪೈದಕರೀನ್ ಪಾಚ಼್‌ಖ್ಹೋ ಪಾಚ಼್ಉಪ್ಪರ್ ಖ್ಹಡ್ಚಾರೀಖ್ಹ್ ವರಖ್ಹ್ ಬಚಿರ‍್ಹೊ. ಲೆಮೆಕ ಒಟ್‌ ಖ್ಹಾತ್‌ಖ್ಹೋ ಖ್ಹಾತ್‌ಉಪ್ಪರ್ ಖ್ಹಡ್‌ತೀನಿಖ್ಹ್‌ ವರಖ್ಹ್ ಬಚಿರ‍್ಹೀನ್ ಇನವಾರ್ ಮರ‍್ಯೊ. ನೋಹ ಪಾಚ಼್‌ಖ್ಹೋ ವರಖ್ಹ್‌ನೊ ಹುಯಿನ್ ಶೇಮ್‌, ಹಾಮ್‌, ಯೆಫೆತ್‌ಕರಿ ತೀನ್‌ಜ಼ಣ ಪರ್ಖ್ಹ ಲಡ್ಕಾವ್ನ ಪೈದಕರ‍್ಯೊ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.