Waghri Booli Bible
ಆದಿಕಾಂಡ 43
ಬೆನ್ಯಾಮಿನ್ ಅಜು಼ ಯೋಸೇಫನ ಭೈಯೇ ಪಾಛ಼ ಈಜಿಪ್ಟ್‌ನ ಗಯಾತೆ.
ಕಾನಾನ್‌ಮ ಕಾಳ್‌ದುಕಾಳ್ ಘಣು ಜಾ಼ಖ್ಹತ್‌ಹುಯಿಗುಥು. ಇವ್ಣೆ ಈಜಿಪ್ಟ್‌ಥ ಲಾಯಾತೆ ಅನಾಜ಼್ ಖತಮ್ ಹುಯಿಜಾ಼ವದಿನ್ ಇವ್ಣೊ ಬಾನೆ ಇವ್ಣುನ, “ತುಮೆ ಪಾಛ಼ ಜೈ಼ನ್ ಬಿಜೂ಼ಬಿ ಥೋಡು ಅನಾಜ಼್‌ನ ಮೋಲ್ ಲೀನ್‌ಆವೊ” ಕರಿ ಬೊಲ್ಯೊ. ಇನಖ್ಹಾಜೆ ಯೆಹೂದನೆ ಇನ ಬಾನ ಶಾತ್ ಬೋಲ್ಯೋಕತೊ, “ಯೊ ಅದ್ಮಿ ಹಮುನ ‘ತುಮಾರ ನ್ಹಾನ ಭೈನ ಬುಲೈ ನಾಲಾಯತೊ ಮಾರು ಮ್ಹೋಡು ತುಮೆ ನಾದೇಕ್ಣು’ ಕರಿ ಕಡಕ್‌ಥಿ ಬೊಲ್ಯೊ. ‘ತೂ ಹಮಾರ ನ್ಹಾನ ಭೈನ ಹಮಾರಿ ಜೋ಼ಡ್ಮ ಮೋಕ್‌ಲ್ಯೋತೊ ಹಮೆ ಜೈ಼ನ್, ತುನ ಅನಾಜ಼್ ಮೋಲ್‌ಲೀನ್ ಐಯೇಸ್. ಇನ ತೂ ನಾ ಮೋಕ್‌ಲ್ಯೋತೊ ಹಮೆ ಕೋ ಜೈ಼ಯೇನಿ. ಶನಕತೊ ಯೊ ಅದ್ಮಿ, “ತುಮಾರೊ ನ್ಹಾನೊ ಭೈ ತುಮಾರಿ ಜೋ಼ಡ್ಮ ನಾರ‍್ಹಯೋತೊ ಮಾರು ಮ್ಹೋಡು ನಾ ದೇಕ್ಣು” ಕರಿ ಬೋಲಿ ರಾಖ್ಯೋಸ್. ಇನಖ್ಹಾಜೆ ಯಾಕೋಬ್‌ನೆ, “ಬಿಜೇಕ್ ನ್ಹಾನೊ ಭೈ ಛಾ಼ ಕರಿ ಯೊ ಅದ್ಮಿನ ಬೋಲೊ, ಮನ ಶನಖ್ಹಾಜೆ ಆ ಕುಢಾಪಮ ಘಾಲ್ಯ?” ಕರಿ ಬೊಲ್ಯೊ. ತದೆ ಇವ್ಣೆ, ಅಪ್ಣಿ ಬಾರೇಮಾಬಿ ಅಪ್ಣ ಘರ್‌ವಾಳಾನಿ ಬಾರೇಮಾಬಿ ಯೊ ಅದ್ಮಿನೆ ಖ್ಹಂಜ಼್‌ಕಾರ್‌ಥಿ ಪೂಚ಼್‌ತಾಚ್‌ ಕರ‍್ಯೊ. ಅಜು಼ ಇನೆ ತುಮಾರೊ ಬಾ ಬಿಜೂ಼ಬಿ ಬಚಿರ‍್ಹೋಸ್‌ಕಿಶೂ? ತುಮುನ ಬಿಜೇಕ್ ನ್ಹಾನೊ ಭೈ ಛಾ಼ಕಿಶೂ? ಕರಿ ಪುಛಾ಼ಯೊ. ಯೊ ಜ಼ವಾಬ್‌ನ ಬರೋಬರ್‌ನು ಫೇಡ್‌ದಿದ. ಯೊ ತುಮಾರ ನ್ಹಾನ ಭೈನ ಬುಲೈಲೀನ್ ಆವೊಕರಿ ಬೋಲ್‌ಶೆ ಕರಿ ಹಮುನ ಕಿಮ್ ಮಾಲುಮ್ ಪಡ್‌ಶೆ?” ಕರಿ ಬೋಲ್ಯ. ತದೆ ಯೆಹೂದನೆ ಇನೊ ಬಾ ಯಾಕೋಬನ, “ಯೊ ಛೋ಼ಕ್ರಾನ ಮಾರಿ ಜೋ಼ಡ್ಮ ಮೋಕಲ್, ಹಮೆ ಜೈ಼ಯೇಸ್. ತದೆ ತೂಬಿ , ಹಮೇಬಿ ಅಜು಼ ಹಮಾರ ಲಡ್ಕಾಬಿ ಮರ್‌ಶುಕೊಂತೆ ಬಚ್‌ಶು. ಮೇ ಇನಿ ಜಿಮ್ಮೇದಾರಿ ಲೆವುಸ್‌; ಇನಿ ಬಾರೇಮ ಮನಾಸ್ ಪುಛಾ಼ಯೇಜಾ಼ಯ್. ಮೇ ಇನ ತಾರ ಖ್ಹಾಮ್ಣೆ ಪಾಛೊ಼ಫರಿ ನಾ ಬುಲೈಲಯಿನ್ ಭೀರಾಖ್ಯೋತೊ ಯೊ ಅಪ್‌ರಾದ್‌ ಕದೇಬಿ ಮಾರಪರಸ್ ರ‍್ಹವಾದೆ. ಹಮೆ ದೇರ್‌ ನಾರುಕ್ಯಹೋತ್ತೊ ತದೇಸ್‌ ಬೇ ವಖ್ಹತ್ ಜೈ಼ನ್ ಆಯಾಹೋತ್” ಕರಿ ಬೊಲ್ಯೊ. ತದೆ ಇವ್ಣೊ ಬಾ ಯಾಕೋಬನೆ, “ತುಮೆ ಜಾ಼ವ್ಣುಕತೊ ಎಕ್ ಕಾಮ್ ಕರೊ; ಆ ಮುಲಕ್‌ಮ ಮಳಾತೆ ಮೋಲ್ನ ರಾಛಾ಼ನ ಇನಾಮ್ನಖ್ಹಾಜೆ ಥೋಡು ತೇಲ್, ಶೇತ್, ದೂದ್‌ನಿ ಮ್ಹಲೈ, ವಾಖ್ಹ್‌ನು ಮುಲಾಮ್‌, ವಾನುತೇಲ್‌, ಬಾದಮ್, ಕಾಜು಼ ಥೋಡು ಮಸಾಲನು ರಾಛು಼ ಆಅಖ್ಖಾನ ತುಮಾರ ಕೋಥ್‌ಳಾಮ ಘಲ್ಲೀನ್ ಜಾ಼ವೊ. ಯೋಸ್ ಕಾಹೆತೆ ತುಮೆ ಬೇಪಟ್ ಎತ್ರು ಪೈಶಾನ ಲೀಜಾ಼ವೊ; ಇವ್ಣೆ ತುಮಾರ ಕೋಥ್‌ಳಾನ ಮ್ಹೋಡೆ ಪಾಛು಼ ಘಾಲಿ ಮೋಕ್ಲಿರಾಖ್ಯುಥುತೆ ಪೈಶಾ ಉಶೇತೊ ಲೀನ್‌ಜಾ಼ವೊ. ತುಮಾರ ನ್ಹಾನ ಭೈನಾಬಿ ಬುಲೈಲೀನ್ ಪಾಛ಼ ಯೊ ಅದ್ಮಿಕನ ಬುಲೈಲೀನ್ ಜಾ಼ವೊ. ಯೊ ತುಮಾರಾಪರ್ ಗೋರ್‌ಕರೀನ್‌ ತುಮಾರ ಮೋಟಭೈನಾಬಿ ಬೆನ್ಯಾಮೀನ್ನಾಬಿ ತುಮಾರಿ ಜೋಡ್ಮ ಮೋಕ್ಲಿದ್ಯಾವಾನಿ ತರ ಸರ್ವಶಕ್ತ ಯೆಹೋವ ದೇವ್ ಕರಾದೆ; ಮೇತೊ ಲಡ್ಕಾವ್ನ ಗುಮೈಲ್ಯಾವಾಳೊ ಹುಯಿರ‍್ಹವಾನು ಉಶೇತೊ ಇಮ್ಮಸ್ ಹುವಾದೆ” ಕರಿ ಬೊಲ್ಯೊ. ತದೆ ಇವ್ಣೆ ಕಾಣ್ಕೆನ ರಾಛಾ಼ನ ತಯಾರ್ ಕರಿಲೀನ್, ಬೇಪಟ್ ಪೈಶಾನ ಪಾಡಿಲೀನ್, ಬೆನ್ಯಾಮೀನ್ನ ಜೋ಼ಡ್ಮ ಬುಲೈಲೀನ್ ಈಜಿಪ್ಟ್‌ದೇಖ್ಹ್‌ನ ಜೈ಼ನ್ ಯೋಸೇಫ್‌ನ ಖ್ಹಾಮ್ಣೆ ಭೀರಿಗಯ. ಬೆನ್ಯಾಮೀನ್ ಇವ್ಣಿಜೋ಼ಡ್ಮ ರ‍್ಹಾವಾನು ಯೋಸೇಫನೆ ದೇಖಿನ್ ಇನು ಘರ್‌ ದೇಖಿಲ್ಯಾವಾಳನ ಬುಲೈನ್, “ಆ ಅದ್ಮೆವ್‌ನ ಘರ್ಮ ಬುಲೈಲೀನ್ ಜಾ಼, ಅಛ್ಛಿಂತರ ಪಲಿ ರ‍್ಹಾವಾನು ಜಾನ್ವಾರ್‌ನ ವ್ಹಾಡಿನ್ ಖಾಣು ಪಿಕಾವ್. ಶನಕತೊ ಆ ಅದ್ಮೆವ್ ಆ ವಖ್ಹ್‌ತೆ ಧೊಪಾರ್‌ಮ ಮಾರಿ ಜೋ಼ಡ್ಮ ಖಾಣು ಖಾಶೆ” ಕರಿ ಹುಕುಮ್‌ದಿದೊ. ಯೋಸೇಫನು ಹುಕುಮ್‌ನಿತರಸ್ ಘರ್‌ದೇಖಿಲ್ಯವಾಳನೆ ಇವ್ಣುನ ಯೋಸೇಫನ ಘರ್ಮ ಬುಲೈಲೀನ್ ಗಯೊ. ಯೋಸೇಫನ ಘರೆ ಬುಲೈಲಾಯೂತೆ ದೇಖಿನ್ ಇವ್ಣೆ ಡರಿನ್, “ಪಹಿಲಿ ಬಾರ್ ಅಪ್ಣ ಕೋಥ್‌ಳಾ ಪಾಛ಼ ಲೀನ್ ಗಯಾತೆ ಪೈಶಾನ ಖ್ಹಾಜೇಸ್‌ ಇನೆ ಅಪ್ಣುನ ಇನ ಘರ್ಮ ಬುಲೈರಾಖ್ಯೋಸ್. ಫಕ್ಕರಿ ಅಪ್ಣಪರ್ ಪಡೀನ್ ಅಪ್ಣುನ ಗುಲಾಮ್‌ಬಣೈನ್ ಅಪ್ಣ ಗಧೇಡಾವ್ನ ಛಿನೈಲಿಶೆಕರಿ ದೆಖಾವಸ್” ಕರಿ ಇವ್ಣ ಇವ್ಣಾಮಸ್ ಬೋಲಿಲಿದ. ಘರ್‌ನ ದರ‍್ವಾಜ಼ಕನ ಜೈ಼ನ್ ಯೋಸೇಫನು ಘರ್‌ ದೇಖಿಲ್ಯಾವಳನ, “ಅಲಾ ಯಜಕ್, ಫೈಲಿ ಏಕ್‌ ವಖ್ಹ್‌ತೆ ಹಮೆ ಅನಾಜ಼್‌ನು ರಾಛು಼ ಲೀನ್‌ಜಾ಼ವಾನ ಆಯಾಥ. ಹಮೆ ಜೈ಼ನ್ ಥಾತೆ ಡೇರಾಮ ಹಮಾರ ಕೋಥ್‌ಳಾವ್ನ ಛೋ಼ಡಿನ್ ದೇಖಾಖ್ಹತರ್ ಹರೇಕ್‌ಜ಼ಣಾನ ಪೈಶಾನ ವಜ಼ನ್‌ಮ ಜ಼ರಾಬಿ ಕಮ್‌ಕೊಂತೆ ತಿನತಿನ ಕೋಥ್‌ಳಾಮಾಸ್‌ ಥು. ಇನ ಪಾಛು಼ ಫರಾವನ ಲೀನ್ ಆಯಾ. ಅನಾಜ಼್ ಮೋಲ್‌ಲ್ಯಾವಾನಖ್ಹಾಜೆ ಅಲಕ್ ಪೈಶಾ ಲೈರಾಖ್ಯಾಸ್. ಯೊ ಪೈಶಾನ ಹಮಾರ ಕೋಥ್‌ಳಾಮ ಕೋಣ್ ಘಾಲ್ಯೂಕಿ ಹಮುನ ಮಾಲುಮ್ ಕೊಯ್ನಿ” ಕರಿ ಬೋಲ್ಯ. ಇನಖ್ಹಾಜೆ ಯೊ ಘರ್‌ದೇಖಿಲ್ಯಾವಾಳನೆ, “ತುಮೆ ಸಮಾಧಾನ್‌ಥಿ ರ‍್ಹವೊ. ತುಮೆ ಶಾತ್ಬಿ ಡರೊನಕೊ ತುಮುನಾಬಿ ತುಮಾರ ಬಾನಾಬಿ ದೇವ್ ಹುಯಿರ‍್ಹವಾಳನೆ ತುಮಾರ ಕೋಥ್‌ಳಾಮ ಪೈಶಾ ಘಾಲ್ಯೊ ಉಶೆ. ತುಮಾರ ಪೈಶಾ ಮನ ಮಳ್ಯ” ಕರಿಬೋಲಿನ್, ಇನೆ ಸಿಮೆಯೋನ್ನ ಇವ್ಣಕನ ಬುಲೈಲಿನ್ ಆಯೊ. ಇನಪಾರ್ ಇವ್ಣ ಅಖ್ಖಾಸ್ನ ಯೋಸೇಫನ ಘರ್ಮ ಇನೆ ಬುಲೈಲೀನ್ ಆಯೊ. ಹಾತ್‌ ಗೋಡಾ ಧೊವಾನ ಪಾಣಿ ದೆವಾಡಿನ್, ಇವ್ಣ ಗಧೇಡವ್‌ನಾಬಿ ಚಾ಼ರೊ ನಖಾಯೊ. ಇವ್ಣೆ ಹಿಜ್ಜಾ಼ಸ್ ಖಾಣುಖಾವ್‌ಣು ಕರಿ ವಾತೆ ಇವ್ಣೆ ಖ್ಹಮ್‌ಜ್ಯಾಥಾತೆ ಇನಾಖ್ಹಾಜೆ ಇವ್ಣೆ ಲಾಯಥಾತೆ ಕಾಣ್ಕೆನ ಯೋಸೇಫನ ದ್ಯವಾನ ತಯಾರ್ ಕರಿಲಿದ. ಯೋಸೇಫ ಘರೆ ಆವಾದಿನ್‌, ಇವ್ಣೆ ಇವ್ಣ ಹಾತ್‌ಮ ಥೂತೆ ಕಾಣ್ಕೆನ ಘರ್ಮಲಾಯಿನ್ ಇನ ದೀನ್ ಇನ ಖ್ಹಾಮ್ಣೆ ಆಡ್‌ಪಡ್ಯ. ಇನೆ ಇವ್ಣುನ ಅಛ಼್ಛ ಛಾ಼ಕಿ ಕಿಮ್‌ಛಾ಼ ಕರಿಪುಛೈ಼ನ್‌ ಇವ್ಣುನ ಶಾತ್ ಬೋಲ್ಯೋಕತೊ, “ತುಮೆ ಬೋಲ್ಯಾತೆ ಬುಢೋಹುಯಿಗೋತೆ ತುಮಾರೊ ಬಾ ಅಛ್ಛೊ಼ ಛಾ಼ಕಿಶೂ? ಯೊ ಬಿಜೂ಼ಬಿ ಬಚಿರ‍್ಹೋಸ್‌ಕಿಶೂ? ಕರಿ ಪುಛಾ಼ಯೊ. ಇವ್ಣೆ ಪಾಛ಼ ಜ಼ಮೀನ್‌ಲಗು ಮುಡ್‌ಕ್ಯು ಝು಼ಕೈನ್ ಖ್ಹಲಾಮ್‌ಕರೀನ್‌, “ತುಮಾರೊ ಆಳ್‌ಹುಯಿರೋತೆ ಹಮಾರೊ ಬಾ ಹಮ್ಕೆಲಗೂಬಿ ಅಛ್ಛೊ಼ಛಾ಼, “ಕರಿ ಬೋಲ್ಯ. ತದೆ ಇನೆ ಡೋಳಪಾಡಿ ಇನಿ ಪೀಠೆ ಪೈದಹುಯೋತೆ ಭೈ ಬೆನ್ಯಾಮೀನ್ನ ದೇಖಿನ್, “ತುಮೆ ಬೋಲ್ಯಾತೆ ತುಮಾರೊ ನ್ಹಾನೊ ಭೈ ಆಸ್ ಕಿಶು?” ಕರಿ ಪುಛೈ಼ನ್ ಇನ, “ಛೋ಼ಕ್ರ ದೇವ್ನಿ ಪ್ಯಾರ್ ತಾರಪರ್ ರ‍್ಹಾವಾದೆ” ಕರಿ ಬೊಲ್ಯೊ. ಯೋಸೇಫ ನ್ಹಾನ ಭೈನ ದೇಖಿನ್ ಇನು ಪೇಟ್‌ಬಳಾತೆ ಇನಖ್ಹಾಜೆ ಯೊ ಒಗ್ಗೀಸ್ ಇನ ಘರ್ಮಜೈ಼ನ್ ರೊಯೊ. ಇನಾಪಾರ್ ಮ್ಹೋಡು ಧೊಯ್‌ಲೀನ್ ಭಾರ್ ಆಯಿನ್, ದಿಲ್‌ ಘಟ್ ಕರಿಲೀನ್, “ಖಾಣು ನಾಖೊ” ಕರಿ ಹುಕುಮ್ ಕರ‍್ಯೊ. ಖಾಣು ನಾಖವಾಳವ್‌ನೆ ಇನಾಬಿ ಇನ ಭೈಯೇನಾಬಿ ಇನ ಜೋ಼ಡ್ಮಥಾತೆ ಈಜಿಪ್ಟ್‌ವಾಳನಬಿ ಅಲಕ್ ಅಲಕ್ ಬೇಖ್ಹಾಡಿನ್ ಖಾಣುನಾಖ್ಯು. ಶನಕತೊ ಈಜಿಪ್ಟ್‌ವಾಳು ಇಬ್ರಿಯವಾಳನ ಜೋ಼ಡೆ ಪಂತೀಮ ಬೇಶಿನ್ ಖಾಣು ಖಾತೂಥು ಕೊಯ್ನಿ. ಯೊ ಈಜಿಪ್ಟ್‌ವಾಳನ ಕಚಿಂಡ್‌ ಹುಯಿರೂಥು. ಯೋಸೇಫನೆ ಇನ ನ್ಹಾನ ಮೋಟ ಭೈಯೇನ, ಶಾಣಾಥಿ ಧರೀನ್ ಅಡ್ಡಾಣಿಲಗೂಬಿ, ಇವ್ಣಿ ಇವ್ಣಿ ಉಂಬರ್‌ನಿ ಪರಕ್ಕಸ್‌ ಬೇಖ್ಹಾನಿತರ ಕರ‍್ಯೊತೆ ಇನಖ್ಹಾಜೆ, ಇವ್ಣ ಇವ್ಣಾಮಸ್ ಆಶ್ಚರ್ಯಕರ‍್ಯು. ಯೋಸೇಫನೆ ಇನ ಖ್ಹಾಮ್ಣೆ ಮ್ಹೇಲಿರಾಖ್ಯುಥೂತೆ ಖಾಣಮಾಥು ಇವ್ಣುನ ಭಾಗ್‌ ದಿಮೋಕ್‌ಲ್ಯೊ. ಇನಾಮ ಬೆನ್ಯಾಮೀನ್ನ ಗಯೋತೆ ಭಾಗ್‌ ಯೊ ಅಖ್ಖಾನ ಭಾಗ್‌ಥಿ ಪಾಚ಼್‌ ಪಟ್‌ಯೆತ್ರು ಜಾ಼ಖ್ಹತ್‌ಥು. ಇವ್ಣೆ ಘಣು ಖೈಪೀನ್ ಯೋಸೇಫನಿ ಜೋ಼ಡ್ಮ ಖ್ಹುಶೀಥಿ ಥ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.