Waghri Booli Bible
ಆದಿಕಾಂಡ 14
ಅಬ್ರಾಮ್‌ನೆ ಲೋಟನ ಬಚಾ಼ಯೊತೆ
ಯೊ ದನ್ಮ 1ಶಿನಾರ್‌ನೊ ರಾಜ಼ ಅಮ್ರಾಫೆಲ್‌, ಎಲ್ಲಾಸರನೊ ರಾಜ಼ ಅರಿಯೋಕ, ಏಲಾಮ್‌ನೊ ರಾಜ಼ ಕೆದೊರ್ಲಗೋಮರ್‌, ಗೋಯಿಮನೊ ರಾಜ಼ ತಿದ್ಗಾಲ್‌ ಆ ಚಾರ್‌ಜ಼ಣ ರಾಜ಼ನೆ ಝ಼ರುಕೊ ತಬರ್‌ಖಾಮ ಎಕ್ಟುಮಳಿರ‍್ಹೊತೆ ಸೊದೋಮ್ ರಾಜ಼ ಬೆರಗ, ಗೊಮೋರನೊ ರಾಜ಼ ಬಿರ್ಶಗ, ಅದ್ಮಾಹನೊ ರಾಜ಼ ಶಿನಾಬ, ಚೆಬೋಯಿಮ್‌ನೊ ರಾಜ಼ ಶೆಮೇಬರ, ಬೇಲಗ ನತರ್ ಚೋಗರನ ಪಾಚ಼್ ರಾಜಾ಼ವ್‌ಥಿ ಜಂಗ್ ಭೀಡ್ಯು. ಆ ಪಾಚ಼್ ರಾಜ಼ವ್ ಹಮ್ಕೇನು ಮೀಟ್‌ನೊದರ‍್ಯಾವ್‌ಕರಿ ಬೋಲೈರ‍್ಹುತೆ ಸಿದ್ದೀಮ್‌ ಝ಼ರುಕೊನ ತಬರ್‌ಖಾಮ ಒಟ್‌ಥಿ ಮಳಿರ‍್ಹಾಥ. ಬೆರಗ ಅಜು಼ ಆ ಪಾಚ಼್‌ಜ಼ಣ ರಾಜ಼ಖ್ಹಾರು ಭಾರ ವರಖ್ಹ್‌ ಕೆದೊರ್ಲಗೋಮರನ ಚ಼ಪ್ಪಣ್‌ಮ ರ‍್ಹೀನ್ ತೇರ‍್ಹ ವರಖ್ಹ್‌ಮ ಪಾಛು಼ ಫರಿಪಡ್ಯು. ಚೌ಼ಧನ ವರಖ್ಹ್‌ಮ ಕೆದೊರ್ಲಗೋಮರಬಿ ಇನ ಮಳ್ಯಹುಯ ರಾಜ಼ವ್‌ಬಿ ಅಯಿನ್ ಅಷ್ಟರೋತ್‌ ಕರ್ನಯಿಮ್‌ ರೆಫಾಯವಾಳನಾಬಿ ಹಮಿ ಕರಿ ತಬರ್‌ಖಾಮ ಜೂಜ್ಯವಾಳನಾಬಿ ಶಾವೆಕಿರ್ಯಾತಯಿಮಿಮ ಏಮಿಯವಾಳನಬಿ, ಆ ನಾಹುಯಿನ್ ಸೇಯಿರ್‌ಕರಿ ಪಹಾಡ್‌ನೊ ತಬರ್‌ಖಾಮ ಜಿವ್ಣು ಕರುಕರ್ತುಥೂತೆ ಹೋರಿಯವಳನಾಬಿ, ಹಿಜ್ಜಾ಼ಸ್‌ ಇವ್ಣುನ ಹರೈನ್ ರೇತ್ನ ತಬರ್‌ಖಾನ ಖನ್ನೆಛಾ಼ತೆ ಎಲ್ಪಾರಾನ್‌ಲಗೂಬಿ ಪಾಛೊ಼ ನಖ್ಹಾಡ್ಯು. ಇನಕೇಡೆಥು ಇವ್ಣೆ ಪಾಛು಼ಫರಿನ್ ಕಾದೇಶ್‌ಕರಿ ಬೋಲಾನು ಎನ್ಮಿಷ್ಟಾಟಿನ ಆಯಿನ್ ಅಮಾಲೇಕ್ಯವಾಳಾನು ತಮಾಮಸ್‌ ಗಾಮ್‌ನಾಬಿ ಹಚಚೋನ್ ತಾಮರಮ ಜಿವ್ಣು ಕರುಕರ್ತೊಥೋತೆ ಅಮೋರಿಯವಾಳನಬಿ ಜೂತಿಲಿದು. ತದೆ ಸೊದೋಮ್, ಗೊಮೋರ, ಅದ್ಮಾಹ, ಚೆಬೋಯಿಮ್‌ ಅಜು಼ ಚೋಗರ್‌ಕರಿ ಬೇಲಗ ದೇಖ್ಹ್‌ನು ರಾಜ಼ವ್‌ಖ್ಹಾರು ನಿಕ್ಳಿನ್ ಇವ್ಣುನ ಮ್ಹೋರೆಹುಯಿನ್, ಕತೊ ಏಲಾಮ್‌ ರಾಜ಼ ಕೆದೊರ್ಲಗೋಮರ್‌, ಗೋಯಿಮನೊ ರಾಜ಼ ತಿದ್ಗಾಲ, ಶಿನಾರ್‌ನೊ ರಾಜ಼ ಅಮ್ರಾಫೆಲ್‌, ಎಲ್ಲಾಸರನೊ ರಾಜ಼ಹುಯಿರ‍್ಹೋತೆ ಅರಿಯೋಕ, ಅವ್ಣಿ ವಿರೋದ್‌ ಸಿದ್ದೀಮ್‌ಕರಿ ಝೋ಼ಕ್‌ಮ ಇವ್ಣ ದಂಡ್‌ನ ಭೀರಾಖ್ಯು. ಅಮ್‌ ಚಾರ್‌ಜ಼ಣ ರಾಜ಼ವ್ನೆ ಪಾಚ಼್‌ಜ಼ಣ ರಾಜಾ಼ವ್ನ ಡರಾಯು. ಕತೋಬಿ ಸಿದ್ದೀಮ್‌ ಝ಼ರುಕಾನು ತಬರ್‌ಖೊ, ಬಂಡಾನಿ ಪಥಾರಿಯೇನು ಡಾಂಬರ್‌ನ ಕುಂಟಾವ್‌ಥಿ ಭರೈರ‍್ಹುಥು. ಸೊದೋಮ್ ಗೊಮೋರನ ರಾಜ಼ಭಣಿವಾಳು ನಾಶಿಜಾ಼ವನಿ ವಖ್ಹ್‌ತೆ ಯೊ ಡಾಂಬರ್‌ನ ಕುಂಟಾಮ ಪಡಿಗಯು; ಉಬ್ರಿಹುಯು ಪಹಾಡ್‌ಭಣಿ ನಾಶಿಚ಼ಲಿಗು. ಜೂತ್ಯೂತೆ ಯೊ ಚಾರ್‌ಜ಼ಣ ರಾಜ಼ವ್ನೆ ಸೊದೋಮ್ ಗೊಮೋರ್‌ ಖ್ಹಯೇರ್‌ಮಥೂತೆ ಖ್ಹಾರೂಸ್ ಧನ್‌ದೌಲತ್‌ನಾಬಿ ಇನಾಮಾನು ಅನಾಜ಼್‌ಬಿ ಲೂಟಿಲೀನ್‌ ಗಯು. ಸೊದೋಮ್ಮ ಜಿವ್ಣು ಕರುಕರ್ತೊಥೋತೆ ಅಬ್ರಾಮ್‌ನೊ ನ್ಹಾನೊಭೈನೊ ಛಿಯ್ಯೊ ಲೋಟನಾಬಿ ಇನಿ ಶೊತ್‌ಖ್ಹಮೇದ್‌ ಧರಿಲೀನ್ ಚ಼ಲಿಗು. ಕತೋಬಿ ಛು಼ಕ್ಯುತೆ ಇನಮಾಥೊ ಏಕ್‌ಜ಼ಣಾನೆ, ಇಬ್ರಿಯವಾಳೊ ಅಬ್ರಾಮ್‌ಕನ ಅಯಿನ್ ಆಖ್ಹಾರಿ ವಾತೆ ಖ್ಹಮ್‌ಜಾ಼ಡ್ಯೊ. ಅಬ್ರಾಮ್‌, ಅಮೋರಿಯವಾಳೊ ಹುಯಿರೋತೆ ಮಮ್ರೆಯಾನು ಮೋರೆ ತೋಪ್‌ಕನ ಜಿವ್ಣು ಕರುಕರ್ತೊಥೊ. ಮಮ್ರೆಯನ ಎಷ್ಕೋಲ ಅಜು಼ ಆನೇರಕರಿ ಬೇ ಭೈಯೇ ಥಾ; ಅವ್ಣೆ ಭೇಜ಼ಣನಾಬಿ ಅಬ್ರಾಮ್‌ನಾಬಿ ಒಪ್ಪಂದ ಥು. ಅಬ್ರಾಮ್‌ ಇನೊ ನ್ಹಾನೊ ಭೈನೊ ಛಿಯ್ಯೊ ಖ್ಹಾರ್ಕೊಟ್‌ಮ ಮಳ್ಯುತೆ ಇನ ಖ್ಹಮ್‌ಜೀನ್‌, ಇನ ಘರ್‌ಮಾಸ್ ಪೈದಹುಯಿನ್, ಹಿಜ್ಜಾ಼ ಪಳೀನ್ ಶಿಕಿರ‍್ಹೂತೆ ತೀನ್‌ಖ್ಹೊ ಅಠಾರ ಜ಼ಣು ಆಳ್ನ ಜಂಗ್‌ನ ತಯಾರ್ ಕರೀಲಿಜೈನ್ ಯೊ ಚಾರ್ ರಾಜಾ಼ವ್‌ನಾಬಿ ದಾನ ಖ್ಹಯೇರ್‌ಲಗೂಬಿ ಪಾಛೊ಼ ನಖ್ಹಾಡ್ಯೊ. ಯೊ ರಾತ್ನಿ ವಖ್ಹತ್‌ಮ ಇನ ಡಂಡ್‌ನ ಬೇಭಾಗ್‌ ಕರೀನ್, ವಹೇರ‍್ಯಪರ್‌ ಪಡಿನ್ ಹರಾಯೊ. ಕಾಹೆತೆ ದಮಸ್ಕ ಖ್ಹಯೇರ್‌ನ ಉತ್ತರ್ ದಿಕ್‌ಭಣಿಥಾತೆ ಹೋಬಾಕರಿ ಗಾಮ್‌ಲಗು ಇವ್ಣುನ ಪಾಛೊ಼ ನಖ್ಹಾಡ್ಯೊ. ರಾಜ಼ಖ್ಹಾರು ಲೂಟಿಲಿದಾತೆ ಖ್ಹಾರುಸ್ ಚೀಜ಼್‌ನ ಇನೆ ಪಾಛೊ಼ ಛಿನೈಲಿದೊ. ಇನ ನ್ಹಾನಭೈನೊ ಛಿಯ್ಯೊ ಲೋಟನಾಬಿ ಛೋ಼ಡಾಯೊ. ಇನಿ ಶೊತ್‌, ಖ್ಹಾರ್ಕೊಟ್‌ಮಥೀತೆ ತಯೇಡಾವ್‌ನ, ಅಜು಼ ಬಿಜ಼ ಅದ್ಮಿವ್‌ನಾಬಿ ಬುಲೈಲೀನ್ ಆಯೊ.
ಮೆಲ್ಕೀಚೆದೆಕನೆ ಅಬ್ರಾಮ್‌ನ ಆಶೀರ್ವಾದ್‌ ಕರ‍್ಯೊತೆ
ಇನೆ ಕೆದೊರ್ಲಗೋಮರನಾಬಿ ಇನಿಜೋ಼ಡ್ಮಥಾತೆ ರಾಜಾ಼ವ್‌ನಾಬಿ ಹರೈನ್ ಆವಾದಿನ್ ಸೊದೋಮ್‌ನೊ ರಾಜ಼ನೆ ಇನ ರಾಜ಼ನು ಝ಼ರುಕೊಕರಿ ಬೋಲೈರ‍್ಹುತೆ ಶಾವೆ ಝೋ಼ಕ್‌ಮ ಅಬ್ರಾಮ್‌ನ ಮಳ್ಯೊ. ಸಾಲೇಮಿನೊ ಮಹಾನ್ ರಾಜ಼ ಮೆಲ್ಕೀಚೆದೆಕ ಜಿನು ಅಯಿನ್ ರೋಟನಾಬಿ ದ್ರಾಕ್ಷಿನ ರಖ್ಹ್‌ನಾಬಿ ದಿದೊ. ಆ ಹೈರೋತೆ ಘಣೋ ಊಚೊ಼ ದೇವ್‌ನೊ ಯಾಜಕಬಿ ಹುಯಿರ‍್ಹೋಥೊ. ಅನೆ ಅಬ್ರಾಮ್‌ನ ಆಶೀರ್ವಾದ್‌ಕರೀನ್, “ಆಬ್‌ಧರ್ತಿನ ಉಬ್‌ಜಾ಼ಯೋತೆ ದೇವ್‌ನು ಆಶೀರ್ವಾದ್‌ ಅಬ್ರಾಮ್‌ನ ಮಳಾದೆಕರಿ ಬೊಲ್ಯೊ. ಸೊರ್ಗನೊ ದೇವ್‌ ತಾರ ವಹೇರ‍್ಯಾನ ತಾರ ಹಾತ್ಮ ದಿದೋತೆ ಇನಖ್ಹಾಜೆ ಇನ ಧನ್ಯವಾದ್‌” ಕರಿಬೋಲ್ಯೊ. ಅಬ್ರಾಮ್‌ ಇನೆ ಜೂತಿಲೀನ್ ಆಯೋತೆ ಖ್ಹಾರಸ್ ಚೀಜ಼್‌ಮ ದಖ್ಹ್‌ಮ ಏಕ್‌ಭಾಗ್ ಮೆಲ್ಕಿಚೆದೆಕನ ದಿದೊ. ಸೊದೋಮ್‌ನ ರಾಜ಼ನೆ ಅಬ್ರಾಮ್‌ನ, “ತೂ ಛೋ಼ಡೈಲಿನ್ ಆಯೋತೆ ಅದ್ಮೇವ್‌ನ ಮನ ದಿನಾಕ್; ಶೊತ್‌ನ ತೂಸ್ ರಾಖೀಲೆ” ಕರಿಬೋಲ್ಯೊ. ಅಬ್ರಾಮ್‌ನೆ ಸೊದೋಮ್‌ನ ರಾಜ಼ನ, ಆಬ್‌ಧರ್ತಿನ ಬಣಾಯೋತೆ ಘಣೋ ಊಚೊ಼ ದೇವ್‌ ಯೆಹೋವಭಣಿ ಹಾತ್‌ಪಾಡಿನ್ ಆಣ್‌ಲೆವುಸ್. ಮನ ತಾರು ಶಾತ್‌ಬಿ ನಕೊ, “ಏಕ್‌ ಧಾಗೊರ‍್ಹೇವೊ, ಚಪ್ಪಲ್‌ನಿ ಡೋರಿನರ‍್ಹೇವೊ ತಾರಮಾಥು ಖೆವುಬಿ ಮೆ ಲೇವ್‌ಕೊಯ್ನಿ. ಅಜು಼ ‘ಮಾರೇಥಿ ಅಬ್ರಾಮ್‌ ಶೌಕಾರ್ ಬಣ್ಯೊ ಕರಿ ಬೋಲಾವಖ್ಹರ್ಕು ನಾಹೋಣು. ಮಾರು ಆಳ್‌ಖ್ಹಾರಾನೆ ಖಾದುತೆ ಮ್ಹೇಲಿನ್, ಮಾರಜೋ಼ಡೆ ರ‍್ಹವಾಳ ಆನೇರ ಎಷ್ಕೋಲ ಮಮ್ರೆವಾಳನ ಆವ್ಣುತೆ ವಾಟೊ ಖಲಿ ಇವ್ಣುನ ರ‍್ಹವಾದೆ” ಕರಿಬೋಲ್ಯೊ.
Source notes (1)
- Footnote ಬಾಬಿಲೋನ್
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.