Waghri Booli Bible
ಎಸ್ತೇರ್ 9
ಯೆಹೂದ್ಯವಾಳಥಿ ವಹೇರ‍್ಯಾವ್ನ ನಾಶ್‌ಕರ‍್ಯುತೆ
ರಾಜ಼ನಿ ಹುಕುಮ್‌ನ, ತೀರ್ಮಾನ್ನ ಚ಼ಲಾವಖ್ಹರ್ಕೊ ದನ್ ಕತೊ, ಭಾರನೊ ಮಹಿನೊಹುಯಿರೋತೆ ಫಾಲ್ಗುಣ ಮಹಿನಾನು ಥೇರಾನೊ ದನ್ ಆಯೊ. ಯೊ ದನ್‌ಮ ಯೆಹೂದ್ಯವಾಳನ ಹಮೇಸ್ ಜೀತಿಲಿಯೇಜಾ಼ಯ್ ಕರಿ ಇವ್ಣು ವಹೇರ‍್ಯು ಟಿವೈರ‍್ಹೂಥು. ಕತೋಬಿ ಇನ ಬದಲ್ ಯೆಹೂದ್ಯವಾಳೂಸ್‌ ಇವ್ಣ ವಹೇರ‍್ಯಾವ್ನ ಜೀತಿಲಿದು. ಇನಖ್ಹಾಜೆ ರಾಜ಼ ಅಹಷ್ವೇರೋಷನು ತಮಾಮಸ್ ತಬರ್‌ಖಾನು ಹರೇಕ್ ಖ್ಹಯೇರ್‌ಮಥೂತೆ ಯೆಹೂದ್ಯವಾಳು ಇವ್ಣುನ ಕೇಡ್ ಕರಾವಾಳನ ವಿರೋದ್‌ಹುಯಿನ್ ಹಾತ್‌ಪಾಡಾನ ಎಕ್ಟುಹುಯು. ಖ್ಹಾರಸ್ನ ಇವ್ಣೊ ಡರ್‌ಥೋತೆ ಇನಖ್ಹಾಜೆ ಕೋಣ್‌ಬಿ ಇವ್ಣಖ್ಹಾಮ್ಣೆ ಭೀರ‍್ಹಾವಾನ ಕೋ ಹುಯುನಿ. ಆ ನಾಹುಯಿನ್‌ ಮಹೇಲ್‌ಮ ಮೊರ್ದೆಕೈನು ಅದಿಕಾರ್‌ನು ತಾಖತ್ ಭಡ್ತುಗಯೂತೆ ದೇಖಿನ್‌ ಇನಿ ಬಾರೇಮ ಖ್ಹಾರಸ್ ತಬರ್‌ಖಾಮಾಬಿ ಫೈಲಾಯು. ಇನಾಖ್ಹಾಜೆ ತಮಾಮಸ್ ತಬರ್‌ಖಾನು ಅದಿಕಾರಿಯೇಬಿ, ರಾಜ್ಯಪಾಲಖ್ಹಾರೂಬಿ, ದೇಖ್ಹ್‌ನ ಮೋಟವ್‌ಬಿ, ಅಜು಼ ಬಿಜು಼ಖ್ಹಾರು ರಾಜ಼ನು ಸೇವಕ್‌ರ‍್ಹವಾಳೂಬಿ ಇನ ಡರೀನ್ ಯೆಹೂದ್ಯವಾಳನಿ ಮದತ್‌ನ ಆಯು. ಅಮ್ ಯೆಹೂದ್ಯವಾಳು ಇವ್ಣ ಖ್ಹಾರಾಸ್ ವಹೇರ‍್ಯಾವ್ನ ಹರೈನ್, ತಲ್ವಾರ್‌ಥಿ ಕತ್ರಿ ಮಾರಿನ್, ಖತಮ್ ಕರ‍್ಯು; ಇವ್ಣ ವಹೇರ‍್ಯಾವ್ನ ಪಸಂದ್‌ಕಿಮ್ ಹುವಾಸ್ಕಿ ತಿಮ್ ಕರ‍್ಯು. ಯೆಹೂದ್ಯವಾಳು ಶೂಷನ್ ನಂಗರ್‌ಮಾಸ್‌ ಪಾಚ಼್‌ಖ್ಹೊ ಅದ್ಮೇವ್‌ನ ಮಾರಿನಾಖ್ಯು. ಮರಿಗಯೂತೆ ಇವ್ಣಾಮ ಪರ್ಷಂದಾತ, ದಲ್ಫೋನ್ ಅಜು಼ ಅಸ್ಫಾತ, ಪೋರಾತ, ಆದಲ್ಯ, ಅರೀದಾತ, ಪರ್ಮಷ್ಟ, ಅರೀಸೈ, ಅರಿದೈ ಅಜು಼ ವೈಜಾತ, ಕರಿ ನಾಮ್‌ವಾಳು ಖ್ಹಾರುಥು. ಅವ್ಣೆ ಯೆಹೂದ್ಯವಾಳನ ವಹೇರ್‌ ಕರುಕರ್ಥೋತೆ ಹಮ್ಮೆದಾತನೊ ಛಿಯ್ಯೊ ಹಾಮಾನನ ದಖ್ಹ್‌ಜ಼ಣ ಛಿಯ್ಯಾ. ಅತ್ರಜ಼ಣಾನ ಮರ್‌ನಾಖ್ಯೂತೋಬಿ ಯೆಹೂದ್ಯವಾಳನೆ ಲೂಟಿ ಕರ‍್ಯುಕೊಯ್ನಿ, ಯೊ ದನ್ ಶೂಷನ್ ನಂಗರ್‌ಮ ಕತ್‌ರೈಗಯೂತೆ ಇವ್ಣಿ ಗಣ್ತಿ ರಾಜ಼ನ ಖ್ಹಮ್‌ಜಾ಼ಡ್ಯು. ತದೆ ರಾಜ಼ನೆ ಎಸ್ತೇರ್ ರಾಣಿನ, “ಯೆಹೂದ್ಯವಾಳನೆ ಶೂಷನ್ ನಂಗರ್‌ಮಾಸ್‌ ಪಾಚ಼್‌ಖ್ಹೊ ಅದ್ಮಿನಾಬಿ, ಹಾಮಾನನ ದಖ್ಹ್‌ಜ಼ಣ ಲಡ್ಕಾವ್‍ನಾಬಿ ಮರ್‌ನಾಖಿದಿದು; ಅಜು಼ ಬಚ್ಯೂತೆ ರಾಜ಼ನ ತಬರ್‌ಖಾಮ ಕೆತ್ರೂಸ್‌ಕಿ ಅದ್ಮಿ ಕತ್‌ರೈಗಯು ಉಶೆ. ತಾರಿ ಬಿಂತಿ ಖಿವು? ಉಶೇತೋ ಚ಼ಲಾವುಸ್‌, ತೂ ಶಾತ್‌ ಬೋಲಿಲಿದಿತೋಬಿ ದೆವುಸ್‌” ಕರಿ ಬೊಲ್ಯೊ. ಇನ ಎಸ್ತೇರ್‌ನೆ, “ರಾಜ಼ನ ಪಸಂದ್‌ ಉಶೇತೊ, ಆಜ಼್‌ನಿತರ ಕಾಲ್‌ಬೀ ರಾಜನಿ ಹುಕುಮ್‌ನಿ ಘೋಣಿ ಕರಾನಬಿ ಹಾಮಾನನ ದಖ್ಹ್‌ಜ಼ಣ ಛಿಯ್ಯಾವ್‌ನು ಮುರ್ದಾವ್‌ನಾಬಿ ಗಳ್‌ಫಾಶಿಪರ್ ಠಂಗಾವನ ಶೂಷನ್‌ಮ ಛಾ಼ತೆ ಯೆಹೂದ್ಯವಾಳನ ಹುಕುಮ್ ಹೋಣು” ಕರಿ ಗಿಂಗೈಲಿದಿ. ತದೆ ರಾಜ಼ನೆ ಇಮ್ಮಸ್ ಹುಕುಮ್‌ದಿದೊ. ತದ್ನುತದೇಸ್ ಆ ಬಾರೇಮಾನು ರಾಜ಼ನಿ ಹುಕುಮ್ ಶೂಷನ್ ನಂಗರ್‌ಮ ಮಾಲುಮ್‌ಪಡ್ಯು. ಅಜು಼ ಹಾಮಾನನ ದಖ್ಹ್‌ಜ಼ಣ ಛಿಯ್ಯಾವ್‌ನು ಮುರ್ದಾವ್ನ ಗಳ್‌ಫಾಶಿಪರ್ ಠಂಗಾಯು. ಶೂಷನ್ನು ಯೆಹೂದ್ಯವಾಳು ನಿಸಾನ್ ಮಹಿನಾನು ಚ಼ೌಧಾನ ದನ್‌ಮಾಬಿ ಎಕ್ಟುಹುಯಿನ್ ಹಿಜ್ಜಾ಼ನು ತೀನ್‌ಖ್ಹೊ ಅದ್ಮಿನ ಮಾರ‍್ಯು; ಕತೋಬಿ ಪಾಛು಼ ಲೂಟಿ ಕೊಕರ‍್ಯುನಿ. ಇಮ್ಮಸ್ ಬಿಜ಼ ರಾಜ಼ನ ತಬರ್‌ಖವ್‌ಮಾಬಿ ಯೆಹೂದ್ಯವಾಳು ಇವ್ಣ ವಹೇರ‍್ಯಾವ್‌ನು ಕಾಟದ್ಯವಾನು ಮ್ಹೇಲಿನ್, ಇವ್ಣೊ ಜಾನ್‌ ಬಚಾ಼ಡಿಲ್ಯವಾನ ಖ್ಹಾಜೆ ಎಕ್ಟುಹುಯಿನ್ ಆಯಿನ್‌ ಇವ್ಣ ವಹೇರ‍್ಯಾವ್‌ಮ ಪಾಚ಼್‌ಉಪ್ಪರ್ ಖ್ಹಡ್‌ತೀನಿಖ್ಹ್ ಹಜಾ಼ರ್‌ ಅದ್ಮೇವ್‌ನ ಮರ್‌ನಾಖಿದಿದು; ಕತೋಬಿ, ಲೂಟಿ ಕರ‍್ಯುಕೊಯ್ನಿ. ಆ ನಿಸಾನ್ ಮಹಿನಾನು ಥೇರಾನ ದನ್‌ಮ ಚಾ಼ಲ್ಯು. ಇವ್ಣೆ ಚ಼ೌಧಾನ ದನ್‌ಮ ಅರಾಮ್‌ಕರೀನ್ ಯೊ ದನ್ನ ಖ್ಹುಶಿನ ಪೋಭಾರನೊ ದನ್‌ಕರಿ ಮನಾಯು. ಶೂಷನ್ನು ಯೆಹೂದ್ಯವಾಳು ಥೇರಾನೊ ದನ್ ಅಜು಼ ಚೌ಼ಧಾನೊ ದನ್ ಎಕ್ಟುಹುಯಿನ್ ಆಯುತೆ ಇನಾಖ್ಹಾಜೆ, ಇವ್ಣೆ ಪಂಧ್ರಾನ ದನ್‌ಮ ಅರಾಮ್ ಕರಿಲಿದು. ಯೊ ರೋಜ಼್‌ ಖ್ಹುಶಿನೊ ಪೋಭಾರನೊ ದನ್‌ಕರಿ ಮನಾಯು. ಅನಖ್ಹಾಜೆ ಬಲ್ಡಾನ ತಬರ್‌ಖಾನು ನಂಗರ್‌ಮ ರ‍್ಹಾವಾಳು ಯೆಹೂದ್ಯವಾಳು ನಿಸಾನ್ನು ಚೌ಼ಧಾನ ದನ್ನ ಅಛ್ಛೊ಼ದನ್‌ಕರೀಬಿ ಖ್ಹಯೇರ್‌ಮ ರ‍್ಹಾವಾಳು ಪಂಧ್ರಾನ ದನ್ನ ಅಛ್ಛೊ಼ದನ್‌ಕರೀಬಿ ಮನೈನ್, ಖ್ಹುಶಿನ ಇರಂದೀನ ಪಿಕೈನ್ ಖೈನ್, ಅಜು಼ ಏಕ್‌ಥಿ ಇನಾಮ್ನ ವಾಟ ಪಾಡಿಲಿದು.
ಪೂರೀಮ್‌ ಪೂಜ಼
ಮೊರ್ದೆಕೈನೆ ಖನ್ನೇಬಿ ದೂರ್‌ಬಿ ಥೂತೆ ಅಹಷ್ವೇರೋಷನು ಖ್ಹಾರೂಸ್ ತಬರ್‌ಖಾನು ಯೆಹೂದ್ಯವಾಳನ ಚಿಟ್ಟಿಯೇಥಿ ಖ್ಹಮ್‌ಜಾ಼ಡ್ಯೂತೆ ವಾತೆಖ್ಹಾರಿ ಲೀಖ್ಯೊ: ಹರೇಕ್ ವರಖ್ಹ್‌ಬಿ ನಿಸಾನ್ ಮಹಿನಾನು ಚೌ಼ಧಾನೊ ದನ್ ಅಜು಼ ಪಂಧ್ರಾನೊ ದನ್ನಾ ಪೂಜ಼ನೊ ದನ್ ಕರಿ ಮನಾವನು ಹಮೇಶಾನು ಖಾನೂಲ್‌ ಕರಿ ಗಣ್ತಿಕರ್‌ನು. ಯೊ ದನ್‌ಮ ಯೆಹೂದ್ಯವಾಳನ ವಹೇರ‍್ಯಾವ್‌ನು ಚ಼ಪ್ಪಣ್ ಮಾಥು ಛು಼ಟೀನ್ ಅರಾಮ್‌ಹುಯು. ಯೊ ಮಹಿನಾಮ ಪಶ್ತಾವ್ಣಿ ಜೈ಼ನ್ ಇವ್ಣುನ ಖ್ಹುಶಿಹುಯು; ದುಖ್ ಜೈ಼ನ್ ಖ್ಹುಕ್‌ನ ದನ್ ಆಯು. ಇನಾಖ್ಹಾಜೆ ಇವ್ಣೆ ಯೊ ದನ್‌ಮ ಪೂಜ಼ನು ಖಾಣು ಪಿಕೈನ್ ಏಕ್‌ಥಿಏಕ್ ಖಾಣಾನ ಚೀಜ಼್‌ನು ಇನಾಮ್‌ ದೇತುಥು. ಇಮ್ಮಸ್ ಯೆಹೂದ್ಯವಾಳು ಮೊರ್ದೆಕೈನು ಚಿಟ್ಟಿಮ ಲೀಖೈರ‍್ಹುತೆ ಪರಕ್ಮಾಸ್ ಚ಼ಲಾಯು. ಯೊ ವರಖ್ಹ್‌ ಚಾ಼ಲೀತೆ ಪೂಜ಼ ಇವ್ಣಾಮ ವರಖ್ಹ್‌ನಿ ಪೂಜ಼ಕರಿ ಮನಾವ್ಣು ಕರಿ ತೀರ್ಮಾನ್ ಕರಿಲಿದು.
ಖ್ಹಾರಸ್ ಯೆಹೂದ್ಯವಾಳನ ವಹೇರ್‌ ಕರ್ತೊಥೋತೆ ಆಗಾಗನಿ ಪಿಳ್ಗಿವಾಳೊಬಿ ಹಮ್ಮೆದಾತನೊ ಛಿಯ್ಯೊಬಿ ಹುಯಿರೋತೆ ಹಾಮಾನನೆ ಯೆಹೂದ್ಯವಾಳನ ಮರ್‌ನಾಕ್ಣುಕರಿ ಹೂಡ್‌ ಕರಿಲೀನ್ ಇವ್ಣುನ ಕಲಾವ್ಣಿಕರೀನ್‌ ನಾಶಕರಾನಿ ಬಾರೇಮ “ಪೂರ್”ನ ಕತೊ ಚೀಟ್‌ನ ನಾಖ್ಯೋಥೊ. ಆ ವಾತ್ ರಾಜ಼ನ ಕಾನ್‌ಮ ಪಡಾಮ ಇನೆ, “ಹಾಮಾನನೆ ಯೆಹೂದ್ಯವಾಳನ ವಿರೋದ್ ಸೋಚ್ಯೋತೆ ಕೇಡ್ ಇನ ಮುಡ್‌ಕ್ಯಾಪರಸ್‌ ಆವಾದೆ. ಇನಾಬಿ ಇನ ಲಡ್ಕಾವ್‍ನಾಬಿ ಗಳ್‌ಫಾಶಿದೆವೊ” ಕರಿ ಚಿಟ್ಟಿಥಿ ಹುಕುಮ್ ಕರಿರಾಖ್ಯೋಥೊ. ಯೊ “ಪೂರ್” ಕರಿ ಲೀಖ್ಯಾನಿ ಆಧಾರ್‌ಪರ್ ಯೊ ದನ್ನ “ಪೂರೀಮ್‌” ಕರಿ ನಾಮ್‌ಆಯು. ಮೋರ್ದಕೈನ ಚಿಟ್ಟಿನ ಕಾಮ್‌ಥಿ ಇವ್ಣುನ ಹುಯೂತೆ ಇನಾಬಿ ಯೆಹೂದ್ಯವಾಳು ಯೊ ಚಿಟ್ಟಿನಿ ವಾತೆವ್‌ನಾಬಿ ಯೊ ಅಖ್ಖಾನಿ ಬಾರೇಮ ಇವ್ಣೇಸ್ ಖ್ಹಮಾಳ್ಯುತೇಬಿ, ಇವ್ಣುನ ಹುಯುತೇಬಿ ಯಾದ್‌ಕರಿಲೀನ್, ಹರೇಕ್ ವರಖ್ಹ್‌ಬಿ ಯೊ ಬೇ ದನ್ನಾ ಖ್ಹಾರೂಸ್ ಖಾನ್‌ಖೋಜ಼್‌, ಹರೇಕ್ ಮುಲಕ್‌, ಹರೇಕ್ ನಂಗರ್‌, ಹರೇಕ್ ಅಗ್ಲಿ ಪಿಳಿಗಿವಾಳನ, ಹರೇಕ್ ಕುಟುಂಬ್‌ವಾಳನ ಆ ಪೂರೀಮ್‌ ಪೂಜ಼ ಯೆಹೂದ್ಯರ್‌ಮ ಕೆದೇಬಿ ನಾಭೀರೇವ್ಣುಕರಿ ತೀರ್ಮಾನ್‌ಕರ‍್ಯು. ಆನಾಹುಯಿನ್ ಅಬೀಹೈಲನಿ ಛೋ಼ರಿ ಎಸ್ತೇರ್‌ರಾಣಿನೆ ಪೂರೀಮ್‌ ಪೂಜಾ಼ನ ಚ಼ಲಾವನಿ ಬಾರೇಮಾನು ಯೊ ಬೇನು ಖಾನುಲ್‌ನ ಖಾಯಮ್‌ ಕರಾನಖ್ಹಾಜೆ ಮೊರ್ದೆಕೈನು ಮದತ್‌ಲೀನ್‌ ಚಿಟ್ಟಿಯೇನ ಲೀಖಿ. ಮೊರ್ದೆಕೈನೆ, ಅಹಷ್ವೇರೋಷನು ರಾಜ್ಯನು ಏಕ್‌ಖ್ಹೊ ಖ್ಹಾತ್‌ಉಪ್ರೀಖ್ಹ್‌ ತಬರ್‌ಖಾವ್‌ಮ ಜಿವ್ಣುಕರುಕರಾತೆ ಖ್ಹಾರಸ್ ಯೆಹೂದ್ಯವಾಳನಿ ರಕ್ಷಣೆ ಅಜು಼ ಶಾಂತಿನಖ್ಹಾಜೆ ಯೊ ಚಿಟ್ಟಿಯೇ ಮೋಕ್‌ಲ್ಯೊ. ದಯೆ ಅಜು಼ ಖ್ಹಾಚಿ ವಾತೇವ್‌ಥಿ ಯೊ ಚಿಟ್ಟಿಯೇಮ, “ಯೆಹೂದ್ಯವಾಳು ಇವ್ಣಾಮಾಬಿ ಅಜು಼ ಇವ್ಣಿ ಪಿಳ್ಗಿವಾಳಮಾಬಿ ಉಪವಾಸ್, ಅಜು಼ ಕಲ್‌ಕಲಾಟ್‌ನ ದನ್ನ ಯಾದ್ ಕರಿಲ್ಯವಾನಖ್ಹಾಜೆ ಇವ್ಣೇಸ್ ಮಾಲುಮ್ ಕರಿಲಿದುಥುತೆ ಪರಕ್ಮ ಆ ಪೂರೀಮ್‌ ದನುನ, ಇನು ಅಜು಼ ಯೆಹೂದ್ಯವಾಳೊ ಮೊರ್ದೆಕೈನು ಹುಕುಮ್‌ನಿಘೋಣಿ ಹರೇಕ್ ವರಖ್ಹ್‌ಬಿ ಮಾಲುಮ್ ಹುಯಿರ‍್ಹುತೆ ಹಗಾಮ್ಮ ಮ್ಹೇಲ್‌ನುನಾತೆ ಮನಾವ್ಣು.” ಕರಿ ರಾಣಿನೆ ಲೀಖಿರಾಖಿಥಿ. ಎಸ್ತೇರ್‌ನು ಯೊ ಹುಕುಮ್‌ನಿ ಚಿಟ್ಟಿ ಪೂರೀಮ್‌ ಪೂಜಾ಼ನ ಚ಼ಲಾಯು ಅಜು಼ ಯೊ, ದಪ್ತರ್‌ಮಾಬಿ ಲೀಖಾಯು.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.