Waghri Booli Bible
ಎಸ್ತೇರ್ 4
ಎಸ್ತೇರ್‌ಕನ ಮದತ್ನಖ್ಹಾಜೆ ಮೊರ್ದೆಕೈನಿ ಬಿಂತಿ
ಚಾ಼ಲಿತೆ ವಾತ್‌ಖ್ಹಾರಿ ಖ್ಹಮ್‍ಜ್ಯೊತೆ ಮೊರ್ದೆಕೈ, ಇನ ಲುಂಗ್ಡಾನ ಫಾಡಿಲೀನ್ , ಕೋಥ್‌ಳಾನಿ ಛೈ಼ನ ಫೇರಿನ್‌, ಇನಾಪರ್‌ ರಾಕ್‌ ರಂಚಿಲೀನ್ ಖ್ಹಯೇರ್‌ಮಾಕರಿ ಚಾ಼ಲ್ತೊಹುಯಿನ್‌ ಘಣು ದುಖ್‌ಥಿ ಅಂದ್ರೋಖ್ಹ್‌ಕರ‍್ಯೊ. ಯೋಸ್ ಹಾಲತ್‌ಮ ಮಹೇಲ್‌ನ ಮೋಟ ದರ್ವಾಜ಼ಲಗೂಬಿ ಆಯೊ. ಕೋಥ್‌ಳಾನಿ ಛೈ಼ನ ಭಾಂದ್ಯುಹುಯು ಕೋಣ್‌ಬಿ ಮಹಿ ನಾಜ಼ಾವ್ಣುಕರಿ ಹುಕುಮ್‌ಥು. ಖೆವಖೆವ ರಾಜ್ಯಮ ರಾಜ಼ನಿ ಹುಕುಮ್‌ ಅಜು಼ ತೀರ್ಮಾನ್ ಭಡ್‌ಕ್ಯುಕಿ ಹಿಜ್ಜಾ಼ಖ್ಹಾರು ಯೆಹೂದ್ಯವಾಳಮ ಘಣು ದುಖ್‌ಬಿ, ಉಪ್‌ವಾಸ್‌ಬಿ, ರದನ್‌ರೋಝ಼್‌ನ್ಯ ಕರೀನ್ ಕೋಥ್‌ಳಾನಿ ಛೈ಼ನ ಪಾಥ್‌ರೀನ್ ರಾಕ್‌ನ ಉಪ್ಪರ್ ಬೇಶಿಗಯು. ಎಸ್ತೇರ್‌ನಿ ದಾಸಿಯೇ ಅಜು಼ ಮಹೇಲ್ನು ಅದಿಕಾರಿಖ್ಹಾರು ರಾಣಿನ1 ಆ ಖ್ಹಾರಿವಾತೆ ಇನ ಖ್ಹಮ್‌ಜಾ಼ಡ್‌ತಾನ, ಯೊ ಘಣಿ ಘಬ್ರಾವ್ಣಿಥಿ ಮೊರ್ದೆಕೈನ ಲುಂಗ್ಡ ದಿಮೋಕ್ಲಿನ್‌, “ಕೋಥ್‌ಳಾನಿಛೈ಼ನ ಕಾಡಿನಾಖಿನ್, ಆ ಫೇರಿಲೆ” ಕರಿ ಬೋಲಿಮೋಕ್ಲಿ ಕತೋಬಿ ಇನೆ ಮಾಂಗ್ಯೊಕೊಯ್ನಿ. ತದೆ ಎಸ್ತೇರ್‌ನೆ ಚಾ಼ಕ್ರಿನಖ್ಹಾಜೆಕರಿ ರಾಜ಼ನೆ ದಿದೋತೆ ಹತಾಕ ಕರಿ ಅದಿಕಾರಿನ ಬುಲೈನ್, ಮೊರ್ದೆಕೈಕನ ಜೈ಼ನ್, “ತೂ ಶನಾ ಅಮ್‌ ಕರ‍್ಯೋತೆ ಕರಿ ಪುಛೈ಼ನ್ ಆವ್” ಕರಿ ಬೋಲಿಮೋಕ್ಲಿ. ಇಮ್ಮಸ್ ಹತಾಕನೆ ಮಹೇಲ್‌ನ ದರ‍್ವಾಜ಼ನ ಖ್ಹಾಮ್ಣೆಛಾ಼ತೆ ಖ್ಹಯೇರ್‌ನು ಬಲ್ಡಾಮ ಮೊರ್ದೆಕೈಕನ ಜಾ಼ವಖ್ಹತರ್, ಮೊರ್ದೆಕೈನೆ, ಚಾ಼ಲಿತೆ ಖ್ಹಾರೀಸ್‍ ವಾತೆನ ಅಜು಼ ಹಾಮಾನನೆ ಯೆಹೂದ್ಯವಾಳನ ನಾಶ್‌ಕರಾನಖ್ಹಾಜೆ ರಾಜ಼ನ ಖಜಿನೊಮಾಥು ಅತ್ರು ರೂಪಾನ ಪೈಶಾದೆವುಸ್‌ಕರಿ ಬೋಲ್ಯೊತೆ ವಾತೆನಾಬಿ ಹತಾಕನ ಖ್ಹಮ್‌ಜಾ಼ಡ್ಯೊ. ಆ ನಾಹುಯಿನ್ ಖ್ಹಾರಸ್‌ ಯೆಹೂದ್ಯವಾಳನ ಮಾರಿನಾಖನಖ್ಹಾಜೆ ಶೂಷನ್ ಖ್ಹಯೇರ್‌ಮ ಭಡ್‌ಕ್ಯುತೆ ರಾಜಾ಼ನಿ ಹುಕುಮ್‌ನು ಎಕ್ ಚಿಟ್ಟಿನ ದೀನ್, “ಅನ ಎಸ್ತೇರ್‌ನ ಬೋಲಿವತಾಳ್; ಅಜು಼ ಯೊ ರಾಜ಼ಕನ ಜೈ಼ನ್ ಇನ ಅದ್ಮೇವ್ನಖ್ಹಾಜೆ ರಾಜ಼ ಗೋರ್‌ವತಾಳನಿಘೋಣಿ ಇನಾಕನ ಬಿಂತಿಕರಾದೆ”. ಕರಿ ಬೋಲಿಮೋಕ್‌ಲ್ಯೊ. ಹತಾಕನೆ ಪಾಛೊ಼ಫರಿ ಆಯಿನ್ ಎಸ್ತೇರ್‌ನ ಮೊರ್ದೆಕೈನಿ ಅಖ್ಖಿ ವಾತೇವ್ನ ಖ್ಹಮ್‌ಜಾ಼ಡ್ಯೊ. ಎಸ್ತೇರ್‌ನೆ ಇನ ಪಾಛು಼ ಮೊರ್ದೆಕೈಕನ ಮೋಕ್ಲಿನ್, “ರಾಜ಼ ಇನಾಕನ ಆವ್ಣುಕರಿ ಬೋಲಿ ನಾ ಮೋಕ್‌ಲ್ಯೋತೊ, ಇನಾಕನ ಮಹೇಲ್‌ನ ಮಹಿ ಜಾ಼ವಾಳನ ಮರಣ್ಣಿ ನಿಶತ್ ದೇವ್ಣುಕರಿ ಹುಕುಮ್‌ನ ತಯೇಡ ಪರ್ಖ್ಹೊಕರಿ ಕೊಂತೆ ಖ್ಹಾರಸ್ನ ಹುಯಿರುಥು. ಕಿನಾಭಣಿ ಇನು ಖ್ಹೊನ್ನಾನು ಡಂಡಾನ ವತಾಳಸ್ಕಿ ಇವ್ಣೆ ಖಲಿ ಜಾನ್‌ಥಿ ಬಚ಼್‌ಶೆ. ಕರಿಬೋಲಾನು ರಾಜಾ಼ನ ಖ್ಹಾರಸ್‌ ಆಳ್‌ನಾಬಿ, ಖ್ಹಾರಾಸ್ ಮಹೇಲ್‌ಮ ರ‍್ಹಾವಾಳನಾಬಿ ಮಾಲುಮ್‌ರ‍್ಹಾವಾನಿ ವಾತೆ. ಮನಾತೊ ಡೋಡಿಖ್ಹ್‌ ದನ್‌ಥು ರಾಜ಼ಕನ ಜಾ಼ವಾನ ಸ್ವಾಗತ ಹುಯುಕೊಯ್ನಿ” ಕರಿ ಖ್ಹಮ್‌ಜಾ಼ಡ್‌ಕರಿ ಬೋಲಿ. ಹತಾಕನೆ ಎಸ್ತೇರ್‌ನಿ ವಾತೆಖ್ಹಾರಿ ಮೊರ್ದೆಕೈನ ಖ್ಹಮ್‌ಜಾ಼ಡ್ಯೊ. ತದೆ ಇನೆ ಎಸ್ತೇರ್‌ನ, “ತೂ ಮಹೇಲ್‌ಮಛಾ಼ತೆ ಇನಾಖ್ಹಾಜೆ ಯೆಹೂದ್ಯವಾಳು ನಾಶಹುಯ್ಗುತೋಬಿ ಮೇ ಖಲಿ ಬಚಿಜೈ಼ಶ್‌ಕರಿ ನಕೊಲ್ಹಾಯಿಶ್, ತೂ ಹಮ್ಕೆ ಖ್ಹೊಪೊ ರ‍್ಹಿಗೀತೊ ಬಿಜಿ ಖೆವಿಬಾಜೂ಼ಥುಬಿ ಯೆಹೂದ್ಯವಾಳನ ಮದತ್‌ರ‍್ಹವೊ, ಛುಟ್‌ಕಾರ್‌ರ‍್ಹವೊ ಮಳ್‌ಶೆಕೊಯ್ನಿ. ತೂತೋಬಿ ತಾರ ಬಾನ ಘರ್‌ವಾಳನಿ ಜೋಡ್ಮ ನಾಶ ಹುಯಿಜೈ಼ಶ್‌. ಆನಾಹುಯಿನ್ ತೂ ಅಥ್ರಾನಿ ವಖ್ಹತ್‌ನ ಖ್ಹಾಜೇಸ್ ಪಟ್ಟಾನ ಆಯಿರ‍್ಹಿಉಶೆ. ಕಿನಾಮಾಲುಮ್.” ಕರಿ ಬೋಲಿಮೋಕ್‌ಲ್ಯೊ. ತದೆ ಎಸ್ತೇರ್ ಮೊರ್ದೆಕೈನ, “ತೂ ಜೈ಼ನ್ ಶೂಷನ್ ಖ್ಹಯೇರ್‌ಮ ಛಾ಼ತೆ ಖ್ಹಾರಸ್‌ ಯೆಹೂದ್ಯವಾಳನ ಎಕ್ಟುಕರ್; ತುಮೇಖ್ಹಾರು ಶೂಷನ್ ನಂಗರ್‌ಮ ಮಳಿನ್ ತೀನ್‌ರೋಜ಼್‌ ರಾತ್‌ದನ್ ಖಾಣುಪಾಣಿ ಮ್ಹೇಲಿನ್ ಮಾರಖ್ಹಾಜೆ ಉಪವಾಸರ‍್ಹೆವೊ; ಇಮ್ಮಸ್ ಮೇಬಿ ಮಾರಿ ಸೇವಕಿನಿ ಜೋ಼ಡ್ಮ ಉಪವಾಸ್‌ರ‍್ಹೆವುಸ್‌. ಇನಾಪಾರ್ ರಾಜ಼ನಿ ಹುಕುಮ್‌ನ ಮೀರಿನ್‌ತೋಬಿ ಮೇ ಇನಾಕನ ಜ಼ವುಸ್‌. ಮರಿಗಿತೊ ಮರೀಗಿಕರಿ ಬೋಲಿಮೋಕ್ಲಿ. ಮೊರ್ದೆಕೈ ಪಾಛೊ಼ ಫರಿಜೈ಼ನ್ ಎಸ್ತೇರ್‌ನೆ ಬೋಲಿತೆತಿಮ್ಮಸ್ ಕರ‍್ಯೊ.
Source notes (1)
- Footnote ಸೇವಕಕತೊ ಹಿಝ಼್‌ಡಖ್ಹಾರು
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.