Waghri Booli Bible
ಅಪೊ 3
ಏಕ್‌ ಲಂಗ್ಡೊ ಅಛ್ಛು಼ ಹುಯೊತೆ
ಏಕ್‍ದನ್ ಪೇತ್ರಬಿ ಯೋಹಾನ ಧೊಪಾರ‍್ನ ತೀನ್ ಘಂಟಾನ ಚಾ಼ಲ್ತಿಥೀತೆ ಪ್ರಾರ್ಥನೆನಖ್ಹಾಜೆ ದೇವ್ನಿಮಂದಿರ್‌ನ ಗಯ. ಪೈದಾಖ್ಹ್‌ ಥಿ ಲಂಗ್ಡೊ ಥೋತೆ ಏಕ್ಅದ್ಮಿನ ಕೋಣಸ್ಕಿ ಥೋಡುಜ಼ಣು ಢೊಯಿಲಿನ್ ಅಯಿನ್; ದೇವ್ನಿಮಂದಿರ್‌ನ ಮಹಿ ಜಾ಼ವಾಳಕನ ಧರಮ್ ಮಾಂಗಾನಖ್ಹಾಜೆ ಇನ ‘ಶನ್‍ಗಾರ‍್ನು ದರ‍್ವಾಜು಼ ಕರಿ ಬೋಲೈಲೇತೆ ಬಾಕಲ್‍ಕನ ಹರ್‌ದನ್‌ ಬೆಖ್ಹಾಡ್‍ತೂಥು. ಇನೆ ದೇವ್ನಿಮಂದಿರ್‌ನ ಮಹಿ ಒಳೆಜಾ಼ಯ್ತೆ ಪೇತ್ರನ ಅಜು಼ ಯೋಹಾನನ ದೇಖಿನ್ ಧರಮ್ ದ್ಯವಾನ ಗಿಂಗಾಯು. ಪೇತ್ರ ಯೋಹಾನ ಭೇಜ಼ಣ ಠರ್‌ಕೈನ್ ದೇಖ್ಯ. ಪೇತ್ರನೆ ಇನ “ಹಮೂನ ದೇಕ್!” ಕರಿ ಬೊಲ್ಯೊ. ಯೊ ಲಂಗ್ಡೊ ಇವ್ಣೇಥಿ ಶಾತ್‍ತೋಬಿ ಮಳ್‍ಶೆಕಿ ಶುಕಿ ಕರಿ ಖ್ಹಯಾಲ್ ಕರೀನ್ ಇವ್ಣಭಣಿ ದೇಖ್ಯು. ತದೆ ಪೇತ್ರನೆ, ಪೈಶ ಖ್ಹೊನ್ನು ಮಾರಕನ ಕೊಯ್ನಿ, ಕತೋಬಿ ಮಾರಕನ ಛಾ಼ತೆ ಯೊ ತುನ ದೆವುಸ್. ನಜ಼ರೇತ್ನ ಯೇಸುಕ್ರಿಸ್ತನ ನಾಮ್‍ಥೀಸ್ ಉಠೀನ್ ಚಾ಼ಲ್‍ಕರಿ ಬೋಲಿನ್, ಇನೊ ಖಾವೊ ಹಾತ್‍ ಧರೀನ್ ಉಠಾಡ್ಯೊ. ತದ್‌ನು ತದೇಸ್‌ ಇನ ಪಕ್ತೇಳಿಮಾಬಿ, ಪಂಜ಼ವ್‍ಮಾಬಿ,ಏಡಿಮಾಬಿ ಶಕತ್ ಆಯು. ಯೊ ಉಠೀನ್ ಭೀರಿನ್‌ ಗೋಡೆಥಿ ಚಾ಼ಲಾಲಗ್ಯೊ; ಯೊ ಚಾ಼ಲ್ತೊ ಖೇಲ್ತೊ ದೇವ್ನ ಖ್ಹರಾವ್‌ತೊಹುಯಿನ್ ಇವ್ಣಿಜೋ಼ಡ್ಮ ದೇವ್ನಿಮಂದಿರ್‌ನ ಮಹಿ ಗಯೊ. ಯೊ ಚಾ಼ಲ್ತೊಹುಯಿನ್‌ ದೇವ್ನ ಖ್ಹರಾವ್‌ತೊ ವಳ್ಯಾವಾತೆ ಅದ್ಮಿಖ್ಹಾರಾನೆ ದೇಖ್ಯು; ಆ ಹೈರುತೆ ಮಂದಿರ‍್ನ ಶನ್‍ಗಾರ‍್ನು ದರ‍್ವಾಜು಼ ಕರಿ ಬಾಕಲ್‍ಕನ ಬೇಶಿನ್ ಧರಮ್ ಮಾಂಗ್‌ತೊಥೋತೆ ಆಸ್ ಕರಿ ಖ್ಹಣೇದ್ ಕರ‍್ಯು. ಯೋಸ್ ಅದ್ಮಿ ಚಾ಼ಲೀನ್ ದೇವ್ನ ಖ್ಹರಾವನು ದೇಖಿನ್ ಘಣು ಆಶ್ಚರ್ಯ ಕರ‍್ಯು.
ಪೇತ್ರನು ಉಪದೇಶ್
ಅಛ್ಛು಼ ಹುಯುತೆ ಲಂಗ್‍ಡಾನೆ ಪೇತ್ರ ಬಿಜು಼ ಯೋಹಾನನ ಜೋ಼ಡ್ಮ ಒಳೆಜಾ಼ಯ್ತೆ ತದೆ, ಆಶ್ಚರ್ಯ ಕರುಕರ್ತುಥೂತೆ ಅದ್ಮಿಖ್ಹಾರು ಸೊಲೊಮೋನ್ ಕರಿ ನಾಮ್ನ ಛ಼ತ್‌ಕನ ಎಕ್ಟು ಹುಯಿನ್ ನಾಶಿಆಯು. ಪೇತ್ರ ಅನ ದೇಖಿನ್, ಯೊ ಅದ್ಮಿಖ್ಹಾರಾನ; ಇಸ್ರಾಯೇಲ್‌ವಾಳವೊ, ಅನ ದೇಖಿನ್ ಶನ ಆಶ್ಚರ್ಯ ಹುಯಿರಾಸ್? ತುಮೆ ಹಮೂನ ಶನ ಅಮ್ ದೇಖುಕರಸ್? ಹಮೆ ಹಮಾರಿ ಶೊಂತ್ ಶಕಥ್ಥಿ ರ‍್ಹವೊ, ಹಮಾರಿ ದೇವ್ನಿ ಭಕ್ತಿಥಿ ರ‍್ಹವೊ ಅನ ಚಾ಼ಲ್ವಾನಿತರ ಕರ‍್ಯಕರಿ ನಕೊ ಲಾಝ಼್‌ಶು? ಅಪ್ಣೊ ಗುರುಗುರಬ್‌ಲ್ಯ ಹುಯಿರೋತೆ ಅಬ್ರಹಾಮ್ ಇಸಾಕ್ ಯಾಕೋಬನೊ ದೇವ್ ಅಜು಼ ಅಪ್ಣೊ ಗುರುಗುರಬ್‌ಲ್ಯನೊ ದೇವ್ ಇನೊ ದಾಸಹುಯಿರ‍್ಹೊತೆ ಯೇಸುನ ಮಹಿಮೆ ಕರಿರಾಖ್ಯೊಸ್. ಕತೋಬಿ ತುಮೆ ಇನ ಪಿಲಾತನ ಹಾತ್ಮ ಮಾರನ ಧರಿನ್‍ ದಿದಾ; ಬಿಜು಼ ಪಿಲಾತನೆ ಇನ ಛೋ಼ಡಾವ್ಣು ಕರಿ ಖ್ಹೂಜ಼್‌ ಕರಾದಿನ್, ಇನಖ್ಹಾಮ್ಣೆ ತುಮೆ ಯೇಸು ಹೋಣುಕೊಯ್ನಿ ಕರಿ ಬೋಲ್ಯ. ತುಮೆ ಪರಿಶುದ್ಧಬಿ ನೀತಿನೊ ಹುಯಿರೋತೆ ಯೇಸುನ ನಕೊ ಕರಿ ಬೋಲ್ಯ. ಇನಬದಲ್ ಹತ್ಯಾರ ಏಕ್‌ ಚೋ಼ರ್‌ನ ಛೋ಼ಡೈ ದೇವ್ಣು ಕರಿ ಪಿಲಾತನ ಬೋಲಿಲಿದ. ಅಮ್ ತುಮೆ ಜಾನ್‍ದೇವಳಾನಸ್ ಮರೈನಾಖ್ಯ. ಕತೋಬಿ ದೇವ್ನೆ ಇನ ಮರ‍್ಯಾಹುಯಾಮಾಥು ಉಠಾಡ್ಯೊ; ಅನಿ ಬಾರೇಮ ಹಮೇಸ್ ಸಾಕ್ಷಿಖ್ಹಾರು ಹುಯಿರಾಸ್. ತುಮೆ ಶಾತ್ ದೇಖ್ಯಕಿ ಅಜು಼ ತುಮೆ ಶಾತ್ ಖ್ಹಮ್‍ಜ್ಯಾಕಿ ಯೊ ಅಖ್ಖು ಇನ ನಾಮ್‍ಥೀಸ್ ಹುಯಿರುಸ್. ಯೊ ಲಂಗ್‍ಡಾನೆ ಯೇಸುನ ಉಪ್ಪರ್ ರಾಖಿರಾಖ್ಯೊತೆ ವಿಶ್ವಾಸ್‌ಥೀಸ್ ಇನ ಅಛ್ಛು಼ ಹುಯುತೆ ಅನಅಖ್ಖು ತುಮೆ ದೇಖಿರಾಖ್ಯಸ್. ಇಸ್ರಾಯೇಲ್‌ವಾಳವೊ, ಯೊ ರ‍್ಹವಾದೆ ತುಮೆ ಮಾಲುಮ್ ಕರ‍್ಯಕೊಂತೆ ಯೇಸುನ; ಅಮ್ ಕರ‍್ಯಕರಿ ಮನ ಮಾಲುಮ್ ಛಾ಼, ತುಮಾರ ಅದಿಕಾರಿ ಜಿನುಬಿ ಮಾಲುಮ್ ಕರೀಲಿದಾಕೊಯ್ನಿ. ಕ್ರಿಸ್ತಯೇಸು ಲತಾಡ ಲಿಶೆ ಕರಿ ದೇವ್ನೆ ಪ್ರವಾದಿಖ್ಹಾರಥಿ ಅಗಾಡಿಸ್ ಬೋಲಾಯೋತೆ ವಾತೆ ಅಮ್ನಿ ಪರಕ್ಮ ಚಾ಼ಲಾಯೊ. ಅನಖ್ಹಾಜೇಥಿ ತುಮಾರ ಪಾಪ್ನಖ್ಹಾಜೆ ತುಮೆ ಪ್ರಾಯಶ್ಚಿತ್ ಕರಿಲೀನ್ ದೇವ್‌ಭಣಿ ಫರಿಜಾ಼ವೊ. ತದೆ ಯೊ ತುಮಾರಿ ಪಾಪ್ನ ಕ್ಷಮಾಪಣ್ ಕರಿಲಿಶೆ. ಪ್ರಭು ತುಮೂನ ಆತ್ಮೀಕ ಅರಾಮ್ ದಿಶೆ.ಅಜು಼ ದೇವ್ನೆ ಪಹಿಲೇಸ್ ಕ್ರಿಸ್ತಕರಿ ಚೂ಼ಣಿರಾಖ್ಯೊತೆ ಮೆಸ್ಸಿಯಾನ ತುಮಾರಖ್ಹಾಜೇಸ್ ಮೋಕಲ್‌ಶೆ. “ಕತೋಬಿ ಅಖ್ಖಾಸ್ನ ಬರೋಬರ್ ಕರಾನ ದನ್ ಆವಾಲಗು ಯೊ ಪರಲೋಕ್‌ಮಾಸ್ ರ‍್ಹೇವ್ಣುಕರಿ ದೇವ್ ಘಣಾದನ್ನ ಪಾಛ಼ಳ್ ಇನ ಪವಿತ್ರ ಪ್ರವಾದಿಥಿ ವಾತೆ ಬೋಲಾನಿ ವಖ್ಹತ್‌ಮ; ಆ ದನ್ನಿ ಬಾರೇಮ ಬೋಲ್ಯೊಥೊ. 1ಮೋಶೆನೆ ಬೋಲ್ಯೊತೆ ಶಾತ್‍ಕತೊ, ದೇವ್‍ಹುಯಿರ‍್ಹೋತೆ ಪ್ರಭು ಮಾರಿನಿತರ ತುಮಾರ ಅದ್ಮಿಮಾಸ್ ಏಕ್‌ ಪ್ರವಾದಿನ ತುಮಾರಖ್ಹಾಜೆ ಉಠಾಡ್‍ಶೆ, ಯೊ ಬೋಲ್‍ಶೇತೆ ಅಖ್ಖಿ ವಾತೆನ ತುಮೆ ಖ್ಹಮಜ಼್‌ಣು. ಯೊ ಪ್ರವಾದಿನಿ ವಾತೆನ ಖ್ಹಮ್‍ಜ಼ಕೊಂತೆ ಹರೇಕ್ ಜ಼ಣೊಬಿ ದೇವ್ನ ಅದ್ಮಿಥಿ ಅಲಕ್‌ಹುಯಿನ್ ನಾಶ್‌ಹುಯಿಜಾ಼ಶೆ. ಸಮುವೇಲ್‍ಥಿ ಧರೀನ್ ಇಂಥಿ ಪಛ಼್‌ಲ್ಯ ಪ್ರವಾದಿಖ್ಹಾರುಬಿ ಹಮ್ಕೇನಿ ಆ ದನ್ನಿ ಬಾರೇಮ ವಾತೆ ಬೋಲ್ಯು. ಯೊ ಪ್ರವಾದಿಖ್ಹಾರು ಬೋಲ್ಯಾತೆ ವಾತೆನ ತುಮೆ ಖ್ಹಮ್‍ಜಿಲಿದ. ದೇವ್ ತುಮಾರ ಗುರುಗುರಬ್‍ಲ್ಯಾನಿ ಜೋ಼ಡ್ಮ ಕರ‍್ಯೊತೆ ಒಪ್ಪಂದಾನನ ತುಮೆ ಸ್ವೀಕಾರ್ ಕರೀಲಿದಾ. ದೇವ್ ತುಮಾರೊ ಗುರು ಹುಯಿರೋತೆ ಅಬ್ರಹಾಮ್‌ನ, ‘ತಾರಿ ಖಾನ್‍ಧಾನ್‍ಥಿ ಜ಼ಮೀನ್‌ಪರ್ ಛಾ಼ತೆ ಅದ್ಮಿಖ್ಹಾರು ವಾರ್‌ಖ್ಹೊ ಲೀಲಿಶೆ ಕರಿ ಬೊಲ್ಯೊ. ದೇವ್ ಪಹಿಲೆ ತುಮಾರಖ್ಹಾಜೇಸ್ ಇನ ಸೇವಕ್‌ನ ಮರಣ್‌ಥು ಉಠಾಡಿನ್ ತುಮಾರಕನ ಮೋಕ್‌ಲ್ಯೊ. ತುಮೂನ ಆಶೀರ್ವಾದ್‌ ಕರಾನಖ್ಹಾಜೆ ದೇವ್ನೆ ಯೇಸುನ ಮೋಕ್‌ಲ್ಯೊ. ಯೊ ತುಮಾರಮ ಹರೇಕ್ ಜ಼ಣಾನಾಬಿ ಇವ್ಣಿ ಇವ್ಣಿ ಖರಾಬ್ ವಾಟ್‍ಥಿ ದೂರ್ ಕರೀನ್ ಆಶೀರ್ವಾದ್‌ ಕರ್ಶೆ.” ಕರಿ ಬೊಲ್ಯೊ.
Source notes (1)
- Cross-reference ಧರ್ಮೊ 18:15
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.