Waghri Booli Bible
ಅಪೊ 25
ಫೆಸ್ತನ ಖ್ಹಾಮ್ಣೆ ಪೌಲನ ಲಾಯುತೆ
ಫೆಸ್ತನೆ ಅಧಿಕಾರ್‌ಲೀನ್ ತೀನ್‌ದನ್ನ ಬಾದ್ಮ ಕೈಸರೈಯಾಥು ಯೆರೂಸಲೇಮ್ನ ಗಯೊ. ಹಿಜ್ಜಾ಼ ಗಲ್‌ಢಯಾಜಕ್‌ಬಿ ಅಜು಼ ಯೆಹೂದ್ಯರ್‌ನ ಘಲ್ಡಾವ್‌ನ ಪೌಲನಿ ವಿರೋದ್ ಛಾ಼ಡಿ ಬೊಲ್ಯೊ. ಇನ ಯೆರೂಸಲೇಮ್ಮ ಪಾಛು಼ ಮೋಕಲ್ನುಕರಿ ಇವ್ಣೆ ಪೆಸ್ತಾನ ಗಿಂಗೈಲಿದು. ತೂ ದಯಾಕರೀನ್ ಇನ ಯೆರೂಸಲೇಮ್ನ ಮೋಕಲ್ನುಕರಿ ಪೌಲನ ಕೇಡ್ನಖ್ಹಾಜೆ ಸೋಚ್ಯು. ಶನಕತೊ ಜಾ಼ವಾನ ಮಾರಗ್‌ಪರ್ ಇನ ಮಾರಿನಾಕ್ಣುಕರಿ ಜ಼ಪಿರ‍್ಹೂಥು. ಫೆಸ್ತನೆ ಅಮ್ ಜ಼ವಾಬ್ ದಿದೊ; ಪೌಲ ಕೈಸರೈನ ಖ್ಹಾರ್ಕೊಟ್‌ಮ ಛಾ಼. ಮೇ ಹಿಜ್ಜಾ಼ ಒಗ್ಗೀಸ್ ಪಾಛೊ಼ ಜಾ಼ವ್ಣುಕರಿ ಛೂ಼. ಇನಖ್ಹಾಜೆ ತುಮಾರಮ ಅಧಿಕಾರ್‌ವಾಳು ಮಾರಕೇಡೆ ಕೈಸರೈಮ ಐನ್ ಯೊ ಅದ್ಮಿಮ ಅಪರಾದ್ ಶನುತೋಬಿ ಉಷೇತೊ ಇನಾಪರ್ ಗಲ್ತಿ ಲಗಾಡೊ ಕರಿ ಬೊಲ್ಯೊ. ಫೆಸ್ತನೆ ಇವ್ಣಜೋ಼ಡ್ಮ ಆಟ್‍ಥಿ ಧರೀನ್ ದಖ್ಹ್‌ರೋಜ್‌ಲಗು ರ‍್ಹೀನ್ ಇನಪಾರ್ ಯೊ ಕೈಸರೈನ ಗಯೊ. ಬಿಜೇಕ್‍ದನ್ನೆ ನ್ಯಾವ್‍ನಿ ಝ಼ಗೋಮ ಜೈ಼ನ್ ಪೌಲನ ಬುಲೈಲಿನ್ ಆವ್ಣುಕರಿ ಶಿಪಾಯಿ ಹುಕುಮ್ ಕರ‍್ಯೊ. ಫೆಸ್ತ ನ್ಯಾವ್‍ನಿ ಝ಼ಗೋಮ ಬೆಠೋಥೊ. ಯೆರೂಸಲೇಮ್‌ಥು ಆಯುಥೂತೆ ಯೆಹೂದ್ಯರ್, ಪೌಲ ಹಿಜ್ಜಾ಼ ಆವಾದಿನ್ ಇನ ಅಶ್‌ಪಿಶ್ ಭೀರಿನ್ ಇನಪರ್ ಘಣು ಗಲತ್‌ ಲಗಾಡ್ಯು. ಇವ್ಣೆ ಶಾತ್ಬಿ ಸಾಬಿತ್ ಕರಾನ ಕೋಹುಯುನಿ. ಕತೋಬಿ ಪೌಲನೆ ಜ಼ವಾಬ್ ದೇತೊಹುಯಿನ್, “ಮೇ ಯೆಹೂದ್ಯರ್‌ನಿ ಧರ್ಮಶಾಸ್ತ್ರನಿ ವಿರೋದ್ ರ‍್ಹವೊ ದೇವ್ನಿಮಂದಿರ್‌ನಿ ವಿರೋದ್ ರ‍್ಹವೊ, ಚಕರ್‌ವರ್ತಿನಿ ಬಾರೇಮ ರ‍್ಹವೊ, ಮೇ ಖಿವು ಗಲ್ತಿಬಿ ಕರ‍್ಯೊಕೊಯ್ನಿ.” ಕರಿ ಬೊಲ್ಯೊ. ಕತೋಬಿ ಫೆಸ್ತನೆ ಯೆಹೂದ್ಯರ್‌ಥಿ ದಯಾನ ಲ್ಯವಾನಖ್ಹಾಜೆ ಪೌಲನ “ತೂ ಯೆರೂಸಲೇಮ್ಮ ಜಾ಼ವನ ಕೋಶಿಶ್ ಕರಾನಿವಖ್ಹ್‌ತೆ, ಹಿಜ್ಜಾ಼ ಮಾರಖ್ಹಾಮ್ಣೆ ಆ ಗಲ್ತಿನಿ ಬಾರೇಮ ತೀರ್ಪ್‌ ಕರಿಲೇವ್ಣುಕರಿ, ತುನ ಖ್ಹಯಾಲ್ ಛಾ಼ಕಿ ಶು? ಕರಿ ಬೊಲ್ಯೊ. ತದೆ ಪೌಲನೆ ಬೊಲ್ಯೊ, “ಮೆ ಹಮ್ಕೆ ಕೈಸರ್‌ನ ನ್ಯಾವ್ನಿಝ಼ಗೊಮಾಸ್ ಭಿಯೋಸ್; ಮನ ತೀರ್ಪ್‌ಕರ‍್ನುತೆ ಹಜ್ಜಾ಼ಸ್. ಯೆಹೂದ್ಯರ್‌ನ ಮೆ ಶನು ಠಗಾಯೊ ಶಾತ್‌ಕೊಯ್ನಿ ಕರಿ ಬೋಲಾನು ತುಮುನಾಬಿ ಅಛ್ಛಿನಿತರ ಮಾಲುಮ್‌ಛೆ. ಮೇ ಅನ್ಯಾಯ್ ಕರವಾಳೊ ಹುಯಿನ್ ಶಾತ್ತೋಬಿ ಕರವಾಳೊ ಹುಯಿನ್ ಧರ್ಮಶಾಸ್ತ್ರನಿ ಪರಕ್ ಮನ ಮರಣ್ ದಂಡಣೆನ ಕಾರಣ್ ಹುಯೋತೊಬಿ ಇನ ಮೆ ಮಾನಿಲೇವ್ಸ್. ಕತೋಬಿ ಅವ್ಣೆ ಪೊಳ್ ಗಲತ್‌ನ ಮಾರಪರ್ ನಾಖನುರ‍್ಹಯೂತೊ, ಮನ ಕೋಣ್‌ಬಿ ಅವ್ಣ ಹಾತ್ಮ ದ್ಯವಾನ ಕೋ ಉಶೇನಿ. ಮೆ ಕೈಸರ್‌ನ ಖ್ಹಾಮ್ಣೆ ಬೋಲಿಲೆವುಸ್” ಕರಿ ಬೊಲ್ಯೊ. ತದೆ, ಫೆಸ್ತನೆ ಇವ್ಣಸಭೆವಾಳಾನಿ ಜೋ಼ಡ್ಮ ಚರ್ಚೆಕರೀನ್ ತದೆ ಪೌಲನ, “ತೂ ಕೈಸರನ ಖ್ಹಾಮ್ಣೆ ಬೋಲಿಲೆವುಸ್‌ಕರಿ ಬೋಲ್ಯೊನಿ, ಇನಖ್ಹಾಜೆ ಕೈಸರಕನಾಸ್ ಜಾ಼ವ್ಣುಕರಿ ಬೊಲ್ಯೊ.
ಹೆರೋದಾಬಿ ಅಗ್ರಿಪ್ಪನ ಖ್ಹಾಮ್ಣೆ ಪೌಲ
ಥೋಡದನ್ನ ಬಾದ್ಮ ಅಗ್ರಿಪ್ಪ ರಾಜ಼ಬಿ ಬೆರ್ನಿಕೆನಿ ಜೋ಼ಡ್ಮ ಫೆಸ್ತನ ಮಳಾನಖ್ಹಾಜೆ ಅಜು಼ ಸ್ವಾಗತ್ ಕರಾನ ಕೈಸರೈಮ ಆಯು. ಇವ್ಣೆ ಖ್ಹುಮಾರ್‌ದನ್ ಹಿಜ್ಜಾ಼ಸ್ ರಹಿಗು. ಇನಖ್ಹಾಜೆ ಫೆಸ್ತನೆ ಪೌಲನಿ ಬಾರೇಮ ರಾಜ಼ನ ಖ್ಹಮ್‌ಜಾ಼ಡ್ಯೊ ಶಾತ್‌ಕತೊ, “ಫೇಲಿಕ್ಸನೆ ಖ್ಹಾರ್ಕೊಟ್‌ಮಾಸ್ ಮ್ಹೇಲಿನ್ ಗಯೋತೆ ಏಕ್‍ಜ಼ಣೊ ಛಾ಼. ಮೆ ಯೆರೂಸಲೇಮ್ಮ ರ‍್ಹವಾನಿವಖ್ಹ್‌ತೆ ಯೆಹೂದ್ಯರ್‌ನ ಗಲ್‌ಢಯಾಜಕ್‍ಖ್ಹಾರು ಅಜು಼ ಗಲ್‌ಢಖ್ಹಾರು ಇನಿ ಬಾರೇಮ ಮನ ಆರೋಪ್ ಬೋಲಿನ್ ಇನ ತೀರ್ಪ್‌ಹುವಾದೆ ಕರಿ ಗಿಂಗಾಯು. ಮೆ ಇವ್ಣುನ; ಅಪರಾದಿಬಿನ್ ಅಪರಾದ್ ಲಗಾಡವಾಳು ಆಮಖ್ಹಾಮೆ ಭೀರೆವ್ಣು; ಇನಾಪರ್ ಲಗಾಡಿರಾಖ್ಯುತೆ ಅಪರಾದ್ನ ವಿರೋದ್ ಜ಼ವಾಬ್‍ದ್ಯವಾನ ಅಪರಾದಿನ ಅವಕಾಶ್ ಕರಿದೇವ್ಣು. ಇಮ್‌ ಕರ‍್ಯುಕೊಂತೆ ಹಾತ್ಮ ನೇರ್ ದೀನಾಖನು ರೋಮ್ನಿ ಪದತ್ತಿಕಾಹೆ ಕರಿ ಬೊಲ್ಯೊ. “ಇವ್ಣೆ ಹಜ಼್ಜ ಮಳಿನ್ ಆವಖ್ಹತರ್ ಮೇ ಜ಼ರಾಬಿ ಧೀರ್‌ಕೊಂತೆ ಬಿಜೇಕ್ ದನ್ನೇಸ್ ನ್ಯಾವ್‍ನಿ ಝ಼ಗೋಪರ್ ಬೇಶಿನ್ ಯೊ ಅದ್ಮಿನ ಬುಲಾವ್ಣುಕರಿ ಹುಕುಮ್ ದಿದೊ. ಯೆಹೂದ್ಯರ್ ಉಠಿಭೀರಿನ್ ಇನ ಉಪ್ಪರ್ ಅಪರಾದ್ ಲಗಾಡ್ಯು. ಕತೋಬಿ ಮೇ ಸೋಚಾನಿ ಪರಕ್ಮ ಇವ್ಣೆ ಇನಾಪರ್ ಖಿವು ಖರಾಬ್ ಅಪರಾದ್‍ಬಿ ಕೊ ಲಗಾಡ್ಯನಿ. ಇವ್ಣೆ ಬೋಲ್ಯುತೆ ವಾತೆಖ್ಹಾರು ಇವ್ಣ ಶೊಂತ್ ಧರ್ಮಾನು ಸಂಬಂದ್‌ನಿತರ ಹುಯಿರೂಥು. ಅಜು಼ ಯೇಸುಕರಿ ಏಕ್‍ಜ಼ಣ ಭಣೀಥು ಆ ವಿವಾದ್ ಹುಯಿರ‍್ಹುಥು. ಮರಿಗಯೋತೆ ಯೇಸು ಹಮ್ಕೆ ಜಿವ್ತೊ ಛಾ಼ ಕರಿ ಪೌಲನೆ ಬೊಲ್ಯೊ. ಆ ವಾತೆನಿ ಬಾರೇಮ ಮನ ಜಾ಼ಖ್ಹತ್ ಮಾಲುಮ್ ಕೊಥುನಿ ಇನಾಖ್ಹಾಜೆ ಮೇ ಪುಛಾ಼ವನ ಕೊಗಯೋನಿ ಕತೋಬಿ ಮೇ ಪೌಲನ, ‘ತೂ ಯೆರೂಸಲೇಮ್ಮ ಜೈ಼ನ್ ನ್ಯಾವ್ನ ತೀರ್ಮಾನ್ ದೇವ್ಣುಕರಿ ಮೆ ಬೊಲ್ಯೊ. ಇನಾಖ್ಹಾಜೆ,ಪೌಲನೆ ‘ಚಕರ್‌ವರ್ತಿ ಕೈಸರ್‌ಥೀಸ್ ಮಾರು ಜಾವಾಬ್‍ನ ಪೂಚ್‌ತಾಚ಼್‌ ಹುವಾದೆ ತಬ್‍ಲಗು ಮನ ಬಚಾ಼ಡ್ಣು’ ಕರಿ ಬೋಲಿಲಿದೊ. ಇನಾಖ್ಹಾಜೆ ರೋಮ್‍ನ ಚಕರ್‌ವರ್ತಿಕನ ಮೋಕ್ಲಲಗು ಇನ ಕಾವ್ಲಿಮ ರಾಕ್ಣುಕರಿ ಹುಕುಮ್‌ದಿದೊ”. ಅಗ್ರಿಪ್ಪನೆ ಫೆಸ್ತನ, “ಆ ಅದ್ಮಿ ಬೋಲಾಸ್ತೆ ಖ್ಹಮ್‌ಜಾ಼ನ ಮನಾಬಿ ಪಸಂದ್ ಛಾ಼” ಕರಿ ಬೊಲ್ಯೊ. ಪೆಸ್ತಾನೆ, “ಯೊ ಬೋಲಾನು ತೂ ಕಾಲೆ ಖ್ಹಮ್‍ಜೆಜಾ಼ಯ್” ಕರಿ ಜ಼ವಾಬ್ ದಿದೊ. ಅಗಲ್ಯದನ್ನೆ ಅಗ್ರಿಪ್ಪರಾಜ಼ ಅಜು಼ ಬೆರ್ನಿಕೆರಾಣಿ ಘಣು ರಂಗ್‌ರಾಜ಼್‌ಥಿ ಶಿಪಾಯಿನ ಮೋಟಕನ ಅಜು಼ ಕೈಸರೈನ ಗಲ್‌ಢವ್‍ನಿ ಜೋ಼ಡ್ಮ ಸಭೆನ ಆಸ್ತಾನ್ಮ ಆವಖ್ಹತರ್. ಪೌಲಾನ ಮಹಿ ಬುಲೈಲಿನ್ ಆವ್ಣುಕರಿ ಫೆಸ್ತನೆ ಶಿಪಾಯ್ನ ಹುಕುಮ್ ಕರ‍್ಯೊ. ತದೆ ಫೆಸ್ತನೆ, “ರಾಜ಼ ಅಗ್ರಿಪ್ಪ, ಹಮಾರ ಜೋ಼ಡ್ಮ ಮಳಿಐರ‍್ಹಾತೆ ಖ್ಹಾರಾಸ್ ಅದ್ಮಿವೊ; ತುಮೆ ದೇಖುಕರಾತೆ ಆ ಅದ್ಮಿನಪರ್ ಹಜ್ಜಾ಼ಛಾ಼ತೆ ಅಜು಼ ಯೆರೂಸಲೇಮ್ಮ ರ‍್ಹವಾಳು ಖ್ಹಾರುಸ್ ಯೆಹೂದ್ಯರ್ ಮನ ಗಲತ್‌ ಬೋಲಿನ್, ಆ ಜಿವ್ತೊ ನಾರ‍್ಹೇಣು ಕರಿ ಚಿಕ್ರಾಣ್ ಮಾರ‍್ಯು. ಮೇ ಅನ ವಿಚಾರ್ ಕರಾನಿ ವಖ್ಹ್‌ತೆ ಶನು ಝೂ಼ಟುಬಿ ಕೋ ದೇಖ್ಯೋನಿ ಕತೋಬಿ ಕೈಸರ್‌ಥೀಸ್ ನ್ಯಾವ್‌ನು ತೀರ್ಪ್‌ಹುವಾದೆ ಕರಿ ಬೋಲಿಲಿದೊ. ಇನಖ್ಹಾಜೆ ಅನ ರೋಮ್‍ನ ಮೋಕ್ಲಾನ ತೀರ್ಮಾನ್ ಕರಿರಾಖ್ಯೊಸ್. ಕತೋಬಿ ಅನಿ ವಾತೆನಿ ಬಾರೇಮ ಕೈಸರೈನ ಲೀಖಾನ, ಬರಾಬರ್‌ನು ಅಪರಾದ್ ಶಾತ್ಬಿ ಮನ ಕೊದೆಖಾವನಿ, ಇನಖ್ಹಾಜೆ ಮೇ ಅನ ತುಮಾರ ಖ್ಹಾರಾನ ಖ್ಹಾಮ್ಣೇಬಿ ವಿಶೇಷ್‌ಥಿ ಛಾ಼ತೆ ರಾಜ಼ ಅಗ್ರಿಪ್ಪನ ಖ್ಹಾಮ್ಣೆ ಲೈರಾಖ್ಯೊಸ್. ಇನಖ್ಹಾಜೆ ತುಮೆ ಅನ ವಿಚಾರ್‌ಕರೀನ್ ಅನಿ ಬಾರೇಮ ಇನ ಲೀಖಾನ ಶನಿತೋಬಿ ವಾತೆ ದಿಶುಕರಿ ಬೋಲಿನ್ ಟಿವೈರ‍್ಹೋಸ್. ಮೇ ಸೋಚಾನಿತರ ಏಕ್‌ ಖೈದಿನ ವಿರೋದ್ ಛಾ಼ತೆ ಅಪರಾದ್ನ ಮಾಲುಮ್ ನಾ ಕರ‍್ಯುತೊ ಇನ ಸೀಜರ್‌ಕನ ಮೋಕ್ಲಾನು ಬರಬ್ಬರ್‌ ಕೊಯ್ನಿಕರಿ ಬೊಲ್ಯೊ.
Source notes (1)
- Footnote ಬೆನಿರ್ಕೆ ಆ ಹೈರಿತೆ ಏಕ್‌ನ ಹೆರೋದ ಅಗ್ರಿಪ್ಪನಿ ಛೋ಼ರಿ ಅಜು಼ ಬೇನ ಹೆರೋದ ಅಗ್ರಿಪ್ಪನಿ ಭೇನ್ ಹುಯಿರ‍್ಹೀಥಿ
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.