Waghri Booli Bible
ಅಪೊ 17
ಥೆಸಲೋನಿಕಮ ಪೌಲಾನಿ ಸೇವೆ
ಪೌಲ ಅಜು಼ ಸೀಲನೆ ಅಂಫಿಫೊಲಿ ಅಜು಼ ಅಪೊಲೋನ್ಯನಿ ವಾಟೆಕರಿ ಚಾ಼ಲ್ತಹುಯಿನ್ ಥೆಸಲೋನಿಕ ಖ್ಹಯೇರ್‌ಮ ಆಯ. ಹಿಜ್ಜಾ಼ ಯೆಹೂದ್ಯರ್‌ನಿ ಏಕ್ ಸಬಾಮಂದಿರ್‌ ಥು. ಪೌಲನೆ ಕದೆ ಕದೇಬಿ ಜಾ಼ತೊಥೋತೆ ಇಮ್ಮಸ್ ಯೆಹೂದ್ಯರ್‌ನ ಮಳಾನಖ್ಹಾಜೆ ಸಭೆಮ ಗಯೊ. ಇನೆ ತೀನ್ ವಾರ ಸಬ್ಬತ್‌ ದನ್ಮ ಯೆಹೂದ್ಯರ್‌ನ ಜೋ಼ಡೆ ದೇವ್ನಿ ವಚನ್ನಿ ಆಧಾರ್‌ಥಿ ಬೋಲಿವತಾಳ್ಯೊ. ಜಗತ್ನ ಉದ್ಧಾರ್ ಕರಾವಾಳೊ, ಖ್ಹತಾಪ್ಣಿನ ಲೇವ್ಣೂಸ್‍ ಪಡ್ಯುಥು. ಅಜು಼ ಮರಿಜೈನ್ ಪಾಛು಼ ಉಟ್ನುಸ್ ಪಡ್ಯುಥು ಕರಿ ಮೇ ಬೋಲುಕರುಸ್ತೆ ಯೊ ಕ್ರಿಸ್ತ” ಕರಿ ಮಾಲುಮ್ ಕರಾಯೊ. ಇವ್ಣಾಮ ಥೋಡಜ಼ಣು ದೇವ್ನು ಭಕ್ತರ್‌ ಹುಯಿರುತೆ ಗ್ರೀಕ್‌ನು ಮೊಟು ಝೂ಼ಂಡ್‌ ಅಜು಼ ಮುಖ್ಯ ತಯೇಡಾಮ ಕೈಯೆಕ್‍ಜ಼ಣಿ ಪೌಲ ಅಜು಼ ಸೀಲಾನಿ ಜೋ಼ಡೆ ಮಳಿಗಯು. ಕತೋಬಿ ನಂಬ್ಯುಕೊಂತೆ ಯೆಹೂದ್ಯಖ್ಹಾರು ಬಳಾಪೊ ಕರ‍್ಯು. ಇವ್ಣೆ ಖ್ಹಯೇರ್‌ಮ ಥೂತೆ ಥೋಡ ಖರಾಬ್ ಅದ್ಮಿವೋನ ಪೈಶಾದೀನ್ ಬುಲೈಮಂಗೈನ್‌ ಗಮ್ಮ ಗಲಾಟ್ ಕರೈನ್, ಪೌಲಬಿನ್ ಸೀಲನ ಖ್ಹಯೇರ‍್ನ ಸಭೆನ ಖ್ಹಾಮ್ಣೆ ಲೀನ್‍ ಆವ್ಣುಕರಿ ಯಾಸೋನನ ಘರ್‌ನ ಘೇರ್ತುಹುಯಿನ್ ಆಯು. ಕತೋಬಿ ಇವ್ಣೆ ಹಿಜ್ಜಾ಼ ದೆಖಾಯುಕೊಂತೆ ಇನಖ್ಹಾಜೆ ಇವ್ಣೆ ಯಾಸೋನನಾಬಿ ಥೋಡ ವಿಶ್ವಾಸಿಖ್ಹಾರಾನ ನಂಗರ‍್ನ ಅಧಿಕಾರಿನ ಖ್ಹಾಮ್ಣೆ ಖೇಚಿಲೈನ್‌; ಆ ಅದ್ಮಿಖ್ಹಾರು ಜಗತ್ನಿಅಖ್ಖಿಸ್ ಬಾಜು಼ ಗಲಾಟ್ ಉಠಾಡಿನ್ ಹಮ್ಕೆ ಹಜ್ಜಾ಼ಬಿ ಐರ‍್ಹಾಸ್. ಯಾಸೋನನೆ, ಇನ ಘರ್‌ಮಾಸ್ ಇವ್ಣುನ ರಾಖಿರಾಖ್ಯೋಸ್. ಅಜು಼ ಇವ್ಣೆಖ್ಹಾರು ಯೇಸುಕರಿ ಬಿಜೇಕ್‍ಜ಼ಣೊ ರಾಜ಼ ಛಾ಼ಕರಿ ಬೋಲಿನ್, ಕೈಸರ್‌ನಿ ಹುಕುಮ್‌ನ ವಿರೋಧ್‍ಥಿ ಚಾ಼ಲುಕರಸ್ ಕರಿ ಚಿಕ್‌ರ‍್ಯು. ಆ ವಾತೆ ಖ್ಹಮ್‍ಜ್ಯುತೆ ಖ್ಹಯೇರ್‌ವಾಳು ಅಜು಼ ಖ್ಹಯೇರ‍್ನ ಅಧಿಕಾರಿನ ಘಣು ಕಲಾವ್ಣಿ ಹುಯಿನ್ ಯಾಸೋನಥೀಬಿ ಬಿಜ಼ ಥೋಡ ವಿಶ್ವಾಸಿಥೀಬಿ ಜಾ಼ಮೀನ್‍ಲೀನ್ ಇನ ಪಾಛ಼ಳ್ ಇವ್ಣುನ ಮ್ಹೇಲಿದಿದು.
ಬೆರೋಯ ಖ್ಹಯೇರ್‌ಮ ಪೌಲಬಿ ಸೀಲ
ಯೋಸ್ ರಾತ್ಮ ವಿಶ್ವಾಸಿಖ್ಹಾರು ಪೌಲ ಸೀಲನ ಬೆರೋಯ ಕರಿ ಬೋಲಾನು ಬಿಜೇಕ್ ಖ್ಹಯೇರ‍್ನ ಮೋಕ್‍ಲ್ಯು. ಬೆರೋಯಮ ಪೌಲ ಸೀಲನ ಯೆಹೂದ್ಯರ್‌ನ ಸಭೆಮ ಗಯ. ಆ ಯೆಹೂದ್ಯವಾಳು ಥೆಸಲೋನಿಕನ ಯೆಹೂದ್ಯರ್‌ಥಿಬಿ ಪೌಲ ಸೀಲನೆ ಬೋಲ್ಯಾತೆ ಅಛ್ಛಿ ಸಂದೇಶ್ನ ಖುಲ್ಲ ದಿಲ್‌ಥಿ ಘಣು ಶಂತೋಖ್ಹ್‌ ಥಿ ಖ್ಹಮ್‌ಜ್ಯು. ಅಜು಼ ಯೊ ವಾತೆ ಖ್ಹಾಚು಼ಸ್‍ಕರಿ ಬೋಲಾನು ಮಾಲುಮ್ ಕರಿಲ್ಯವಾನಖ್ಹಾಜೆ ಪವಿತ್ರ ಪುಸ್ತಕನ ಹರೇಕ್ನೆ ಬರೋಬರ್ ಫಢ್ಯುತೆ ಇನಖ್ಹಾಜೆ ಥೆಸಲೋನಿಕ ವಾಳೇಥಿಬಿ ಅಛ್ಛಿಗುಣ್‌ವಾಳು ಹುಯಿರ‍್ಹುಥು ಅಮ್‍ರ‍್ಹಾವಮ ಕೈಯೆಕ್ಕಿ ಜ಼ಣು ನಂಬ್ಯು. ಅಜು಼ ಗ್ರೀಕ್‍ನಿತಯೇಡ ಪರ್ಖ್ಹಾ ವಿಶ್ವಾಸ್ ಕರ‍್ಯು. ಕತೋಬಿ ಪೌಲ ಬೆರೋಯಮ ದೇವ್ನು ವಚನ್ನ ಬೋಲುಕರಸ್ ಕರಿ ಬೋಲಾನು ಖ್ಹಮ್‌ಜಿನ್‌ ಥೆಸಲೋನಿಕನು ಯೆಹೂದ್ಯಮಾಬಿ ಬೆರೋಯಮಾಬಿ ಐನ್ ಹಿಜ಼್ಜಾನ ಅದ್ಮಿಖ್ಹಾರಾನ ಕಲಾವ್ಣಿಕರಿನ್ ಗಲಾಟ್ ಉಠಾಡ್ಯು. ಇನಖ್ಹಾಜೆ ವಿಶ್ವಾಸಿಖ್ಹಾರು ತದ್‌ನು ತದೇಸ್‌ ಪೌಲನ ದರ‍್ಯಾವ್ನ ಕನಾರಲಗು ಮೋಕ್ಲಿದಿದು. ಕತೋಬಿ ಸೀಲ ಅಜು಼ ತಿಮೊಥೆ ಇವ್ಣೆ ಬೆರೋಯಮಾಸ್ ರ‍್ಹೀಗ. ಪೌಲನ ಮ್ಹೇಲಿದ್ಯವಾನ ಗಯುಥೂತೆ ಖ್ಹಾರು ಇನ ಜೋ಼ಡ್ಮ ಅಥೇನ್ಸಲಗು ಗಯು. ಸೀಲನಾಬಿ ತಿಮೊಥೆಯನಾಬಿ ಮಳಿಹುಯಿಗುತೊ ತದೇಸ್‌ ಒಗ್ಗಿಸ್ ಇನಕನ ಆವ್ಣುಕರಿ ಪೌಲನಿ ಹುಕುಮ್‍ಥಿ ಪಾಛ಼ ಆಯ.
ಅಥೇನ್ಸ್‌ಮ
ಪೌಲ ಇವ್ಣಖ್ಹಾಜೆ ಅಥೇನ್ಸ್‌ಮ ಟಿವೈರ‍್ಹವಾನಿ ವೇಳ್ ಯೊ ಖ್ಹಯೇರ್‌ಮ ಕಿಜ್ಜಕಿಜ್ಜಾಬಿ ಮೂರತ್ತಸ್‍ ಅಖ್ಖು ರ‍್ಹವಾನು ದೇಖಿನ್ ಇನೊ ಮನ್ ಉಕ್ಳಿರ‍್ಹೀಗು. ಇನಖ್ಹಾಜೆ ಇನೆ ಸಭೆಮ ಜೈ಼ನ್ ಯೆಹೂದ್ಯರ್ ಅಜು಼ ದೇವ್ನಿ ಭಕ್ತಿರ‍್ಹಾವಳು ಗ್ರೀಕ್‍ವಾಳಾನಿ ಜೋ಼ಡೆ ಅಜು಼ ಖ್ಹಯೇರ್‌ಮ ಬೇಪಾರ್‌ಕರಾನಿ ಝ಼ಗೋಮ ದೇಖವಾಳಾನಿ ಜೋ಼ಡ್ಮ ಹರೇಕ್ ದನ್ ಚರ್ಚೆ ಕರಾಲಗ್ಯು. ಎಫಿಕೂರಿಯವಾಳು ಅಜು಼ ಸ್ತೋಯಿಕ ಕರಿ ನವಿ ಸೋಚ್ನಿ ಬಾರೇಮ ಬೋಲಾವಳು ಥೋಡುಜ಼ಣು, “ಆ ಅದ್ಮಿನ ಯೊ ಶನಿಬಾರೇಮ ವಾತೆ ಬೋಲುಕರಸ್ತೆ ಕರಿ ಬೋಲಾನು ಖ್ಹಾಚಮಾಬಿ ಮಾಲುಮ್ ಕೊಯ್ನಿ. ಯೊ ಶಾತ್ ಬೋಲ್ನುಕರಿ ಛಾ಼? ಕರಿ ಬೋಲ್ಯು. ಯೇಸು ಮರ‍್ಯಮಾಥು ಪಾಛು಼ಜಿವ್ತೊಹುಯಿನ್ ಉಠೀನ್ ಐರ‍್ಹೋಸ್ ಕರಿ ಬೋಲಾನಿ ಸುವಾರ್ತೆನ ಪೌಲ ಬೋಲುಕರ್ತೊಥೊ. ಅಜು಼ ಥೋಡುಜ಼ಣು ‘ಆ ಹುಯಿರುತೆ ಬಹಾರ್‌ಲ್ಯ ದೇವ್ನಿ ಬಾರೇಮ ಬೋಲಾನಿತರ ದೇಖಾವಸ್; ಕರಿ ಬೋಲ್ಯು. ಇವ್ಣೆ ಪೌಲನ ಅರಿಯೊಪಾಗನಿ ನ್ಯಾವ್‍ನಿ ಸಭೆಮ ಬುಲೈಲಿಗಯು. ಅವ್ಣೆ ಇನ “ತೂ ಶಾತ್ ಬೋಲಿ ವತಾಳ್ಣು ಕರಿ ಛಾ಼ಕಿ ಯೊ ನವಿ ಬೋಧನ್ನಿ ನಿಯಮ್ನ ಹಮುನಾಬಿ ವತಾಳ್. ತೂ ಬೋಲುಕರಾತೆ ಅಖ್ಖಿವಾತೆ ಹಮೂನ ನೌಖು ಹುಯಿರ‍್ಹುಸ್. ಅಥೆನ್ಸ್‌ಮ ಅಖ್ಖೂಸ್ ಅದ್ಮಿ ಅಜು಼ ಹಿಜ್ಜಾ಼ ಜಿವ್‍ಕರ್ತುಥೂತೆ ಬಿಜ಼ ದೇಖ್ಹ್‌ವಾಳು ನವ ಸೋಚ್ನಿ ಬಾರೇಮ ಬೋಲನಾಬಿ ಅಜು಼ ಖ್ಹಮ್‍ಜಾ಼ನಾಬಿ ಘಣು ಇಷ್ಟಕರ‍್ಯು. ತದೆ ಪೌಲನೆ ಅರಿಯೊಪಾಗನ ನ್ಯಾವ್‍ನಿ ಸಭೆನ ಖ್ಹಾಮ್ಣೆ ಉಠಿಭೀರಿನ್ ಅಮ್ ಬೊಲ್ಯೊ, “ಅಥೆನ್ಸ್‌ನ ಅದ್ಮಿವೊ ತುಮೆ ಅಖ್ಖೀಸ್ ಥರಮಾಬಿ ದೇವ್ನ ಜಾ಼ಖ್ಹತ್ ಭಕ್ತಿ ಕರಾವಾಳ ಕರಿ ಮನ ದೇಖಾವಸ್. ಮೆ ತುಮಾರ ಖ್ಹಯೇರ್‌ಮ ಚಾ಼ಲಿನ್ ವೇಳ್ಮ ತುಮೆ ಪೂಜ಼ಕರಾತೆ ದೇವ್ತಿನು ಮೂರತ್ನ ದೇಖಾನಿವಖ್ಹ್‌ತೆ ಏಕ್ ಚಾ಼ಚ಼ರ್‌ಪರ್ ‘ಮಾಲುಮ್‌ಕೊಂತೆ ದೇವ್ನ ಕರಿ ಲೀಖೈರ‍್ಹೂಥು. ಇನಖ್ಹಾಜೆ ತುಮೆ ಖೆವಾನ ಮಾಲುಮ್‌ಕೊಂತೆ ಪೂಜ಼ಕರಸ್ಕಿ ಇನಾಸ್ ತುಮೂನ ಮಾಲುಮ್ ಕರಾವುಸ್ ಖ್ಹಮ್‍ಜೊ಼” ಕರಿ ಬೊಲ್ಯೊ. ಜಗತ್ನಾಬಿ ಇನಾಮಛಾ಼ತೆ ಅಖ್ಖಾನಾಬಿ, ಬಣಾಯೋತೆ ದೇವ್ ಆಬ್ ಧರ್ತಿನ ಯಜಮಾನ್ ಹುಯಿರ‍್ಹೋತೆ ಇನಖ್ಹಾಜೆ ಯೊ ಹಾತೇಖ್ಹು ಭಾಂದಿಹುಯು ದೇವಳ್ಮ ಜಿವ್ಣುಕರಾವಾಳೊ ಕಾಹೆ; ಯೋಸ್ ಹರೇಕ್ನ ಜಾನ್ನೊರಾವೊ಼ ಅಜು಼ ಜಿವಾನಖ್ಹಾಜೆ ಹೋಣುತೆ ಖ್ಹಾರುಸ್‌ದ್ಯವಾಳೊ ಯೋಸ್; ಇಮ್ಮಸ್ ಅದಮ್‍ಜ಼ಮಾನೊ ಇನಖ್ಹಾಜೆ ಮ್ಹಿನತ್‌ಕರಾನು ಕಾಮ್ ಇನ ಶಾತ್ಬಿಕೊಯ್ನಿ. ದೇವ್ನೆ ಏಕ್ ಅದ್ಮಿನ ಬಣಾವ್‍ತೊ ಹುಯಿನ್ ಅದಮ್‍ಜ಼ಮಾನಾನು ಝೂ಼ಂಡ್‌ ಶುರುಕರ‍್ಯೊ. ಇನೇಥಿ ಬಿಜು಼ ಅಖ್ಖೂಸ್ ಅದ್ಮಿನ ಜಗತ್‌ನು ಕಿಜ಼್ಜಕಿಜ್ಜಾ಼ಬಿ ಇವ್ಣೆ ಜಿವ್ಣು ಕರಾನಿತರ ಕರ‍್ಯೊ. ಇವ್ಣೆ ಕದೆ ಅಜು಼ ಕಿಜ಼್ಜಕಿಜ್ಜಾ಼ ರ‍್ಹೇವ್ಣುಕರಿ ಬೋಲಾನು ನಿರ್ಧಾರ್ ಕರ‍್ಯೊ. ಏಕ್ ವೇಳ್ ಇವ್ಣೆ ಧೀರ್‌ಥಿ ತೋಬಿ ಮಾಲುಮ್ ಕರಿಲಿಶೆಕರಿ ಇನ ಢುಂಡಾನಿತರ ಕರ‍್ಯೊ. ಕತೋಬಿ ದೇವ್ ಅಪ್ಣಾಮ ಕಿನಾಬಿ ಜಾ಼ಖ್ಹತ್ ದೂರ್ ಕೊಯ್ನಿ. ಶನಕತೊ ಇನಾಸ್ಮ ಅಪ್ಣೆ ಜಿವ್‌ಕರಿಯೇಸ್. ಚಾ಼ಲುಕರಿಯೇಸ್ ಅಜು಼ ರ‍್ಹಿಯೇಸ್. ತುಮಾರ ಗೀದ್‌ ಲಿಖವಾಳಮ ಥೋಡುಜ಼ಣು, “ಹಮೆ ಇನ ಸಂತಾನ್‍ವಾಳಸ್” ಕರಿ ಬೋಲಿರಾಖ್ಯುಸ್. ಅಪ್ಣೆ ದೇವ್ನ ಲಡ್ಕ ಹುಯಿರ‍್ಯವಾಪರ್‌, ಅದ್ಮಿಖ್ಹಾರು ಸೋಚಾನಿ ಪರಕ್ಮ ಬಣಾವಟ್ನಿ ಮೂರತ್ನ ಪರಕ್‍ ರ‍್ಹವೊ ದೇವ್ ಛಾ಼ಕರಿ ತುಮೆ ಖ್ಹಯಾಲ್ ನಾಕರ‍್ನು. ಯೊ ರೂಪು ಖ್ಹೊನ್ನು ಅಜು಼ ಬಂಡಾನಿ ಶಕಲ್ಮ ಕೊಯ್ನಿ. ಗಯೂತೆ ಹಗಾಮ್ಮ ಅದ್ಮಿಖ್ಹಾರು ದೇವ್ನ ಮಾಲುಮ್ ಕರ‍್ಯುಕೊಯ್ನಿ. ಕತೋಬಿ ದೇವ್ನೆ ಯೊ ಶಾತ್ಬಿ ಕರ‍್ಯೊಕೊಯ್ನಿ. ಹಮ್ಕೆತೋಬಿ ಜಗತ್ನಿ ಅಖ್ಖಿಬಾಜು಼ಮ ರ‍್ಹವಾಳು ಅದ್ಮಿಖ್ಹಾರು ಖರಾಬ್ ಮಾರಗ್‌ನ ಮ್ಹೇಲಿನ್ ಇನಾಭಣಿ ಫರ್‌ನುಕರಿ ಹುಕುಮ್ ದೆವುಕರಸ್. ಜಗತ್ನ ಅದ್ಮಿಖ್ಹಾರಾನು ನ್ಯಾಯನ ಫೆಡಾವನಖ್ಹಾಜೆ ದೇವ್ನೆ ಏಕ್‍ದನ್ನ ಖ್ಹಣೇದ್ ಕರಿರಾಖ್ಯೋಸ್. ತದೆ ನ್ಯಾವ್‌ನ ಫೇಡಾವನಖ್ಹಾಜೆ ಇನೆ ಏಕ್‍ಜ಼ಣಾನ ಕೇತ್ರಾಕಿ ವರಖ್ಹ್‌ನ ಪಾರಸ್ ಚೂ಼ಣಿರಾಖ್ಯೊಸ್. ಅನ ಹರೇಕ್‌ಜ಼ಣಾನ ಮಾಲುಮ್ ಕರಾವನಖ್ಹಾಜೆ ಆ ಏಕ್‍ಜ಼ಣಾನ ಮರ‍್ಯಹುಯಮಾಥು ಜಿವ್ತು ಉಠಾಡಿರಾಖ್ಯೊಸ್. ಯೇಸು ಮರ‍್ಯಹುಯಮಾಥು ಪಾಛು಼ಜಿವ್ತೊಹುಯಿನ್ ಉಠೀನ್ ಐರ‍್ಹೋಸ್‍ಕರಿ ಬೋಲಾನಿ ವಾತೆನ ಖ್ಹಮ್‍ಜ್ಯೊತೆ ಅದ್ಮಿಮ ಥೋಡುಜ಼ಣು ನಕ್ಲೆ ಕರ‍್ಯು. ಅಜು಼ ಥೋಡುಜ಼ಣು “ಆ ವಾತೆನಿ ಬಾರೇಮ ತೂ ಬಿಜೇಕ್‍ಹಲ್ಲ ಬೋಲೆಜಾ಼ಯ್ ತದೆ ಹಮೆ ಖ್ಹಮಜ಼್‌ಶು” ಕರಿ ಬೋಲ್ಯು. ಇನಖ್ಹಾಜೆ ಪೌಲನೆ ಇವ್ಣಕಂಥು ನಿಕ್ಳಿ ಚ಼ಲೆಗಯೊ. ಕತೋಬಿ ಯೊ ಅದ್ಮಿಖ್ಹಾರಾಮ ಥೋಡುಜ಼ಣು ಪೌಲನ ವಿಶ್ವಾಸ್ ಕರಿನ್ ಇನಕೇಡೆ ಎಕ್ಟು ಹುಯು. ನಂಬ್ಯುತೆ ಅದ್ಮಿಖ್ಹಾರಾಮ ಅರಿಯೊಪಾಗ ನ್ಯಾವ್‍ನಿ ಸಭೆವಾಳೊ ದಿಯೊನುಸ್ಯಬಿ, ದಾಮರಿ ಕರಿ ಏಕ್‍ಜ಼ಣಿ ಥಿ, ಇಮ್ಮಸ್ ಅಜೂ಼ಬಿ ಥೋಡುಜ಼ಣು ಥೂ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.