Waghri Booli Bible
2 ಕೊರಿಂಥ 2
ಕತೋಬಿ ಮೇ ಪಾಛೊ಼ಫರಿ ತುಮಾರಕನ ದುಖ್‌ಥಿ ಆಯಿಶ್‌ಕೊಯ್ನಿ ಕರಿ ಮಾರಮ ಖ್ಹೂಜ಼್‌ ಕರೀಲಿದೊ. ಮೇ ತುಮುನ ದುಖ್ ಕರಾಯೋತೊ, ಮನ ಖುಷಿ ಕರಾವವಾಳುಕೋಣ್‍? ಮಾರೇಥಿ ದುಖ್ ಪಡ್ಯಾತೆ ತುಮೆಖಾಯೆ ಶು.
ಅನೇಥಿ ಮೇ ಆ ಚಿಟ್ಟಿನ ಲಿಖ್ಯೋತೆ ಮನ ಖ್ಹುಶಿ ಕರಾವಾಳಸ್ ಮನ ದುಖ್‍ಮ ನಾ ನಾಖಿಲೇವ್ಣು ಕರಿ ಲಾಝು಼ಸ್. ಮಾರಿ ಖ್ಹುಶಿಸ್‍ ತುಮಾರಿ ಖ್ಹುಶೀಕರಿ ತುಮೆ ಲಾಝ಼ಸ್‍ ಕರಿ ಮೇ ವಿಶ್ವಾಸ್ ಕರುಸ್.
ಗಲತ್‌ ಕರವಾಳನ ಕ್ಷಮಾಕರಾನು
ಮೇ ಅಗಾಡಿ ಏಕ್‍ವಖ್ಹತ್‍ ತುಮುನ ಲೀಖಾನಿ ವಖ್ಹ್‌ತೆ, ಮಾರೊ ದಿಲ್‌ ಘಣು ಕಲಾವ್ಣಿ ಹುಯಿರ‍್ಹುಥು, ಬಿಜು಼ ದುಖ್‍ಥಿಥು. ಮೇ ಆಂಝು಼ನಾಕ್‍ತೊ ಹುಯಿನ್ ತುಮುನ ಲೀಖ್ಯೋತೆ, ತುಮುನ ದುಖ್ ಕರಾವ್ಣು ಕರಿ ಕಾಹೆ, ತುಮುನ ಕೆತ್ರೆ ಪ್ಯಾರ್‌ಕರೂಸ್ ಕರಿ ತುಮೆ ಮಾಲುಮ್ ಕರೀಲೆವ್ಣು ಕರಿ ಎತ್ರೇಸ್.
ತುಮಾರಿ ಸಬೇನೊ ಏಕ್‍ಜ಼ಣೊ ದುಖ್ ದಿದೋತೆ, ಮನ ಏಕ್ ಜ಼ಣನ ಕಾಹೆ ಏಕ್ ಕೊಂತೆ ಏಕ್ ಪರಕ್ಮ ಇನೆ ಘಣ ಅದ್ಮಿನ ದುಖ್ ದೀರಾಖ್ಯೊಸ್. ಯೋ ದುಖ್ ಖ್ಹಾರಾಸ್‌ಮ ಹುಯುಕರಿ ಮೇ ಬೋಲುಕೊಯ್ನಿ. ತುಮೆ ಖ್ಹಾರು ಮಳೀನ್‍ ದಿದಾತೆ ನಿಶತಸ್‍ ಬಶ್‌. ಹಮ್ಕೆ ತುಮೆ ಇನ ಮಾಪ್ ಕರಿನ್ ಭಾಲಿದೆವ್ಣು. ಕೊಯ್ನಿಕತೊ ಯೋ ಘಣ ದುಖ್‍ಮ ಡುಬಿಜಾ಼ಶೆ. ಇನಾಖ್ಹಾಜೆ, ತುಮೆ ಇನ ಪ್ಯಾರ್ ಕರೋಸ್ ಕರಿ ಇನ ವತಾಳ್ಣು ಕರಿ ಮೇ ತುಮುನ ಬೋಲಿಲೆವುಸ್. ಖ್ಹಾರೀಸ್‍ ವಾತ್ನಿ ಬಾರೇಮ ತುಮೆ ಮುಡ್‌ಕ್ಯು ಝು಼ಕಾವವಾಳ ಹುಯಿರ‍್ಹಾಸ್ಕಿ ಕೊಯ್ನಿ. ಕಾಯಿತೋಬಿ ತುಮುನ ತರೀಪ್ಷ ಕರಿನ್ ಮಾಲುಮ್ ಕರಿಲ್ಯಾವಾನ ಮೇ ತುಮುನ ಆ ಚಿಟ್ಟಿನ ಲಿಖ್ಯೋತೆ. ತುಮೆ ಕಿನ ಮಾಪ್ ಕರೋಸ್ಕಿ ಮೇಬಿ ಇವ್ಣುನ ಕ್ಷಮಾಪಣ್ ಕರುಸ್. ತುಮಾರ ಖ್ಹಾಜೆಸ್ ಇನ ಕ್ರಿಸ್ತನ ಖ್ಹಾಮ್ಣೆ ಕ್ಷಮಾಪಣ್ ಕರುಸ್. ಅಮ್‍ ಶೈತಾನ್‍ ಅಪ್ಣುನ ಠಗಾವ್ಣುನಾಕರಿ ಅಮ್‌ಕರ‍್ಯೊ. ಶನಕತೊ ಇನಿ ಖರಾಬ್‌ಖ್ಹೂಜ಼್‌ ಅಪ್ಣುನ ಮಾಲುಮ್ ಛಾ಼.
ತ್ರೋವ ಕರಿ ಗಾಮ್ಮ ಪೌಲನಿ ಚಾ಼ಲ್‍ಕುಚ಼್
ಮೇ ಕ್ರಿಸ್ತನಿ ಸುವಾರ್ತೆನ ಬೋಲಾನ ತ್ರೋವ ಖ್ಹಯೇರ‍್ನ ಜಾ಼ವಾನಖ್ಹಾಜೆ ಪ್ರಭುನೆ ಗೋರ್‌ಥಿ ಮನ ಬಾಕಲ್‌ಕಾಡಿನ್ ಅಛ್ಛು಼ ಮಾರಗ್ ವತಾಳ್ಯೊ, ಕತೋಬಿ ಮಾರೊ ಭೈ ಹುಯಿರೋತೆ ತೀತನ ಮೇ ಹಿಜ್ಜಾ಼ ದೇಖ್ಯೊಕೊಂತೆ ಮಾರ ದಿಲ್ನ ಸಮಾಧಾನ್ ಕೋಥೂನಿ. ಇನಖ್ಹಾಜೆ ಮೇ ಇವ್ಣುನ ಧನ್ಯವಾದ್ ಬೋಲಿನ್ ಹಿಜ಼್ಜಾಥೊ ಮೆಕೆದೋನಿಯನ ನಿಕ್‍ಳ್ಯೊ.
ಕ್ರಿಸ್ತಥಿಸ್ ಜೀತ್
ಕತೋಬಿ ಮೇ ದೇವ್ನ ಧನ್ಯವಾದ್ ಕರುಸ್. ಯೋ ಹಮೂನ ಕ್ರಿಸ್ತನಿ ಗಳ್‌ಜೋ಼ಡ್ಮ ಕದೇಬಿ ಜೀತ್‍ನಿ ಜಯಭಣಿ ಚ಼ಲಾವ್ತೊ ಹುಯಿನ್ ಅಜು಼ ಇನಿ ಗ್ಯಾನ್ನಿ ಅಛ್ಛಿ ವಾಖ್ಹ್‌ನ ಅಖ್ಖಿಬಾಜು಼ ಹಮಾರೇಥಿ ಫೈಲಾವವಾಳ ದೇವ್ನ. ರಕ್ಷಣೆನ ಮಾರಗ್‍ಮ ರ‍್ಹವಾಳಮಾಬಿ ಬಿಜು಼ ನಾಶನನ ಮಾರಗ್‍ಮ ರ‍್ಹವಾಳಮಾಬಿ ಹಮೆ ದೇವ್ನ ಖ್ಹಾಮ್ಣೆ ಕ್ರಿಸ್ತಮ ಮಹಿಕವ್‌ ಕರಿಯೇಸ್. ನಾಶನನ ಮಾರಗ್‍ಮ ರ‍್ಹವಾಳ ಅದ್ಮಿವೋನ ಮರಣ್ಣು ವಾಖ್ಹ್‌ಹುಯಿರಾಸ್, ರಕ್ಷಣೆನ ಮಾರಗ್‍ಮ ರ‍್ಹವಾಳ ಅದ್ಮಿನ ಜಿವ್ತುಜಾನ್ನೊ ಮಾರಗ್ ಹುಯಿರ‍್ಹಾಸ್. ಅಮ್‍ರ‍್ಹವಾಪರ್ ಆ ಕಾಮ್‍ಕರ‍್ವಾನ ಕೋಣ್ ಯೋಗ್ಯ ಹುಯಿರುಸ್? ಕೈಏಕ್ ಜ಼ಣು ದೇವ್ನಿವಚನ್ನ ಮಿಲಾವಟ್ ಕರಿ ಬೇಪಾರ್ ಕರಾಸ್. ಹಮೆತೋಬಿ ಇಮ್‌ಕಾಹೆ ದೇವ್‌ಮ ರ‍್ಹೀನ್, ದೇವ್ನಖ್ಹಾಮ್ಣೆ ಕ್ರಿಸ್ತಯೇಸುನಿ ಗಳ್‌ಜೋ಼ಡ್ಮ ಬರೋಬರ್ ಖೀವೂಕಿ ತೀನಸ್ ಹಮೆ ಬೋಧನೆ ಕರೇಸ್.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.