Waghri Booli Bible
1 ತಿಮೊ 3
ಸಬೇಮ ಗಲ್‌ಢಖ್ಹಾರು
ಆ ಬೋಲಾನು ವಿಶ್ವಾಸ್‍ನು ಹುಯಿರುಸ್. ಏಕ್‌ ವಖ್ಹತ್ ಅದ್ಮಿನ ಅಛ್ಛೊ಼ ಘಲ್ಡೊಹೊಣುಕತೊ ಯೋ ಅಛ್ಛು಼ ಕಾಮ್ ಕರಾನ ಹರಖ್ಹ್ ಕರಾಸ್. ಸಬೆನ ಚ಼ಲಾವವಾಳೊ ಗಲ್ತಿ ನಾಕರಾವಾಳೊ ಹುಯಿರ‍್ಹೇಣು. ಇನು ಯೋ ದಾಬುಕ್ಮ ರ‍್ಹವಾಳೊ ಹುಯಿರ‍್ಹೇಣು, ಆತ್ಮಾನ ಖ್ಹಮಾಳಿಲ್ಯವಾಳೊ, ಅಛ್ಛಿ ಚಾ಼ಲ್ ಚ಼ಲಣ್‍ಥಿ ರ‍್ಹವಾಳೊ, ಆವವಾಳಾನ ಸ್ವಾಗತ್‌ಕರವಾಳೊ, ಅಜು಼ ವಚನ್ ಶಿಕಾಡಾಮ ಚಾ಼ತುರ್ ಹುಯಿರ‍್ಹೇಣು. ಯೋ ಪೀನ್ ಲಡೈ ಕರಾವಾಳೊ ನಾ ಹುಯಿರ‍್ಹೇಣು, ನತರ್‌ಕಿ ಮಾರ್‌ತೋಡ್ ಕರಾವಾಳೊಸ್ಕಿ ನಾ ಹುಯಿರ‍್ಹೇಣು, ಕತೋಬಿ ಯೋ ಶೇದೇವ್‌ನಿಘೋಣಿ ಅಜು಼ ಸಮಾಧಾನ್‌ಥಿ ರ‍್ಹೇಣು; ಇನ ಪೈಶಾನಿ ಲಾಲಚ್‌ ನಾ ರ‍್ಹೇಣು. ಯೋ ಇನ ಘರ್‌ವಾಳಾನ ಬರೊಬರ್‌ಥಿ ಚ಼ಲಾವವಾಳೊ ಅಜು಼ ಇನ ಲಡ್ಕಾ ಇನಿ ವಾತೇನ ಖ್ಹಮ್‌ಜಿನ್‌, ಮರ್ಯಾದಿ ದ್ಯವಾನಿಘೊಣಿ ದೇಖಿಲೆವ್ಣು. ಶೊಂತ್ ಘರ್‌ವಾಳಾನಸ್ ಚ಼ಲಾವಾನ ಇನ ನಾ ಹುಯೂತೊ, ದೇವ್ನಿ ಸಬೆನ ಯೋ ಕಿಮ್ ಚ಼ಲಾವ್‌ಷೆ? ಯೋ ನವೇಥಿ ದೇವ್ನ ನಂಬ್ಯೂತೆ ಅದ್ಮಿ ನಾ ಹುಯಿರ‍್ಹೇಣು, ನವೇಥಿ ನಂಬವಾಳಾನ ಸಬೆ ಚ಼ಲಾವಾನು ಕಾಮ್ ದಿದಾತೊ, ಇನಾಮ ಹಂಕಾರ್ ಐನ್, ಶೈತಾನ್ನ ಹುಯೂತೆ ಇಮ್ನಿ ದಂಡನೆ ಇನಾಬಿ ಹುಯಿಜಾ಼ಶೆ. ಎತ್ರೇಸ್ ಕಾಹೆತೆ, ಯೋ ಭಾರ್‌ಲ್ಯ ಅದ್ಮಿಥಿ ಆಛ್ಛೊ಼ ಕರಿ ಬೊಲೈಲ್ಯವಾಳೊ ಹುಯಿರ‍್ಹೇಣು, ಇಮ್‌ ನಾ ರ‍್ಹಯೋತೊ ಅದ್ಮಿಖ್ಹಾರು ಇನಾಪರ್ ಗಲತ್‌ ಲಗಾಡಿ ದಿಶೆ ಅಜು಼ ಯೋ ಶೈತಾನ್ನ ಚ಼ಪ್ಪಣ್‌ಮ ಖ್ಹಪ್‌ಡಿಜಾ಼ಶೆ.
ಸಬೆನ ಮದತ್ ಕರಾವಾಳು
ಇಮ್ಮಸ್ ಸಬೇಮ ಸೇವಕ್‌ರಾವಾಳೂಬಿ ಮರ್ಯಾದಿ ಲೀಲ್ಯಾವನ ಯೋಗ್ಯ ಹುಯಿರ‍್ಹೇಣು. ಅಜು಼ ಇವ್ಣೆ ಬೇಜೀಬ್‌ವಾಳು. ಇವ್ಣೆ ಪಿಯಾವಾಳುಸ್ಕಿ ಅಜು಼ ಪೈಶಾನಿ ಲಾಲಚ್‌ಮ ನಾ ರ‍್ಹೇಣು. ವಿಶ್ವಾಸ್‌ನಿ ಗಧಾರ‍್ನ ಖ್ಹಾಚಿನ ಅಛ್ಛಿ ದಿಲ್ನಿಸಾಕ್ಷಿನ ಧರಿರಾಖವಾಳ ಹುಯಿರ‍್ಹೇಣು. ಪಹಿಲೆ ಇವ್ಣುನ ತರೀಪ್‌ಶ ಕರಿಲೇವ್ಣು, ಕೋಣ್‌ಬಿ ಇವ್ಣಾಪರ್ ಗಲತ್‌ ನಾಲಗಾಡ್ಯೂತೊ, ಇವ್ಣೆ ಸಬೇಮ ಸೇವಕ್ ಹುಯಿನ್ ಕಾಮ್ ಕರೆಜಾ಼ಯ್. ಇಮ್ಮಸ್ ಇವ್ಣಿ ಬಾವಣ್‌ಬಿ ಚಾ಼ಲ್‌ಚ಼ಲಣ್‍ಮ ಅಛ್ಛಿ ರ‍್ಹಹವಾಳಿಯೆ ಹುಯಿರ‍್ಹೇಣು ಅಜು಼ ಚ಼ಹಾಡ್ ಬೋಲವಾಳಿಯೆ ನಾ ಹುಯಿರ‍್ಹೇಣು; ಅಛ್ಛೇಥಿ ಚಾ಼ಲ್‌ವಾಳಿ ಹುಯಿರ‍್ಹೇಣು ಅಜು಼ ಇವ್ಣೆ ಹರೇಕ್‌ಮ ವಿಶ್ವಾಸ್‌ವಾಳಿಬಿ ಹುಯಿರ‍್ಹೇಣು. ಸಬೇಮ ಸೇವೆ ಕರಾವಾಳೊ ಏಕ್‌ ಬಾವಣ್‌ವಾಳೊ ಹುಯಿರ‍್ಹೇಣು, ಇನ ಲಡ್ಕಾನ ಅಜು಼ ಘರ್‌ವಾಳಾನ ಬರೊಬರ್‌ಥಿ ಚ಼ಲಾವವಾಳೊ ಹುಯಿರ‍್ಹೇಣು. ಸಬೇಮ ಅಛ್ಛಿನಿತರ ಸೇವೆ ಕರಾವಾಳು ಸೇವಕರ್‌ನ ಘಣು ಮರ್ಯಾದಿ ಮಳಾಸ್, ಅನೇಥಿ ಇವ್ಣೆ ಕ್ರಿಸ್ತ ಯೇಸುಪರ್ ರಾಖಿಮ್ಹೆಲಾನು ವಿಶ್ವಾಸ್‌ನ ಘಣು ಭಾಲಿಥಿ ಬೋಲವಾಳು ಹುಯಿರ‍್ಹೇಸ್.
ಮೋಟಿ ಗಪ್ಲತ್
ಮೇ ಭರೋಖ್ಹಾಥಿ ಆ ಚಿಟ್ಟಿ ಲೀಖುಕರುಸ್ ಒಗ್ಗಿಸ್‌ಮ ತಾರಕನ ಆವಾಳೊ ಛು಼. ಕತೋಬಿ ಏಕ್‌ಬಾರ್ ಮನ ಆವಾನ ಧೇರ್ ಹುಯುತೋಬಿ, ಆ ಚಿಟ್ಟಿ ಮನ ಖ್ಹಮ್‍ಜಾ಼ಡಸ್ತೆ ತಿಮ್ ದೇವ್ನ ಘರ್‌ಮ ಯೊ ಜಿವ್ತೊ ದೇವ್ನಿ ಸಬೆಮ ಚಾ಼ಲಿಲೇವ್ಣುತೆ ಪರಕ್ ಕಿಮ್‌ರ‍್ಹೇಣು, ಯೋ ಸಬೆ ಖ್ಹಾಚಿನು ಹದಿಪಾಯ ಅಜು಼ ಆಧಾರ್‌ನು ಖಂಬು ಹುಯಿರ‍್ಹೂಸ್. ಅಪ್ಣ ದೇವ್‌ಮ ಭಕ್ತಿನು ಜಿವ್ಣನು ಖ್ಹಾಚಿ ಗಪ್ಲತ್ ಗುಮಾನಿಕೊಂತೆ ಘಣಿ ಮೋಟಿ ಹುಯಿರ‍್ಹೀಸ್, ಕ್ರಿಸ್ತನೆ ಅದ್ಮಿನಿ ರೂಪ್‌ಮ ಅಪ್ಣುನ ದೆಖಾಯೊ, ಯೋಸ್ ಪವಿತ್ರಾತ್ಮನ ವತಾಳ್ಯೊ, ಸೊರ್ಗಾನ ದೂತರ್‌ಥಿ ದೆಖೈಗು. ಅಲ್ಹಾವ್‌ಅದ್ಮಿವೋನಿ ಬೀಚ್ಮ ಯೊ ಬೋಲಿವತಾಳೈಗೊ, ಜಗತ್‌ ಇನಾಪರ್ ವಿಶ್ವಾಸ್ ಕರ‍್ಯು, ಅಜು಼ ಇನ ಮಹಿಮೆಥಿ ಸೊರ್ಗಾಮ ಪಡೈಗೊ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.