Waghri Booli Bible
1 ಪೇತ್ರ 3
ಬಾವಣ್‍ ಅಜು಼ ಬಾವ್ರಿ
ಇಮ್ನಿಸ್ ಪರಕ್ಮ ಬಾವ್ಣೆವೊ, ತುಮಾರ ಬಾವ್ರಿನಿ ದಾಬುಕ್ಮ ರ‍್ಹವೊ. ಇವ್ಣಾಮ ಥೋಡುಜ಼ಣು ದೇವ್ನಿ ವಚನ್ನ ಅವಿಧೇಯ ಹುಯಿರೂತೋಬಿ, ತುಮಾರ ಅಛ಼್ಛ ಕಾಮ್ನ ದೇಖಾಥೀಸ್ ಇವ್ಣೆ ವಿಶ್ವಾಸ್‌ಮ ಆವಾನಿತರ ಉಶೆ. ಇನಾಖ್ಹಾಜೆ ತುಮೆ ಏಕ್‌ ವಾತ್‍ಬಿ ಬೋಲ್ನುನಾತೆ ರ‍್ಹವಾನು ಜ಼ರೂರತ್ ಛಾ಼. ಶನಕತೊ ಇವ್ಣೆ ತುಮಾರಿ ಪರಿಶುದ್ ಅಜು಼ ಇಜ಼್ಜತ್‌ನಿ ಚಾ಼ಲ್‌ಥೀಸ್ ಅಛ್ಛಿವಾಟ್‍ಪರ್ ಆವ್‌ಶೆ. ಚೋ಼ಟಿ ಗೂಥಿಲ್ಯಾವಾನೂಬಿ ಖ್ಹೊನ್ನುಖ್ಹರಪ್‍ಬಿ ಅಜು಼ ಅಛ಼್ಛು ಲುಂಗ್‌ಡು ಫೇರಾನುಬಿ ಆ ಅಖ್ಖು ಭಾರ್‌ಲ್ಯು ಶನ್‍ಗಾರ್‌ಸ್ ಯೋ ತುಮಾರು ಪೇರ್‌ವಾಖ್ಹ್ ನಾ ಹುಯಿರ‍್ಹೇಣು ಎತ್ರೇಸ್. ಕತೋಬಿ ಅನಬದಲ್ ದೇವ್ನ ಡೋಳಾಮ ಘಣ ಮೋಲ್ನುಬಿ ಅಜು಼ ಕದೇಬಿ ರ‍್ಹವಾನುಬಿ ಹುಯಿರ‍್ಹುತೆ ಶೇದೇವ್‍ಬಿ ಶಾಂತಿನೊ ಮನ್ ತುಮಾರ ಮಹಿನ ದಿಲ್‌ನು ಶನ್‌ಗಾರ್ ಹುಯಿರ‍್ಹವಾದೆ. ಫಾಚ಼್‌ಲ್ಯಾ ಹಗಾಮ್ಮ ದೇವ್‌ಪರ್‌ ಭರೋಖ್ಹೊ ರಾಖಿಮ್ಹೆಲ್ಯುಥುತೆ ಭಕ್ತೆ ಹುಯಿರ‍್ಹಿಥಿತೆ ತಯೇಡಖ್ಹಾರು ಜಿನು ಅಮ್ಮಸ್ ಇವ್ಣು ಇವ್ಣೇಸ್ ಬಾವ್ರಿಯೇವ್‍ನಿ ದಾಬುಕ್ಮ ರ‍್ಹೀನ್ ಶನ್‌ಗಾರ್ ಕರಿಲಿದಿಯೆಥಿ. ಸಾರ ಅಬ್ರಹಾಮ್‌ನ ವಿಧೇಯ ಹುಯಿರ‍್ಹಿನ್ ಇನ ಯಜಮಾನ್‍ಕರಿ ಬೋಲಿ. ತುಮೆ ಅಛ್ಛು಼ಕರಾವಾಳಿ ಹುಯಿರ‍್ಹಿನ್ ಶನಿ ಡರ್‌ ಝ಼ಪಕ್ಣಿಮ ನಾಪಡವಳಿ ರ‍್ಹೀಯೆತೊ ತುಮೆ ಸಾರನಿ ಛೋ಼ರಿಯೇ ಹುಯಿರ‍್ಹಿಶು, ಅಮ್ನಿಸ್ ಪರಕ್ಮ ಬಾವ್ರಿವೊ, ತಯೇಡ ತುಮಾರೇಥೀಬಿ ಕಮ್‌ಜೋ಼ರಿಕರಿ ಮಾಲುಮ್‌ಕರಿನ್, ತುಮೆ ತುಮಾರಿ ಬಾವ್ಣೆನ ಜೋ಼ಡ್ಮ ಅಛ್ಛು಼ ಅಕ್ಕಲ್‍ಥಿ ಚಾ಼ಲಿಲೇವೊ, ಇವ್ಣೆ ಹಮೇಶಾನಿ ಜಿ಼ಂದ್‌ಗೀನಿ ವರಾನ ತುಮಾರಿ ಜೋ಼ಡ್ಮಾಸ್ ಲಿಶೆಕರಿ ಮಾಲುಮ್ ಕರಿಲೀನ್ ಇವ್ಣುನ ಮರ್ಯಾದಿಕರೊ. ಅಮ್ ಕರ‍್ಯತೊ ತುಮಾರಿ ಪ್ರಾರ್ಥನೆನ ಅಡ್ಡಿ ಉಶೆಕೊಯ್ನಿ.
ಅಛ್ಛಾ಼ನಖ್ಹಾಜೆ ಲ್ಯಾವನಿಖ್ಹತಾಪ್ಣಿ
ಇನಖ್ಹಾಜೆ ತುಮೆಖ್ಹಾರು ಏಕ್‌ ದಿಲ್‌ವಾಳ ಹುಯಿರ‍್ಹಿನ್ ಆರ್‌ಗೋರ್‌ ಕರಾವಾಳ ಹುಯಿನ್ ಜಿವೊ; ಏಕ್‌ಥಿ ಏಕ್‌ ಮಾಲುಮ್ ಕರಿಲ್ಯಾವಾನ ಕೊಶೀಷ್ ಕರೊ. ಏಕ್‌ಥಿ ಏಕ್‌ ಭೈಯೆ ಭೇನೆನಿತರ ಪ್ಯಾರ್‌ಕರೊ. ಅಜು಼ ಗೋರ್‌ ಕರವಾಳು ಶೇದೇವ್‍ಬಿ ಹುಯಿರ‍್ಹೇವೊ. ಖರಾಬ್‌ನ ಖರಾಬ್, ಚಾ಼ವ್‍ಣ್ಯನ ಚಾ಼ವ್ಣ್ಯ ನಾಕರ‍್ನುತೆ ಆಶೀರ್ವಾದ್‌ ಕರೊ ಅನಖ್ಹಾಜೆಸ್ ದೇವ್ನೆ ತುಮುನ ಬುಲೈರಾಖ್ಯೋಸ್ನಿ. ಅಮ್ ಕರಾವಾಳ ಹುಯಿರ‍್ಹಾತೊ ತುಮೆ ಆಶೀರ್ವಾದ್‌ನ ಹಕ್‌ಥಿ ಲೀಲಿಶು. ಶನಕತೊ ಪವಿತ್ರ ದಪ್ತರ್ ಶಾತ್ ಬೊಲಸ್‍ಕತೊ, “ಆ ಜಾನ್ನ ಪ್ಯಾರ್ ಕರ್ತೊಹುಯಿನ್ ಅಛ್ಛದನ್ನ ದೇಖಾನ ಆಖ್ಹ್ ಕರಾವಾಳೊ ಖರಾಬ್ ವಾತ್ ನಕೊ ಬೋಲಾದೆ ಝೂ಼ಟಿ ನಕೊ ಬೋಲಾದೆ. ಇವ್ಣೆ ಯೊ ಖರಾಬ್‌ನ ಮ್ಹೇಲಿನ್ ಅಛ್ಛಾ಼ನ ಕರಾದೆ ಸಮಾಧಾನ್ನ ಢೂಂಡಿನ್ ಇನಾಖ್ಹಾಜೆ ಕೋಶಿಶ್ ಕರಾದೆ. ಶನಕತೊ ನೀತಿವಾಳಪರ್ ಪ್ರಭುನಿ ನಿಘ್ಯ ಛಾ಼. ಅಜು಼ ಯೊ ಇವ್ಣಿ ಬಿಂತಿನ ಕಾನ್‍ದೇಸ್. ಕತೋಬಿ ಖರಾಬ್ ಕರವಾಳನ ಪ್ರಭು ಮ್ಹೋಡು ಫರೈಲೇಸ್. ತುಮೆ ಕದೇಬಿ ಅಛ಼್ಛುಕರಾನ ದಿಲ್‌ಲಗಾಡವಾಳು ಹುಯಿರ‍್ಹಾತೊ ತುಮುನ ಕೇಡ್ ಕರಾವಾಳು ಕೋಣ್‍ರ‍್ಹಿಶೆ? ಏಕ್‌ ವಖ್ಹತ್ ತುಮೆ ನೀತಿನ ಖ್ಹಾಜೆಸ್ ಖ್ಹತಾಪ್ಣಿ ಪಡ್ಯಾತೊ ತುಮೆ ಧನ್ಯ ಹುಯಿರ‍್ಹಾಸ್. ಖಿವಿ ಧಮ್ಕಿನ ತುಮೆ ಡರೊನಕೊ, ಅಜು಼ ವೇಚ಼್‌ಣೆ ನಕೊಕರೊ. ಕತೋಬಿ ಕ್ರಿಸ್ತನ ಪ್ರಭುಕರಿ ತುಮಾರ ದಿಲ್ಮ ಜ಼ತನ್‌ಕರೊ. ತುಮಾರಮ ಛಾ಼ತೆ ಭರೋಖ್ಹಾನ ಆಧಾರಶಾತ್‍ಕರಿ ತುಮುನ ಪುಛಾ಼ವವಾಳ ಹರೇಕ್ ಜ಼ಣಾನ ಜ಼ವಾಬ್‍ದ್ಯವಾನ ಕದೇಬಿ ತಯಾರ್ ರ‍್ಹವೊ. ಕತೋಬಿ ಅನ ಶೇದೇವ್ ಹುಯಿರ‍್ಹಿನ್ ಮರ್ಯಾದಿಥಿ ಬೋಲೊ. ಅಜು಼ ಅಛ಼್ಛು ದಿಲ್‌ನಿಸಾಕ್ಷಿವಾಳ ಹುಯಿ‍ರ‍್ಹೆವೊ. ತದೆ ತುಮೆ ಖರಾಬ್‌ನ ಕರಾವಾಳಕರಿ ತುಮಾರಿ ಬಾರೇಮ ಖರಾಬ್ ವಾತೆ ಬೋಲಿನ್ ಕ್ರಿಸ್ತಮಛಾ಼ತೆ ತುಮಾರಿ ಅಛ್ಛಿ಼ಚಾ಼ಲ್‍ನಿ ಬಾರೇಮ ಖರಾಬ್‍ವಾತ್‍ ಬೋಲಾವಾಳು ತುಮುನ ಚಾ಼ವ್ಣ್ಯ ಕಾಡಾನ ಖ್ಹರ್‌ಮೈಜಾ಼ಶೆ. ಖರಾಬ್ ಕಾಮ್ ಕರಾಥೀಬಿ ದೇವ್ನಿ ಮರ್ಜಿನಿ ಘೋಣಿ ಅಛ಼್ಛಚಾ಼ಲ್ ಚಾ಼ಲವಾಳ ಹುಯಿರ‍್ಹಿನ್, ಖ್ಹತಾಪ್ಣಿ ಪಡಾನುಸ್ ಅಛ್ಛು಼. ಕ್ರಿಸ್ತಬಿ ನೀತಿವಾಳೊ ಹುಯಿರ‍್ಹಿನ್, ಅನೀತಿವಾಳಾನ ಖ್ಹಾಜೆ ಜಾನ್‍ದೀನ್ ಅಪ್ಣುನ ದೇವ್‌ಕನ ಮಳಾವನಖ್ಹಾಜೆ ಎಕ್ಕಸ್ ವಖ್ಹತ್ ಪಾಪ್ನ ಮಟಾವನಖ್ಹಾಜೆ ಖ್ಹತಾಪ್ಣಿ ಪಡೀನ್ ಶರೀರ್‌ಮರ‍್ಹೀನ್ ಆತ್ಮಮ ಜಿವವಾಳೊ ಹುಯೊ. ಆನಾಹುಯಿನ್ ಯೋ ಆತ್ಮನೊ ರೂಪ್‍ಲೀನ್ ಜೇಲ್‌ಮಥೂತೆ ಅಖ್ಖಾಆತ್ಮಕನ ಜೈ಼ನ್ ಸುವಾರ್ತೆನ ಬೋಲಿ ಖ್ಹಮ್‌ಜಾ಼ಡ್ಯೊ. ಕತೊ ಅಗ್‍ಲ್ಯ ಹಗಾಮ್ಮ ನೋಹ ಜ಼ಹಾಜ಼್‌ ಭಾಂದಾನಿ ವಖ್ಹತ್‌ಮ ದೇವ್ ದೀರ್ಘಶಾಂತಿಥಿ ಟಿವೈರ‍್ಹವಾನಿ ವಖ್ಹತ್‌ಮ ಇವ್ಣೆ ಇನ ಅವಿಧೇಯ ಹುಯಿರ‍್ಹುಥು. ಯೋ ಜ಼ಹಾಜ಼್‍ಮ ಥೂತೆ ಆಟ್ ಅದ್ಮಿ ಖಲಿ ಪಾಣಿಮಾಥು ಬಚ್ಯು. ಯೋ ಹಮ್ಕೆ ತುಮುನ ಬಚಾ಼ಡನು ಬ್ಯಾಪ್ತಿಸ್ಮನು ಏಕ್‌ ರೂಪ್ ಹುಯಿರ‍್ಹುಸ್. ಆ ಖಲಿ ಶರೀರ್‌ನು ಮೇಲೊ ಧೊವಾಕೊಯ್ನಿ. ಕತೋಬಿ ಆ ಅಛ಼್ಛು ದಿಲ್ನಿಸಾಕ್ಷಿಥಿ ದೇವ್ನಿ ಜೋ಼ಡ್ಮಕರಾನಿ ವಾಗ್ದಾನ್‌ ಹುಯಿರ‍್ಹೀಸ್. ಅಜು಼ ಯೇಸುಕ್ರಿಸ್ತ ಪಾಛು಼ಜಿವ್ತು ಉಠಾಥಿಸ್ ಹಮ್ಕೆ ಆ ಅಪ್ಣುನ ರಕ್ಷಣೆದಿಶೆ. ಹಮ್ಕೆ ಯೇಸು ಪರ್‌ಲೋಕ್ನ ಜೈ಼ನ್ ದೇವ್ನ ಖಾವಿಬಾಜು಼ಮ ಬೇಠೋಸ್. ಖ್ಹಾರುಸ್ ದೇವ್‌ದೂತರ್‌ಬಿ ಪರಲೋಕ್ನು ಅದಿಕಾರಿಖ್ಹಾರು ಅಜು಼ ಶಕತ್‍ಖ್ಹಾರನ ಉಪ್ಪರ್ ಯೊ ರಾಜ಼್‌ಭಾರ್ ಚ಼ಲವ್‍ಕರಸ್.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.