Waghri Booli Bible
1 ಕೊರಿಂಥ 12
ಪವಿತ್ರಾತ್ಮನು ವರ
ಭೇನೆ ಭೈಯೇವೊ, ಹಮ್ಕೆ ಪವಿತ್ರಾತ್ಮಥಿ ಮಳಾತೆ ವರಾನಿಬಾರೇಮ ತುಮೆ ಬಿಣ್‍ಖ್ಹೈಲಿ ನಾ ಹುಯಿರ‍್ಹೇಣು. ಕರಿ ಆಖ್ಹ್ ಕರುಸ್. ತುಮೆ ಅಲ್ಹಾವ್‌ ಅದ್ಮಿ ರ‍್ಹವಾನಿ ವಖ್ಹ್‌ತೆ ವಾಟ್‌ ಭೈಕಿನ್ ಕಿಮ್ ಮುಕ್ಕ ಮೂರತ್‍ಭಣಿ ಫರಿರಾಥ ಕರಿ ತುಮೆ ಮಾಲುಮ್ ಕರಿರಾಖ್ಯಸ್. ಅಮ್‍ಛಾ಼ತೆ ಇನಖ್ಹಾಜೆ ಮೇ ತುಮೂನ ಖ್ಹಮ್‌ಜಾ಼ಡ್ಯುತೆ ಯೊ ಖ್ಹಮ್‍ಜೊ಼. ದೇವ್ನ ಆತ್ಮಥಿ ವಾತ್ ಬೋಲವಾಳೊ ಕೋಣ್‌ಬಿ, “ಯೇಸು ಶಾಪವಾಳೊ” ಕರಿ ಬೋಲಕೊಯ್ನಿ. ಪವಿತ್ರಾತ್ಮನಿ ಖ್ಹೂಜ಼್‌ಥೀಸ್ ಪಣ್ಕಿ ಕೋಣ್‌ಬಿ “ಯೇಸುಸ್ ಪ್ರಭು” ಕರಿ ಬೋಲಾನ ಹೋಯಿಕೊಯ್ನಿ. ಅಖ್ಖಆತ್ಮಾನು ವರಾಮ ಅಲಕ್ ಅಲಕ್ ತರ ಛಾ಼. ಕತೋಬಿ ಇನ ದ್ಯವಾಳೊ ಪವಿತ್ರಾತ್ಮ ಎಕ್ಕಸ್‍ಜ಼ಣೊ. ಅಖ್ಖಿ ಸೇವೆಮ ಕೈಯೇಕ್ ತರ ಛಾ಼. ಕತೋಬಿ ಎಕ್ಕಸ್ ಜ಼ಣೊ ಪ್ರಭುನ ಸೇವೆ ಕರಿಯೇಸ್. ಅಖ್ಖಕಾಮ್ನಿ ಪರಕ್ಮ ಅಲಕ್ ಅಲಕ್ ತರ ಛಾ಼ ಖ್ಹಾರಾಸ್‌ಮ ಅಖ್ಖಾಸ್ ಕಾಮ್ನ ಕರಾನ ಶಕತ್ ದ್ಯವಾಳೊ ದೇವ್ ಎಕ್ಕಸ್‍ಜ಼ಣೊ. ಹರೇಕ್ ಜ಼ಣಾನ ನಫ್ಫಾನಖ್ಹಾಜೆ ಪವಿತ್ರಾತ್ಮನು ದರ್ಶನ ಹರೇಕ್ ಜ಼ಣಾನ ದೆವೈರ‍್ಹೂಸ್. ಕಿಮ್‌ಕತೊ,ಪವಿತ್ರಾತ್ಮ ಏಕ್ಜ಼ಣಾನ ಗ್ಯಾನ್‌ಥಿ ಭರೈರ‍್ಹಾವನಿ ಸಂದೇಶ್‌ಬಿ ಬಿಜೇಕ್ ಜ಼ಣಾನ ಅಕ್ಕಲ್‍ಥಿ ಭರೈರ‍್ಹಾವನಿ ಸಂದೇಶ್‌ಬಿ ದೇಸ್. ಏಕ್ಜ಼ಣಾನ ವಿಶ್ವಾಸ್‍ಥಿ ಯೋಸ್ ಆತ್ಮಾನು ವರ ಹುಯಿರ‍್ಹುಸ್, ಬಿಜೇಕ್‍ಜ಼ಣಾನ ರೋಗ್ ಅಛ್ಛು಼ ಕರಾನು ಯೋಸ್ ಆತ್ಮಾಥಿ ದೆವೈರ‍್ಹೂಸ್. ಏಕ್ಜ಼ಣಾನ ಅದ್ಭುತ್ ಕಾಮ್‌ಕರಾನಿ ಶಕತ್‍ನಾಬಿ ಅಜೇಕ್ ಜ಼ಣಾನ ಪ್ರವಾದನೆನಾಬಿ, ಏಕ್ಜ಼ಣಾನ ಆತ್ಮಾನ ಸೋಚ್‌ಸಮಜ್‌ಕರಾನಿ ವರಾಬಿ, ಬಿಜೇಕ್‍ಜ಼ಣಾನ ಹರೇಕ್ ತರೀಖಾನಿ ಬೋಲಿ ಬೋಲಾನಿ ವರಾಬಿ, ಏಕ್ಜ಼ಣಾನ ಬೋಲಿನಿ ಮತಲಬ್ನ ಛೋ಼ಡಿನ್ ಬೋಲಾನಿ ವರಾಬಿ ದೇವಾವ್‌ಶೆ. ಕತೋಬಿ ಆ ಖ್ಹಾರೀಸ್‍ ವರಾನ ಎಕ್ಕಸ್‍ಜ಼ಣೊ ಆತ್ಮ ಇನಿಖ್ಹೂಜ಼್‍ನಿಘೊಣಿ ಅಲಕ್ ಅಲಕ್ ಜ಼ಣಾನ ಭಾಗ್‌ ಪಾಡಿದೇಸ್.
ಕೈಯೆಕ್ಕಿ ಭಾಗ್‌ನಿ ಜೋ಼ಡ್ಮ ಎಕ್ಕಸ್ ಶರೀರ್
ಕ್ರಿಸ್ತ ಕೈಯೇಕ್ ಭಾಗ್‌ ಬಣ್ಯೊಹುಯೊ ಎಕ್ಕಸ್ ಶರೀರ್ ಹುಯಿರ‍್ಹೋಸ್. ಇಮ್ಮಸ್ ಶರೀರ್‌ನು ಬಾಗ್‍ಅಖ್ಖು ಕೈಏಕ್ ರ‍್ಹೀನ್ ಎಕ್ಕಸ್ ಶರೀರ್ ಹುಯಿರ‍್ಹುಸ್ತೆ ಇಮ್ಮಸ್ ಕ್ರಿಸ್ತಬಿ ಹುಯಿರೋಸ್. ಅಮ್ಮಸ್ ಯೆಹೂದ್ಯರ್ ರ‍್ಹವೊ,ಯೆಹೂದ್ಯಕಾಹೇತೆ ರ‍್ಹವೊ ಗುಲಾಮ್ ರ‍್ಹವೊ ಛುಟ್ಕಾರ್ ರ‍್ಹವಾಳು ರ‍್ಹವೊ ಅಪ್ಣೆಖ್ಹಾರು ಎಕ್ಕಸ್‍ಜ಼ಣೊ ಆತ್ಮಥಿ ಎಕ್ಕಸ್ ಶರೀರ್‌ನ ಮಹಿ ಬ್ಯಾಪ್ತಿಸ್ಮ ಲೀಲಿದ. ಅಪ್ಣಖ್ಹಾರಾನ ಎಕ್ಕಸ್‍ಜ಼ಣೊ ಪವಿತ್ರಾತ್ಮನ ಪಿಯಾನ ದೆವಾಯು. ಏಕ್ ಶರೀರ್ ಎಕ್ಕಸ್ ಭಾಗ್‌ವಾಳು ಕಾಹೆ, ಕೈಏಕ್ ಭಾಗ್‌ವಾಳು ಹುಯಿರ‍್ಹೇಸ್. ಗೋಡೊ” ಮೇ ಹಾತ್‍ಕೊಂತೆ ಟೇಕೆ ಶರೀರ್‌ನ ಮಳ್ಯುಕೊಯ್ನಿಕರಿ ಬೋಲೆಜಾ಼ಯ್, ಕತೋಬಿ ಅಮ್ ಖಲಿ ಬೋಲ್ಯುತೆ ಗೋಡೊ ಶರೀರ್‌ಥಿ ಅಲಕ್ ಹುಯಿಗುಕೊಯ್ನಿ. ಅಜು಼ ಕಾನ್‌, “ಮೇ ಡೋಳೊ ಕಾಹೆ ಇನಖ್ಹಾಜೆ ಶರೀರ್‌ಮ ಮಳ್ಯೊಕೊಯ್ನಿ” ಕರಿ ಬೋಲ್ಯುತೋಬಿ ಯೋ ಶರೀರ್‌ಮ ಮಳ್‍ಶೆಕೊಂತೆ ರ‍್ಹಿಶೆಕಿಶು? ಶರೀರ್ ಅಖ್ಖು ಡೋಳೊಹುಯಿಗುತೊ ಅಪ್ಣೆ ಖ್ಹಮ್‍ಜಾ಼ನು ಕಿಮ್? ನತರ್ ಯೋ ಅಖ್ಖು ಕಾನ್‌ ಹುಯಿಗುತೊ ಖ್ಹುಂಗಾನು ಕಿಮ್? ಇನಖ್ಹಾಜೆ ಶರೀರ್‌ನ ಅಖ್ಖಭಾಗ್‍ನ ದೇವ್ ಯೋ ಇನು ಮರ್ಜಿನಿ ಪರಕ್ಮ ಹರೇಕ್‍ಜಿನು ಬರೋಬರ್‌ಥಿ ಬಣೈರಾಖ್ಯೊಸ್. ಯೋ ಖ್ಹಾರೂಸ್ ಎಕ್ಕಸ್ ಭಾಗ್‌ ಹುಯಿರ‍್ಹುತೊ ಶರೀರ್ ಕಿಜ್ಜಾ಼ ರ‍್ಹಿಶೆ? ಕತೋಬಿ ಹಮ್ಕೆ ಭಾಗ್‌ ಕೈಏಕ್ ರ‍್ಹಯುತೋಬಿ ಶರೀರ್ ಖಲಿ ಎಕ್ಕಸ್. ಡೋಳೊ ಹಾತ್ನ, “ತೂ ಮನ ಜ಼ರೂರತ್ ಕೊಯ್ನಿ” ಕರಿ ರ‍್ಹವೊ ಬೋಲಾನ ಹೋಯಿಕೊಯ್ನಿ. ಮುಡ್‌ಕ್ಯು ಪಂಜಾ಼ನ ಜ಼ರೂರತ್ ಕೊಯ್ನಿಕರಿ ಬೋಲಾನ ಕೊಹೊಯ್ನಿ. ಕತೋಬಿ ಶರೀರ್‌ಮ ಕಮ್‍ಜೋ಼ರಿನು ಕರಿ ದೆಖಾವತೆ ಭಾಗ್‌ ಅಖ್ಖು ಕೆತ್ರೂಕಿ ಜಾ಼ಖ್ಹತ್ ಜ಼ರೂರತ್ ಛಾ಼. ಕಮ್ ಮರ್ಯಾದಿ ಕರಾವಾಳು ಕರಿ ಸೋಚಿಯೇಸ್‍ತೆ ಖ್ಹಾರನ ವಿಶೇಷ್ ಮರ್ಯಾದಿಥಿ ದೇಖೆಸ್. ಖೆವ ಶರೀರ್‌ನ ಭಾಗ್ನ ಅಖ್ಖಾನ ಕಡ್‌ತೇಲ್‌ಕಿ ಯೊ ಭಾಗ್ನ ದೇವ್ ವಿಶೇಷ್ ಮರ್ಯಾದಿ ದೇಸ್. ಘಣು ಶನ್‌ಗಾರ್ ರ‍್ಹವಾನ ಶರೀರ್‌ನ ಭಾಗ್ನ ಅಮ್ನು ವಿಶೇಷ್ ಖ್ಹದರ್‌ಕರಾನಿ ಜ಼ರೂರತ್ ಕೊಯ್ನಿ. ಕತೋಬಿ ಖಿವು ಭಾಗ್‌ ಕೀಳ್‌ ಥೂಕಿ ವಿಶೇಷ್ ಮರ್ಯಾದಿ ದೇವ್ನೆ ದಿದೊ. ಶರೀರ್‌ಮ ಅಲಕ್ ಕರಿ ಕಚ಼್‌ಕೊಂತೆ ಅಖ್ಖು ಏಕ್‌ಥಿ ಏಕ್ ಮಳಿನ್ ಜಾ಼ವಾನಿತರ ಕರಿರಾಖ್ಯೊಸ್. ಶರೀರ್‌ನು ಏಕ್ ಭಾಗ್ನ ಅಜ಼ಹುಯಿತೊ ಅಖ್ಖಾಸ್ ಭಾಗ್ನಾಬಿ ಅಜ಼ ಹುವಾಸ್; ಏಕ್ ಭಾಗ್ನ ಖ್ಹರಾವ್ಣಿ ಮಳ್ಯುತೊ ಅಖ್ಖಾಸ್ ಭಾಗ್ನಾಬಿ ಖುಷಿ ಹುವಾಸ್. ಹಮ್ಕೆ ತುಮೆ ಕ್ರಿಸ್ತನು ಶರೀರ್ ಹುಯಿರಾಸ್. ತುಮಾರಮ ಹರೇಕ್ ಜ಼ಣುಬಿ ಯೋ ಶರೀರ್‌ನು ಭಾಗ್‍ಅಖ್ಖು ಹುಯಿರಾಸ್. ದೇವ್ ಇನಿ ಸಬೆಮ ಪಹಿಲೆ ಅಪೊಸ್ತಲರ‍್ನ, ಬೇನು ಪ್ರವಾದಿಖ್ಹಾರನ, ತೀನ್ನು ಸಂದೇಶ್ ಶಿಕಾಡವಳನ ಮಿಛಾ಼ಣ್ಯೋಸ್. ಪಾಛ಼ಳ್‍ಥು ಅದ್ಭುತ್ ಕಾಮ್ನ ಕರಾವಾಳನ, ರೋಗ್ ಅಖ್ಖು ಅಛ್ಛು಼ ಕರವಾಳನ, ಅಲಕ್‌ನ ಮದತ್ ಕರವಾಳನ,ವಾಟ್‌ವತಾಳವಾಳನ, ಥರಥರಾನಿ ಬೋಲಿ ಬೋಲಾನಿ ವರಾನ ದೀರಾಖ್ಯೊಸ್. ಅಖ್ಖೂಸ್‌ಜ಼ಣು ಅಪೊಸ್ತಲರ್‌ಕಿ ಶು? ಅಖ್ಖೂಸ್ ಪ್ರವಾದಿಕಿ ಶು? ಅಖ್ಖೂಸ್ ಅದ್ಭುತ್‌ಕಾಮ್‌ ಕರಾವಾಳುಕಿ ಶು? ರೋಗ್ನ ಅಛ಼್ಛುಕರಾನಿ ವರ ಅಖ್ಖಾನಾಬಿ ಛಾ಼ಕಿಶು? ಥರಥರಾನಿ ಬೋಲಿ ಬೋಲವಾಳುಕಿ ಶು? ನತರ್ ವಾತೆನಿ ಮತಲಬ್ನ ಛೋ಼ಡಿ ಬೋಲವಾಳುಕಿ ಶು? ಕತೋಬಿ ತುಮೆ ಮಹಾನ್ ವರಾನ ಆಖ್ಹ್‌ಕರೊ. ಮೇ ತುಮೂನ ಬಿಜೂ಼ಬಿ ಅಖ್ಖಾಸ್ ಊಚೊ಼ ಮಾರಗ್‌ನ ವತಾಳುಸ್‌.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.