ಮಾರ್ಕ 16

ಯೇಸು ಜಿವ್ತೊ ಹುಯಿನ್ ಉಠ್ಯೊತೆ

(ಮತ್ತಾಯ 28:1-8; ಲೂಕ 24:1-12; ಯೋಹಾನ 20:1-10)

1ಸಬ್ಬತ್‌ ದನ್ ಖತಮ್ ಹುವಾನ ಬಾದ್‌ಮ, ಮಗ್ದಲನಿ ಮರಿಯ, ಯಾಕೋಬ್‍ನಿ ಆಯ ಮರಿಯ ಅಜು಼ ಸಲೋಮಿ ಯೇಸುನ ಮುರ್ದಾನ ಲಗಾಡನಖ್ಹಾಜೆ ಅಛ್ಛು಼ ವಾನುತೇಲ್‌ನ ಮೋಲ್ ಲಿದಿಯೆ಼. 2ವಾರಾನು ಪಹಿಲ ದನ್ನೆ ವ್ಹಾಣ್‌ಖ್ಹತ್ರೆಸ್, ದನ್ ನಿಕಳ್‌ತಾಸ್‌ನ, ಇವ್ಣೆ ಯೇಸುನ ಮ್ಹೇಲಿರಾಖ್ಯುಥೂತೆ ಘವಿಕನ ನಿಕ್ಳಿಯೆ಼. 3ಘವಿನ ಬಾಕಲ್‌ನೊ ಬಂಡೊ ಘಣೊ ಮೋಟೊ ಥೊ. ಅನಖ್ಹಾಜೆ ಇವ್ಣೆ ಆವಾನಿ ವಖ್ಹತ್‌ಮ, “ಯೋ ಬಂಡಾನ ಅಪ್ಣಟೇಕೆ ಕೋಣ್ ಕಾಡ್‌ಶೆಲಿ?” ಕರಿ ಇವ್ಣೆಇವ್ಣೇಸ್ ವಾತೆ ಬೋಲ್ತಿ ಉಳ್ಯಾವ್‌ತಿಥಿಯೆ. 4ಕತೋಬಿ ಮುಡ್‌ಕ್ಯು ಪಾಡಿ ದೇಖಾತೊ ಯೋ ಬಂಡೊ ನಿಕ್ಳಿರ‍್ಹೋಥೊ. 5ತದೆ ಇವ್ಣೆ ಘವಿನ ಮಹಿ ಜೈ಼ನ್, ಹಿಜ್ಜಾ಼ ಏಕ್‌ ಜಾ಼ನ್ಜ಼ಮಾನ್ ಅದ್ಮಿ ಧೋಳು ಲುಂಗ್ಡು ಪೇರ‍್ಹಿಲೀನ್‌, ಖಾವಿ ಬಾಜು಼ಮ ಬೆಠುಥೂತೆ ದೇಖಿನ್, ಇವ್ಣೆ ಡರೀಗಯ್ಯೆ಼.

6ತದೆ ಇನೆ ಇವ್ಣುನ, “ಡರೊನಕೊ, ಶಿಲ್‌ಬೆಪರ್ ಮಾರ‍್ಯೂಥೂತೆ, ನಜ಼ರೇತ್‌ನೊ ಯೇಸುನ ಢೂಂಡುಕರಾಸ್ ಕರಿ ಮನ ಮಾಲುಮ್. ಯೋ ಹಜ್ಜಾ಼ ಕೊಯ್ನಿ, ಯೋ ಜಿವ್ತೊ ಹುಯಿನ್ ಉಠಿರ‍್ಹೋಸ್! ಹಂದೇಖೊ, ಆಸ್ ಇನ ಮ್ಹೇಲಿರಾಖ್ಯುಥೂತೆ ಝ಼ಗೊ. 7ಹಮ್ಕೆ ಜಾ಼ವೊ ಅಜು಼ ಆ ಖಬರ್‌ನ ಇನ ಶಿಷ್ಯರ್‌ನ ಅಜು಼ ಪೇತ್ರನಬಿ ಬೋಲೊ, ‘ಯೇಸುನೆ ತುಮೂನ ಬೋಲ್ಯೊಥೋತೆ1 ಇಮ್ಮಸ್, ತುಮಾರೇಥಿ ಅಗಾಡಿ ಗಲಿಲಾಯನ ವಳ್ಯೊಜಾ಼ಸ್; ಹಿಜ್ಜಾ಼ ತುಮೆ ಇನ ದೇಕ್‌ಶು ಕರಿ ಬೋಲೊ” ಕರಿ ಬೋಲ್ಯೊ.

8ತದೆ ಇವ್ಣೆ ಘಬ್‌ರೈಜೈ಼ನ್, ಕಾಪ್ತಿಹುಯಿನ್‌ ಭಾರ್‌ಆಯಿನ್, ಯೋ ಮಖ್ಹಾಣ್ಯನಿ ಘವಿಕಂಥು ನಾಶಿ ಚ಼ಲೀಗಯ್ಯೆ. ಇವ್ಣೆ ಡರ್‌ಥಿ, ಕಿನಾಬಿ ಶಾತ್‌ಬಿ ಕೋ ಬೋಲ್‌ಯೇನಿ.

ಯೇಸು ಮಗ್ದಲನಿ ಮರಿಯನ ದೆಖಾಯೊತೆ

(ಮತ್ತಾಯ 28:9-10; ಯೋಹಾನ 20:11-18)

92

ವಾರಾನೊ ಪಹಿಲೊ ದನ್ನೆನು (ಐತ್‍ವಾರ್‌ನ) ವ್ಹಾಣೆ, ಯೇಸು ಜಿವ್ತೊ ಹುಯಿನ್ ಉಠಾನ ಬಾದ್‌ಮ, ಮಗ್ದಲನಿ ಮರಿಯನ ಪಹಿಲಿ ಬಾರ್ ದೆಖಾಯೊ, ಆ ಮರಿಯಮಾಥು ಯೇಸುನೆ ಖ್ಹಾತ್ ಭೂತ್‌ನ ಕಾಡ್ಯೋಥೊ. 10ತದೆ ಇನೆ ಜೈ಼ನ್, ಇನಕೇಡೆ ಥೂತೆ ಇವ್ಣುನ ಬೋಲಿ; ಇವ್ಣೆ ಘಣು ದುಖ್‌ಥಿ ರೊವ್‌ಕರ್ತುಥು; 11“ಯೇಸು ಜಿವ್ತೊಹುಯಿನ್ ಉಠಿರ‍್ಹೋಸ್, ಮನ ದೆಖಾಯೊ” ಕರಿ ಇನೆ ಬೋಲಿತೆ ವಾತೆನ ಖ್ಹಮ್‌ಜ್ಯು, ಕತೋಬಿ ಇವ್ಣೆ ಇನ ವಿಶ್ವಾಸ್ ಕರ‍್ಯುಕೊಯ್ನಿ.

ಯೇಸು ಬೇ ಜ಼ಣ ಶಿಷ್ಯರ್‌ನ ದೆಖಾಯೊತೆ

(ಲೂಕ 24:13-35)

12ಅನ ಬಾದ್‌ಮ, ಶಿಷ್ಯರ್‌ಮ ಬೇ ಜ಼ಣ ಏಕ್‍ ಗಾಮ್‌ನ ಚಾ಼ಲಿ ಜಾ಼ವಾನಿ ವಖ್ಹತ್‌ಮ, ಯೇಸು ಕೋಣ್‌ಬಿ ಖ್ಹಣೇದ್ ಧರಾನ ಕೋ ಹುವ್ವಾನಿತೆ ಇಮ್ನಿ ರೂಪ್‌ಮ ಇವ್ಣುನ ದೆಖಾಯೊ. 13ಇವ್ಣೆ ಜೈ಼ನ್ ಬಿಜ಼ ಖ್ಹಾರಾನ ಬೋಲ್ಯು, ಕತೋಬಿ ಅವ್ಣಿ ವಾತೆನಾಬಿ ಇವ್ಣೆ ನಂಬ್ಯುಕೊಯ್ನಿ.

ಯೇಸು ಗ್ಯಾರ‍್ಹ ಜ಼ಣಾನ ದೆಖಾಯೊತೆ

(ಮತ್ತಾಯ 28:16-20; ಲೂಕ 24:36-49; ಯೋಹಾನ 20:19-23; ಅಪೊ 1:6-8)

14ಬಾದ್‌ಮ ಗ್ಯಾರ‍್ಹ ಜ಼ಣ ಶಿಷ್ಯರ್‌ ಭರೈನ್ ಖಾಣು ಖವ಼್‌ಕರ್ತಥಾತೆ ತದೆ ಯೇಸು ಇವ್ಣುನಾಬಿ ದೆಖಾಯೊ. ಯೋ ಜಿವ್ತೊ ಹುಯಿನ್ ಉಠಾನ ಬಾದ್‌ಮ, ಇನ ದೇಖಾವಾಳನಿ ವಾತೆನ ಇವ್ಣೆ ನಂಬ್ಯುಕೊಂತೆ ಇನಾಖ್ಹಾಜೆ ಯೇಸುನೆ, ಇವ್ಣುನ ವಿಶ್ವಾಸ್‍ಕೊಂತೆ ಅಜು಼ ಇವ್ಣ ಬಂಡಾನ ದಿಲ್‌ನಖ್ಹಾಜೆ ಇವ್ಣುನ ಗುರ್‌ಕಾಯೊ. 15ಅನ ಬಾದ್‌ಮ ಇವ್ಣುನ, “ತುಮೆ ಜಗತ್ನಿ ಖ್ಹಾರಿ ಬಾಜು಼ಮ ಜೈ಼ನ್‌ ತಮಾಮ್‌ ಅದ್ಮಿನ ದೇವ್ನಿ ಅಛ್ಛಿ ಖಬರ್‌ನ ಬೋಲ್‌ನು. 16ನಂಬಿನ್, ಬ್ಯಾಪ್ತಿಸ್ಮ ಕರೈಲೆವಾಳು ದೇವ್ನಿ ನ್ಯಾವ್‍ನಿ ತೀರ್ಪ್‌ಥಿ ಬಚಿನ್ ಪರ್‌ಲೋಕ್‌ಮ ಜಾ಼ಶೆ3; ಕೋಣ್ ನಂಬಾಕೊಯ್ನಿಕಿ ಇವ್ಣುನ ನಿಶತ್‌ಮಳ್‌ಶೆ. 17ಅತ್ರೇಸ್ ಕಾಹೆತೆ, ನಂಬವಾಳಾನ ಅದ್ಭುತ್ ಕರಾನಿ ಶಕತ್ ದೆವಾವ್‌ಶೆ; ಮಾರು ನಾಮ್ ಬೋಲಿನ್ ಭೂತ್‌ಖ್ಹಾರು ನಖ್ಹಾಡ್‌ಶೆ; ಇವ್ಣೆ ಬೋಲಿಸ್‍ರಾಖ್ಯುಕೊಂತೆ ನವಿ ಬೋಲಿಥಿ ಬೋಲ್‌ಶೆ. 18ಇವ್ಣೆ ಖ್ಹಾಪ್‌ನಖ್ಹಾರು ಪಾಡ್ಯುತೋಬಿ ನಾತೊ ಝಾರ್‌ ಪೀಲಿದುತೋಬಿ ಇವ್ಣುನ ಶಾತ್ಬಿ ಖರಾಬ್ ಕೋ ಉಶೇನಿ; ಇವ್ಣೆ ರೋಗ್‌ವಾಳನ ಉಪ್ಪರ್ ಹಾತ್‌ ಮ್ಹೇಲಿತೊ ಯೋ ರೋಗ್‌ವಾಳನ ಅಛ್ಛು಼ ಹುಯಿಜಾ಼ಶೆ” ಕರಿ ಬೋಲ್ಯೊ.

ಯೇಸು ಸೊರ್ಗನ ಗಯೋತೆ

(ಲೂಕ 24:50-53; ಅಪೊ 1:9-11)

19ಯೇಸು ಪ್ರಭುನೆ ಇವ್ಣ ಜೋ಼ಡೆ ಆ ಖ್ಹಾರು ಬೋಲಿನ್ ಹುಯಿಜಾ಼ವಾನ ಬಾದ್‌ಮ ಇಮ್ಮಸ್ ಸೊರ್ಗಮ ಪಡೈಗಯೊ ಅಜು಼ ಯೇಸು ದೇವ್ನ ಖಾವಿ ಬಾಜು಼ಮ ಬೇಶಿಗಯೊ. 20ಹೈಕಡ್ ಇನು ಶಿಷ್ಯರ್‌ ಚ಼ಲ್ಯೂಜೈ಼ನ್ ಖ್ಹಾರಿ ಬಾಜು಼ ದೇವ್ನಿ ಅಛ್ಛಿ ಖಬರ್‌ನ ಬೋಲ್ಯು. ಅಜು಼ ಪ್ರಭುನೆ ಇವ್ಣ ಜೋ಼ಡೆಸ್ ರ‍್ಹೀನ್ ಖ್ಹಣೇದ್‍ನು ಅದ್ಭುತ್ ಕಾಮ್‌ಖ್ಹಾರು ಕರಿನ್, ಇವ್ಣೆ ಬೋಲಾತೆ ಖ್ಹಾರು ಖ್ಹಾಚಿಸ್‌ಕರಿ ವತಾಳಿದೇತೊ ರ‍್ಹೇತೊಥೊ.