ದೇವ್ನಿ ಖ್ಹಾಚಿ ವಚನ್
ಯೂದ 1
ಪಹಿಲಿವಾತೆ
ಯೇಸು ಕ್ರಿಸ್ತನೊ ಸೇವಕ್‌ಬಿ, ಯಾಕೋಬನೊ ಭೈಬಿ ಹುಯಿರೋತೆ ಯೂದ ಬುಲೈ ರ‍್ಹವಾಳಾನ, ಬಾ ಹುಯಿರೋತೆ ದೇವ್‌ಮ ಪ್ಯಾರ್‌ನ ಹುಯಿರಾತೆ ಅಜು಼ ಯೇಸು ಕ್ರಿಸ್ತನಖ್ಹಾಜೆ ಬಚಿರ‍್ಹಾತೆ ಇವ್ಣುನ ಶಾತ್ ಲೀಖುಸ್‌ಕತೊ, ತುಮೂನ ಗೋರ್‌ಬಿ, ಶಾಂತಿ, ಪ್ಯಾರ್ ಘಣೇಥಿ ಮಳಾದೆ.
ಖರಾಬ್ ಬೋಧಕರ‍್ನಿ ಬಾರೇಮ
ಮಾರ ಪ್ಯಾರ್‌ವಾಳ, ಅಪ್ಣೆ ಲೀರಾಖ್ಯಾತೆ ರಕ್ಷಣೇನಿ ಬಾರೇಮ ತುಮೂನ ಲಿಖಾನ ಪೂರ ಆಖ್ಹ್‌ಥಿ ಕೋಶಿಶ್ ಕರಾನಿ ವೇಳ್ಮ, ದೇವ್ನ ಅದ್ಮಿವೋನ ಹರ್‌ಹಮೇಶ ರ‍್ಹವಾನಿಘೋಣಿ ಎಕ್ಕಸ್‍ಹಲ್ಲ ದೆವೈರ‍್ಹೀತೆ ಭರೋಖ್ಹಾನ ಬಚಾ಼ಡಿಲ್ಯವಾನಖ್ಹಾಜೆ, ತುಮೆ ಕರ್ತರ‍್ಹೇಣುಕರಿ ಝೇತೈನ್ ಲೀಖಾನು ಅಛ್ಛು಼ಕರಿ ಮನ ಬೋಲಾಯು. ಶನಕತೊ ಭಕ್ತಿಕೊಂತೆ, ಅಪ್ಣ ದೇವ್ನ ವಾರ್‌ಖ್ಹಾನ ಭಾಣುಕರಿಲೀನ್‍ ಖ್ಹರಮ್‌ಕೊಂತೆ ಕಾಮ್ನ ಕರವಾಳುಬಿ, ಅಪ್ಣೊ ಎಕ್ಕಸ್ ಯಜಮಾನ್‌ಬಿ ಪ್ರಭು ಯೇಸುಕ್ರಿಸ್ತನ ಝಿಟ್ಕಾರವಾಳು ಥೋಡುಜ಼ಣು ಗಪ್ಲಥ್ಥಿ ಸಬೆಮ ಮಹಿ ಪೇಶಿರ‍್ಹುಸ್. ಅವ್ಣೆ ಅಗಾಡಿಥೂಸ್ ನಿಶತ್‌ನ ನೇಮಕ್‍ಹುಯಿರ‍್ಹುಸ್‍ ಕರಿ ಪವಿತ್ರ ವಚನ್‌ಮ ಲೀಖೈರುಸ್.
ತುಮೆ ಹರೇಕ್‍ನಾಬಿ ಪಹಿಲೇಸ್ ಮಾಲುಮ್ ಕರಿರಾಖ್ಯತೋಬಿ, ಮೆ ಆವ್‌ಶೇತೆ ವಿಚಾರ‍್ನಿ ಬಾರೇಮ ತುಮಾರಿ ಖ್ಹಯಾಲ್ಮ ಲ್ಯಾವ್ಣುಕರಿ ಆಖ್ಹ್‌ಕರುಸ್. ಯೋ ಖಿವುಕತೊ, ಪ್ರಭುನೆ ಇನ ಪ್ರಜೆಖ್ಹಾರಾನ ಈಜಿಪ್ಟ್ ದೇಖ್ಹ್‌ಮಾಥು ಬಚಾ಼ಡ್ಯೊತೋಬಿ, ಇನಕೇಡೆಥು ಕೋಣ್ ನಂಬ್ಯುಕೊಯ್ನಿಕಿ ಇವ್ಣುನ ನಾಶ್ ಕರ‍್ಯೊ. ಇವ್ಣಿ ಅಧಿಕಾರ‍್ನಿ ಝ಼ಗೋನ ಮ್ಹೇಲಿದಿನ್, ಇನ ಶೊಂತ್ ಝ಼ಗೋನ ಮ್ಹೆಂದಿದಾತೆ ದೇವ್‌ದೂತರ್‌ನ ದೇವ್ನೆ ಕದೇಬಿ ರ‍್ಹವಾನಿ ಖ್ಹಂಕಳ್‌ನ ಜ಼ಡ್‍ಕಿನ್ ಮಹಾದನ್ಮ ಉಷೇತೆ ತೀರ್ಪ್‌ನಖ್ಹಾಜೆ ಇವ್ಣುನ ಅಂಧಾರಿನ ಪಾಳ್ಯಮ ಟಿವಾಡಿರಾಖ್ಯೊಸ್. ಇಮ್ಮಸ್ ಸೊದೋಮ್ ಅಜು಼ ಗೊಮೋರ್ ಖ್ಹಯೇರ್‌ವಾಳೂಬಿ, ಇನ ಅಶ್‌ಪೀಶ್‌ನ ಖ್ಹಯೇರ್‌ವಾಳೂಬಿ ಯೋ ದೂತರ್‌ನಿಘೊಣಿ ಚಾ಼ಲಿಲಿನ್ ಇವ್ಣುನ ಇವ್ಣೆಸ್ ಪಾಪೇಲ ಕಾಮ್ನ ದೀನಾಖಿದಿನ್, ನಾಕರ‍್ನುತೆ ಕಾಮ್ನ ಪಾಲನ್‍ ಕರ‍್ಯುತೆ ಇನಖ್ಹಾಜೆ ಇವ್ಣೆ ಕೆದೇಬಿ ರ‍್ಹವಾನ ಆಗ್‌ಮ ಖ್ಹತಾಪ್ಣಿ ಲೇತುಹುಯಿನ್‌, ಖರಾಬ್ ಮಾರಗ್‌ಪರ್ ಚಾ಼ಲವಾಳಾನ ಖರಾಬ್‍ಚಾ಼ಲ್ಮ ಉದಾಹರಣೆಕರಿ ಮ್ಹೇಲಿರಾಖ್ಯುಸ್. ತುಮಾರಿ ಸಬೆಮ ಆವಾಳ ಅದ್ಮಿವ್‌ನಾಬಿ ಅಮ್ನಿಸ್ ಪರಕ್ ಉಶೆ. ಇವ್ಣೆ ಖ್ಹೋಣ್ಯಮ ರ‍್ಹೇಯಿತೆತಿಮ್ ಇವ್ಣೆ ಪಾಪ್‍ಥೀಸ್ ಶರೀರ್‌ನ ಮೈಲು ಕರಿಲೇಸ್. ಅಜು಼ ದೇವ್ನಿ ಅದಿಕಾರ್‌ನ ಝಿಟ್ಕಾರಸ್. ಸೊರ್ಗಾಮ ರ‍್ಹವಳಾನಿ ವಿರೋದ್ ಖರಾಬ್ ವಾತ್ ಬೋಲಸ್. ಕತೋಬಿ ಪಹಿಲೊ ದೇವ್ನೊದೂತಥೋತೆ ಮೀಕಾಯೇಲನೆ ಮೋಶೇನು ಶರೀರ್‌ನಿ ಬಾರೇಮ ಮೀಕಾಯೇಲ ಶೈತಾನ್ನಿ ಜೋ಼ಡ್ಮ ವಾದ ಕರ‍್ಯೊತದೆ, ಯೋ ಶೈತಾನ್ನಿ ವಿರುದ್ದ ಏಕ್‌ಬಿ ದೂಷಣೆ ಕರಾನ ಹಿಮ್ಮತ್ ಲಿದೊಕೊಂತೆ, ಪ್ರಭು ತುನ ಡರಾವದೆಕರಿ ಕರಿಬೋಲ್ಯೊ. ಕತೋಬಿ ಆ ಅದ್ಮಿಖ್ಹಾರು ಇವ್ಣುನ ಮಾಲುಮ್‌ಕೊಂತೆ ತಿನಿಬಾರೇಮ ದೂಷಣೆ ಕರಸ್. ಅಜು಼ ಇವ್ಣೆ ಅಕ್ಕಲ್‌ಕೊಂತೆ ಜಾನ್ವರ್‌ನಿತರ ಮಾಲುಮ್ ಕರಿಲೇಸ್. ಅಜು಼ ಇನೇಥಿ ಇವ್ಣು ಇವ್ಣೇಸ್ ನಾಶ್ ಕರಿಲೇಸ್. “ಇವ್ಣಿ ಹಾಲ್ನ ಮೇ ಶಾತ್‌ಬೋಲು! ಶನಕತೊ ಅವ್ಣೆ ಕಾಯಿನನು ಮಾರಗ್‍ಧರೀನ್ ಚಾ಼ಲಾವಾಳೂಬಿ, ಧನ್‌ ದೌಲತ್ನ ಕಮಾವನಖ್ಹಾಜೆ ಬಿಳಾಮಾನೊ ಗಲತ್‌ ಮಾರಗ್‌ಪರ್ ಚಾ಼ಲಾವಾಳೂಬಿ, ಕೋರಹನಿತರ ವಿರೋದ್ ಆಡ್‌ಫೇಡ್ ಬೋಲಿನ್ ನಾಶಹುವವಾಳು ಹುಯಿರ‍್ಹುಸ್”.1 ತುಮಾರ ಪ್ಯಾರ್‌ನ ಮಿಝ಼್ವಾನ್‌ಮ ಡರ್‌ಕೊಂತೇಸ್ ಖೈನ್, ಇವ್ಣು ಇವ್ಣೇಸ್ ಪೇಟ್ ಪಾಳವಾಳು ಹುಯಿರ‍್ಹುಸ್, ಇವ್ಣೆ ವರ್ಖ್ಹಾತ್‍ಕೊಂತೆ ಮೋಡ್‍ನಿತರ ರ‍್ಹೀನ್, ವಹಿರೊ ವಾಗಥೀಸ್ ಉಡಿಜಾ಼ವಳನಿತರ ರ‍್ಹೇಸ್ ಅಜು಼ ಇವ್ಣೆ ಬರೋಬರ್ ಹಗಾಮ್ನ ಪಂಡು ಮ್ಹೇಲಾಕೊಂತೆ ಅಜು಼ ಜ಼ಡ್‍ಖ್ಹಮೇದ್ ಉಖ್‌ಡೈ ರಡ್ಕಿಜಾ಼ಸ್‍ತೆ ಝಾ಼ಡನಿತರ ರ‍್ಹೇಸ್. ಅವ್ಣೆ ದರ‍್ಯಾವ್‌ಮಾನು ಮೋಟ ಝೋ಼ಕಾಳ್ಯಾನಿತರ ರ‍್ಹೇಸ್. ಯೋ ಝೋ಼ಕಾಳ್ಯಮಾಥು ಫೇಖ್ಹಟ್‌ನ ಝ಼ಂಡಾ ಉಡಾತೆತಿಮ್‌ ಅವ್ಣೆ ಖ್ಹರಮ್‌ಕೊಂತೆ ಕಾಮ್‍ಕರಸ್, ಆ ಅದ್ಮೆವ್ ಆಕಾಶ್‌ಮ ವ್ಹವ್ತುಫಂಡಾತೆ ಶುಕ್ಕರ್‌ನಿತರ ಛಾ಼. ಅವ್ಣಖ್ಹಾಜೆ ಹಮೇಶಾನು ಅಂಧಾರಿನಪಾಳ್‍ನ ಖಾಯಮ್ ಕರಿರಾಖ್ಯೊಸ್. ಆದಾಮನೊ ಖ್ಹಾತ್‍ನಿ ಫಿಡಿವಾಳೊ ಹುಯಿರ‍್ಹೋತೆ ಹನೋಕ ಆ ಅದ್ಮಿವ್‌ನ ಬಾರೇಮ ಪ್ರವಾದ್‌ನೆ ಕರೀನ್ ಅಮ್ ಬೋಲಿರಾಖ್ಯೊಸ್, “ಹಂದೇಖೊ, ಪ್ರಭು ಇನು ಹಜಾ಼ರೊ ಪರಿಶುದ್ ದೂತರ್‌ನಿ ಜೋ಼ಡ್ಮ ವಳ್ಯಾವಸ್”. ಪ್ರಭು ಹರೇಕ್‌ಜ಼ಣಾನ ನ್ಯಾವ್‌ಫೇಡವನಾಬಿ, ಇವ್ಣಾಮ ಬಿಣ್‍ಭಕ್ತಿವಾಳು ವಿರೋದ್‌ಕರ‍್ಯೂತೆ ಖ್ಹಾರುಸ್ ಖರಾಬ್‍ಕಾಮ್ನ ಅಜು಼ ಪಾಪಿಖ್ಹಾರು ಇನ ವಿರೋದ್‌ಹುಯಿನ್ ಬೋಲ್ಯುತೆ ವಾತೆನಿ ಬಾರೇಮ ಖ್ಹಾರಸ್ನ ದೋಷಿಕರಾನ ಒಳ್ಯೊಆವಸ್‌ಕರಿ ಪ್ರವಾದನೆ ಕರ‍್ಯೊ, ಆ ಖರಾಬ್ ಬೋಧನೆ ಕರಾವಾಳು, ಭಣ್‍ಕಾವಾಳುಬಿ ಗಲತ್‌ ಢೂಂಡಾವಾಳೂಬಿ ನಿಕ್‍ಳ್ಯೊಜಾನ್ ವಾಳೂಬಿ, ಬಡೈಮಾರವಾಳೂಬಿ ಶೊಂತ್ ಫಾಯಿದನಖ್ಹಾಜೆ ಖ್ಹರಾವ್ಣಿ ಕರಾವಾಳುಬಿ ಹುಯಿರ‍್ಹುಸ್.
ಝೇತಾವ್ಣಿ ಅಜು಼ ಹುಮ್ಮಖ್ಹ್
ಕತೋಬಿ ಪ್ಯಾರ್‌ನ ದೋಸ್ತಿವೊ, ಅಪ್ಣೊ ಪ್ರಭು ಹುಯಿರೋತೆ ಯೇಸುಕ್ರಿಸ್ತನು ಅಪೊಸ್ತಲರ್‌ಖ್ಹಾರು ಪಹಿಲೆ ಶಾತ್ ಬೋಲ್ಯುಥು ಕರಿ ಯಾದ್‍ಕರಿಲೇವೊ. ಅಪೊಸ್ತಲರ‍್ನೆ ತುಮುನ, “ಖ್ಹರ್ತಿನ ಹಗಾಮ್ಮ ದೇವ್ನಿ ಬಾರೇಮ ತುಮೂನ ನಕ್ಲೆ ಕರವಾಳು ಅದ್ಮಿಖ್ಹಾರು ರ‍್ಹಿಶೆ, ಅಜು಼ ಭಕ್ತಿಕೊಂತೆ ಆಖ್ಹ್‌ನ ಅಖ್ಖುಲೀನ್ ಚಾ಼ಲವಾಳು ಹುಯಿರ‍್ಹಿಶೆಕರಿ ಇವ್ಣೆ ತುಮೂನ ಬೋಲ್ಯುಥು. ಆ ಅದ್ಮಿವ್‍ಖ್ಹಾರು ಇವ್ಣು ಇವ್ಣೇಸ್ ತನಿಯ ಬಣಿಜಾವವಾಳೂಬಿ, ಮ್ಹಾಮುಲಿ ಆಖ್ಹ್‌ಮಾಬಿ, ದೇವ್ನುಆತ್ಮ ಲೀರಾಖ್ಯುಕೊಂತೆಬಿ ಹುಯಿರ‍್ಹುಸ್. ಕತೋಬಿ ಪ್ಯಾರ್‌ನ ದೋಸ್ತಿವೊ, ತುಮೆ ತುಮಾರು ಘಣು ಪರಿಶುದ್ ಕ್ರಿಸ್ತ ವಿಶ್ವಾಸ್ ಆಧಾರ್ ಕರ‍್ಲಿನ್ ಘಟ್‍ಭೀರ‍್ಹೆವೊ ಅಜು಼ ಪವಿತ್ರಾತ್ಮಥಿ ಭರೈನ್ ಪ್ರಾರ್ಥನೆಕರೊ. ದೇವ್ನಿ ಪ್ಯಾರ್‌ಮ ಭೀರ‍್ಹೆವೊ. ಹಮೇಶಾನು ಜಾನ್ನ ಲೀಲ್ಯಾವನಖ್ಹಾಜೆ ಪ್ರಭುಹುಯಿರ‍್ಹೋತೆ ಯೇಸು ಕ್ರಿಸ್ತನು ಗೋರ್‌ನಾಸ್ ಟಿವೈನ್ ದೇಖೊ. ಗುಮಾನಿ ರ‍್ಹವಾಳ ಅದ್ಮಿವ್‌ನ ಗೋರ್‌ಕರೊ. ಥೋಡಜ಼ಣ ಅದ್ಮಿವ್‌ನ ಬಚಾ಼ಡೊ ಯೋ ಅದ್ಮಿವ್‌ನ ಆಗ್‌ಥಿ ಭಾರ್‌ಲ್ಯಾವೊ, ತುಮೆ ಥೋಡಜ಼ಣಾನ ಡರ್‌ತ ಹುಯಿನ್ ಗೋರ್‌ಕರೊ. ಪಾಪ್ನ ಮೈಲಾನ ಕಾಹೆತೆ ಇವ್ಣ ಲುಂಗ್ಡವ್‍ನಾಬಿ ವಹೇರ್‌ಕರೊ.
ಖ್ಹರ್ತಿನಿ ಆಶೀರ್ವಾದ್‌
ದೇವ್ ತಾಖತ್‌ವಾಳೊ ಹುಯಿರ‍್ಹೋಸ್. ತುಮೆ ಠೋಕರ್ ನಾ ಖಾವ್ಣುತೆತಿಮ್ ಮದತ್ ಕರಾವಾಳೊ ಹುಯಿರ‍್ಹೊಸ್. ಯೋ ತುಮಾರಮ ಶನೂ ಕಳಂಕ್‌ಕೊಂತೆ ತಿಮ್‍ಕರೀನ್ ಇನು ಮಹಿಮೆ ಝ಼ಗೋಕನ ಲ್ಯಾವಾನಾಬಿ ತುಮುನ ಮಹಾಖ್ಹುಷಿನ ದ್ಯವಾನಾಬಿ ಶಕತ್‌ವಾಳೊ ಹುಯಿರ‍್ಹೊಸ್. ಅಪ್ಣುನ ರಕ್ಷಣೆ ಕರಾವಾಳೊಬಿ ಎಕ್ಕಸ್ ದೇವ್ನ, ಅಖ್ಖಾ ವಖ್ಹತ್‌ಮಥೂತೆ ತಿಮ್ಮಸ್ ಹಮ್ಕೇಬಿ ಕದೇಬಿ ಅಪ್ಣೊ ಪ್ರಭುಹುಯಿರ‍್ಹೋತೆ ಯೇಸು ಕ್ರಿಸ್ತಥಿ ಇನ ಮಹಿಮೆ, ತಾಖತ್ ಅಜು಼ ಅದಿಕಾರ್‌ಖ್ಹಾರು ರ‍್ಹವಾದೆ. ಆಮೆನ್.
Source notes (1)
- Cross-reference ವಿಮೋಚನ 33:2
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.