ದೇವ್ನಿ ಖ್ಹಾಚಿ ವಚನ್
ಯೋಹಾನ 20
ಖಾಲಿ ಘವಿ
(ಮತ್ತಾಯ 28:1-8; ಮಾರ್ಕ 16:1-8; ಲೂಕ 24:1-12)
ವಾರಾನ ಪಹಿಲದನ್ನೆ ಅಧಿರ‍್ಹೇಣೆಸ್‌, ಬಿಜೂ಼ಬಿ ಅಂಧಾರು ರ‍್ಹವಾನಿಸ್ ವಖ್ಹತ್‌ಮ, ಮಗ್ದಲನಿ ಮರಿಯ ಘವಿಕನ ಐನ್, ಘವಿನ ಮೂಚಿರಾಖ್ಯುಥೂತೆ ಬಂಡೊ ನಿಕ್‌ಳೈರ‍್ಹೂಥೂತೆ ದೇಖಿ. ತದೆ ಇನೆ ಸೀಮೋನ್‌ ಪೇತ್ರ ಅಜು಼ ಯೇಸುನೊ ಪ್ಯಾರ್‌ನೊ ಬಿಜ್ಜೇಕ್‌ ಶಿಷ್ಯಕನ ಮಿಲೈಜೈ಼ನ್‌, ಇನೆ ಇವ್ಣುನ, “ಪ್ರಭುನ ಮಖ್ಹಾಣ್ಯನಿ ಘವಿನ ಮಹಿಥು ಪಳ್ಳಿಜೈ಼ನ್‌, ಕಿಜ್ಜಾ಼ ಮ್ಹೇಲಿರಾಖ್ಯುಸ್ಕಿ, ಹಮೂನ ಮಾಲುಮ್‌ ಕೊಯ್ನಿ!” ಕರಿ ಬೋಲಿ.
ತದೆ ಪೇತ್ರ ಅಜು಼ ಯೋ ಬಿಜ್ಜೇಕ್‌ ಶಿಷ್ಯ ಘವಿಕನ ಗಯ. ಇವ್ಣೆ ಭೇ ಜ಼ಣ ಮಿಲಾಯ, ಕತೋಬಿ ಯೋ ಬಿಜ್ಜೇಕ್‌ ಶಿಷ್ಯ ಪೇತ್ರಥೀಬಿ ಒಗ್ಗಿಸ್ ಮಿಲೈನ್‌, ಘವಿಕನ ಪಹಿಲೆ ಐನ್, ಪೋಚ್ಯೊ. ಇನೆ ಝು಼ಕಿನ್‌, ಲಪೇಟಿಥೂತೆ ಘಣ ಮೋಲ್ನು ಗಾದಿನು ಲುಂಗ್ಡು ಪಡ್ಯುಥೂತೆ ದೇಖ್ಯೊ, ಕತೋಬಿ ಮಹಿ ಕೋಗಯೋನಿ. ಸೀಮೋನ್‌ ಪೇತ್ರನ ಪೀಠೆ ಐನ್, ಘವಿನ ಮಹಿ ಜೈ಼ನ್‌, ಯೋ ಘಣ ಮೋಲ್ನು ಗಾದಿನು ಲುಂಗ್ಡ ಪಡ್ಯುಥು. ಅಜು಼ ಯೇಸುನ ಮುಡ್‌ಕ್ಯಾನ ಭಾಂದ್ಯುಥೂತೆ ಲುಂಗ್ಡು, ಯೋ ಘಣ ಮೋಲ್ನ ಲುಂಗ್ಡಾನ ಜೋ಼ಡೆ ಪಡ್ಯುಥು ಕೊಯ್ನಿತೆ, ಲಪ್‌ಟೈನ್‌ ಏಕಾಡಿ ಅಲಕ್ ಮ್ಹೇಲಿರಾಖ್ಯುಥೂತೆ ದೇಖ್ಯೊ. ಅನಕೇಡೆಥು ಘವಿಕನ ಪಹಿಲೆ ಐನ್, ಪೊಚ್ಯೋತೆ ಯೋ ಬಿಜ್ಜೇಕ್‌ ಶಿಷ್ಯಬಿ ಮಹಿ ಜೈ಼ನ್‌ ದೇಖಿನ್‌, ವಿಶ್ವಾಸ್ ಕರ‍್ಯೊ. ಯೇಸು ಮರ್‌ವಾನ ಬಾದ್‌ಮ ಜಿವ್ತೊ ಹುಯಿನ್ ಉಠಿ ಆವ್ಣುಕರಿ ವಚನ್‌ಮ ಲೀಖೈರ‍್ಹೂತೆ ವಾತೆ ಇವ್ಣುನ ಬಿಜೂ಼ಬಿ ಮಾಲುಮ್‌ ಕೋ ಥೂನಿ. ಅನಕೇಡೆಥು ಯೋ ಶಿಷ್ಯರ್‌ ಪಾಛು಼ಫರಿ ಘರೆ ಗಯು.
ಮಗ್ದಲನಿ ಮರಿಯನ ಯೇಸು ದೆಖಾಯೊತೆ
(ಮತ್ತಾಯ 28:9,10; ಮಾರ್ಕ 16:9-11)
ಕತೋಬಿ ಮರಿಯ ಭಾರ್‌ ಘವಿಕನ ರೊವ್‌ತಿಹುಯಿನ್, ಭೀಯಿಥಿ. ಯೋ ರೊವ್‌ತಿ ಹುಯಿನಸ್‌ ಘವಿನ ಮಹಿ ಝು಼ಕಿನ್‌, ದೇಖಿ. ತದೆ ಯೇಸುನು ಮುರ್ದು ಮ್ಹೇಲ್ಯುಥೂತೆ ಝ಼ಗೋಮ, ಧೋಳು ಲುಂಗ್ಡು ಪೇರ‍್ಹಿರಾಖ್ಯುಥೂತೆ ಬೇ ದೇವ್‌ನು ದೂತರ್‌ನ ದೇಖಿ. ಇನಾಮ ಏಕ್‌ ಜ಼ಣೊ ಮುಡ್‌ಕ್ಯೂ ಥೂತೆ ಭಣಿ, ಅಜು಼ ಏಕ್‌ ಜ಼ಣೊ ಗೋಡಾಭಣಿ ಬೆಠಾಥ. ಯೋ ದೇವ್‌ನು ದೂತರ್ ಮರಿಯನ, “ಅಲಿ ಆಯಾ, ತೂ ಶನ ರೊವ್‌ಕರಾಸ್ತೆ?” ಕರಿ ಪುಛಾ಼ಯ.
ತದೆ ಇನೆ, “ಮಾರೊ ಪ್ರಭುನು ಮುರ್ದಾನ ಇವ್ಣೆ ಪಳ್ಳಿಚ಼ಲಿಗಯು, ಅಜು಼ ಇನ ಕಿಜ್ಗಾ಼ ಮ್ಹೇಲಿರಾಖ್ಯುಸ್ ಕರಿ ಮನ ಮಾಲುಮ್‌ ಕೊಯ್ನಿ!” ಕರಿ ಜಾ಼ವಾಬ್‌ ದಿದಿ.
ಅಮ್ ಬೋಲಾನ ಬಾದ್‌ಮ, ಪೀಠೆ ಫರೀನ್, ಹಿಜ್ಜಾ಼ ಯೇಸು ಭೀರ‍್ಯೊಥೊತೆ ಇನೆ ದೇಖಿ; ಕತೋಬಿ ಯೋಸ್‌ ಯೇಸು ಕರಿ ಇನ ಮಾಲುಮ್‌ ಕೋ ಹುಯೂನಿ. ಯೇಸುನೆ ಇನ, “ಅಲಿ ಆಯಾ, ತೂ ಶನ ರೊವ್‌ಕರಾಸ್ತೆ? ತೂ ಕಿನ ಢೂಂಡುಕರಾಸ್ತೆ?” ಕರಿ ಪುಛಾ಼ಯೊ. ಹೈರೋತೆ ಬಾಗ್‌ನ ದೇಖಿಲ್ಯವಾಳೊಕಿ ಶುಕಿ ಕರಿ ಮರಿಯನೆ ಸೋಚಿನ್,
ಇನ, “ಮಾಲಿಕ್, ತೂ ಇನ ಪಾಡಿಲೀನ್ ಜೈ಼ರೊ ಉಶೇತೊ, ಕಿಜ್ಗಾ಼ ಮ್ಹೇಲಿರಾಖ್ಯೋಸ್‌ ಕರಿ ಮನ ಬೋಲ್, ಮೇ ಇನ ಪಳ್ಳಿಜ಼ವ್‌ಸ್‌” ಕರಿ ಬೋಲಿ.
ಯೇಸುನೆ ಇನ, “ಮರಿಯ” ಕರಿ ಬೋಲ್ಯೊ.
ತದೆ ಇನೆ ಯೇಸು ಭಣಿ ಫರೀನ್, ಇಬ್ರಿಯ ವಾತೇಮ, “ರಬ್ಬೂನಿ!” ಕರಿ ಬೋಲಿ. ರಬ್ಬೂನಿ ಕತೊ, ‘ಗುರು’ ಕರಿ ಮತ್‌ಲಬ್.
ಯೇಸುನೆ ಇನ, “ಮನ ಧರ್‌ನಕೊ, ಶನಕತೊ ಮೇ ಬಿಜೂ಼ಬಿ ಬಾಕನ ಕೋ ಜೈ಼ರ‍್ಹೋನಿ. ಕತೋಬಿ ತೂ ಮಾರ ಭೈಯೇಕನ ಜೈ಼ನ್‌, “ಮೇ ಮಾರೊ ಬಾ ಅಜು಼ ಇವ್ಣೊ ಬಾ, ಮಾರೊ ದೇವ್ ಅಜು಼ ಇವ್ಣೊ ದೇವ್ ಹುಯಿರ‍್ಹೋತೆ ಇನಕನ ಪಾಛೊ಼ ವಳ್ಯೊಜ಼ವುಸ್‌ ಕರಿ ಬೋಲ್” ಕರಿ ಬೋಲ್ಯೊ.
ತದೆ ಮಗ್ದಲನಿ ಮರಿಯ ಶಿಷ್ಯರ್‌ಕನ ಜೈ಼ನ್‌, ಇನೆ ಪ್ರಭುನ ದೇಖಿತೆ ಅಜು಼ ಯೇಸುನೆ ಇನ ಬೋಲ್ಯೋತೆ ಬಾರೇಮ ಇವ್ಣುನ ಬೋಲಿ.
ಯೇಸು ಇನ ಶಿಷ್ಯರ್‌ನ ದೆಖಾಯೊತೆ
(ಮತ್ತಾಯ 28:16-20; ಮಾರ್ಕ 16:14-18; ಲೂಕ 24:36-49)
ಯೋಸ್‌ ದನ್ನೆಕತೊ, ವಾರಾನ ಪಹಿಲ ದನ್ನೆ ಖ್ಹಾಂಜೆ, ಶಿಷ್ಯರ್‌ ಯೆಹೂದ್ಯರ್ ಅದಿಕಾರಿನ ಡರ್‌ಥಿ ಇವ್ಣೆ ಥಾತೆ ಘರ್‌ನು ಬಾಕಲ್‌ ಮೂಚಿನ್, ಮಹಿ ಥಾ. ತದೆ ಯೇಸು ಐನ್, ಇವ್ಣ ಇಚ಼್‌ಮ ಭೀರಿನ್‌, “ತುಮೂನ ಸಮಾಧಾನ್ ಹುವಾದೆ” ಕರಿ ಬೋಲ್ಯೊ. ಆ ಬೋಲಾನ ಬಾದ್‌ಮ, ಇನ ಹಾತ್‌ನಾಬಿ, ಪಾಖ್ಹ್‌ಳಿನಾಬಿ ಇವ್ಣುನ ವತಾಳ್ಯೊ. ಪ್ರಭುನ ದೇಖ್ಯುತೆ ಇನಖ್ಹಾಜೆ ಶಿಷ್ಯರ್‌ ಖ್ಹಾರು ಖ್ಹುಶೀಥಿ ಭರೈಗಯು. ಯೇಸುನೆ ಇವ್ಣುನ, “ತುಮೂನ ಸಮಾಧಾನ್ ಹುವಾದೆ. ಬಾನೆ ಮನ ಮೋಕ್‌ಲ್ಯೊತೆ ಇಮ್ಮಸ್, ಮೇಬಿ ತುಮೂನ ಮೋಕ್ಲುಸ್‌” ಕರಿ ಬೋಲ್ಯೊ. ಅಮ್ ಬೋಲಾನ ಬಾದ್‌ಮ, ಯೇಸುನೆ ಇವ್ಣಾಪರ್ ಫೂಕಿನ್‌, “ಅಲ್ಲೇವೊ ಪವಿತ್ರಾತ್ಮನ. ತುಮೆ ಕಿನು ಪಾಪ್ನ ಮಾಪ್‌ ಕರೋಸ್ಕಿ, ಇವ್ಣು ಪಾಪ್ ಮಾಪ್‌ ಉಶೆ; ಅಜು಼ ತುಮೆ ಕಿನು ಪಾಪ್ನ ಮಾಪ್‌ ಕೋ ಕರೋನಿಕಿ, ಇವ್ಣು ಪಾಪ್ ಮಾಪ್‌ ಕೋ ಉಶೇನಿ” ಕರಿ ಬೋಲ್ಯೊ.
ಯೇಸು ಅಜು಼ ತೋಮ
ಯೇಸು ಆಯೋತೆ ತದೆ, ಭಾರ ಶಿಷ್ಯರ್‌ಮ ಏಕ್‌ ಹುಯಿರ‍್ಹೊಥೋತೆ ದಿದುಮಕರಿ ತೋಮ ಇವ್ಣಿ ಜೋ಼ಡೆ ಕೊಥೋನಿ. ‘ದಿದುಮ’ ಕತೊ ಅವಳಿಜವಳಿ ಕರಿ. ಇನಖ್ಹಾಜೆ ಬಿಜಾ಼ಖ್ಹಾರ ಶಿಷ್ಯರ್‌ನೆ, “ಹಮೆ ಪ್ರಭುನ ದೇಖ್ಯ!” ಕರಿ ಇನ ಬೋಲ್ಯ.
ಕತೋಬಿ ತೋಮನೆ, “ಮೇ ಇನ ಹಾತ್‌ಮ ಮೇಕೇಥಿ ಹುಯೂತೆ ಫೋಡಾನ ದೇಖಿನ್‌, ಯೋ ಮೇಕೆ ಮರೈತೆ ಝ಼ಗೋಮ ಮಾರಿ ಅಂಗ್‌ಳಿ ಘಾಲಿನ್, ಇನಿ ಪಾಖ್ಹ್‌ಳಿಮ ಮಾರಹಾತೇಥಿ ಛಿಮಾಶೆ ತುಮಾರಿ ವಾತೇನ ನಂಬುಕೊಯ್ನಿ” ಕರಿ ಬೋಲ್ಯೊ.
ಆಟ್ ದನ್ ಬಾದ್‌ಮ, ಇನ ಶಿಷ್ಯರ್‌ ಪಾಛು಼ ಮಹಿ ಥಾತೆ ತದೆ, ತೋಮಾಬಿ ಇವ್ಣಿ ಜೋ಼ಡೆ ಥೊ. ಬಾಕಲ್‌ ಮೂಚೈ಼ರ‍್ಹೂಥು, ತದೆ ಯೇಸು ಐನ್, ಇವ್ಣ ಇಚ಼್‌ಮ ಭೀರಿನ್‌, “ತುಮೂನ ಸಮಾಧಾನ್ ಹುವಾದೆ” ಕರಿ ಬೋಲ್ಯೊ. ಅನಕೇಡೆಥು ಯೇಸುನೆ ತೋಮನ, “ತಾರಿ ಅಂಗ್‌ಳಿನ ಹಜ಼್ಜ ಮ್ಹೇಲಿನ್, ಮಾರ ಹಾತ್ನ ಛೀಮಿನ್‌ ದೇಕ್; ತಾರ ಹಾತ್ನ ಖ್ಹಾಮ್ಣೆ ಕರೀನ್, ಮಾರಿ ಪಾಖ್ಹ್‌ಳಿಮ ಘಾಲ್‌, ವಿಶ್ವಾಸ್‌ಕೊಂತೆ ನಕೊ ರ‍್ಹೇ, ವಿಶ್ವಾಸ್ ಕರ್‌!” ಕರಿ ಬೋಲ್ಯೊ.
ತೋಮನೆ ಯೇಸುನ, “ಮಾರೊ ಪ್ರಭು, ಮಾರೊ ದೇವ್!” ಕರಿ ಜವಾಬ್‌ ದಿದೊ.
ಯೇಸುನೆ ಇನ, “ತೂ ಮನ ದೇಖ್ಯೋತೆ ಇನಖ್ಹಾಜೆ ವಿಶ್ವಾಸ್ ಕರ‍್ಯೊ; ಕತೋಬಿ ಮನ ದೇಖಾಕೊಯ್ನಿತೆ ವಿಶ್ವಾಸ್ ಕರಾವಾಳುಸ್‌ ಖ್ಹಾಚಮಾಬಿ ಧನ್ಯರ್” ಕರಿ ಬೋಲ್ಯೊ.
ಆ ಪುಸ್ತಕಾನು ಉದ್ದೇಶ್
ಯೇಸುನೆ ಬಿಜೂ಼ಬಿ ಕೈಯೆಕ್ಕಿ ಅದ್ಭುತ್ ಕಾಮ್ನ ಖ್ಹಾರು ಇನ ಶಿಷ್ಯರ್‌ನ ಖ್ಹಾಮ್ಣೆ ಕರ‍್ಯೊ.ಎತ್ರ ಅಖ್ಖಾಕಾಮ್ನ ಥೋಡುಬಿ ಅದ್ಭುತ್‌ಖ್ಹಾರು ಆ ಪುಸ್ತಕ್‌ಮ ಕೋ ಲೀಖೈರ‍್ಹೂನಿ. ಕತೋಬಿ ಯೇಸುಸ್‌ ಕ್ರಿಸ್ತ ಕರೀಬಿ, ದೇವ್‌ನೊ ಛಿಯ್ಯೊ ಕರೀಬಿ ತುಮೆ ನಂಬಿನ್, ಇನ ನಾಮ್‍ಥಿ ತುಮೂನ ಜಾನ್‌ ಮಳಾದೆ ಕರಿ ಅತ್ರುಖ್ಹಾರು ಲೀಖೈರ‍್ಹುಸ್.
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.