ಯೋಹಾನ 10:11

ಕುರುಬನಿ ಖೇಣಿ

1ಯೇಸುನೆ, “ಮೇ ತುಮೂನ ಖ್ಹಾಚ ಬೋಲುಸ್, ಮೇಂಢಾನು ಕೋಠಾನ ಬಾಕಲ್‌ನಿವಾಟೆ ಮ್ಹೆಂದಿನ್, ಬಿಜಿ ಬಾಜು಼ಥು ಚ಼ಢೀನ್‌, ಮಹಿ ಜಾ಼ವಾಳೊ ಚೋ಼ರ್ ಅಜು಼ ಲೂಟಿಲಿಜಾ಼ವವಾಳೊ ಹುಯಿರ‍್ಹೋಸ್. 2ಕೋಣ್ ಬಾಕಲ್‌ವಾಟೆ ಜಾ಼ವಾಳೊಕಿ ಯೊ ಮೇಂಢಾನ ಚ಼ರಾವವಾಳೊ ಹುಯಿರ‍್ಹೋಸ್. 3ನಾಮ್ ಧರೀನ್ ಚಿಕ್‌ರ‍್ಯುತೊ ಮೇಂಢ ಇನಿ ಅವಾಜ಼್‌ನ ಕಾನ್‍ದೇಸ್. ವಖ್ಹ್‌ತಿ ಕರಾವಾಳೊ ಯೋ ಮೇಂಢಾನ ಚ಼ಲೈಲಿನ್ ಜಾ಼ಸ್‌. 4ತದೆ ಯೋ ಕುರುಬ ಮೇಂಢಾನ ಖ್ಹಾರು ಭಾರ್‌ ಮ್ಹೇಲಾನಜಾ಼ಸ್ಕಿ ತದೆ, ಮೇಂಢ ಇನಪೀಠೆ ಜಾ಼ಸ್‌. 5ಮೇಂಢಖ್ಹಾರು ಇವ್ಣುನ ಮಾಲುಮ್‌ ಕೊಂತೆ ಅಲ್ಹಾವ್ ಅದ್ಮಿನ ಪೀಠೆ ಕೋಜಾ಼ಯ್ನಿ, ಪಣ್ಕಿ ಇಮ್ನ ಅದ್ಮಿಕಂಥು ಮಿಲೈ ಚ಼ಲ್ಯುಜಾ಼ಸ್‌, ಶನಕತೊ ಇವ್ಣುನ ಯೋ ಅದ್ಮಿನು ಗಳು ಮಾಲುಮ್‌ಕೊಯ್ನಿ” ಕರಿ ಬೋಲ್ಯೊ.

6ಆ ಮತ್ಲಬ್‌ನಿ ಖೇಣಿನ ಯೇಸುನೆ ಇವ್ಣುನ ಬೋಲ್ಯೊ, ಕತೋಬಿ ಇವ್ಣೆ ಇನಿ ವಾತೆನಿ ಮತ್ಲಬ್‌ನ ಮಾಲುಮ್ ಕರ‍್ಯುಕೊಯ್ನಿ.

ಯೇಸುಸ್‌ ಅಛ್ಛೊ಼ ಕುರುಬ

7ಇನಖ್ಹಾಜೆ ಯೇಸುನೆ ಪಾಛೊ಼ ಬೋಲ್ಯೊ, “ಮೇ ತುಮೂನ ಖ್ಹಾಚ ಬೋಲುಸ್, ಮೇಸ್ ಮೇಂಢಾನ ಖ್ಹಾರು ದರ‍್ವಾಜು಼ ಹುಯಿರ‍್ಹೋಸ್. 8ಮೇ ಆವಾನ ಅಗಾಡಿ ಆಯೂತೆ ಖ್ಹಾರುಸ್‌ ಚೋ಼ರ್ ಅಜು಼ ಲೂಟವಾಳು ಹುಯಿರ‍್ಹುಸ್‍, ಕತೋಬಿ ಮೇಂಢು ಖ್ಹಾರು ಇವ್ಣುನ ಕಾನ್‌ ಕೋ ದಿದೂನಿ. 9ಮೇಸ್ ಯೋ ದರ‍್ವಾಜು಼, ಮಾರವಾಟೆ ಕೋಣ್-ಕೋಣ್ ಮಹಿ ಜಾ಼ಸ್ಕಿ ಇವ್ಣೆ ಬಚಿಜಾ಼ಶೆ ಅಜು಼ ಇವ್ಣೆ ಮಹಿ ಜಾ಼ಯೆಜಾ಼ಯ್‌, ಭಾರ್‌ಬಿ ಆಯೆಜಾ಼ಯ್‌, ಇವ್ಣುನ ಚ಼ರಣ್ಣು ಘಾಖ್ಹ್‌ ಮಳ್‌ಶೆ. 10ಚೋ಼ರ್ ಚೋ಼ರಿ ಕರಾನಖ್ಹಾಜೆ, ಮರ್‌ನಾಖಾನಖ್ಹಾಜೆ ಅಜು಼ ಬರ್ಬಾತ್ ಕರಾನಖ್ಹಾಜೆ ಆವಸ್ ಪಣ್ಕಿ, ಬಿಜು಼ ಶನಖ್ಹಾಜೆಬಿ ಕಾಹೆ. ಕತೋಬಿ ಮೇತೊ ಇವ್ಣುನ, ಖಲಿ ಜಾನ್‌ ಕಾಹೆ ಜಿವ್ಣು ದೇವ್ಣುಕರಿ ಐರ‍್ಹೋಸ್ ಯೊ ಜಾ಼ಖ್ಹತ್ ಭರ್‌ಪೂರ್‌ ಜಿವ್ಣು ದೇವ್ಣುಕರಿ ಆಯೊ.

11ಮೇಸ್ ಅಛ್ಛೊ಼ ಕುರುಬ; ಅಛ್ಛೊ಼ ಕುರುಬ ಇನ ಮೇಂಢ ಖ್ಹಾರಾನಖ್ಹಾಜೆ ಇನು ಜಾನ್ನಾಸ್ ದೇಸ್. 12ಕತೋಬಿ ಕೂಲಿಆಳ್‌ ಬೋಲಾಸ್ತೆ ಚ಼ರಾವವಾಳೊಬಿ ಕಾಹೆ, ಮೇಂಢ ಖ್ಹಾರಾನ ಯಜಮಾನ್‌ಬಿ ಕಾಹೆ, ಮೇಂಢು ಶೊಂತ್‍ಬಿ ಕಾಹೆ ಇನಖ್ಹಾಜೆ ಜ಼ರಕ್‌ ಆವಾನು ದೇಕ್ತಾಸ್‌ನ, ಮೇಂಢ ಖ್ಹಾರಾನ ಮ್ಹೇಲಿನ್, ಮಿಲೈ ಚ಼ಲ್ಯೊಜಾ಼ಸ್‌. ತದೆ ಜ಼ರಕ್‌ ಮೇಂಢಪರ್ ಪಡೀನ್, ಝೂ಼ಂಡ್‌ನ ಛಿದ್‍ರೈನಾಖಸ್. 13ಯೋ ಕೂಲಿಆಳ್‌ ಮಿಲೈನ್‌, ಚ಼ಲ್ಯುಜಾ಼ಸ್‌ ಶನಕತೊ ಯೋ ಖಲಿಏಕ್‌ ಕೂಲಿ ಆಳ್‌ ಹುಯಿರ‍್ಹೊಸ್, ಇನಖ್ಹಾಜೇಸ್ ಮೇಂಢ ಖ್ಹಾರಾನಿ ಬಾರೇಮ ಇನ ಫಿಕರ್ ಕೋ ರ‍್ಹೇಯ್ನಿ. 14-15ಮೇಸ್ ಅಛ್ಛೊ಼ಕುರುಬ ಹುಯಿರೊಸ್; ಬಾನೆ ಮನ ಅಜು಼ ಮೇ ಬಾನ ಮಾಲುಮ್‌ ಕರಿರಾಖ್ಯೊತೆ ಇಮ್ಮಸ್, ಮೇ ಮಾರ ಮೇಂಢಾವ್ನ ಮಾಲುಮ್ ಕರಿರಾಖ್ಯೋಸ್. ಅಜು಼ ಯೊ ಮೇಂಢಾವ್ನೆ ಮನ ಮಾಲುಮ್ ಕರಿರಾಖ್ಯುಸ್. ಅಜು಼ ಮೇ ಮಾರ ಮೇಂಢಾವ್ನಖ್ಹಾಜೆ ಜಾನ್‌ ದ್ಯವಾನ ತಯಾರ್ ಹುಯಿರಿಶ್. 16ಅತ್ರೇಸ್ ಕಾಹೆತೆ, ಆ ಮಂಧಾಮ ಮಳ್ಯುಕೊಂತೆ ಬಿಜು಼ ಖ್ಹಾರು ಮೇಂಢಾಬಿ ಮನ ಛಾ಼, ಇನಾಬಿ ಮೇ ಲೀನಸ್ ಆವ್ಣು, ಇವ್ಣೆ ಮಾರಿ ಅವಾಜ಼್‌ನ ಖ್ಹಮ್‌ಜಾ಼ಸ್‌; ತದೆ ಎಕ್ಕಸ್ ಝೂ಼ಂಡ್‌ ಉಶೆ ಅಜು಼ ಎಕ್ಕಸ್ ಜ಼ಣೊ ಕುರುಬ ರ‍್ಹಿಶೆ.

17“ಮಾರೊ ಬಾ ಮನ ಪ್ಯಾರ್ ಕರಾಸ್ ಶನಕತೊ ಮೇ ಮಾರ ಜಾನ್ನ ಪಾಛು಼ ಮಳ್‌ಶೆ ಕರಿ ಇನ ದೆವುಸ್. 18ಮಾರ ಜಾನ್ನ ಕೋಣ್‌ಬಿ ಮಾರೇಥಿ ಕಾಡಾನ ಕೋ ಹುವಾನಿ. ಮೇ ಮಾರಿ ಖ್ಹುದ್‌ನಿ ಮರ್ಜಿಥಿ ಮಾರ ಜಾನ್ನ ದೆವುಸ್‌ ಮಾರ ಜಾನ್ನ ದ್ಯವಾನ ಅಜು಼ ಪಾಛು಼ ಇನ ಲೀಲ್ಯಾವನ ಮನ ಹಕ್‌ ಛಾ಼. ಆ ಹುಕುಮ್‌ ಮನ ಮಾರ ಬಾಥಿ ಮಳಿರ‍್ಹೀಸ್‌” ಕರಿ ಬೋಲ್ಯೊ.

19ಯೇಸುನಿ ಆ ವಾತೇಥಿ ಯೆಹೂದ್ಯರ್‌ಮ ಬಿಜು಼ ಪಾಛು಼ ಭಾಗ್‌ ಪಡಿಗಯು. 20ಇವ್ಣಾಮ ಘಣು ಜ಼ಣು, “ಅನಾಮ ಭೂತ್‌ ಛಾ಼, ಅನ ದಿವಾನು ಲಾಗಿರ‍್ಹೂಸ್, ತುಮೆ ಶನ ಇನಿ ವಾತೇನ ಖ್ಹಮ್‌ಜೋ಼ಸ್ತೆ?” ಕರಿ ಬೋಲ್ಯು.

21ಬಿಜು಼ ಥೋಡು ಜ಼ಣು, “ಭೂತ್‌ ಧರಿರಾಖ್ಯುತೆ ಅದ್ಮಿ ಅಮ್ನಿ ವಾತೆ ಕೋ ಬೋಲಾನಿ! ಕಿಮ್ ಭೂತ್‌ ಕಾಣಾನ ಡೋಳಾ ದೆಖಾವಾನಿ ಘೋಣಿ ಕರ್‌ಶೇಕಿ ಶು?” ಕರಿ ಬೋಲ್ಯು.

ಯೆಹೂದ್ಯವಾಳು ಯೇಸುನ ಝಿಟ್ಕಾರ‍್ಯುತೆ

22ತದೆ ಯೆರೂಸಲೇಮ್ಮ ಮಂದಿರ್‌ನು ಉಜಾ಼ಖ್ಹ್‌ನಿ ಪೂಜಾ಼ ಚಾ಼ಲುಕರ್ತುಥು, ತದೆ ಠಣ್ಣಾ ದನ್ ಹುಯಿರ‍್ಹಾಥ. 23ಯೇಸು ಮಂದಿರ್‌ನ ಮಹಿ ಸೊಲೊಮೋನ್ನು ಮಂಡಪ್‌ಕನ ಚಾ಼ಲ್ಯೊಫಂಡ್‌ತೋಥೊ. 24ತದೆ ಯೆಹೂದ್ಯವಾಳು ಇನ ಅಶ್‌ಪಿಶ್ ಐನ್, ಭರಾಯು ಅಜು಼, “ಬಿಜು಼ ಕೆತ್ರ ದನ್ ಹಮಾರೆಥಿ ಖ್ಹಾಚ಼ನ ಮುಶ್ಕಿಲ್‌ಮ ರಾಖಿರಾಖಸ್? ತೂ ಕ್ರಿಸ್ತ ಉಶೇತೊ, ಹಮೂನ ನೇರ್‌ವಳಿಥಿ ಬೋಲ್” ಕರಿ ಬೋಲ್ಯು.

25ಯೇಸುನೆ, “ಮೇ ಅಗಾಡಿಸ್ ತುಮೂನ ಬೋಲ್ಯೊ, ಕತೋಬಿ ತುಮೆ ಮನ ವಿಶ್ವಾಸ್‌ ಕೋ ಕರ‍್ಯಾನಿ, ಮಾರ ಬಾನ ನಾಮ್‌ಪರ್‌ ಮೇ ಕರುಸ್ತೆ ಅದ್ಭುತ್ ಕಾಮಸ್ ಮನ ಸಾಕ್ಷಿ ಹುಯಿರ‍್ಹುಸ್‍. 26ಕತೋಬಿ ಮನ ವಿಶ್ವಾಸ್‌ಕರಾಕೊಂತೆ ಇನಖ್ಹಾಜೆ, ತುಮೆ ಮಾರ ಮೇಂಢ ಕೋ ಹುಯಿರಾನಿ 27ಮಾರ ಮೇಂಢ ಮಾರಿ ಅವಾಜ಼್‌ನ ಖ್ಹಮ್‌ಜಾ಼ಸ್‌; ಮನ ಇವ್ಣೆ ಮಾಲುಮ್‌ ಅಜು಼ ಇವ್ಣೆ ಮಾರ ಪೀಠೆ ಆವಸ್. 28ಮಾರ ಮೇಂಢಖ್ಹಾರಾನ ಮೇ ಹರ್‌ಹಮೇಶಾನಿ ಜಿ಼ಂದ್‌ಗಿ ದೀಶ್, ಅಜು಼ ಇವ್ಣೆ ಕದೇಬಿ ಮರ್‌ಶೆ ಕೊಯ್ನಿ. ಕೋಣ್‌ಬಿ ಇವ್ಣುನ ಮಾರ ಹಾತ್‌ಮಾಥು ಛಿನಾವಾನ ಕೋ ಉಶೇನಿ. 29ಆ ಅಖ್ಖಾನ ಮನ ದಿದೋತೆ ಮಾರ ಬಾ ಖ್ಹಾರೇಥಿ ಮೋಟೊ, ಅಜು಼ ಬಾನ ಹಾತ್‌ಮಾಥು ಕೋಣ್‌ಬಿ ಇವ್ಣುನ ಛಿನಾವಾನ ಕೋ ಹುವಾನಿ. 30ಬಾಬಿ, ಮೇ ಎಕ್ಕಸ್ ಹುಯಿರ‍್ಹಾಸ್‌” ಕರಿ ಬೋಲ್ಯೊ.

31ಪಾಛು಼ ಯೆಹೂದ್ಯರ್ ಯೇಸುನ ಮಾರ‍್ನು ಕರಿ ಬಂಡಾ ಚೂ಼ಣಿಲಿದು. 32ತದೆ ಯೇಸುನೆ ಇವ್ಣುನ, “ಬಾನೆ ದಿದೋತೆ ಕೈಯೆಕ್ಕಿ ಅಛ್ಛು಼ ಕಾಮ್ನ ಮೇ ತುಮಾರ ಖ್ಹಾಮ್ಣೆ ಕರಿವತಾಳ್ಯೊ; ಯೋ ಖ್ಹಾರು ಕಾಮ್ಮಾಥು ಕೆಹು ಕಾಮ್ನಟೇಕೆ ಮಾರಪರ್ ತುಮೆ ಬಂಡಾ ಫೇಕ್‌ಣು ಕರಿ ಛಾ಼?” ಕರಿ ಪುಛಾ಼ಯೊ.

33ಯೆಹೂದ್ಯರ್‌ನೆ, “ಹಮೆ ತಾರಪರ್ ಬಂಡಾ ಫೇಕಾನ ಆಯಾತೆ ಅಛ಼್ಛ ಕಾಮ್ನಕರಿ ಕಾಹೆ, ತುನೆ ದೇವ್ನ ಛಿಂಗಾಯೋತೆ ಇನಖ್ಹಾಜೆ, ತೂ ಖಲಿ ಏಕ್‌ ಅದ್ಮಿ ಹುಯಿರ‍್ಹೋಸ್, ಅಜು಼ ತಾರು ತೂಸ್ ದೇವ್ ಕರಿಲ್ಯವಾನ ದೇಖಾಸ್ತೆ ಇನಖ್ಹಾಜೇಸ್ ಬಂಡಾ ಫೇಕಾನ ಆಯಾತೆ!” ಕರಿ ಜವಾಬ್‌ ದಿದು.1 34ತದೆ ಯೇಸುನೆ, “ತುಮೆ ದೇವ್‌ಖ್ಹಾರು ಹುಯಿರ‍್ಹಾಸ್‌’ ಕರಿ ದೇವ್ನೆ ಬೋಲ್ಯೊತೆ ತುಮಾರಿ ಧರ್ಮಶಾಸ್ತ್ರಮ ಲೀಖೈರ‍್ಹುಸ್ ಕೊಯ್ನಿಕಿಶು?”2 ಕರಿ ಜವಾಬ್‌ ದಿದೊ. 35ಧರ್ಮಶಾಸ್ತ್ರ ಕದೇಬಿ ಝೂ಼ಟಿ ಕೋ ಹುವಾನಿ; ದೇವ್ನಿವಚನ್ನ ಲೀರಾಖವಾಳನ ದೇವ್‌ಖ್ಹಾರುಕರಿ ಯೋ ಬೋಲಾನು ರ‍್ಹಯುತೊ 36ಬಾನೇಸ್ ಇನು ಶೊಂತ್‍ಛಿಯ್ಯೊನ ಚೂ಼ಣಿಲೀನ್, ಜಗತ್‌ಮ ಬೋಲಿ ಮೋಕ್‌ಲೈರ‍್ಹೋತೆ ಇನ ತುಮೆ ‘ಮೇ ದೇವ್‌ನೊ ಛಿಯ್ಯೊ ಹುಯಿರ‍್ಹೋಸ್ ಕರಿ ಬೋಲ್ತಾನ, ‘ತೂ ದೇವ್ನಿ ದೂಷಣೆ ಕರಾಸ್’ ಕರಿ ಬೋಲಸ್ತೆ ಶನ? 37ಮೇ ಮಾರೊ ಬಾ ಬೋಲಾತೆ ಕಾಮ್ನ ನಾ ಕರ‍್ಯೊ ಉಶೇತೊ, ಮಾರಿ ವಾತೇನ ನಕೊ ನಂಬೊ. 38ಕತೋಬಿ “ಮೇ ಅಮ್ ಕರ‍್ಯೊತೆ ಇನಖ್ಹಾಜೆ ಮನ ತುಮೆ ವಿಶ್ವಾಸ್‌ ಕೊ ಕರಾನಿ, ಆ ಕಾಮ್ನ ದೇಖಿನ್‌ ತೋಬಿ ನಂಬೊ. ತದೆ ಮಾರ ಮಹಿ ಬಾ ಛಾ಼ ಕರೀಬಿ, ಅಜು಼ ಬಾನ ಮಹಿ ಮೇ ಛೂ಼ ಕರೀಬಿ ತುಮೆ ಮಾಲುಮ್‌ ಕರಿಲಿಶು” ಕರಿ ಬೋಲ್ಯೊ.

39ಇವ್ಣೆ ಬಿಜು಼ ಪಾಛು಼ ಯೇಸುನ ಧರ್‌ನು ಕರಿ ಕರ‍್ಯು, ಕತೋಬಿ ಯೋ ಇವ್ಣೇಥಿ ಛು಼ಕಿನ್ ನಿಕ್ಳಿಗಯೊ.

40ಅನ ಬಾದ್‌ಮ ಯೇಸು ಯೊರ್ದನ್‌ ನದ್ದಿನು ಪಾರ್ಲಿ ಬಾಜೂ಼ಮ ಯೋಹಾನ ಅಗಾಡಿ ಬ್ಯಾಪ್ತಿಸ್ಮ ದೆವಾಡು ಕರ್ತೊಥೋತೆ, ಯೋ ಝ಼ಗೋಕನ ಪಾಛು಼ ಜೈ಼ನ್‌, ಹಿಜ್ಜಾ಼ಸ್ ಥೊ.3 41ಕೈಯೆಕ್ಕಿ ಅದ್ಮಿಖ್ಹಾರು ಇನಾಕನ ಐನ್, “ಯೋಹಾನನೆ ಕದೇಬಿ ಏಕ್‌ ಖ್ಹಣೇದ್‌ಬಿ ಕರ‍್ಯೊಕೊಯ್ನಿ, ಕತೋಬಿ ಆ ಅದ್ಮಿನಿ ಬಾರೇಮ ಯೋಹಾನನೆ ಬೋಲ್ಯೋತೆ ಹರೇಕ್ ವಾತೇಬಿ ಖ್ಹಾಚಿಸ್” ಕರಿ ವಾತೆ ಬೋಲ್ಯು. 42ಅಜು಼ ಯೊ ಝ಼ಗೊ ಕೈಯೆಕ್ಕಿ ಅದ್ಮಿ ಯೇಸುಪರ್ ವಿಶ್ವಾಸ್‌ ಕರ‍್ಯು.