ದೇವ್ನಿ ಖ್ಹಾಚಿ ವಚನ್
ಇಬ್ರಿ 7
ಮೆಲ್ಕಿಜೆದೇಕ್ ಏಕ್‌ ಯಾಜಕ್
ಆ ಮೆಲ್ಕಿಜೆದೇಕ್ ಸಾಲೇಮ್‌ನೊ ರಾಜ಼ ಅಜು಼ ಘಣೊಊಚೊ಼ ಹುಯಿರ‍್ಹವವಾಳೊ ದೇವ್‌ನೊ ಯಾಜಕಬಿ ಹುಯಿರ‍್ಹೊಥೊ. ಅನೆ ರಾಜ಼ವ್ನ ಸಂಹಾರ್ ಕರೀನ್ ಪಾಛೊ಼ ವಳ್ಯವ್ತೊಥೊತೆ ಅಬ್ರಹಾಮ್‌ನ ಮ್ಹೋರೆಹುಯಿನ್ ಇನ ಆಶೀರ್ವಾದ್‌ ಕರ‍್ಯೊ. ಇನ ಅಬ್ರಹಾಮ್‌ನೆ ಯೋ ಜ್ಯುತಿಲೀನ್ ಆಯೊಥೋತೆ ಅಖ್ಖೂಸ್ ಜಿನಖ್ಹ್‌ಮ ದಖ್ಹ್‌ಮ ಏಕ್‌ ಭಾಗ್ನ ದಿದೊ. “ಮೆಲ್ಕಿಜೆದೇಕ್ ಕರಿ ನಾಮ್ನ ನೀತಿನೊ ರಾಜ಼ ಕರೀಬಿ ಅನಕೇಡೆಥು ಸಾಲೇಮ್‌ನೊ ರಾಜ಼ಕತೊ ಸಮಾಧಾನ್ನೊ ರಾಜ಼” ಕರೀಬಿ ಮತ್ಲಬ್. ಇನ ಆಯಕೊಯ್ನಿ ಬಾಕೊಯ್ನಿ, ಖಾನ್‍ದಾನ್‍ಬಿ ಕೊಯ್ನಿ, ಪೈದಾಖ್ಹ್‌ಬಿ ಕೊಯ್ನಿ, ಮರಣ್‌ಬಿ ಕೊಯ್ನಿ, ಯೋ ದೇವ್ನ ಛಿಯ್ಯಾನಿತರ ರ‍್ಹೀನ್, ಹಮೇಶಾನೊ ಯಾಜಕ್‍ಹುಯಿರ‍್ಹೊಸ್. ಆ ಹೈರೋತೆ ಕೆತ್ರೆ ಮಹಾನ್ ಹುಯಿರ‍್ಹೊಸ್ ಕರಿ ದೇಖೊ ಅಪ್ಣೊ ಗುರುಗುರಬ್‌ಲ್ಯೊ ಹುಯಿರ‍್ಹೂತೆ ಅಬ್ರಹಾಮ್‌ನೆ ಜಂಗ್ ಜೂತಿನ್ ಲಾಯೊತೆ ಜಿನಖ್ಹ್‌ಮ ದಖ್ಹ್‌ಮ ಏಕ್‌ ಭಾಗ್‌ ಇನ ದಿದೋನಿ. ಖ್ಹಾಚಮಾಬಿ ಲೇವಿನ ಖೂಮ್ಮ ಯಾಜಕ್ನು ಕಾಮ್ ಲೀರಾಖವಾಳು, ಅದ್ಮಿಥಿ ಕತೊ ಅಬ್ರಹಾಮ್‌ನು ಖಾಂದಾನ್‍ವಾಳಥಿ ದಖ್ಹ್‌ಮ ಏಕ್‌ ಭಾಗ್‍ಖ್ಹಾರು ಲ್ಯಾವಾನ ಧರ್ಮಶಾಸ್ತ್ರಮ ಹುಕುಮ್ ಛಾ಼. ಕತೋಬಿ ಮೆಲ್ಕಿಜೆದೇಕ್ ಲೇವಿನು ಖಾನ್‍ದಾನ್‍ವಾಳನ ಮಳ್ಯೊಹುಯೊ ಕಾಹೆ, ರ‍್ಹಯುತೋಬಿ ಆಬ್ರಹಾಮ್ ಥಿ ದಖ್ಹ್‌ನು ಏಕ್‍ಭಾಗ್ನಲಿದೊತೆ ಕಾಹೆತೆ ದೇವ್‍ಥಿ ವಾಗ್ದಾನ್ ಲೀರಾಖವಾಳೊ ಅಬ್ರಹಾಮ್‌ನ ವಾರ್‌ಖ್ಹೊದಿದೊ. ಆಶೀರ್ವಾದ್‌ ಲ್ಯವಾಳಾಥೀಬಿ, ಆಶೀರ್ವಾದ್‌ ಕರವಾಳೋಸ್ ಊಚೊ಼ ಕರಿ ಬೋಲಾಮ ಶನು ಶಕ್ ಕೊಯ್ನಿ. ದಖ್ಹ್‌ಮ ಭಾಗ್ನ ಲ್ಯವಾಳ ಯಾಜಕ್‌ಖ್ಹಾರು ಏಕ್‌ಕೊಂತೆ ಏಕ್‍ದನ್ ಮರಾಸ್. ಕತೋಬಿ ಆಬ್ರಹಾಮ್‍ಥಿ ದಖ್ಹ್‌ಮ ಭಾಗ್ನ ಲೀರಾಖವಾಳೊ ಮೆಲ್ಕಿಜೆದೇಕ್ ಕೆದೇಬಿ ಜಿವ್ತೊರ‍್ಹಿಶೆ ಕರಿ ಧರ್ಮಶಾಸ್ತ್ರಮ ಬೋಲೈರ‍್ಹುಸ್. ಅಜು಼ ದಖ್ಹ್‌ಮ ಭಾಗ್‍ಅಖ್ಖು ಲೇಸ್ತೆ ಲೇವಿಬಿ ಜಿನು, ಅಬ್ರಹಾಮ್‍ಥಿ ದಖ್ಹ್‌ಮ ಭಾಗ್‍ಅಖ್ಖು ದ್ಯಾವನಿತರಹುಯು. ಕಿಮ್ ಕತೊ, ಮೆಲ್ಕಿಜೆದೇಕ್ ಅಬ್ರಹಾಮ್‌ನ ಮ್ಹೋರೆಹುವಾನಿ ವಖ್ಹ್‌ತೆ, ಲೇವಿ ಬಿಜೂ಼ಬಿ ನಾ ಪೈದಹುಯಿರ‍್ಹೊತೋಬಿ ಅಬ್ರಹಾಮ್‌ನ ಶರೀರ‍್ಮ ಮಳಿರ‍್ಹೋಥೊ. ಇಸ್ರಾಯೇಲ್‌ವಾಳನ ದೆವಾಯುತೆ ಧರ್ಮಶಾಸ್ತ್ರ ಲೇವಿವಾಳನು ಯಾಜಕ್ನು ನಿಯಮ್‌ಪರ್ ಆಧಾರ್ ಹುಯಿರ‍್ಹುಸ್. ಲೇವಿವಾಳನು ಅಮ್ನ ನಿಯಮ್‌ಥೀಸ್ ಪೂರಹುವಾನು ರ‍್ಹಯೂತೊ. ಆರೋನ್ನ ಖಾನ್‌ದಾನ್ನ ಕೊಮಳನಿತೆ, ಮೆಲ್ಕಿಜೆದೇಕ್‌ನಿ ಖಾನ್‌ದಾನ್‌ಮ ಮಳ್ಯೊಹುಯೊ ಬಿಜೇಕ್‍ಜ಼ಣೊ ಯಾಜಕ ಆವಾನಿ ಜ಼ರೂರತ್ ಶಾತ್‌ಥಿ? ಯಾಜಕ್ನು ಪದವಿ ಬದ್ಲಾನು ರ‍್ಹಯೂತೊ. ಧರ್ಮಶಾಸ್ತ್ರ ಜಿನು ಬದ್ಲಾನು ಜ಼ರೂರತ್ ಛಾ಼. ಕತೋಬಿ ಆಹೈರುತೆ ಕಿನಿ ಬಾರೇಮ ಬೋಲೈರ‍್ಹೂಸ್ಕಿ ಯೋ ಹೈರುತೆ ಬಿಜೇಕ್ ಖಾನ್‌ಖೋಜ಼್‌ನ ಮಳ್ಯೊಹುಯೊ. ಯೋ ಖಾನ್‌ಖೋಜ಼್‌ನ ಏಕ್‍ಜ಼ಣೋಬಿ ಚಾ಼ಚ಼ರ್‌ಕನ ಸೇವೆ ಕರ‍್ಯೊಕೊಯ್ನಿ. ಅಪ್ಣೊ ಪ್ರಭು ಯೆಹೂದ ಖಾನ್‍ಖೋಜ಼್‌ಮ ಪೈದಾ ಹುಯಿನ್ ಆಯೊಹುಯೊಕರಿ ಅಛ್ಛಿನಿತರ ಮಾಲುಮ್‍ಪಡಸ್; ಆ ಖಾನ್‌ಖೋಜ಼್‌ನ ಯಾಜಕವ್ನಿ ಬಾರೇಮ ಮೋಶೆನೆ ಶಾತ್ಬಿ ಬೋಲ್ಯೊ ಕೊಯ್ನಿ.
ಮೆಲ್ಕಿಜೆದೇಕನಿಘೊಣಿನೊ ಬಿಜೇಕ್ ಯಾಜಕ್
ಮೆಲ್ಕಿಜೆದೇಕ್‍ನಿತರ ಬಿಜೇಕ್ ಯಾಜಕ್ ಆವ್‍ಶೆಕರಿ ಬೋಲಾನು ರ‍್ಹಯೂತೊ ಯೋ ಬಿಜೂ಼ಬಿ ಘಣು ಆಛ್ಛಿಂತರ ಮಾಲುಮ್‌ ಪಡಸ್ನಿ. ಆ ಯಾಜಕ್ ಶರೀರ್ ಸಂಬಂದ್ ಪಡಾಸ್ತೆ ನಿಯಮ್‌ನಿ ಪರಕ್‍ ಕೊಹುಯುನಿತೆ, ಜಾನ್ನ ಶಕತ್ನ ಆಧಾರ್‌ಥಿ ಮಟಾಕೊಂತೆ ರ‍್ಹಿಶೆ. ಇನಿ ಬಾರೇಮ ತೂ ಅಖ್ಖಾ ಜ಼ಗ್‌ಜ಼ಮಾನಮಾಬಿ, ಮೆಲ್ಕಿಜೆದೇಕ್‌ನಿ ಘೋಣಿನೊ ಯಾಜಕಾಸ್‌ಕರಿ ಧರ್ಮಶಾಸ್ತ್ರ ಬೋಲಸ್. ಶನಕತೊ ಪಹಿಲೆಥೂತೆ ಹುಕುಮ್ ಕಮ್‌ಜೋ಼ರಿಬಿ ಫಾಯಿದೊಕೊಂತೆಬಿ ಹುಯಿರ‍್ಹುತೆಖ್ಹಾಜೆ ಯೊ ಭೀರಿಗು. ಧರ್ಮಶಾಸ್ತ್ರ ಶನಾಬಿ ಪೂರ ಕೊಕರಾನಿ. ಅಜು಼ ಇನ ಬದಲ್ ದೇವ್‌ಕನ ಜೈ಼ನ್ ಲೀಲಾವನುಸ್ ಭರೋಖ್ಹೊ ಹುಯಿರ‍್ಹೊಸ್. ಆ ಬಿಜೂ಼ಬಿ ಬೋಲ್ನುಕತೊ ಆಣ್‌ಕೊಂತೆ ಕಾಹೆ. ಅನಾಹುಯಿನ್ ಲೇವಿವಾಳು ಆಣ್‌ ಕೊಂತೆ ಯಾಜಕ್‍ಬಣ್ಯು. ಯೋತೋಬಿ ಆಣ್‌ಥಿ ಯಾಜಕಹುಯೊ. ಕತೋಬಿ ದೇವ್ ಇನ ಅಮ್ ಬೋಲ್ಯೊ, “ತು ಹರ್‌ಹಗಾಮ್‌ಬಿ ಯಾಜಕ್ ಹುಯಿರ‍್ಹೋಸ್; ಅಜು಼ ಪ್ರಭು ಹುಯಿರೋತೆ ಮೇ ಕೋಲ್‌ನಾಮ್ ಕರಿನ್ ಬೋಲಿರಾಖ್ಯೊಸ್. ಅಜು಼ ಮಾರೊದಿಲ್ನ ಕೊಬದ್‌ಲೈಶ್‌ನಿ ‘ತು ಕದೇಬಿ ಯಾಜಕ ಹುಯಿರ‍್ಹಿಶ್.” ಅನಿ ಫರಕ್ ಶಾತ್‌ಕತೊ ಯೇಸು ಆಣ್‌ನಿ ಜೊ಼ಡ್ಮಾಸ್ ಮಹಾನ್ ಒಪ್ಪಂದಾನ ಆಧಾರ್ ಹುಯೊ. ಬಿಜೇಕ್ ಫರಕ್ ಶಾತ್‌ಕತೊ: ಕೈಏಕ್ ಜ಼ಣು ಯಾಜಕ್ ಹೋಣು ಪಡ್ಯುಥು. ಶನಕತೊ ಲೇವಿವಾಳು ಮರುಕರ್ತುಥುತೆ ಇನಖ್ಹಾಜೆ ಯೊ ಕಾಮ್ ಚ಼ಲಾವನ ಕೊಹುಯುನಿ. ಕತೋಬಿ ಯೇಸುತೋಬಿ ಕದೇಬಿ ಜಿವ್‌ಶೇತೆ ಇನಖ್ಹಾಜೆ ಇನು ಯಾಜಕ್ ಧರಮ್ ಕೋಣ್‌ಬಿ ಕರಾನ ಕೊಹುವಾನಿ. ಇನಖ್ಹಾಜೆ ಯೋ ಇನೇಥಿ ದೇವ್‌ಕನ ಆವಾಳಾನ ಪೂರ ಬಚಾ಼ಡನ ಶಕತ್‌ವಾಳೊ ಹುಯಿರ‍್ಹೊಸ್. ಶನಕತೊ ಇವ್ಣಖ್ಹಾಜೆ; ದೇವ್‌ಕನ ಬಿಂತೀಕರಾನ ಕೆದೇಬಿ ಜಿವಿರ‍್ಹವಾಳೊ ಹುಯಿರ‍್ಹೊಸ್. ಇನಖ್ಹಾಜೆ ಅಪ್ಣುನ ಹೋಣುತೆ ಇನ ಪೂರಕರಾವಳೊ ಮಹಾಯಾಜಕ ಹುಯಿರ‍್ಹೊಸ್ ಪರಿಶುದ್‌ಬಿ ದೋಷ್‍ಕೊಯ್ನಿತೇಬಿ, ಮೈಲಾಪ್‍ಕೊಯ್ನಿತೆಬಿ, ಪಾಪಿಮ ಮಳಾಕೊಂತೆ ನಿರ‍್ವಾಳೊಬಿ ಹುಯಿರ‍್ಹವಾಳೊಬಿ ಆಕಾಶ್ ಮಂಡಲ್‍ಥೀಬಿ ಊಚಾ಼ಮ ರ‍್ಹವಾಳೊ. ಪಹಿಲೆ ಇವ್ಣ ಪಾಪ್ನ ಪರಿಹಾರ‍್ನ ಖ್ಹಾಜೆ ಇನಪಾರ್ ಅದ್ಮಿವ್‌ನ ಪಾಪ್ನ ಪರಿಹಾರ‍್ನಖ್ಹಾಜೆ; ಬಲಿ ಸಮರ್ಪಣ್‌ ಕರಾಸ್ತೆ ಲೇವಿನ ಮಹಾಯಾಜಕರ್‌ನಿತರ ಆ ಹೈರುತೆ ಹರೇಕ್ ದನ್‌ಬಿ ಬಲಿಖ್ಹಾರು ಅರ್ಪಣ್ ಕರಾನು ಜ಼ರೂರತ್ ಕೊಯ್ನಿ. ಶನಕತೊ ಆ ಹೈರುತೆ ಇನ ಯೋಸ್ ಅರ್ಪಣ್ ಕರಾನಿವಖ್ಹ್‌ತೆ ಅಖ್ಖಾನಿ ಪಾಪ್ನಖ್ಹಾಜೆ ಎಕ್ಕಸ್ ಹಲ್ಲ ಬಲಿ ಅರ್ಪಣ್ ಕರ‍್ಯೊ. ಧರ್ಮಶಾಸ್ತ್ರ ಕಮ್‍ಜೋ಼ರಿ ಆದ್ಮಿವ್ನ ಮಹಾಯಾಜಕರ್‌ ಕರೀನ್ ನೇಮಕ್ ಕರಾಸ್. ಕತೋಬಿ ಧರ್ಮಶಾಸ್ತ್ರನ ವಾರ್ ಆಣ್‌ನಿ ಜೋ಼ಡ್ಮ ಆಯೂತೆ ವಚನ್ ಕದೆಕದೇಬಿ ಅಖ್ಖೂಸ್ ಪೂರ ಹುಯಿರೋಸ್ತೆ ಛಿಯ್ಯಾನಸ್ ಯಾಜಕ ಕರಿನ್ ನೇಮಕ್ ಕರಿರಾಖ್ಯುಸ್.
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.