ಇಬ್ರಿ 4

1ಅಮ್‌ರ‍್ಹವಾಪರ್, ದೇವ್ನಿ ಆರಾಮ್ಮ ಮಳೆಜಾ಼ಯ್ ಕರಿ ಛಾ಼ತೆ ವಾಗ್ದಾನ್ ಬಿಜೂ಼ಬಿ ಇನಖ್ಹಾಜೆ ತುಮಾರಮ ಕೋಣ್‌ಬಿ ಇನಾಮ ಛು಼ಕಿನಾಜಾ಼ವ್ಣುತೆ ಅಪ್ಣೆ ಡರ್‌ ಭಕ್ತಿಥಿ ರ‍್ಹಿಯೆ. 2ಇಸ್ರಯೇಲ್‌ವಾಳಾನ ಸುವಾರ್ತೆ ಬೋಲಾಯುತೆ ತಿಮ್‌ ಹಮುನಾಬಿ ಬೋಲಾಯು. ಕತೋಬಿ ಯೊ ಹಗಾಮ್ಮ ಇವ್ಣೆ ಭರೋಖ್ಹಾಥಿ ಖ್ಹಮ್‌ಜ್ಯುಕೊಂತೆ ಇನಖ್ಹಾಜೆ ಇವ್ಣುನ ಫಾಯಿದೊ ಕೊಹುಯುನಿ. 3ಹಮ್ಕೆ ವಿಶ್ವಾಸ್ ಕರಾವಾಳ ಅಪ್ಣೆಸ್ ಯೊ ಅರಾಮ್‌ನಿ ಝ಼ಗೋಮ ಮಳಾವಾಳ ಹುಯಿರ‍್ಹಾಸ್. ಶನಕತೊ ಜಗತ್ನ ಪಹಿಲೇಥು ಇನು ಉಬ್‍ಜಾ಼ವ್ಣಿನ ಕಾಮ್‌ಖ್ಹಾರು ಖತಮ್ ಹುಯ್ಗುತೋಬಿ ‘ಇವ್ಣೆ ಮಾರಿ ಆರಾಮ್ನಿ ಝ಼ಗೋಮ ಮಳ್‍ಶೇಸ್‍ಕೊಯ್ನಿ ಕರಿ ಮೆ ಇರಾದೇಥಿ ಆಣ್‌ಲಿದೊ’ ಕರಿ ಬೋಲಿರಾಖ್ಯೊಸ್ನಿ. 41ಕಿಜ್ಜಾ಼ಕಿ ಏಕ್‌ ಬಾಜು಼ ಉಬ್‍ಜಾ಼ವ್ಣಿನ ಖ್ಹಾತ್ನೆ ದನ್ನಬಾರೇಮ, ದೇವ್ನೆ ಇನು ಕಾಮ್‌ಖ್ಹಾರು ಖತಮ್ ಕರಿನ್, ಖ್ಹಾತ್ನ ದನ್ಮ ಅರಾಮ್‌ ಕರ‍್ಯೊಕರಿ ಲಿಖೈರ‍್ಹುಸ್. 5“ಅವ್ಣೆ ಮಾರಿ ಆರಾಮ್ನಿ ಝ಼ಗೋಮ ಮಳ್‍ಶೇಸ್‍ಕೊಯ್ನಿ” ಕರಿ ಏಕ್‍ಭಾಗ್‍ಮ ಯೊ ಬಿಜು಼ಪಾಚು಼ ಬೋಲಿರಾಖ್ಯೊಸ್. 6ಪಹಿಲೆ ಸುವಾರ್ತೆ ಖ್ಹಮ್‍ಜ್ಯೂಕಿ ಇವ್ಣೆ ಆ ಅರಾಮ್‌ ಕೋಲಿದುನಿ ಶನಕತೊ ಇವ್ಣೆ ಇನ ಅವಿಧೇಯ ಹುಯಿರ‍್ಹುಥು. ಇನಖ್ಹಾಜೆ ದೇವ್ನ ಆರಾಮ್ನ ಲೀಲ್ಯಾವನ ಬಿಜಾ಼ನ ಹುಕುಮ್‌ ದಿದೊ. 7ಬಿಜು಼ಪಾಛೊ಼ ಘಣಾವರಖ್ಹ್‌ನ ಬಾದ್ಮ ಯೋ ದಾವೀದ್‍ಥಿ ‘ಆಜ಼್‌ನೊ ದನ್’ ಕರಿ ಬಿಜೋ಼ದನ್ನ ಬೋಲಿದಿದೊ, ಕಿಮ್‌ಕತೊ ತುಮೆ ಆ ವಖ್ಹತ್ ದೇವ್ನ ಗಳಾನ ಕಾನ್‌ ಲಗಾಡವಾಳ ರ‍್ಹಯಾತೊ ತುಮಾರ ದಿಲ್ನ ಕಠಣ್ ನಕೊ ಕರಿಲೆವೊ! ಕರಿ ಬೋಲಸ್.2 8ಯೆಹೋಶುವನೆ ಯೋ ಅದ್ಮಿವೋನ ಯೋ ಅರಾಮ್‌ನ ಮಹಿ ಲೀಗಯೊಹೊತ್ತೊ, ದೇವ್‍ಬಿಜೇಕ್‍ ದನ್ನಿಬಾರೇಮ ಪಾಛ಼ ಬೋಲ್ಯೊಹೊತ್ತ್‌ಕೊಯ್ನಿನಿ. 9ಇನಖ್ಹಾಜೆ ದೇವ್ನ ಅದ್ಮಿನ ಸಬ್ಬತ್‌ ಕರಿ ಅರಾಮ್‍ನದನ್ ಬಿಜೂ಼ಬಿ ಛೆ. 10ದೇವ್ ಇನ ಕಾಮ್ನ ಖ್ಹತಮ್‍ಕರೀನ್ ಕಿಮ್ ಆರಾಮ್‍ ಕರ‍್ಯೋಕಿ ಇಮ್ಮಸ್ ಇನ ಆರಾಮ್ಮ ಆವಾಳೂಬಿ ಇವ್ಣ ಕಾಮ್ನ ಖ್ಹತಮ್‍ಕರೀನ್ ಅರಾಮ್ ಕರ್ಶೆ. 11ಇನಖ್ಹಾಜೆ ಅಪ್ಣೆ ಆ ಅರಾಮ್ ಲ್ಯವಾನಟೇಕೆ ಅಪ್ಣೆ ಕೋಶಿಶ್ ಕರಿಯೆ. ಅಪ್ಣಾಮ ಏಕ್‍ಜ಼ಣತೋಬಿ ಇವ್ಣಿನಿಘೋಣಿ ಅವಿಧೇಯ ಹುಯಿನ್ ಮಟಿನಾಜಾ಼ವ್ಣುತೆ ಇಮ್‌ ರ‍್ಹಿಯೆ. 12ದೇವ್ನಿ ವಚನ್ ಜಿವ್ತಜಾನ್ನು, ಕಾಮ್ ಕರ್ತುರ‍್ಯವಾನುಬಿ ಅಜು಼ ಖಿವಿ ಬೇಮ್ಹೋಡಾನಿ ತಲ್ವಾರ್‌ಥೀಬಿ ಚಾ಼ಲ್ತು ರ‍್ಹೀನ್, ಜಾನ್ನಬಿ ಆತ್ಮಾನ, ಕೀಲ್ ಬಿಶ್ಶಾನಾಬಿ ಅಲಕ್‍ ಕರಾಯೆತ್ರೆ ಪರಕ್ಮ ಪೇಶಿ ನಿಕ್‌ಳ ಎತ್ರೆಬಿ, ದಿಲ್ನಿಖ್ಹೂಜ್‍ನಾಬಿ ಸೋಚ್ ಸಮಜ್‌ನಾಬಿ ಪರ್ಖಾನು ಹುಯಿರ‍್ಹುಸ್. 13ಇನಿ ನಜ಼ರ‍್ಮ ಓಠೆ ಹುಯಿರ‍್ಹುತೆ ಖಿವಿ ಉಬ್‍ಜಾ಼ವ್ಣಿಬಿ ಕೊಯ್ನಿ. ಇನ ಡೋಳೇಥಿ ಲಪಿಹುಯು ಖಿವೂಬಿ ಕೊಯ್ನಿ. ಇನ ಡೋಳಾಮ ಅಖ್ಖೂಬಿ ಖುಲಮ್‌ಖುಲ್ಲ ಛಾ಼. ಅಜು಼ ಎಥ್ರಾನವಾಳನ ಅಪ್ಣೆ ಗಣ್ತಿ ದೇವ್ಣುಪಡಾಸ್.

ಯೇಸು ಮಹಾನ್ ಪ್ರಧಾನ ಯಾಜಕ

14ಆಬ್‌ಮಾಕರಿ ಗಯೋತೆ ದೇವ್‌ನೊ ಛಿಯ್ಯೊಹುಯಿರೊತೆ ಯೇಸುಸ್ ಅಪ್ಣುನ ಏಕ್‌ ಮಹಾಯಾಜಕ್ ಹುಯಿರ‍್ಹೊಸ್. ಇನಖ್ಹಾಜೆ ಅಪ್ಣೆ ಛಾ಼ತೆ ವಿಶ್ವಾಸ್ ಘಟ್ ಧರಿಲಿಯೆ. 15ಶನಕತೊ ಅಪ್ಣುನ ಛಾ಼ತೆ ಮಹಾಯಾಜಕ್ ಅಪ್ಣಿ ಕಮ್‍ಜೋ಼ರಿಮ ಅಪ್ಣುನ ಗೋರ್‌ ವತಳಾಕೊಂತೆ ರ‍್ಹೆಯಿಕೊಯ್ನಿ. ಯೊ ಹರೇಕ್ ವಾತೆನಿ ಬಾರೇಮ ಅಪ್ಣಿನಿತರಸ್ ಶೋದನೆ ಪಡ್ಯೊಹುಯೊ. ಕತೋಬಿ ಇನೆ ಪಾಪ್ ಕರ‍್ಯೊಸ್ ಕೊಯ್ನಿ. 16ಇನಖ್ಹಾಜೆ ಅಪ್ಣೆ ಬರಾಬರ್‌ನಿ ವೇಳ್ಮ ಗೋರ್‌ನ ಲಿಲ್ಯಾವನಖ್ಹಾಜೆ ಇನಿ ವಾರ್‌ಖ್ಹೇಥಿ ಅಪ್ಣುನ ಬರಾಬರ್‌ನಿ ವೇಳ್ಮ ಮದತ್ನಖ್ಹಾಜೆ ಹಿಮ್ಮಥ್ಥಿ ಇನಿ ಕೃಪಾಸನ್ನ ಖ್ಹಾಮ್ಣೆ ಅಯ್ಯೆ.