ಗಲಾತ್ಯ 4

1ಕತೋಬಿ ಮೇ ಶಾತ್‌ಬೋಲುಸ್ ಕತೊ ಹಕ್‍ದಾರ್ ರ‍್ಹವಾಳೊ ಯೋ ಇನು ಧನ್‌ದೌಲತ್ನ ಯಜಮಾನ್ ಹುಯಿರ‍್ಹೊತೋಬಿ ಅಡ್ಡಾಣಿ ರ‍್ಹಾವಾಲಗು ಇನು ರ‍್ಹಯುತೋಬಿ ಯೊ ಆಳ್‌ನಿತ್ರಾಸ್ ರ‍್ಹೇಸ್. 2ಬಾನೆ ಖ್ಹಣೇದ್ ಕರ‍್ಯೊತೆ ವಖ್ಹತ್‌ಲಗು ಪಾಲನ್‌ಕರಾವಳನಿ ಅಜು಼ ಚ಼ಲಾವವಾಳಾನಿ ಚ಼ಪ್ಪಣ್‌ಮ ರ‍್ಹೇಣು. 3ಇಮ್ಮಸ್ ಅಪ್ಣೇಬಿ ಅಡ್ಡಾನಿ ರ‍್ಹವಾನಿ ವಖ್ಹ್‌ತೆ ಆ ಜಗತ್ನಿ ನಿಯಮ್‌ಥಿ ಚ಼ಲಾವತೆ ಸೇವೆನ ಅಧೀನ್ ಹುಯಿರ‍್ಹಾಥ. 4ಕತೋಬಿ ಬರಬರ‍್ನಿ ವಖ್ಹತ್ ಆವಖ್ಹತರ್ ದೇವ್ನೆ ಇನ ಛಿಯ್ಯಾನ ಮೋಕ್‌ಲ್ಯೊ.ಯೊ ಏಕ್‌ ತಯೇಡಾಮ ಪೈದಹುಯಿನ್ ಧರ್ಮಶಾಸ್ತ್ರನಿ ಅಧೀನ್‍ಮ ಆಯೊ. 5ಅನೇಥಿ ಯೊ ಧರ್ಮಶಾಸ್ತ್ರನಿ ಚ಼ಪ್ಪಣ್‌ಮ ರ‍್ಹವಾಳನ ಛೋ಼ಡಾವ್ಣುಕರಿ ಆಯೊ. ಅನಖ್ಹಾಜೇಥಿ ಅಪ್ಣೆ ದೇವ್ನ ಲಡ್ಕಾ ಹುಯ. 6ತುಮೆ ಛಿಯ್ಯಾಹುಯಿರ‍್ಹಾತೆ ಖ್ಹಾಜೆ ದೇವ್ನೆ, “ಬಾ! ಬಾ!” ಕರಿ ಚಿಕ್ರಾಸ್ತೆ ಇನ ಛಿಯ್ಯಾನ ಆತ್ಮಾನ ಅಪ್ಣ ದಿಲ್ಮ ಮೋಕ್‌ಲ್ಯೊ. 7ಅಮ್‌ರ‍್ಹವಾಪರ್ ಅಜು಼ ಸೇವಕ್ ಕಾಹೆ, ಛಿಯ್ಯೊ ಹುಯಿರ‍್ಹೋಸ್. ಛಿಯ್ಯೊ ಕರಿ ಬೋಲಾಪರ್ ದೇವ್‌ನೊ ವಾರಿಸ್‌ವಾಳೊಬಿ ಹುಯಿರ‍್ಹೋಸ್.

ಗಲಾತ್ಯವಾಳನಿ ಬಾರೇಮ ಪೌಲಾನಿ ನಿಘ್ಯ

8ಅಗ್ಗಳ್ ತುಮೆ ದೇವ್ನ ಮಾಲುಮ್‌ ಕರ‍್ಯಾಕೊಂತೆ, ದೇವಸ್ ಕಾಹೆತೆ ಇವ್ಣುನ ಗುಲಾಮ್ ಹುಯಿರ‍್ಹಾಥ.1 9ಹಮ್ಕೆತೋಬಿ ತುಮೆ ದೇವ್ನ ಮಾಲುಮ್‌ ಕರಿರಾಖ್ಯಾಸ್. ವಿಶೇಷ್‌ಥಿ ದೇವ್ನೆ ತುಮುನ ಮಾಲುಮ್ ಕರಿರಾಖ್ಯೋಸ್. ಅಮ್‌ರ‍್ಹವಾಪರ್ ತುಮೆ ಕಾಮ್ನ ಕೊಯ್ನಿತೆ, ಫಾಯಿದೊ ಕೊಯ್ನಿತೆ, ಜಗತ್ನಿ ನಿಯಮ್‌ಭಣಿ ತುಮೆ ಶನ ಫರೋಸ್? ಪಾಛು಼ ಇನ ಗುಲಾಮ್ ಹೋಣುಕರಿ ಛಾ಼ ಕಿಶು? 10ತುಮೆ ಯೋಯೊ ದನ್ನಾಬಿ, ಮಹಿನನಬಿ, ವೇಳ್ನಾಬಿ, ಅಜು಼ ಹಗಾಮ್ನ ಬಾರೇಮ ಇನಾಸ್ ತುಮೆ ಚ಼ಲಾವವಾಳ ಹುಯಿರ‍್ಹಾಥ. 11ಮೇ ತುಮಾರಖ್ಹಾಜೆ ಮ್ಹಿನತ್ ಕರ‍್ಯೊತೆ ಫಲ್‌ಕೊಂತೆ ಹುಯ್ಗುಕಿಶುಕಿ ಕರಿ ತುಮಾರಿ ಬಾರೇಮ ಡರ್‌ ಹುವಾಸ್. 12ಭೈಯೇ ಭೇನೆವೊ, ಮೆ ತುಮಾರಿನಿ ಘೋಣಿ ಹುಯೋತೆ ಇಮ್ಮಸ್ ತುಮೇಬಿ ಮಾರಿನಿತರಸ್ ಹೋಣುಕರಿ ತುಮುನ ಗಿಂಗೈಲೆವುಸ್. ತುಮೆ ಮನ ಶಾತ್ಬಿ ಠಗಾಯ ಕೊಯ್ನಿ. 13ಮನ ಶರೀರ್‌ಮ ಅಛ್ಛು಼ ಕೋಥುಂತೆ ಇನಖ್ಹಾಜೆ ತುಮಾರಮ ರ‍್ಹೀನ್ ಪಹಿಲಿ ಬಾರ್‌ಮ ತುಮುನ ಸುವಾರ್ತೆ ಬೋಲಿ ವತಾಳ್ಯೊಥೋತೆ ತುಮುನ ಮಾಲುಮ್‌ ಛಾ಼. 14ಮಾರಿ ಶರೀರ್‌ನಿ ರ‍್ಹಾಥಿ ತುಮುನ ಬೇಜಾರ್ ಹುವಾನು ರ‍್ಹಯುತೋಬಿ ಧಚ಼್‌ಕಾಯ ಕೊಯ್ನಿ, ಝಿಟ್ಕಾರ‍್ಯ ಕೊಯ್ನಿ, ಮನ ದೇವ್ನ ದೂತನಿತರ ಕ್ರಿಸ್ತಯೇಸುನಿ ಘೋಣಿಸ್ ಉಪಚಾರ್ ಕರ‍್ಯಾ. 15ಯೋ ವಖ್ಹತ್‌ಮ ಯೋ ಏಕ್‌ ಖುಶಿಕರಿ ಲಹಿರಾಖ್ಯಾಥಾನಿ, ಹಮ್ಕೆ ಯೊ ಖ್ಹಯಾಲ್ ಕಿಜ್ಜಾ಼ ಛಾ಼? ತದೆ ಹೋಣುಕತೊ ತುಮಾರ ಡೋಳಾನಸ್ ಉಖ್ಡೀನ್ ಮನ ದಿದಾಹೋತ್ತ್ ಕರಿ ಮೇ ಸಾಕ್ಷಿ ಬೋಲುಸ್. 16ಅಮ್‌ರ‍್ಹವಾಪರ್ ಮೆ ಖ್ಹಾಚಿಬೋಲಾಥಿ ತುಮುನ ವಹೇರ‍್ಯೊ ಹುಯೊ ಕಿಶು?2 17ಯೋ ಮಾರು ವಿರೋದಿ ಖ್ಹಾರು ತುಮುನ ದೋಸ್ತ್ ಕರಾವ್ಣುಕರಿ ದಿಲ್‌ ಲಗಾಡು ಕರಾಸ್ ಕತೋಬಿ ಅಛ್ಛಾ಼ನಖ್ಹಾಜೆ ಕಾಹೆ. ತುಮೆ ಇವ್ಣುನ ಕಿಮ್ ಮನ್‌ಲಗಾಡ್ಣುಕರಿ ಕರಸ್ಕಿ ಇಮ್ಮಸ್ ಇವ್ಣೇಬಿ ತುಮುನ ಮಾರೇಥಿ ಅಲಕ್ ಕರ್ನುಕರಿ ಕೋಶಿಶ್ ಕರುಕರಸ್. 18ತುಮಾರಿ ಜೋ಼ಡೆ ರ‍್ಹವಾನಿವಖ್ಹ್‌ತೆ ಖಲಿಕಾಹೆ ಕೆದೇಬಿ ಅಛ್ಛು಼ ವಾತೇವ್ನ ಖ್ಹಾಜೆ ತುಮೆ ಮನ್ ಲಗಾಡನು ಅಛ್ಛೂ಼ಸ್. 19ಮಾರ ಪ್ಯಾರ್‌ನ ಲಡ್ಕಾವ್‍ನಿಘೋಣಿ ಛಾ಼ತೆ ಗಲಾತ್ಯವಾಳವೊ, ಆಯ ಇನ ಲಡ್ಕಾನಖ್ಹಾಜೆ ಜ಼ಣತ್‌ನಿ ಅಜ಼ ಪಡಾನಿಘೋಣಿ, ಕ್ರಿಸ್ತ ಯೇಸುನು ಚಾ಼ವ್‌ಭಾವ್ ತುಮಾರಮ ಆವಲಗು ತುಮಾರ ಖ್ಹಾಜೆ ಮೆ ಎಥ್ರಾನಿಸ್ ಅಜ಼ ಪಡುಕರುಸ್. 20ತುಮಾರಿ ಬಾರೇಮ ಶಾತ್‌ಕರ‍್ನುಕರಿ ಮನ ಸೋಚಾನ ಕೊಹುಂಕರಾನಿ. ಬೋಲ್ನುಕತೊ, ತುಮಾರ ಬೀಚ್ಮಾಸ್ ರ‍್ಹೀನ್ ಮಾರ ವಾತೆನಿ ಲಬೂಜ಼್‌ನ ಬದ್ಲಾಯೊಹೊತ್ತೊ ಅಛ್ಛು಼ ರ‍್ಹಿಯುಹೊತ್ ಕಿಶುಕಿ!

ಸಾರನಿ ಅಜು಼ ಹಾಗರ‍್ನಿ ಉದಾಹರಣೆ

21ಧರ್ಮಶಾಸ್ತ್ರನ ಹೇಟಹುಯಿನ್ ಚಾ಼ಲಾನ ಹರ್ಖ್ಹವಾಳ, ಧರ್ಮಶಾಸ್ತ್ರ ಶಾತ್‌ ಬೋಲುಕರಸ್ ಕರಿ ತುಮೆ ಖ್ಹಮ್‌ಜ್ಯ ಕೊಯ್ನಿಕಿಶು? ಮನ ಜ಼ವಾಬ್ ದೇವೊ. 22ಇನಾಮ ಲಿಖೈರ‍್ಹುಸ್ ಶಾತ್‌ಕತೊ ಅಬ್ರಹಾಮ್‌ನ ಬೇ ಪರ್ಖ್ಹಾ ಲಡ್ಕಾಥ. ಏಕ್‌ ಜ಼ಣೊ ದಾಸಿನ ಪೈದಹುಯೊತೆ, ಬಿಜೇಕ್ ಜ಼ಣೊ ಛುಟ್ಕಾರ್‌ಥಿ ರ‍್ಹವಾಳಿನ ಪೈದಹುಯುತೆ.3 23ದಾಸಿನೊ ಛಿಯ್ಯೊ ಶರೀರ್‌ನ ಸಂಬಂಧ್‌ಥಿ ಪೈದಹುಯುತೆ, ಛುಟ್ಕಾರ್‌ಥಿ ರ‍್ಹವಾಳಿನೊ ಛಿಯ್ಯೊ ವಾಗ್ದಾನ್‌ಥೀಸ್ ಹುಯೋತೆ. 24ಆ ವಾತೆಖ್ಹಾರು ಮಾಲುಮ್ ಕರಾನು ಹುಯಿರ‍್ಹುಸ್. ಕಿಮ್‌ಕತೊ ಯೋ ಭೇ ತಯೇಡ ಬೇ ಒಪ್ಪಂದ ಹುಯಿರ‍್ಹುಸ್. ಏಕ್‌ ಒಪ್ಪಂದ ಸೀನಾಯಿ ಪರ್ಭತ್ ಉಬ್ಜಿನ್ ಗುಲಾಮ್ ಹುಯಿನ್ ರ‍್ಹವಾನ ಲಡ್ಕಾನ ಪೈದಕರಸ್ತೆ; ಯೋಸ್ ಹಾಗರ್. 25ಹಾಗರ್ ಕತೊ ಅರಬ್‌ಮ ಛಾ಼ತೆ ಸೀನಾಯಿ ಪರ್ಭತ್‌ನ ವತಾಳಸ್‍. ಹಮ್ಕೇನು ಯೆರೂಸಲೇಮ್ ಖ್ಹಯೇರ‍್ನಿಮತ್ ಹುಯಿರ‍್ಹೀಸ್. ಶನಕತೊ ಯೊ ಹೈರಿತೆ ಇನ ಅದ್ಮಿಯೇನ ಜೋ಼ಡ್ಮ ಹಮ್ಕೆ ಸೇವೆಕರವಾಳಿ ಹುಯಿರ‍್ಹೀಸ್. 26ಕತೋಬಿ ಸೊರ್ಗಾನು ಯೆರೂಸಲೇಮ್ ಕರಿ ಬೋಲವಾಳಿ ಛುಟ್ಕಾರ್‌ವಾಳಿ ಹುಯಿರ‍್ಹೀಸ್. ಆಸ್ ಅಪ್ಣಿ ಆಯ. 27ಜ಼ಣಿಕೊಂತೆ ವಾಂಝಿ ತಯೇಡ ಶಂತೋಖ್ಹ್‌ಕರ್ ಜ಼ಣತ್‌ನಿ ಅಜ಼ ಮಾಲುಮ್‌ಕೊಂತೆ ರ‍್ಹವಾಳಿ, ಖುಷಿಥಿ ಊಚು಼ ಅವಾಜ಼್‌ಥಿ ಚಿಕರ್, ಬಾವ್ರಿ ರ‍್ಹಾವವಾಳಿಥೀಬಿ ಬಾವ್ರಿ ಮ್ಹೇಲಿಹುಯಿನ ಲಡ್ಕಾ ಜಾ಼ಖ್ಹತ್‌ಕರಿ ಲೀಖೈರ‍್ಹೂಸ್‌ನಿ.4 28ಭೇನೆ ಭೈಯೇವೊ, ಅಪ್ಣೆ ಇಸಾಕನಿ ಘೋಣಿ ವಾಗ್ದಾನ್ನ ಫಲ್ನ ಲಡ್ಕಹುಯಿರ‍್ಹಾಸ್. 29ಕತೋಬಿ ಪಹಿಲೆ ಶರೀರ್‌ನ ಸಂಬಂಧ್‌ಥಿ ಪೈದ ಹುಯಿರ‍್ಹಾವಳೊ ದೇವ್ನ ಆತ್ಮಾನಿ ಶಕಥ್ಥಿ ಪೈದಹುಯಿರ‍್ಹಾವಳನ ಖ್ಹತಾಪ್ಣಿ ದ್ಯವನಿತರಸ್ ಹಮ್ಕೇಬಿ ಹೂಕರಸ್.5 30ಕತೋಬಿ ಪವಿತ್ರ ದಪ್ತರ್‌ಮ ಶಾತ್‌ಬೋಲಾಸ್? “ದಾಸಿನಾಬಿ ಇನ ಛಿಯ್ಯಾನಾಬಿ ಭಾರ್‌ಕಾಡ್‌. ದಾಸಿನೊ ಛಿಯ್ಯೊ ಛುಟ್ಕಾರ್‌ಥಿ ರ‍್ಹವಾಳಿನ ಛಿಯ್ಯಾನ ಜೋ಼ಡೆ ಭಾಗ್‌ ಲ್ಯವಾಳೊ ನಾಹುಯಿರ‍್ಹೇವ್ಣು” ಕರಿ ಬೋಲಾಸ್.6 31ಇಮ್ಮಸ್ ಭೈಯೇ ಭೇನೆವೊ, ಅಪ್ಣೆ ದಾಸಿನ ಲಡ್ಕಾಕಾಹೆ, ಕತೋಬಿ ಛುಟ್ಕಾರ್‌ವಾಳಿನ ಲಡ್ಕಾ ಹುಯಿರ‍್ಹಾಸ್.