ದೇವ್ನಿ ಖ್ಹಾಚಿ ವಚನ್
ಎಫೆಸ 4
ಶರೀರ್ಮ ಏಕ್ ಹುಯಿರ‍್ಹಾವನು
ಇನಖ್ಹಾಜೆ ಪ್ರಭುನ ಸೇವೆನಖ್ಹಾಜೆ ಖೈದಿ ಹುಯಿರ‍್ಹೊಸ್ತೆ ಮೆ ತುಮೂನ ಬೋಲಿಲೆವ್‌ಸ್ ಶಾತ್‌ಕತೊ ದೇವ್ ತುಮುನ ಬುಲಾವನಿವಖ್ಹ್‌ತೆ ತುಮೆ ದೇವ್‍ಥಿ ಬುಲೈರಾಸ್ತೆಖ್ಹಾಜೆ ಯೊ ಬುಲಾವ್ಣಿನ ಲ್ಹಾಯೇಕ್ ಹುಯಿನ್ ಜಿವ್ಣು ಕರೊ. ತುಮೆ ದೇವ್‌ಮ ಬುಲಾಯತೆ ಇನಖ್ಹಾಜೆ ಹೇಟು ಹುಯಿರ‍್ಹವಾನು, ಶೇದೇವ್‌ಥಿ ರ‍್ಹವಾನು, ಖ್ಹಮಾಳಿರ‍್ಹವಾಳ ಹುಯಿನ್ ಪ್ಯಾರ್‌ಥಿ ಏಕ್‌ಥಿ ಏಕ್ ಖ್ಹಮಾಳಿರ‍್ಹವೊ. ಸಮಾಧಾನ್ನಿ ಬಂಧನ್ಮ ಭಂದೈರ‍್ಹವಾಳ ಹುಯಿನ್ ಪವಿತ್ರಾತ್ಮಥಿ ಹುವಾಸ್ತೆ ಒಗ್ಗಟ್‌ನ ಬಚಾ಼ಡಾನಖ್ಹಾಜೆ ಮನ್‌ಲಗಾಡೊ. ತುಮೆ ದೇವ್‌ಮ ಬುಲಾವನಿವಖ್ಹ್‌ತೆ ಖ್ಹಾರು ಎಕ್ಕಸ್ ಶರೀರ್ಮ ಮಳಿರ‍್ಹವಾಳಬಿ, ಎಕ್ಕಸ್ ಪವಿತ್ರಾತ್ಮಥಿ ರ‍್ಹವಾಳಬಿ, ಎಕ್ಕಸ್ ಭರೋಖ್ಹಾನಟೇಕೆ ಬುಲೈರ‍್ಹಾಸ್. ತುಮುನ ಯೋ ಎಕ್ಕಸ್ ಪ್ರಭು, ಎಕ್ಕಸ್ ವಿಶ್ವಾಸ್, ಎಕ್ಕಸ್ ಬ್ಯಾಪ್ತಿಸ್ಮ, ಬಾ ಹುಯಿರ‍್ಹೊಸ್ತೆ ಎಕ್ಕಸ್ ದೇವ್‌ಬಿ, ಅಖ್ಖಾನ ಪ್ರಭು ಹುಯಿರ‍್ಹವಾಳೊ, ಖ್ಹಾರೇಥಿಸ್ ಕಾಮ್ ಕರಾವವಾಳೊಬಿ, ಖ್ಹಾರಮಸ್ ಜಿವ್ಣುಕರವಾಳೊ ಹುಯಿರ‍್ಹೋಸ್. ಕತೋಬಿ ಕ್ರಿಸ್ತನಿ ವರಾನಿ ಆಳ್ತಿನಿ ಪರಕ್ಮಾಸ್ ಹರೇಕ್ ಜ಼ಣಾನ ವಾರ್‌ಖ್ಹಾನಿ ವರ ದೆವೈರ‍್ಹೂಸ್. ಇನಾಖ್ಹಾಜೆ ಪವಿತ್ರ ದಪ್ತರ್‌ಮ ಅಮ್ ಬೋಲೈರ‍್ಹೂಸ್‍, “ಯೊ ಊಚಿ ಸ್ಥಾನ್‌ಪರ್ ಛ಼ಡಿಜಾ಼ವನಿ ವಖ್ಹ್‌ತೆ, ಯೊ ಖೈದಿಖ್ಹಾರಾನ ಬಂಧಿ ಕರ‍್ಲಿ ಜೈ಼ನ್ ಅದ್ಮಿಖ್ಹಾರಾನ ಇನಾಮ್ ದಿದೊ”. “ಛ಼ಡಿಗಯೊ” ಕರಿ ಬೊಲಾನಿ ಮತ್ಲಬ್ ಶಾತ್‌ಕತೊ? ಯೊ ಜ಼ಮೀನ್ನ ಗಧಾರ್‌ಮ ಉತ್‌ರ‍್ಯೊಕರಿ ಬೋಲಾನಿತರ ಹುವಾಸ್. ಉತ್ರಿನ್ ಆಯೊಹುಯೊ, ಖ್ಹಾರುಸ್ ಭರಾನಖ್ಹಾಜೆ ಅಖ್ಖಾ ಜಗತ್‌ಥೀಬಿ ಊಚಾ಼ಮ ಛ಼ಢಿಗಯೊಹುಯೊ ಹುಯಿರ‍್ಹೋಸ್. ಯೊ ಹೈರೋತೆ ಇನಾಮ್ನ ದ್ಯವಾಳೊಬಿ ಹುಯಿರ‍್ಹೊಸ್ ಕತೊ ಯೊ ಥೋಡಜ಼ಣಾನ ಅಪೊಸ್ತಲರ್ ಕರಿಬಿ, ಥೋಡಾನ ಪ್ರವಾದಿಕರಿಬಿ, ಥೋಡಜ಼ಣಾನ ಸುವಾರ್ತೆ ಬೋಲವಾಳುಕರಿಬಿ, ಥೋಡಜ಼ಣಾನ ಸಬಾಪಾಲಕರ್ ಕರಿಬಿ, ಶಿಕಾಡವಾಳೊ ಕರಿಬಿ ನೆಮಿಸಾಯೊ. ಯೋ ಕ್ರಿಸ್ತನ ಶರೀರ್ಮ ಎಕ್ಟುಹುವಾನಖ್ಹಾಜೆ ಅಖ್ಖಾ ದೇವ್ನ ಅದ್ಮಿವ್‌ನ ಕ್ರಿಸ್ತನ ಸೇವೆನ ಕಾಮ್ನಖ್ಹಾಜೆ ತಯಾರ್ ಕರಾನ ಟೇಕೆ ಯೋ ಅಮ್ ಕರ‍್ಯೊ. ಇನಖ್ಹಾಜೆ ದೇವ್ನ ಅದ್ಮಿನ ಅಕ್ಲಿಕರೀನ್ ದೇವ್ನ ಛಿಯ್ಯಾನ ಕಾಮ್ ಕರಾನಖ್ಹಾಜೆ ತಯಾರ್ ಕರ್ನುಕರಿಬಿ ಅಜು಼ ಯೇಸುಕ್ರಿಸ್ತನು ಶರೀರ್ ಹುಯಿರ‍್ಹುಸ್ತೆ ಸಬೆ ಭಡಾದೆಕರಿ ಇನೆ ಅವ್ಣುನ ನೇಮ್‌ಶಾಯೊ. ಇನಾಖ್ಹಾಜೆ ಬೋಲಿಲಾವನು ಶಾತ್‌ಕತೊ ಅಪ್ಣೆ ಹಂಕೇಥು ಅಡ್ಡಾಣಿ ನಾ ಹುಯಿರ‍್ಹೇವ್ಣುತೆ, ಖರಾಬ್ ಅದ್ಮಿನ ಠಗಾವ್ಣಿಮಾಬಿ, ಗಲ್ತಿಸೋಚ್‌ಮ ಪಡೀನ್, ಅಲಕ್ ಅಲಕ್ ಭೋದನ್‌ಥಿ ಧೋಕಹುಯಿನ್ ವಹಿರೊ ಕೀಕಡ್‌ಕಿ ತೀಕಡ್‌ ನಾಜಾ಼ವಾಳ ಹುಯಿರ‍್ಹೇಣು. ಕತೋಬಿ ಪ್ಯಾರ್‌ಮ ಖ್ಹಾಚು಼ಬೋಲ್ತಹುಯಿನ್ ಹರೇಕ್ ವಾತೆವ್‌ಮಾಬಿ ಮುಡ್‌ಕ್ಯು ಹುಯಿರ‍್ಹೋಸ್ತೆ ಕ್ರಿಸ್ತಮ ಭಡವಾಳ ಹುಯಿರ‍್ಹಿಯೆ. ಶರೀರ್‌ಅಖ್ಖು ಕ್ರಿಸ್ತಥಿ ಹರ್ ಕೀಲ್‌ಥಿ ಘಟ್ ಮಳಿರ‍್ಹೀನ್, ಹರೇಕ್ ಖ್ಹಂದೊಬಿ ಇನು, ಇನು ಕಾಮ್ ಕರಾಸ್ತೆಖ್ಹಾಜೆ ಶರೀರ್ ಪ್ಯಾರ್‌ಮ ಅಛ್ಛಿನಿತರ ಭಡಾಸ್.
ಕ್ರಿಸ್ತಮ ನವು ಜಿವ್ಣು
ಇನಾಖ್ಹಾಜೆ ಮೆ ಪ್ರಭುಮ ತುಮುನ ಶಾತ್‌ ಬೋಲುಸ್‌ಕತೊ ಅಲಕ್ ಅದ್ಮಿಖ್ಹಾರು ಚಾ಼ಲಾನಿಘೋಣಿ ಅನ ಅಗ್ಗಳ್ ನಾಚಾ಼ಲ್ನು. ಇವ್ಣೆ ಕಾಯ್‌ ಫಾಯಿದೊಕೊಂತೆ ಅಕ್ಕಲ್‌ವಾಳನಿತ್ರ ಚಾ಼ಲಿಲೆಸ್. ಇವ್ಣ ದಿಲ್‌ ಅಂಧಾರಥಿ ಢಪೈರ‍್ಹೂಸ್, ಇವ್ಣೆ ಇವ್ಣಿ ಕಠೋರ್ ದಿಲ್‌ಥೀಬಿ ಅಜು಼ ಇವ್ಣಾಮ ಅಕ್ಕಲ್‌ಕೊಂತೆ ಖ್ಹಾಜೇಥಿಬಿ ದೇವ್ ದೇಸ್ತೆ ಜಾನ್‌ಥಿ ದೂರ್ ಹುಯಿರ‍್ಹೂಸ್. ಇವ್ಣೆ ಖ್ಹರಮ್‌ ಮ್ಹೆಂದಿನ್ ಇವ್ಣುಇವ್ಣುನ ಖರಾಬ್ ಆಖ್ಹ್‌ನ ದಿನಾಖಿನ್, ಹರೇಕ್ ಥರಾನು ಕಚಿಂಡ್‌ ಕಾಮ್‍ಅಖ್ಖಾನ ನಿಕ್ಳಜಾನ್‌ಥಿ ಚ಼ಲಾವಸ್. ತುಮೆತೋಬಿ ಕ್ರಿಸ್ತನಿ ಬಾರೇಮ ಇಮ್ನು ಶಾತ್ಬಿ ಶಿಕ್ಯಾಕೊಯ್ನಿ. ಶನಕತೊ ಖ್ಹಾಚಮಾಬಿ ಇನಾಮಸ್ ಖ್ಹಮ್‌ಜಿರಾಖ್ಯಾಸ್‌ ಅಜು಼ ಇನ ಪೀಠೆ ಜಾ಼ವಳ ತುಮುನ ಯೇಸುಮ ಛಾ಼ತೆ ಖ್ಹಾಚ಼ನಿಘೋಣಿಸ್ ಶಿಕಾಡಿರಾಖ್ಯಸ್. ಇನಖ್ಹಾಜೆ ತುಮುನ ಶಿಕಾಡ್ಯುತೆ ಭೋದನ್ ಶಾತ್‌ಕತೊ ತುಮೆ ತುಮಾರಿ ಅಗ್ಲಿ ಚಾ಼ಲ್‌ನಿತರಾನು ಜೂ಼ನಿ ಆದತ್‌ನ ಕಾಡಿನಾಖೊ; ಯೊ ಧೋಕ ಖೈರಾಖ್ಯಾಸ್ತೆ ಖರಾಬ್ ಆಖ್ಹ್‌ಥಿ ಭರೈರ‍್ಹುಸ್‌. ಯೊ ನಾಶ್‌ ಹುಯಿಜಾ಼ವನು ಹುಯಿರುಸ್. ಅಜು಼ ತುಮೆ ತುಮಾರು ದಿಲ್‌ ಮನ್ನ ನವು ಕರಿಲೆವೊ. ಅಜು಼ ತುಮಾರು ತುಮೆ ನವಿ ಆದತ್‌ನ ಫೇರಿಲೆವೊ ದೇವ್ನಿಸ್ ಪರಕ್ಮ ಅಜು಼ ಖ್ಹಾಚಿಥೀಬಿ ನೀತಿನೂಬಿ, ಪರಿಶುದ್ ಹುಯಿನ್‍ಬಿ ಉಬ್ಜಿರ‍್ಹುಸ್. ಇನಾಖ್ಹಾಜೆ ಝೂ಼ಟಿ ಬೋಲಾನು ಮ್ಹೇಲಿನ್ ಹರೇಕ್ ಜ಼ಣು ಇನ ಭೀಡೆವಾಳನ ಜೋ಼ಡೆ ಖ್ಹಾಚಿಸ್ ಬೋಲೊ. ಶನಕತೊ ಅಪ್ಣೆಖ್ಹಾರು ಎಕ್ಕಸ್ ಶರೀರ‍್ನು ಭಾಗ್‌ ಹುಯಿರ‍್ಹಾಸ್ನಿ. ಇರಾದೊ ಕರ‍್ಯತೋಬಿ ಪಾಪ್ ನಕೊಕರ್ಶು, ದನ್ ಡುಬಾಥಿ ಪಹಿಲೆಸ್ ತುಮಾರೊ ಇರಾದೊ ಖ್ಹರ್ತಿ ಹುಯಿಜಾ಼ವದೆ. ಶೈತಾನ್ನ ಮೋಕ ನಕೊದಿಶು. ಚೋ಼ರಿ ಕರಾವಾಳೊ ಚೋ಼ರ್ ಕರಾನು ಮ್ಹೆಂದಿನ್ ರಾಬಿನ್ ಮಿನಥ್ಥಿ ಅಛ಼್ಛು ಕಮೈಕರೀನ್ ಜಿವ್ಣು ಕರಾದೆ, ತದೆ ಗರೀಬ್ ಅದ್ಮಿನ ದ್ಯಾವಾನ ಇನ ಹಾತೆ ಉಶೆ. ತುಮಾರ ಮ್ಹೋಡೆಥಿ ಖಿವು ಖರಾಬ್ ವಾತೆ ನಾ ಆವ್ಣು. ಕತೋಬಿ ಭಕ್ತಿನ ಭಡಾವಾನಿ ಯೋವೇಳ್ಮ ಬೋಲ್ನುತೆ ವಾತೆ ಹುಯಿರ‍್ಹೇಣು. ತುಮೆ ವಾತೆ ಬೊಲ್ಯಾತೊ ಖ್ಹಮ್‌ಜಾ಼ವಾಳನಾಬಿ ಅಛ಼್ಛು ದೆಖಾವ್‌ಶೆ. ದೇವ್ನ ಪವಿತ್ರಾತ್ಮನ ದುಖ್ ನಕೊ ಕರೊ. ಇನಾಮಸ್ ಛುಟ್ಕಾರ್‌ನ ದನ್ನಖ್ಹಾಜೆ ಮುದ್ರೊ ಲೀರಾಖ್ಯಾಸ್ನಿ. ಖ್ಹಾರು ವಹೇರ್‌, ಇರಾದೊ, ಖೀಜ಼್, ಝ಼ಗ್‍ಡೊ, ಚಾ಼ವ್‌ಣ್ಯ ಅನಖ್ಹಾರನಬಿ ಹರೇಕ್ ಥರಾನು ಖರಾಬ್ ಕಾಮ್ನ ತುಮಾರೇಥಿ ಕಾಡಿನಾಖೊ. ಇನ ಬದಲ್ ಏಕ್‌ಥಿಏಕ್ ದಯಕರವಾಳಬಿ, ಗೋರ್‌ ಕರವಾಳಬಿ ಹುಯಿ‍ರ‍್ಹೆವೊ. ದೇವ್ನೆ ತುಮುನ ಕ್ರಿಸ್ತಮ ಮಾಪ್ ಕರ‍್ಯೊತೆ ಇಮ್ಮಸ್ ತುಮೇಬಿ ಏಕ್‌ಥಿಏಕ್ ಮಾಪ್ ಕರೊ.
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.