ಅಪೊ 26

ರಾಜ಼ ಅಗ್ರಿಪ್ಪನ ಖ್ಹಾಮ್ಣೆ ಪೌಲನು ಜ಼ವಾಬ್

1ಅಗ್ರಿಪ್ಪ ಪೌಲನ, “ಹಮ್ಕೇಥೊ ತಾರ ಭಣೀಥು ವಾತೆ ಬೋಲೆಜಾ಼ಯ್” ಕರಿ ಬೋಲ್ಯೊ. ತದೆ ಪೌಲನೆ ಹಾತ್‍ಪಾಡಿನ್ ಜ಼ವಾಬ್ ದೇತೊಹುಯಿನ್ ಅಮ್ ಬೋಲ್ಯೊ; 2ರಾಜ಼ ಅಗ್ರಿಪ್ಪ, ಯೆಹೂದ್ಯರ್ ಮಾರಪರ್ ಅಖ್ಖಿ ಅಪರಾದ್ ಕರಸ್ಕಿ ಆಜ಼್ ತಾರ ಖ್ಹಾಮ್ಣೆ ಇನು ಜ಼ವಾಬ್ ದ್ಯವಾನಿ ಅವಕಾಶ್ ಮಳಿರ‍್ಹೂತೆ ಮಾರು ಮೇಸ್ ಧನ್ಯಕರಿ ಬೋಲಿಲೇವುಸ್. 3ಶನಕತೊ ಯೆಹೂದ್ಯರ್‌ಮ ಛಾ಼ತೆ ಅಖ್ಖುಸ್ ಚಾ಼ಲ್ ಚ಼ಲಣ್‌ಬಿ, ಅಜು಼ ಯೆಹೂದ್ಯರ್ ವಿಚಾರ‍್ನ ವಾದಕರುಕರಾತೆ ಬಾರೇಮ ತುನ ಅಛ್ಛಿನಿತರ ಮಾಲುಮ್ ಛಾ಼. ಇನಖ್ಹಾಜೇಥಿ ಮಾರಿ ವಾತೆನ ಧೀಮೆಥಿ ಖ್ಹಮಜ಼್‌ಣು ಕರಿ ಗಿಂಗೈಲೆವುಸ್. 4“ಮೆ ಅಡ್ಡಾಣಿಥೋಬಿ ಯೆರೂಸಲೇಮ್ಮ ಮಾರ ಶೊಂತ್ ದೇಖ್ಹ್‌ನ ಅದ್ಮಿವೋನಿಜೋ಼ಡೆ ರ‍್ಹೀನ್ ಜಿವ್ಣುಕರ‍್ಯುತೆ ರೀತಿ ಅಖ್ಖು ಯೆಹೂದ್ಯರ್‌ನ ಮನ ಮಾಲುಮ್‌ ಛಾ಼. 5ಹಮಾರಿ ಧರ್ಮ್‌ನು ಜಾ಼ಖ್ಹತ್ ಕಠಣ್‍ಥಿ ರ‍್ಹವಾನು ಫರಿಸಾಯರ್‌ನು ಪದತ್ತಿನಿ ಅನುಸಾರ್ ಫರಿಸಾಯ ಹುಯಿನ್ ಚಾ಼ಲಿಲಿದೊಕರಿ ಶುರುವಾತ್‌ಥೂಬಿ ಇವ್ಣುನ ಮಾಲುಮ್‌ ಛಾ಼. ಸಾಕ್ಷಿ ಬೋಲಾನು ದಿಲ್‌ ಉಷೇತೊ ಬೋಲೆಜಾ಼ಯ್. 6ದೇವ್ನೆ ಹಮ್ಕೇಬಿ ಅಪ್ಣ ಗುರುಗುರಬ್‍ಲ್ಯನ ಕರ‍್ಯೊತೆ ವಾಗ್ದಾನ್ನ ಉಷೆಕರಿ ವಿಶ್ವಾಸ್ನಖ್ಹಾಜೆ ಮೇ ಆಜ಼್ ನ್ಯಾವ್‌ನಿ ವಿಚಾರಣೆಮ ಭಿಯೋಸ್. 7ಹಮಾರು ಭಾರ ಖೂಮ್‍ವಾಳು ದನ್‍ರಾತ್ ಭರೋಖ್ಹಾಥಿ ದೇವ್ನ ಆರಾದನೆ ಕರ್ತುಹುಯಿನ್, ಯೋ ವಾಗ್ದಾನ್ನುಫಲ್ ಲೀಲ್ಯಾವನಖ್ಹಾಜೆ ಟಿವೈರ‍್ಹೂಸ್. ರಾಜ಼, ಯೋಸ್ ಭರೋಖ್ಹಾನಿ ಬಾರೇಮ ಯೆಹೂದ್ಯರ್‌ಖ್ಹಾರು ಮಾರಿ ವಿರೋದ್ ಅಪರಾದ್ ಲಗಾಡುಕರಸ್. 8ದೇವ್ನೆ ಮರ‍್ಯಾಹುಯಮಾಥು ಉಠಾಡ್ಯೊತೆ ನಂಬಾನ ಕೊಹುವಾನಿಕರಿ ತುಮೆ ಶನ ಖ್ಹೂಜ಼್‌ ಕರೋಸ್? 9ಏಕ್‌ ಹಗಾಮ್ಮ ನಜ಼ರೇತ್‌ನು ಯೇಸುನ ನಾಮ್ನ ವಿರೋದ್‌ಥಿ ಕೈಏಕ್ ಕಾಮ್ನ ಮೆ ಚ಼ಲಾವ್ಣುಕರಿ ಸೋಚಿರಾಖ್ಯೋಥೊ. 10ಯೆರೂಸಲೇಮ್ಮ ಇಮ್ಮಸ್ ವಿಶ್ವಾಸಿನ ವಿರೋದ್‍ಕರೀನ್ ಕೈಯೆಕ್ಕಿ ಕಾಮ್ ಕರ‍್ಯೋಥೊ. ಯೋ ವಿಶ್ವಾಸಿಖ್ಹಾರಾಮ ಕೆತ್ರಾಕಿಜ಼ಣಾನ ಜೇಲ್‌ಮ ಘಾಲಾನ ಮಹಾಯಾಜಕರ‍್ನೆ ಮನ ಅದಿಕಾರ್ ದಿದೊ. ಇವ್ಣುನ ಮರಣ್ಣಿ ತೀರ್ಪ್‍ನಿ ವಖ್ಹ್‌ತೆ ಮೇ ಇನ ಮಾನಿಲಿದೊ. 11ಅಖ್ಖಾ ಸಬೇನು ಮಂದಿರ್‌ಮಾಬಿ ಮೇ ಕೈಯೇಕ್‌ಹಲ್ಲ ಇನ ಖ್ಹತಾಪ್ಣಿ ದೀನ್ ಇನೇಥಿ ದೇವ್ನ ದೂಷಣೆನಿ ವಾತೆ ಬೋಲಾವಾನಿತರ ಕೋಶಿಶ್‌ಕರ‍್ಯೊ. ಯೋ ವಿಶ್ವಾಸಿಖ್ಹಾರಾಪರ್ ಇರಾದೊ ಕರ್ತೊಹುಯಿನ್ ಇವ್ಣುನ ಢೂಂಡಿನ್ ಲತಾಡ ದ್ಯವಾನಖ್ಹಾಜೆ ಭಾರ್‌ ದೇಖ್ಹ್‌ನ ಖ್ಹಯೇರ್‌ಮಾಬಿ ಗಯೋಥೊ.

ಇನ ಹುಯುತೆ ಬದ್ಲಾವ್ಣಿನ ಬಾರೇಮ ಪೌಲನೆ ಬೋಲ್ಯೋತೆ

(ಅಪೊ 9:1-19; 22:6-16)

12ಏಕ್‌ ಹಲ್ಲ ದಮಸ್ಕನ ಜಾ಼ವಾನ ಗಲ್‌ಢಯಾಜಕರ್‌ಥಿ ಅದಿಕಾರ್‌ನಾಬಿ ಹಕ್ನ ಲೀನ್‌ ದಮಸ್ಕನ ಜಾ಼ವಾನಿ ವಾಟ್‌ಪರ್ ವಳೇಜಾ಼ತೊಥೊ. 13ತದೆ ಧೊಪಾರ್‌ ಹುಯಿರ‍್ಹುಥು. ಅಫ್ಪರ್‌ಥೂಸ್ ಸೊರ್ಗಮಾಥು ಚಾ಼ಂದ್‍ಥೀಬಿ ಜಾ಼ಖ್ಹತ್ ಏಕ್‌ ಉಜಾ಼ಳು ಆಯಿನ್ ಮಾರಾ ಅಶ್‌ಪಿಶ್‍ ಅಜು಼ ಮಾರಾಕೇಡೆ ಉಳಿಯಾವ್ತುಥೂತೆ ಇವ್ಣ ಅಶ್‌ಪಿಶ್‌ ಉಜಾ಼ಖ್ಹ್‌ಥಿ ಝ಼ಮ್‍ಕ್ಯು. 14ಹಮೆ ಅಖ್ಖಾಸ್‍ಜ಼ಣ ಜ಼ಮೀನ್‌ಪರ್ ರಡ್ಕಿಗಯ. ತದೆ ಸೌಲ ಸೌಲ ಮನ ಶನ ಖ್ಹತಾವಸ್? ಕಾಟಾನ ಲಠ್ಠಾನ ಲಾತ್ ಮಾರಾಥಿ ತುನಾಸ್ ದರದ್, ಕರಿ ಇಬ್ರಿಯ ವಾತೆಮ ಬೋಲಾನಿ ಏಕ್‌ ಅವಾಜ಼್‌ನ ಖ್ಹಮ್‍ಜ್ಯೊ. 15ತದೆ ಮೇ, “ಪ್ರಭು, ತೂ ಕೋಣ್” ಕರಿ ಬೋಲಖ್ಹತರ್ ಪ್ರಭುನೆ, “ತೂ ಖ್ಹತವ್‍ಕರಸ್ತೆ ಯೇಸುಸ್ ಮೇ. 16ಕತೋಬಿ ತೂ ಉಠೀನ್ ಭೀರೆ; ತುನ ಮಾರೊ ಸೇವಕ್ ಕರೀನ್‍ಬಿ ಸಾಕ್ಷಿಕರೀನ್‍ಬಿ ನೇಮಿಶಾವನಖ್ಹಾಜೆ ಮೇ ತುನ ದೆಖಾಯೊತೆ ವಾತೆನಾಬಿ, ಮೇ ತುನ ದ್ಯವಾನು ದರ್ಶನ್‍ಖ್ಹಾರನಿ ಬಾರೆಮಾಬಿ ತೂ ಅದ್ಮಿಖ್ಹಾರನ ಸಾಕ್ಷಿ ಹುಯಿರ‍್ಹಾಸ್ ಅನಖ್ಹಾಜೆಸ್ ಆವಖ್ಹತ್ ಮೇ ತುನ ದೇಖಾಯೊ. 17ಮೇ ತುನ ತಾರು ಇಸ್ರಾಯೇಲ್ ಅದ್ಮಿಥೀಬಿ ಯೆಹೂದ್ಯರ್‌ಕಾಹೆತೆ ಅದ್ಮಿಥೀಬಿ ತುನ ಖರಾಬ್ ನಾಹೊಣುತೆತಿಮ್ ಬಚಾ಼ಡಿಶ್‌ ಮೇ ತುನ ಇವ್ಣಕನ ಮೋಕ್ಲುಕರುಸ್. 18ತೂ ಇವ್ಣ ಖ್ಹಾರಾನ ಖ್ಹಾಚ಼ನ ಖ್ಹಮ್‌ಜಾ಼ಡಿನ್ ಇವ್ಣುನ ಅಂಧಾರಮ ಥೂತೆ ಇವ್ಣಡೋಳನ ಉಜಾ಼ಳಾಮ ಆವಾನಿತರಾಬಿ ಶೈತಾನ್‍ನಿ ಅದಿಕಾರ್‌ಥಿ ದೇವ್‌ಭಣಿ ಫರಾನಿತರಾಬಿ ಕರ‍್ನು. ತದೆ ಇವ್ಣು ಪಾಪ್‌ಖ್ಹಾರು ಮಾಪ್‌ಉಷೆ. ಪರಿಶುದ್ಧರ್‌ನಿ ಜೋ಼ಡ್ಮ ಹುಕುಮ್‌ ಲೀಲಿಶೆ. ಇವ್ಣ ಡೋಳ ಉಖಡ್‌ನುಕರಿ ಇವ್ಣಕನ ಮೇ ತುನ ಮೋಕ್ಲುಸ್‌ ಕರಿ ಬೋಲ್ಯೊ.

ಪೌಲ ಇನಿ ಕಾಮ್ನಿ ಬಾರೇಮ ವಾತೆಬೋಲ್ಯೊತೆ

19ಅನಖ್ಹಾಜೆ ಅಗ್ರಿಪ್ಪ ರಾಜ಼, ಪರಲೋಕ್‌ಥು ಮನ ಹುಯೂತೆ ಯೊ ದರ್ಶನಾನ ಮೇ ಖ್ಹರಮ್‌ ಕಾಡುಕೊಯ್ನಿ. 20ಪಹಿಲೆ ಯೆರೂಸಲೇಮ್ಮ ಛಾ಼ತೆ ದಮಸ್ಕಮಾಬಿ, ಯೂದಾಯನ ಅಖ್ಖಾ ತಭರ್‌ಖಾಮಾಬಿ ಛಾ಼ತೆ ಇವ್ಣುನ ಅಜು಼ ಯೆಹೂದ್ಯರ್‌ಕಾಹೆತೆ ಅದ್ಮಿನಾಬಿ, ತುಮೆ ದೇವ್‌ಭಣಿ ಫರ್‌ನು ಕರೀಬಿ ತುಮಾರು ಪಾಪ್‌ಭರ‍್ಯು ಜಿವ್ಣನ ಮ್ಹೇಲಿನ್ ದೇವ್‌ಭಣಿ ಫರಿಜಾ಼ವ್ಣುಕರಿಬಿ ಆಸ್ ಯೋಗ್ಯಾನು ಅಛ಼಼್ಛಕಾಮ್ನ ಪ್ರಚಾರ್ ಕರ‍್ಯೊ. 21ಯೊ ಕಾರಣ್ಣಖ್ಹಾಜೆ ಯೆಹೂದ್ಯರ್ ಮನ ದೇವ್ನ ಮಂದಿರ್‌ಮ ಧರೀನ್ ಮಾರಿನಾಕ್ಣುಕರಿ ಕೋಶಿಶ್ ಕರ‍್ಯು. 22ಕತೋಬಿ ದೇವ್ನೆ ಮನ ಯೋ ದನ್ಮ ಮದತ್ ಕರ‍್ಯೊ. ಯೊ ಹಮ್ಕೆಲಗೂಬಿ ಮನ ಮದತ್ ಕರುಕರಸ್. ಇನಾಖ್ಹಾಜೆಸ್ ಆಜ಼್ ಹಜ್ಜಾ಼ ಭಿಯೋಸ್ ಅಜು಼ ಮೆ ದೇಖ್ಯೋತೆ ಘಟನೇನಿ ಬಾರೇಮ ಅದ್ಮಿಖ್ಹಾರನ ಸಾಕ್ಷಿ ಬೋಲುಕರುಸ್. ಮೋಶೆ ಅಜು಼ ಪ್ರವಾದಿಖ್ಹಾರು ಖ್ಹಾಮೆ ಹುವಾನು ಬಾರೇಮ ಖ್ಹಮ್‌ಜಾ಼ಡ್ಯುತೆ ವಾತೇಸ್‌ ಪಣ್ಕಿ ಖಿವೂಬಿ ನವು ಕೊಬೋಲ್ಯೋನಿ. 23ಯೇಸುನೆ ಖ್ಹತಾಪ್ಣಿನ ಪಾಡಿನ್ ಅಜು಼ ಮರ‍್ಯಹುಯಮಾಥು ಪಾಛು಼ಜಿವ್ತೊ ಹುಯಿನ್ ಆವಾಮ ಪಹಿಲೊ ಹುಯಿನ್ ಉಠೀನ್ ಯೆಹೂದ್ಯರ್‌ನಾಬಿ ಯೆಹೂದ್ಯರ್‌ಕಾಹೆತೆ ಇವ್ಣನಾಬಿ ರಕ್ಷಣೆನ ಉಜಾ಼ಳನ ವತಾಳವಾಳೊ ಹುಯಿರ‍್ಹೋಸ್.” 24ಅಮ್ ಪೌಲನೆ ಇನಭಣಿಥು ಜ಼ವಾಬ್ ದ್ಯವಾನಿ ವಖ್ಹ್‌ತೆ; ಫೆಸ್ತನೆ, “ಪೌಲ, ತೂ ದಿವಾನೊ ಹುಯಿಗೊ ಜಾ಼ಖ್ಹತ್ ಪಢಂತ್‌ ತುನ ದಿವಾನನಿತರ ಕರಿನಾಖ್ಯು” ಕರಿ ಚಿಕ್ರಿನ್ ಬೋಲ್ಯೊ. 25ತದೆ ಪೌಲನೆ, “ಮೋಟೊ ಮಹರಾಜ಼ ಹುಯಿರ‍್ಹೋತೆ ಫೆಸ್ತ ಮೇ ದಿವಾನೊಕಾಹೆ ಮೇ ಅಛ್ಛಿ ದಿಮಾಕ್‍ಥಿ ಗಂಭೀರ್‌ಥಿ ಖ್ಹಾಚು಼ ವಾತೆನಾಸ್ ಬೋಲುಕರುಸ್. 26ಅಗ್ರಿಪ್ಪ ರಾಜ಼ ಆ ವಾತೆಖ್ಹಾರು ಅಛ್ಛಿನಿತರ ಮಾಲುಮ್ ಕರಾಖ್ಯೊಹುಯೊ; ಶನಕತೊ ಇನಖ್ಹಾಮ್ಣೆ ಬರಬ್ಬರ್‌ಥೀಸ್ ವಾತೆ ಬೋಲುಸ್ ಅನಾಮ ಏಕ್‌ಬಿ ಇನ ಲಪಿಛಪಿಕೊರ‍್ಹೂನಿ ಕರಿ ನಂಬಿರಾಖ್ಯೊಸ್, ಶನಕತೊ ಆ ಏಕ್‌ ಕೋಣಾಮ ಚಾ಼ಲ್ಯುತೆ ವಾತೆ ಕಾಹೆ. 27ಅಗ್ರಿಪ್ಪ ರಾಜ಼ ತೂ ಪ್ರವಾದಿ ಖ್ಹಾರಾನ ನಂಬಾಸ್ಕಿಶು? ತೂ ವಿಶ್ವಾಸ್ ಕರೀಶ್‌ಕರಿ ಮನ ಮಾಲುಮ್” ಕರಿ ಬೋಲ್ಯೊ; 28ತದೆ ಅಗ್ರಿಪ್ಪರಾಜ಼ನೆ ಪೌಲನ ಅಮ್ ಬೋಲ್ಯೊಕಿ, “ಘಣು ಶುಲ್ಬಾಥಿ ಮನ ಕ್ರಿಸ್ತಾನ್‍ವಾಳೊ ಕರ್ನುಕರಿ ತೂ ಸೋಚಿರಾಖ್ಯೋಸ್ಕಿ ಶು?” ಕರಿ ಬೋಲ್ಯೊ. 29ಇನ ಪೌಲನೆ; ನ್ಹಾನಿ ಕೋಶಿಶ್‍ಥಿ ರ‍್ಹವೊ, ಮೋಟಿ ಕೋಶಿಶ್‍ಥಿ ರ‍್ಹವೊ, ಯೊ ಮನ ಮುಖ್ಯ ಕಾಹೆ. ತೂಸ್ ಖಲಿಕಾಹೆ ಆಜ಼್ ಮನ ಖ್ಹಮ್‌ಜು಼ಕರಾತೆ ಹರೇಕ್‌ಜ಼ಣು ಮಾರಿನಿತರ ಹೋಣುಕರಿ ಮೆ ದೇವ್ನ ಪ್ರಾರ್ಥನೆಕರುಸ್ ಕತೋಬಿ ಆ ಖ್ಹಂಕಳ್‌ಮ ಪಣ್ಕಿ ತುಮೆ ನಾಜ಼ಕ್‌ಡಾವ್ಣು ಕರಿಬೋಲ್ಯೊ. 30ರಾಜ಼ ಅಗ್ರಿಪ್ಪ, ರಾಜ್ಯಪಾಲ್ ಪೆಸ್ತ, ಬೆರ್ನಿಕೆ ಅಜು಼ ಇವ್ಣಜೋ಼ಡೆ ಬೆಠುಥೂತೆ ಅದ್ಮಿಖ್ಹಾರು ಉಠಿಭೀರ‍್ಯು. 31ಇನಪಾರ್ ಭಾರ್‌ಜೈ಼ನ್‌ ಇವ್ಣೆ, “ಆ ಅದ್ಮಿನ ಮರಣ್ಣಿ ದಂಡನೆ ನತರ್ ಬೇಡಿ ಘಾಲನು ಅನೆ ಶಾತ್ಬಿ ಕೊಕರ‍್ಯೋನಿ ಕರಿ ಇವ್ಣ ಇವ್ಣಾಮಸ್‌ ಬೋಲಾಲಗ್ಯು 32ತದೆ ಅಗ್ರಿಪ್ಪನೆ ಫೆಸ್ತನ, “ಆ ಅದ್ಮಿ ಕೈಸರನ ಖ್ಹಾಮ್ಣೆ ಬೋಲಿಲೆವುಸ್‌ಕರಿ ನಾಬೋಲ್ಯೊಹೊತ್ತೊ ಅನ ಛುಟ್ಕಾರ್ ಕರೇಜಾ಼ಯಿಥು ಕರಿಬೋಲ್ಯೊ.