ದೇವ್ನಿ ಖ್ಹಾಚಿ ವಚನ್
1 ತಿಮೊ 5
ವಿಶ್ವಾಸಿಯೇನ ಬಾರೇಮ ಜಿಮ್ಮೇದಾರಿ
ಬುಢಾ ಅದ್ಮಿನ ಗುರ್‌ಕಾವ್‍ನಕೋತೆ, ಇವ್ಣುನ ತಾರ ಬಾನಿಮತ್ ಕರಿ ಸೋಚೊ, ಜಾ಼ನ್ಜ಼ಮಾನ್ ಪರ್ಖ್ಹಾವ್‌ನ ಭೈಯೇನಿಘೋಣಿ ಇವ್ಣುನ ಅಕ್ಕಲ್ ಬೋಲಿಒತಾಳ್‌. ಬುಢಿಯಾ ಬಾಯ್ಕಾವ್‌ನ ಆಯಾನಿಮತ್ ಅಜು಼ ಜಾ಼ನ್ಜ಼ಮಾನ್ ತಯೇಡಾವ್ನ ಪಾಕ್‌ಮನ್‌ಥಿ ನ್ಹಾನಿ ಭೇನ್ ಮೋಟಿಭೇನೆವ್ನಿ ಮತ್ ದೇಕ್ಣು, ಇವ್ಣ ಜೋ಼ಡೆ ಪಾಕ್‌ಮನ್‌ಥಿ ಚಾ಼ಲಿಲೇವ್ಣು. ದಿಕ್‌ದೆಶಾರ್‌ಕೊಂತೆ ಮುಂಡಚ್ಚಿ ತಯೇಡಾವ್ನ ಖ್ಹದ್ದರ್‌ ಕರೊ, ಶನಕತೊ ಇವ್ಣುನ ಖ್ಹಾಚಮಾಬಿ ಇನು ಜ಼ರೂರತ್ ಛಾ಼. ಕತೋಬಿ ಏಕ್‌ ಮುಂಡಚ್ಚಿನ ಲಡ್ಕಾ ನತರ್ ನಾತಿಪೋತಿ ರ‍್ಹಯೂತೊ, ಇವ್ಣೆಸ್ ಪಹಿಲೆ ಭಕ್ತಿನ ಜಿವ್ಣಮ ಚಾ಼ಲಿಲಿನ್, ಇನ ಘರ್‌ವಾಳಾನ ದೇಖಿಲ್ಯವಾನು ಶಿಕಿಲೇವ್ಣು. ಇವ್ಣುನ ಹೋಣುತೆ ಆಯ-ಬಾನ ಅಜು಼ ಇನ ಅಜ್ಜ ಅಜ್ಜಿನ ಚಾ಼ಕ್ರಿ ಕರಾವಾಳ ಹುಯಿರ‍್ಹೇಣು ಆ ದೇವ್ನ ಪಸಂದ್‍ನು ಹುಯಿರುಸ್. ಖ್ಹಾಚಮಾಬಿ ದಿಕ್‌ದೆಶಾರ್‌ ಕೊಂತೆ ಏಕ್‌ ಮುಂಡಚ್ಚಿ ರ‍್ಹಯೀತೊ, ಯೋ ದೇವ್‌ಪರ್‌ ಇನೊ ಭರೋಖ್ಹೊ ನಾಖಿನ್, ಇನಿ ಮದತ್ನಖ್ಹಾಜೆ ದನ್-ರಾತ್ ದೇವ್ನ ಪ್ರಾರ್ಥನೆ ಕರಾವಾಳಿ ಹುಯಿರ‍್ಹೇಣು. ಕತೋಬಿ ಏಕ್‌ ಮುಂಡಚ್ಚಿ ಬಿಜ಼ ಪರ್ಖ್ಹಾನ ಜೋ಼ಡ್ಮ ಇನಿ ಆಖ್ಹ್‌ನ ಪೂರ ಕರಾನ ಇನಿ ಜಿ಼ಂದ್‌ಗೀನ ದಿನಾಖಿದಿದೀತೊ, ಯೋ ಬಚಿರ‍್ಹಯೀತೋಬಿ ಮರ್‌ವಾದಾಖ್ಹಲಸ್. ಇನಖ್ಹಾಜೆ ವಿಶ್ವಾಸಿವೋನ ಹುಕುಮ್ ದೇ ಅನೇಥಿ ಕೋಣ್‌ಬಿ ಇವ್ಣಾಪರ್ ಗಲತ್‌ ನಾ ಲಗಾಡ್‌ಣು. ಕೋಣ್‌ತೋಬಿ ಇವ್ಣ ಮಾಯ-ಮಾತ್ರಾನ, ಇವ್ಣ ಘರ್‌ವಾಳಾವ್ನ ಖ್ಹದರ್ ನಾ ಕರ‍್ಯೂತೊ, ಯೋ ಕ್ರಿಸ್ತಮಾನಿ ಇನು ವಿಶ್ವಾಸ್‌ನ ದಿದೊಹುಯೊ ಅಜು಼ ಯೊ ವಿಶ್ವಾಸ್‌ಕೊಂತೆ ಇವ್ಣೆಥಿಬಿ ಕಡ್‌ತೆಲ್ ಹುಯಿರ‍್ಹೋಸ್. ತೀನಿಖ್ಹ್‌ ವರಖ್ಹ್‌ಥಿ ಕಮ್ ಉಂಬರ‍್ನಿ ಮುಂಡಚ್ಚಿಯೇನ, ಮುಂಡಚ್ಚಿಯೇನಿ ಪಟ್ಟಿಮ ನಕೊ ಮಳಾವ್. ಕತೋಬಿ ಯೋ ಖಲಿ ಏಕ್‌ ಬಾವ್ರಿನ ಬಾವಣ್‍ ಹುಯಿರ‍್ಹಾವಳಿ, ಅಜು಼ ಇನು ಗುಣ್ ಅಛ್ಛು಼ ಕಾಮ್ ಕರಾಮಸ್ ರ‍್ಹೇಣು. ಅಜು಼ ಇನ ಲಡ್ಕಾವ್ನ ಅಛ್ಛಿನಿತರ ಪಾಳಿರಾಕ್ಣು, ಘರ್‌ಕನ ಆವವಾಳಾನ ಸ್ವಾಗತ್ ಕರಾವಾಳಿ ಹುಯಿರ‍್ಹೇಣು. ಬಿಜು಼ ರ‍್ಹೇಸ್ತೆ ವಿಶ್ವಾಸಿನಿ ಜೋ಼ಡ್ಮ ಧೋಬೆಡಿನಿತ್ರ ಚಾ಼ಲಿಲೇವ್ಣು. ಖ್ಹತಾಪ್ಣಿಮ ರ‍್ಹೇಸ್ತೆ ಅದ್ಮಿವ್‌ನ ಮದತ್ ಕರಾವಾಳಿ ಹುಯಿರ‍್ಹೇಣು. ಅಜು಼ ಅಛ್ಛು಼ಕಾಮ್ನ ಸಮರ್ಪಣ್‌ ಕರಿರಾಖವಾಳಿ ಹುಯಿರ‍್ಹೇಣು. ಕತೋಬಿ ಜಾ಼ನ್ಜ಼ಮಾನ್ ಮಂಡಚ್ಚಿಯೇನ ಆ ಪಟ್ಟಿಮ ನಕೊ ಮಳೈಶ್; ಶನಕತೊ ಇವ್ಣುನ ಪಾಛು಼ ವ್ಯಹಾ ಕರ‍್ನು ಕರಿ ಆಖ್ಹ್ ಐಗಿತೊ, ಕ್ರಿಸ್ತಮ ರ‍್ಹೇಸ್ತೆ ಭಕ್ತಿಥಿ ಮ್ಹೇಲಿದೇಸ್. ಎಥ್ರಾನವಾಳೊ ಇವ್ಣೆ ಪಹಿಲೆ ಕರ‍್ಯೊತೆ ವಾಗ್ದಾನ್ನ ಮ್ಹೇಲಿದಿನ್ ನ್ಯಾಯತೀರ್ಪ್‌ಮ ಪಡಿಜಾ಼ಸ್‌. ಎತ್ರೇಸ್ ಕಾಹೆತೆ ಇವ್ಣೆ ಘರ್-ಘರ್ ಫರ್ತಿಹುಯಿನ್ ಇನಿ ವಖ್ಹತ್‌ನ ಬರ್ಬಾತ್‌ಕರಾಸ್,ಅನೇಥಿಬಿ ಜಾ಼ಖ್ಹತ್ ಮಶ್ಲ ಮಾರಾನು ಅಜು಼ ಬಿಜಾ಼ನ ಕಾಮ್ಮ ಗೋಡೊಘಾಲಾನು ಕರಸ್. ಇನಖ್ಹಾಜೇಸ್ ಮೇ ಬೋಲುಸ್ಕಿ, ಜಾ಼ನ್ಜ಼ಮಾನ್ ಮುಂಡಚ್ಚಿಯೆ ವ್ಯಹಾ ಕರಿಲೀನ್, ಲಡ್ಕಾ ಜ಼ಣಾದೆ ಅಜು಼ ಇವ್ಣ ಘರ್‌ನ ದೇಕ್-ಭಾಲ್ ಕರಾದೆ, ಅನೇಥಿ ಅಪ್ಣ ದುಶ್‌ಮನ್ನ ಅಪ್ಣಪರ್ ಗಲತ್‌ ಬೋಲಾನ ವಾಟ್‌ ಕೋ ರ‍್ಹಿಶೇನಿ. ಕತೋಬಿ ಥೋಡಿ ಮುಂಡಚ್ಚಿಯೆ ತಯೇಡ ತದ್ದೇಸ್ ಇವ್ಣಿ ವಾಟ್ನ ಮ್ಹೆಂದಿನ್, ಶೈತಾನ್ನ ಪೀಠೆ ಚ಼ಲಿಗೈಯೆ. ಕತೋಬಿ ಏಕ್‌ ವಖ್ಹತ್ ವಿಶ್ವಾಸಿ ತಯೇಡಾವ್ನ ಘರ್‌ಮ ಮುಂಡಚ್ಚಿಯೆ ರ‍್ಹಯೀತೊ, ಇವ್ಣೇಸ್ ಇನಿ ಖ್ಹದರ್ ಕರ‍್ನು, ಅಜು಼ ಯೊ ವಜ಼ನ್ನ ಸಬೇಪರ್ ನಾ ನಾಕ್ಣು. ತದೆ ದಿಕ್-ದೆಶಾರ್ ಕೊಂತೆ ಇವ್ಣುನ ಸಬೆ ದೇಕ್‌ಭಾಲ್ ಕರೆಜಾ಼ಯ್. ಸಬೇಮ ಅಛ್ಛಿನಿತರ ಕಾಮ್ ಕರಾಸ್ತೆ ಶಾಣ ಅದ್ಮಿನ ಬೇ ಪಟ್ ಮರ್ಯಾದಿ ದೇವ್ಣು. ತದೆ ವಚನ್ ಬೋಲಿದ್ಯವಾಮ ಅಜು಼ ಶಿಕಾಡಾಮ ಯೊ ಮ್ಹಿನತ್ ಕರಾಸ್. ಧರ್ಮಶಾಸ್ತ್ರ ಬೋಲಾಸ್ಕಿ “ಖಳು ಖುಂದ್ಲಾತೆ ಢಾಂಡನ ಮ್ಹೋಡಾನ ಮ್ಹೋರ್ಕಿ ನಾಘಾಲ್ನು” ಕರೀಬಿ “ಅಜು಼ ಕಾಮ್ ಕರಾವಾಳ ಆಳ್‌ನ ಬರೋಬರ್‌ನಿ ಕೂಲಿ ದೇವ್ಣು” ಕರೀಬಿ ವಚನ್‌ಮ ಬೋಲಾಸ್. ಸಭೆನ ಶಾಣಾವ್‌ಪರ್ ಕೋಣ್‌ತೋಬಿ ಗಲತ್‌ ಬೋಲ್ಯೂತೊ, ಬೇ ನತರ್‌ಕಿ ತೀನ್ ಅದ್ಮಿನ ಮ್ಹೋಡೇಥಿ ಸಾಕ್ಷಿ ನಾಬೋಲ್ಯುತೊ, ಇನ ನಂಬಿಶ್ ನಕೊ. ಪಾಪ್ ಕರಾವಾಳನ ಖ್ಹಾರಾನ ಖ್ಹಾಮ್ಣೇಸ್ ಗುರ್‌ಕಾವ್, ಅನೇಥಿ ಬಿಜು಼ ಅದ್ಮಿ ಖ್ಹಾರುಬಿ ಡರ್‌ಶೆ. ತೂ ಬೋಲಿ ಖ್ಹಮ್‌ಜಾ಼ನ ಅಗಾಡಿಸ್ ಗಲತ್‌ ನಾಲಗಾಡ್ನುತೇಬಿ, ಏಕ್‌ಬಾಜು಼ಸ್ ಶಾತ್ಬಿ ನಾಕರ‍್ನುತೇಬಿ, ಮೇ ಬೋಲ್ಯೊತೆ ತಿಮ್ ಚಾ಼ಲ್ನುಕರಿ ದೇವ್ನ ಖ್ಹಾಮ್ಣೆಬಿ ಅಜು಼ ಕ್ರಿಸ್ತಯೇಸು ಖ್ಹಾಮ್ಣೆಬಿ, ಚೂ಼ಣೈರ‍್ಹುತೆ ಪರಿಶುದ್ ದೂತರ್‌ನ ಖ್ಹಾಮ್ಣೆಬಿ ಮೇ ತುನ ಖ್ಹಾಚಾಥಿ ಬೋಲುಕರುಸ್. ಖಿವೂಬಿ ಅಜು಼ ಖ್ಹಾಚಿ ಪರ್ಖಾನ ಅಗಾಡಿ ಕಿನಭಣಿಥೂಬಿ ನಾ ರ‍್ಹೇವ್ಣುತೆ ಆ ಖ್ಹಾರು ಕಾಮ್ ಕರ‍್ನು. ಉತ್ವಾಳಿಥಿ ಕಿನ ಮಾಥಪರ್‌ಬಿ ಹಾತ್‌ ಮ್ಹೇಲಿನ್, ಪ್ರಭುನಿ ಸೇವೇನ ನೇಮಕ್ ನಕೊ ಕರೀಶ್. ಇಮ್‌ ನೇಮಕ್ ಕರ‍್ಯೊತೊ ಇವ್ಣ ಪಾಪ್‌ಮ ತೂಬಿ ಭಾಗ್‌ವಾಳೊ ಹುಯಿಜೈ಼ಶ್. ತಾರು ತೂ ಪಾಕ್‌ಥಿ ರ‍್ಹವಾನಿಘೋಣಿ ದೇಖಿಲೆ. ಪಾಣಿಸ್ ಖಾಲಿ ಪೀನಕೊ, ತುನ ಅಛ್ಛಿನಿತರ ಹಜ಼ಮ್ ಹುವಾನಖ್ಹಾಜೆ, ಥೋಡು ಥೋಡು ದ್ರಾಕ್ಷಿನು ರಖ್ಹ್‌ಬಿ ಪೀ. ಶನಕತೊ ಅಜು಼ ತೂ ಘಡಿ-ಘಡಿ ರೋಗ್‌ಮ ಪಡೀಜಾ಼ಸ್. ಥೋಡ ಅದ್ಮಿನು ಪಾಪ್‌ಖ್ಹಾರು ಅಛ್ಛಿನಿತರ ದೆಖಾವಸ್ ಅಜು಼ ಯೋ ಪಾಪ್ ಇವ್ಣುನ ನ್ಯಾವ್‍ನಿ ತೀರ್ಮಾನ್‌ಕನ ಲೀಜಾ಼ಸ್; ಕತೋಬಿ ಅಜು಼ ಥೋಡು ಅದ್ಮಿನು ಪಾಪ್ ಖ್ಹಾರು ಲಪೈರ‍್ಹೀನ್ ಅಜು಼ ದೆಖಾವಾನ ಧೇರ್ ಲಾಗಸ್. ಇಮ್ಮಸ್ ಅಛ್ಛು಼ ಕಾಮ್‌ಖ್ಹಾರುಬಿ ಅಛ್ಛಿನಿತರ ದೆಖಾವಸ್, ಕತೋಬಿ ಖಿವು ದೆಖಾವಕೊಯ್ನಿ ಇನಾಬಿ ಲಪಾಡಿರಾಖನ ಕೊಹುವ್ವಾನಿ.
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.