ದೇವ್ನಿ ಖ್ಹಾಚಿ ವಚನ್
1 ಕೊರಿಂಥ 15:58
Verse 58 is marked below, with the whole chapter around it. Read from the start
ಕ್ರಿಸ್ತ ಮರೀನ್ ಜಿವ್ಯೊತೆ ಇನಿ ಬಾರೇಮ
ಭೈಯೇ ಭೇನೆವೊ, ಮೇ ತುಮೂನ ಬೋಲ್ಯೊತೆ ಸುವಾರ್ತೆನ ಹಮ್ಕೆ ತುಮಾರಿ ಯಾದ್ಮ ಲ್ಯವೂಸ್, ಖ್ಹಮ್‌ಜಾ಼ಡುಸ್. ತುಮೆ ಇನ ಮಾನಿಲಿದ. ಇನಾಮ ಭಿಯಾಸ್‌. ಮೇ ಬೋಲ್ಯೊತೆ ಆ ಸುವಾರ್ತೆನ ತುಮೆ ಘಟ್‍ಥಿ ಧರಿಲಿದಾತೊ ತುಮೂನ ರಕ್ಷಣೆ ಉಷೆ. ನತರ್‌ತೊ ತುಮಾರಿ ವಿಶ್ವಾಸ್ ಬೇಕಾರ್ ಹುಯಿಜಾ಼ಶೆ. ಶನಕತೊ ಮೇಬಿ ಜಿನು ಶಿಕ್ಯೋತೆ ಪಹಿಲಿ ವಾತೆಮಾಥು ಮುಖ್ಯ ವಾತ್ನಸ್ ತುಮೂನ ಖ್ಹಮ್‌ಜಾ಼ಡ್ ರಾಖ್ಯೋಸ್. ಯೋ ಶಾತ್‍ಕತೊ ಧರ್ಮಶಾಸ್ತ್ರಮ ಖ್ಹಮ್‍ಜಾ಼ಡಿರಾಖ್ಯೊತೆ ತಿಮ್ ಕ್ರಿಸ್ತ ಅಪ್ಣ ಪಾಪ್ನಖ್ಹಾಜೆ ಮರ‍್ಯೊ. ಯೋ ಗಡೈಗಯೊ, ಪವಿತ್ರ ದಪ್ತರ್‌ನಿ ಪರಕ್ಮಾಸ್ ತೀನ್ನೆ ರೋಜ಼್‌ಮ ಉಠಿನ್ ಆಯೊ.1 ಪೇತ್ರನಬಿ ಇನಪಾರ್ ಭಾರ ಜ಼ಣ ಅಪೊಸ್ತಲರ್‌ನಾಬಿ ದೇಖಾಯೊ.ಧರ್ಮಶಾಸ್ತ್ರ ಅನಕೇಡೆಥು ಎಕ್ಕಸ್ ವಖ್ಹತ್‌ಮ ಪಾಚ಼್ ಖ್ಹೋಥಿಬಿ ಜಾ಼ಖ್ಹತ್ ಜ಼ಣ ಭೈಯೇ ಭೇನೆವ್‌ನ ದೇಖಾಯೊ. ಇವ್ಣಾಮ ಘಣುಅದ್ಮಿ ಹಮ್ಕೇಬಿ ಬಚಿರ‍್ಹೂಸ್. ಥೋಡುಜ಼ಣು ಮರಿಗಯು. ಇನಕೇಡೆಥು ಯೋ ಯಾಕೋಬ್‌ನಾಬಿ ಇನಪಾರ್ ಬಿಜೇಕ್ ವಖ್ಹತ್ ಖ್ಹಾರಸ್ ಅಪೊಸ್ತಲರ್‌ನಾಬಿ ದೆಖಾಯೊ. ಖ್ಹರ್ತಿಖ್ಹುಗ್ಗಿಮ ದನ್ ಭರಾಯುಕೊಂತೆ ಪೈದಹುವಾಳಾನಿತರ ಛೂ಼ತೆ ಮನಾಬಿ ದೆಖಾಯೊ. ಮೇತೊ ಅಪೊಸ್ತಲರ್‌ಮ ನ್ಹಾನೊ, ಅಪೊಸ್ತಲಕರಿ ಬೋಲೈಲ್ಯವಾನ ಮೇ ಯೋಗ್ಯಕಾಹೆ. ಶನಕತೊ ಮೇ ದೇವ್ನಿ ಸಬೇನಾಸ್ ಖ್ಹತಾಯೊ. ಕತೋಬಿ ಮೇ ಕೆಥ್ರಾನವಾಳೊ ಹುಯಿರ‍್ಹೋಥೊಕಿ ಯೊ ದೇವ್‌ನೊ ವಾರ್‌ಖ್ಹೊಸ್ ಹುಯಿರುಸ್. ಮನಹುಯುತೆ ಇನೊ ವಾರ್‌ಖ್ಹೊ ಬಿಣ್‌ಫಾಯಿದೊ ಹುಯುಕೋಯ್ನಿ. ಮೇ ಇವ್ಣ ಅಖ್ಖೇಥೀಸ್ ಕೆತ್ರೇಕ್ಕಿ ಜಾ಼ಖ್ಹತ್ ವಾಖ್ಯೊಕರ‍್ಯೊ. ಕತೋಬಿ ಮ್ಹಿನತ್ ಕರ‍್ಯೊತೆ ಮೇಸ್ ಕಾಹೆ ದೇವ್ನಿ ವಾರ್‌ಖ್ಹೇಥಿಸ್ ಹುಯು. ಇನಖ್ಹಾಜೆ ಮೇ ರ‍್ಹಿಯೋತೊ ಶಾತ್, ಇವ್ಣೆ ರ‍್ಹಯೊತೊ ಶಾತ್ ಇನಾಸ್ ಹಮೆ ಬೋಲ್‍ಯೇಸ್ತೆ ಸುವಾರ್ತೆನ ಬೋಲಿರಾಖ್ಯಾಸ್. ತುಮೆ ವಿಶ್ವಾಸ್ ಕರಿರಾಖ್ಯಾಸ್.
ಮರ‍್ಯಾಹುಯ ಪಾಛು಼ ಜಿವಿನ್ ಉಠಾನು
ಕತೋಬಿ ಕ್ರಿಸ್ತ ಮರ‍್ಯಾಹುಯಾಮಾಥು ಉಠೀನ್ ಆಯೋಕರಿ ಬೋಲುಕರಾನಿ ವಖ್ಹತ್‌ಮ ತುಮಾರಮ ಥೋಡುಜ಼ಣು ಮರ‍್ಯಾಹುಯಾನ ಪಾಛು಼ ಜಿವ್ತುಹುವಾನು ಕೊಯ್ನಿಕರಿ ಬೋಲಾನು ಕಿಮ್? ಮರ‍್ಯಾಹುಯಾನ ಪಾಛು಼ಜಿವ್ತು ಹುವಾನು ಕೊಯ್ನಿಕತೊ, ಕ್ರಿಸ್ತಬಿ ಮರ‍್ಯಾಹುಯಾಮಾಥು ಉಠಿನ್ ಆಯೊ ಕೊಯ್ನಿಕರಿ. ಕ್ರಿಸ್ತ ಉಠಿನ್ ಆಯೊಕೊಯ್ನಿಕತೊ ಹಮಾರಿ ಉಪದೇಶ್‍ಬಿ, ತುಮಾರಿ ವಿಶ್ವಾಸ್‍ಬಿ ಫಾಯಿದೊಕೊಂತೆ ಹುಯಿರ‍್ಹುಸ್. ಆನಾಹುಯಿನ್ ಮರ‍್ಯುಹುಯು ಉಠೀನ್ ಆಯುಕರಿ ದೇವ್ ಕ್ರಿಸ್ತಾನ ಉಠಾಡ್ಯೊಸ್ ಕೊಯ್ನಿ; ಉಠಾಡ್ಯೊಕರಿ ಸಾಕ್ಷಿ ದಿದಾತೆ ಅಪ್ಣೆ ದೇವ್ನಿ ಬಾರೇಮ ಝೂ಼ಟಿ ಬೋಲವಾಳ ಹುಯ ದೆಖೈಯೆಸ್ ಮರ‍್ಯುಹುಯು ಉಠಿಆವಕೊಯ್ನಿಕತೊ ಕ್ರಿಸ್ತಬಿ ಜಿವ್ತೊಹುಯಿನ್ ಉಠೀನ್ ಆಯೊಕೊಯ್ನಿ. ಕ್ರಿಸ್ತ ಉಠಿನ್ ಆಯೊಕೊಯ್ನಿಕತೊ, ತುಮಾರಿ ವಿಶ್ವಾಸ್ ಬಿಣ್‌ಫಾಯಿದಾನು ಹುಯಿರ‍್ಹೂಸ್. ತುಮೆ ಆಜೂ಼ಬಿ ತುಮಾರಿ ಪಾಪ್‍ಮಾಸ್‌ ಛಾ಼. ಆ ನಾಹುಯಿನ್ ಕ್ರಿಸ್ತಮ ರ‍್ಹೀನ್ ಮರ‍್ಯುಹುಯುಖ್ಹಾರು ನಾಶ ಹುಯಿರ‍್ಹುಸ್ ಕರಿ ಇನಿ ಮತಲಬ್. ಅಪ್ಣೆ ಆ ಜಿ಼ಂದ್‌ಗೀಮ ಖಲಿ ಕ್ರಿಸ್ತಮ ಭರೋಖ್ಹಾವಾಳ ಹುಯಿರ‍್ಹಾತೊ, ಜಗತ್ನ ಅದ್ಮಿಥೀಬಿ ಕಡತೇಲ್‍ ಹುಯಿರ‍್ಹಿಯೇಸ್. ಕತೋಬಿ ಖ್ಹಾಚು಼ ಶಾತ್‍ಕತೊ ಹಮ್ಕೆ ಕ್ರಿಸ್ತ ಮರ‍್ಯಹುಯಮಾಥು ಉಠೀನ್ ಆಯಿರ‍್ಹೋಸ್. ಮರ‍್ಯಹುಯ ಖ್ಹಾರಾಸ್‌ಮ ಮರೀನ್ ಉಠಾನು ಛಾ಼ಕರಿ ವಿಶ್ವಾಸಿಮ ಜ಼ಮೀನ್ ಹುಯಿರ‍್ಹೂಸ್. ಶನಕತೊ ಏಕ್‌ ಅದ್ಮಿಥಿ ಮರಣ್ ಆಯುತೆ ತಿಮ್ಮಸ್ ಏಕ್‌ ಅದ್ಮಿಥಿ ಮರ‍್ಯಾಹುಯಾನ ಪಾಛು಼ಜಿವ್ತು ಹುವಾನು ಆವಸ್. ಶನಕತೊ ಆದಾಮ್ಮ ಖ್ಹಾರೂಸ್ ಮರಾನಿ ತರಸ್, ಕ್ರಿಸ್ತಮ ಖ್ಹಾರೂಸ್ ಜಿವ್ತು ಉಶೆ. ಕತೋಬಿ ಕ್ರಿಸ್ತ ಖ್ಹಾರೇಥಿ ಪಹಿಲೆ ಇನಪಾರ್ ಕ್ರಿಸ್ತ ಆವಾನಿ ವಖ್ಹ್‌ತೆ ಇನು ಅದ್ಮಿಖ್ಹಾರು ಏಕ್‌ನ ಕೇಡೆಥು ಏಕ್‌ ಬರೋಬರ್‌ನಿ ಪರಕ್ಮ ಉಠೀನ್ ಆವ್‌ಶೆ. ಅನಕೇಡೆಥು ಯೋ ಖ್ಹಾರೂಸ್ ದರ್‌ಬಾರ್‌ನಾಬಿ ಖ್ಹಾರೂಸ್ ಅದಿಕಾರ್‌ನಾಬಿ, ಖ್ಹಾರೂಸ್ ಶಕತ್‍ನಾಬಿ ನಾಶ್ ಕರೀನ್ ಬಾ ದೇವ್ನ ಹಾತ್ಮ ರಾಜ್ಯ ದಿನಾಖಿದ್ಯವಾನಿ ವಖ್ಹ್‌ತೆ ಖ್ಹತಮ್ ಹುಯಿಜಾ಼ಶೆ.2 ಶನಕತೊ ದೇವ್ ಅಖ್ಖಾಸ್ ವಹೇರ‍್ಯಾವ್ನ ಹರೈನ್ ಇನ ಪಗ್‍ಪರ್ ನಾಖೀಲ್ಯವಾಲಗು ರಾಜ಼್ ಚ಼ಲಾವಾನು ಜ಼ರೂರತ್ ಛಾ಼.3 ಖ್ಹರ್ತಿನ ನಾಶ್‍ಹುವಾಳೊ ವಹೇರ‍್ಯೊ ಮರಣಸ್. ಶನಕತೊ “ದೇವ್ ತಮಾಮ್‍ನಾಸ್ ಇನ ಗೋಡಾನ ಹೇಟ್ ನಾಖಿನ್ ಇನ ಅಧೀನ್ ಕರ‍್ಯೊ” ಕರಿ ಬೋಲಾನಿ ವಖ್ಹ್‌ತೆ ಖ್ಹಾರಸ್ನ ಅಧೀನ್ ಕರ‍್ಯೊಹುಯೊ ಇನಾಮ ಮಳ್ಯೊಕೊಯ್ನಿಕರಿ ದೆಖಾವಸ್. ತಮಾಮ್‍ಬಿ ಇನ ಹಾತ್ಮ ದೀರಾಖನಪರ್ ಛಿಯ್ಯೊ ತಮಾಮ್‍ನಾಬಿ ದೀರಾಖವಾಳನ ಇನಹಾತ್‍ ಹೇಟ್ ರ‍್ಹವಾಳೊ ಹುಯಿರ‍್ಹೊಸ್; ಅಮ್‍ ದೇವ್ ತಮಾಮ್ಮಾಬಿ ತಮಾಮ್‌ ಹುಯಿರ‍್ಹೊಸ್. ಮರ‍್ಯಹುಯಾನ ಪಾಛು಼ ಜಿವ್ತುಹುವಾನು ನಾರ‍್ಹಯುತೊ, ಮರ‍್ಯಾಹುಯಾನಖ್ಹಾಜೆ ಬ್ಯಾಪ್ತಿಸ್ಮ ಕರೈಲ್ಯಾವಾಳು ಶಾತ್‍ಕರ್‌ಶೆ? ಮರ‍್ಯುಹುಯು ಖ್ಹಾಚಮಾಸ್ ಉಠಿಆವಾಳು ನಾ ಉಶೇತೊ, ಉಠಿಆವಾಳ ಇವ್ಣಖ್ಹಾಜೆ ಅದ್ಮಿಖ್ಹಾರು ಬ್ಯಾಪ್ತಿಸ್ಮ ಶನಕರೈಲೇವ್ಣು? ಕ್ರಿಸ್ತಮ ತುಮೆ ಮಾರಿ ಜೋ಼ಡೆ ಛಾ಼ತೆ ಇನಖ್ಹಾಜೆ ಅಪ್ಣೆ ಜಿನು ಹರ್‌ಘಡೀಮಾಬಿ ಖತ್ರಾಮ ಶನಛಿ಼ಯೇ? ಭೈಯೇ ಭೇನೆವೊ, ಅಪ್ಣೊ ಪ್ರಭು ಹುಯಿರೋತೆ ಕ್ರಿಸ್ತಯೇಸುಮ ತುಮಾರಿ ಬಾರೇಮ ಮನಛಾ಼ತೆ ಪ್ಯಾರ‍್ನಖ್ಹಾಜೆ ಮೇ ಹರ್‌ರೋಜ಼್‍ಬಿ ಮರಣ್ಣ ಮ್ಹೋರೆ ಛೂ಼ಕರಿ ಬೋಲುಸ್. ಮೇ ಅದ್ಮಿವೋನಖ್ಹಾಜೆ ಎಫೆಸಮ ಜಾನ್ವರ್‌ನ ಜೋ಼ಡ್ಮ ಜಂಗ್ ಭೀಡ್ಯೊತೊ, ಮನ ನಫ್ಫೊತೋಬಿ ಶಾತ್? ಮರಿಜಾ಼ವಳು ಉಠಿಆವಾನು ನಾರ‍್ಹಯುತೊ, ‘ಖೈನ್ ಪೀನ್ ಮರಿಜೈ಼ಯೆ?4 “ಖರಾಬ್ ವಾಟ್ಮ ಖೇಚೈಜಾ಼ಶುನಕೊ, ಖರಾಬ್‍ನೊ ಖ್ಹಂಗ್ ಅಛ್ಛಿಚಾ಼ಲ್‍ನ ಖರಾಬ್ ಕರ್ಶೆ”. ನೀತಿನಖ್ಹಾಜೆ ಹೊಷಾರಿ ಹುವೊ, ಪಾಪ್ನ ನಕೊಕರೊ. ಥೋಡಜ಼ಣಾನ ದೇವ್ನಿ ಬಾರೇಮ ಮಾಲುಮ್ಮಸ್‍ಕೊಯ್ನಿ. ತುಮೂನ ಖ್ಹರಮ್‌ ಲಾಗಾದೆಕರಿ ಮೇ ಆ ವಾತ್ ಬೋಲುಕರುಸ್.
ಪಾಛು಼ ಜಿವ್ತು ಹುಯುತೆ ಶರೀರ್
“ಮರ‍್ಯುಹುಯು ಕಿಮ್ ಉಠಿಆವ್‌ಶೆ, ಕಿಮ್ನ ಶರೀರ್‌ಥಿ ಆವ್‍ಶೆಕರಿ ಕೋಣ್‌ತೋಬಿ ಪುಛಾ಼ವ್‍ಶೆ. ಬಿಣ್‍ ಖ್ಹಯಾಲ್ನ ಅದ್ಮಿ, ತೂ ಬಿತ್‍ ಕರಾತೆ ದಾಣೊ ಮರ‍್ಯುನಾತೊ ಯೋ ಜಾನ್‌ ಲೀಶೆಕಿಶು ಕೊಯ್ನಿ. ತೂ ಏಕ್‍ಘಡಿ ಘವ್‌ನ ರ‍್ಹವೊ ಜಿಜು಼ ಕೆಹೂಬಿ ದಾಣಾನ ರ‍್ಹವೊ ಬಿತ್‍ ಕರಾನಿ ವಖ್ಹ್‌ತೆ ಖಲಿ ಎಕ್ಕಸ್ ದಾಣನಾಸ್ ಪಣ್ಕಿ ಅಗಾಡಿ ಮೋಟು ಹುವಾನು ಶೋಶಿನ ಗಾಡಕೊಯ್ನಿ. ಕತೋಬಿ ಅಖ್ಖಾ ದಾಣನಾಬಿ ಇನ ಹೋಣುತೆ ಶರೀರ್‌ನ ದೇಸ್, ದೇವ್ ಇನಿ ಖ್ಹೂಜ಼್‌ನಿ ಘೋಣಿಸ್ ಇನ ಶರೀರ್‌ನ ದೇಸ್.5 ಅಖ್ಖೂಸ್ ಶರೀರ್ ಎಕ್ಕಸ್ ತರ ರ‍್ಹೇಯಿಕೊಯ್ನಿ. ಅದ್ಮಿನು ಶರೀರ್ ಏಕ್‌ಥರ, ಜಾನ್ವರ್‌ನು ಶರೀರ್ ಏಕ್‌ಥರ, ಜಿನಾವರ್‌ನು ಶರೀರ್ ಏಕ್‌ಥರ, ಮಾಛ಼್‌ಲಾನುಸ್ ಬಿಜೇಕ್‌ತರ, ಆ ನಾಹುಯಿನ್ ಸೊರ್ಗಾನು ಶರೀರ್‌ಖ್ಹಾರು ಛಾ಼; ಧರ್ತಿನು ಶರೀರ್‌ಖ್ಹಾರು ಛಾ಼, ಕತೋಬಿ ಪರಲೋಕಮ ಅಖ್ಖಾಶರೀರ್‌ನು ಶನ್‌ಗಾರ್‌ನ ಅಲಕ್, ಧರ್ತಿನು ಶರೀರ‍್ನು ಶನ್‌ಗಾರ್ ಅಲಕ್. ಚಾ಼ಂದ್‌ನು ಶನ್‌ಗಾರ್ ಅಲಕ್, ಚ಼ಂದರ್‌ಮಾನು ಉಜಾ಼ಖ್ಹ್‌ ಬಿಜೇಕ್ ಪರಕ್. ಶನಕತೊ ಶುಕ್ಕರ್ ಶುಕ್ಕರ್‌ನುಸ್ ಶನ್‍ಗಾರ್‌ಮ ಪರಕ್ ರ‍್ಹೇಸ್. ಮರ‍್ಯಹುಯಾನ ಉಷೇತೆ ಪಾಛು಼ ಜಿವ್ತುಹುವಾನಾಬಿ ಇಮ್ಮಸ್ ರ‍್ಹಿಶೆ. ಶರೀರ್ ನೂಛೈಜಾ಼ವಾನಿ ಹಾಲತ್ಮ ಗಡೈಜಾ಼ಸ್. ಅಜು಼ ಮರೀನ್ ಉಠೀನ್ ಆವಾತೆ ನಾಶ ಹುವಾಕೊಂತೆ ರ‍್ಹಿಶೆ. ಗಡೈಜಾ಼ವಾನಿ ವಖ್ಹ್‌ತೆ ಖರಾಬ್ ಹಾಲತ್ಮಾಬಿ ಬಿತ್‍ಹುವಸ್, ಕತೋಬಿ ಮಹಿಮೆನಿ ಜೋ಼ಡ್ಮ ಉಠಿನ್ ಆವಸ್. ಕಮ್‍ಜೋ಼ರಿಮ ಗಡೈಜಾ಼ಸ್, ಶಕಥ್ಥಿ ಉಠೀನ್ ಆವಸ್. ಗಡಾಯುಹುಯು ಮಾಮೂಲಿ ಶರೀರ್‌ಹುಯಿನ್ ಗಡಾವಸ್, ಆತ್ಮೀಕ ಶರೀರ್‌ಹುಯಿನ್ ಉಠಿನ್ ಆವಸ್. ಅಫ್ಫರ್‌ಥು ಉಬ್‌ಜ್ಯುಹುಯು ಶರೀರ್ ಛಾ಼ಕತೊ ಆತ್ಮೀಕ ಶರೀರ್‌ಬಿ ಛಾ಼. ಪಹಿಲೊ ಅದ್ಮಿಹುಯಿರೋತೆ ಆದಾಮ್ ಜಾನ್‌ ಲಿದೋತೆ ಏಕ್ಜ಼ಣೊಹುಯೊ. ಖ್ಹರ್ತಿನೊ ಅದಾಮ್‌ತೋಬಿ ಜಾನ್ನದ್ಯವಾಳೊ ಆತ್ಮಹುಯೊ” ಕರಿ ಪವಿತ್ರ ದಪ್ತರ್‌ಮ ಲೀಖೈರ‍್ಹುಸ್. ಆತ್ಮೀಕ ಹುವಾಳು ಪಹಿಲೆ ಆಯುಕೊಯ್ನಿ ಮ್ಹಾಮುಲಿಸ್ ಪಹಿಲು ಹುಯಿರ‍್ಹೂಸ್. ಇನಕೇಡೆಥು ಆತ್ಮೀಕ ಹುವಾಳು ಐರ‍್ಹೂಸ್. ಪಹಿಲೊ ಅದ್ಮಿ ಜ಼ಮೀನ್ನು ಮಾಟಿವಾಳೊ ಹುಯಿರ‍್ಹೋಥೊ. ಬೇನೊ ಅದ್ಮಿ ಪರಲೋಕ್‌ಥೊ ಆಯೊ ಹುಯೊ. ಮಾಟಿನೊ ಅದ್ಮಿ ಕೆಥ್ರಾನೋಕಿ, ಮಾಟಿನ ಸಂಬಂದ್ ರ‍್ಹವಾಳುಬಿ ಎಥ್ರಾನಸ್‍ವಾಳು, ಪರ್‌ಲೋಕ್‌ನೊ ಅದ್ಮಿ ಕೆಥ್ರಾನವಾಳೋಕಿ ಪರ್‌ಲೋಕ್ನ ಸಂಬಂಧ್‍ರ‍್ಹಾವಾಳುಬಿ ಎಥ್ರಾನಸ್‍ವಾಳು ಹುಯಿರ‍್ಹಿಶೆ. ಅಪ್ಣೆ ಮಾಟಿನ ಅದ್ಮಿನು ರೂಪ್ ಫೇರಿರಾಖ್ಯಾತೇಸ್ ಪರಕ್, ಪರ್‌ಲೋಕ್‌ನು ಅದ್ಮಿನ ರೂಪ್‍ನಾಬಿ ಪೇರ‍್ಹಿಲಿಶೂ಼.6 ಭೇನೆ ಭೈಯೇವೊ, ಮೇ ಶಾತ್ ಬೋಲಸ್‍ಕತೊ, ಲ್ಹೋಯಿ ಬೋಟಿ ದೇವ್ನ ರಾಜ್ಯಮ ಭಾಗ್‌ ಲಿಶೆಕೊಯ್ನಿ. ನೂಛೈಜಾ಼ಯ್‌ ಕೊಯ್ನಿತೆ, ಇನಾಮ ಭಾಗ್‍ಲ್ಯಾವಾನ ಉಶೆಕೊಯ್ನಿ. ಮೇ ಗಪ್ಲತ್ ಹುಯಿರ‍್ಹೀಥೀತೆ ವಾತೆನ ತುಮುನ ಬೋಲುಸ್ ಖ್ಹಮ್‍ಜೊ ಅಪ್ಣೆಖ್ಹಾರು ಮರಿಜಾಶು ಕೊಯ್ನಿ. ಅಪ್ಣೆಖ್ಹಾರು ಬದ್ಲಿಜಾಶು. ಕತೋಬಿ ಎಕ್ಕಸ್ ಘಡೀಮ, ಪಾಪಣ್ ಮಾರಾನ ಮಹಿಮ ಖ್ಹರ್ತಿನಿ ತುತ್ತೂರಿ ವಜಾ಼ಡನಿ ವಖ್ಹ್‌ತೆ ಮರಿಹುಯು ನಾಶ್‌ಕೊಹುವಾನಿತೆ ಹಾಲತ್ಮ ಉಟ್‌ಶೆ. ತದೆ ಅಪ್ಣೆ ಬದ್ಲಿಜಾಶು. ತುತ್ತೂರಿನುವಾಜ಼ನಿ ವಖ್ಹ್‌ತೆ ಮರ‍್ಯುಹುಯು ಕದೇಬಿಜಿವಾನ, ಉಠಾಡೈಜಾ಼ಶೆ. ಅಪ್ಣೆ ಬದ್ಲಿಜಾಶು. ಕತೋಬಿ ನೂಛೈ಼ಜಾ಼ವಾನು ಶರೀರ್ ನೂಛಾ಼ವಕೊಂತೆ ಇಮ್‌ ಬದ್ಲಿಜಾ಼ಶೆ. ಮರವಾಳು ಮರಾಕೊಂತೆ ಹುಯಿಜಾಶೆ. ಅಮ್‌ರ‍್ಹವಾಪರ್ ನೂಛೈ಼ಜಾ಼ವಾಳು ಶರೀರ್ ನೂಛೈ಼ಜಾ಼ವನುಕೊಂತೆ ಬದಲ್ ಹುವಾನಿವಖ್ಹ್‌ತೆ ಪವಿತ್ರ ದಪ್ತರ್‌ಮ “ಜೀತ್ ಮರಣ್ಣ ಗಳಿಲಿದು” ಕರಿ ಲೀಖಾಯುತೆ ವಾತ್ ಚಾ಼ಲಸ್.7 ಮರಣ್, ತಾರಿ ಜೀತ್ ಕ್ಯಾ? ಮರಣ್ ತಾರು ಝಾರ್‌ ಕಣ್ಣಿ ಕಿಜ್ಜಾ಼ ಛಾ಼.8 ಮರಣ್ ಪಾಪ್‌ಥಿ ಅಜ಼ ದ್ಯವಾನು ತಾಖತ್ನ ಲೇಸ್ ಅಜು಼ ಪಾಪ್ ಧರ್ಮಶಾಸ್ತ್ರಥಿ ಶಕತ್ ಲೀಲೆಸ್. ಕತೋಬಿ ಅಪ್ಣೊ ಪ್ರಭು ಹುಯಿರೋತೆ ಯೇಸು ಕ್ರಿಸ್ತಥಿಸ್ ಅಪ್ಣುನ ಜೀತ್‍ದ್ಯಾವಾಳ ದೇವ್ನ ಧನ್ಯವಾದ್. ಇನಾಖ್ಹಾಜೆ ಮಾರ ಪ್ಯಾರ್‌ನ ಭೇನೆ ಭೈಯೇವೊ, ಘಟ್‍ಥಿ ಭೀರ‍್ಹೆವೊ. ಕೆಹೂಬಿ ತುಮುನ ಹಲಾವದೆ ನಕೊ. ಪ್ರಭುಮ ತುಮಾರೊ ವಾಖ್ಯೊ ಬಿಣ್‌ಫಾಯಿದೊ ಉಶೆಕೊಯ್ನಿ ಕರಿ ಖ್ಹಮ್‌ಜಿನ್‌, ಪ್ರಭುನ ಕಾಮ್ನಖ್ಹಾಜೆ ಕದೇಬಿ ತುಮಾರು ತುಮೆ ಪೂರ ಅರ್ಪಣ್‍ ಕರಿಲೆವೊ.
Source notes (8)
- Cross-reference ಹೋಶೇಯ 6:2
- Cross-reference ದಾನಿಯೇಲ 2:44
- Cross-reference ಕೀರ್ತನೆ 110:1
- Cross-reference ಯೆಶಾಯ 22:13
- Cross-reference ಆದಿಕಾಂಡ 1:11
- Cross-reference 1 ಯೋಹಾನ 3:2
- Cross-reference ಯೆಶಾಯ 25:8
- Cross-reference ಹೋಶೇಯ 13:14
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.