1 ಕೊರಿಂಥ 10:13

ಮೂರತ್ನ ಬಾರೇಮ ಝೇತಾವ್ಣಿ

1ಭೇನೆ ಭೈಯೇವೊ ಮೇ ತುಮುನ ಬೋಲಾನ ಶಾತ್ ಅಖ್ಹ್‌ ಕರುಸ್‌ಕತೊ, ಅಪ್ಣೊ ಗುರುಗುರಬ್‍ಲ್ಯ ಖ್ಹಾರುಬಿ ವಾದ್ಳಾನ ಆಖ್ಹ್‌ರಾಮ ಥಾ, ಇವ್ಣೆಖ್ಹಾರುಬಿ ಜ಼ತನ್‌ಥಿ ದರ‍್ಯಾವ್‍ನ ಉಲಾಂಗಿಗಯು.1 2ಇವ್ಣೆಖ್ಹಾರು ಮೋಶೆನ ಪೀಠೆಜಾ಼ವಾನ ಖ್ಹಾಜೆ ವಾದ್‌ಳಾಮಾಬಿ ದರ‍್ಯಾವ್‍ಮಾಬಿ ಮೋಶೇಥಿ ಬ್ಯಾಪ್ತಿಸ್ಮ ಲೀಲಿದು. 3ಇವ್ಣೆಖ್ಹಾರು ಎಕ್ಕಸ್ ಆತ್ಮೀಕ ಖಾಣನ ಖಾದು. 4ಶನಕತೊ ಎಕ್ಕಸ್ ಆತ್ಮೀಕ ಪಾನ್ಕ ಪೀದು. ಇವ್ಣೆ ಇವ್ಣಿಜೋ಼ಡ್ಮ ಆಯುತೆ ಆತ್ಮೀಕ ಬಂಡಾಮಾಥು ವ್ಹಯೂತೆ ಇನ ಪೀದು. ಯೋ ಬಂಡೋಸ್ ಕ್ರಿಸ್ತಹುಯಿರ‍್ಹೋಥೊ. 5ಕತೋಬಿ ಇವ್ಣಾಮ ಘಣ ಅದ್ಮಿನ ದೇವ್ ಇಷ್ಟ ಕರ‍್ಯೊಕೊಯ್ನಿ. ಇನಖ್ಹಾಜೆ ಇವ್ಣು ಮುರ್ದುಖ್ಹಾರು ಜ಼ಂಗಳ್‌ಮ ಛಿಡ್‍ಕೈಗಯು. 6ಇವ್ಣೆ ಕರ‍್ಯುತೆ ತಿಮ್ ಅಪ್ಣೇಬಿ ಖರಾಬ್‍ಅಖ್ಖಾನ ಆಖ್ಹ್ ನಾಕರ‍್ನುಕರಿ ಝೇತಾವ್ಣಿ ಹುಯಿನ್ ಆ ಹಮ್ಕೆ ಅಪ್ಣುನ ಸಾಕ್ಷಿ ಹುಯಿರುಸ್. 7“ಇವ್ಣಾಮ ಥೋಡುಜ಼ಣು ಮೂರತ್ನ ಆರಾದನೆ ಕರಾವಾಳು ಹುಯಿನ್ ಖೈನ್ ಪೀನ್, ನಗರ್‌ನಾಚ಼್‌ತು ನಿಕ್‌ಳ್ಯು.” ಕರಿ ಲೀಖೈರ‍್ಹೂತೆ ತಿಮ್ ತುಮೆ ಮೂರತ್ನ ಆರಾದನೆ ಕರಾವಾಳ ನಕೊಹುವೊ. 8ಇವ್ಣಾಮ ಥೋಡುಜ಼ಣು ಪಾಪೇಲು ಕಾಮ್ ಕರೀನ್ ಎಕ್ಕಸ್ ರೋಜ಼್‌ಮ ತೀನ್ ಉಪ್ಪರ್‌ವೀಖ್ಹ್‌ ಹಜಾ಼ರ್ ಅದ್ಮಿ ಮರಿಗಯು. ಅಪ್ಣೆ ಪಾಪೇಲುಕಾಮ್ ನಾ ಕರ್ನುತೆ ರ‍್ಹಿಯೆ.2 9ಇವ್ಣಾಮ ಥೋಡುಜ಼ಣು ಪ್ರಭುನ ತರೀಪ್ಷ ಕರೀನ್ ಖ್ಹಾಪ್‍ಥಿ ಮರ‍್ಯುತೆ ತಿಮ್, ಅಪ್ಣೇಬಿ ಇವ್ಣಿನಿತರ ತರೀಪ್ಷ ನಾ ಕರ‍್ನು.3 10ಇವ್ಣಾಮ ಥೋಡುಜ಼ಣು ಗುಣ್‍ಗುಣೈನ್ ನಾಶ್ ಕರಾವಾಳು ದೂತ್‌ನ ಹಾತೇಥಿ ಮರೈಗಯು.ಇನಖ್ಹಾಜೆ ಇವ್ಣಿನಿತರ ಅಪ್ಣೇಬಿ ನಾ ಭಣಕ್ಣು. 11ಯೋ ಅದ್ಮಿವೋನ ಹುಯೂತೆ ಆ ಖೇಣಿಖ್ಹಾರಿ ಸಾಕ್ಷಿಹುಯಿರ‍್ಹುಸ್. ಹಗಾಮ್ನಿ ಖ್ಹರ್ತಿನ ಆಯಿರ‍್ಹಾತೆ ಅಪ್ಣುನ ಝೇತಾವ್ಣಿ ದ್ಯವಾನ ಆ ಅಖ್ಖು ಲಿಖೈರ‍್ಹುಸ್. 12ಇನಖ್ಹಾಜೆ ಘಟ್‍ಥಿ ಭೀಯಾಸ್‍ಕರಿ ಖ್ಹಮ್‍ಜಾ಼ವಾಳ ತುಮೆ ರಡ್ಕಿನಾಜಾ಼ವ್ಣುತೆ ತಿಮ್ ದೇಖಿಲೇವೊ. 13ಅದ್ಮಿವೋನ ಮಾಮುಲಿ ಅವಾತೆ ಖ್ಹತಾಪ್ಣಿ ಮ್ಹೆಲ್ಯುತೊ ಬಿಜು಼ ಖೆವುಕಿ ತುಮೂನ ಆಯುಕೊಯ್ನಿನಿ. ಕತೋಬಿ ದೇವ್ ವಿಶ್ವಾಸ್‌ವಾಳೊ. ತುಮೂನ ಖ್ಹಮಾಳನ ಹೋಯಿಕೊಂತೆ ಶೋದನೆಖ್ಹಾರಾನ ಯೋ ತುಮಾರಪರ್ ಆವಾನಿತರ ಮ್ಹೆಲಕೊಯ್ನಿ. ಕತೋಬಿ ತುಮೂನ ಶೋದನೆ ಆಯುತೊ ಯೊ ಅಖ್ಖಾನ ಖ್ಹಮಾಳನ ಶಕತ್‌ವಾಳ ಹುವಾನಿತರ ಯೋ ಅಖ್ಖೇಥಿ ಛು಼ಕಿಜಾ಼ವಾನೊ ಮಾರಗ್ ಬಣಾವಸ್. 14ಇನಖ್ಹಾಜೆ ಮಾರ ಪ್ಯಾರ್‌ನ ಭೈಯೇ ಭೇನೆವೊ, ಮೂರತ್ನಿಆರಾಧನೆ ಮ್ಹೇಲಿನ್ ನಿಕ್ಳೊ. 15ತುಮೆ ಅಕ್ಲಿಕರಿ ಮೇ ತುಮಾರಿಜೋ಼ಡ್ಮ ಅನ ಬೋಲುಸ್. ಮೇ ತೀರ್ಪ್‌ಕರಾನು ಖ್ಹುದ್ ತುಮೇಸ್ ಸೋಚಿದೇಖೊ. 16ಅಪ್ಣೆ ದ್ರಾಕ್ಷಿನರಖ್ಹ್‌ನು ಕಟೋರಮ ದೇವ್ನ ಧನ್ಯವಾದ್ ಕರೀನ್ ಪಿಯಾನಿವಖ್ಹ್‌ತೆ ಕ್ರಿಸ್ತನ ಲ್ಹೋಯಿಮ ಭಾಗ್‌ಲ್ಯವಾಳ ಹುಯಕೊಯ್ನಿಕಿ ಶು? ಅಪ್ಣೆ ರೋಟಾನ ತೋಡಿನ್ ಖಾವಾನಿ ವಖ್ಹ್‌ತೆ ಕ್ರಿಸ್ತನ ಶರೀರ್‌ಮ ಭಾಗ್‌ಲಿದ ಕೊಯ್ನಿಕಿ ಶು? 17ರೋಟೊ ಎಕ್ಕಸ್ ಇನಖ್ಹಾಜೆ ಅಪ್ಣಾಮ ಕೈಯೇಕ್‌ಜ಼ಣು ರ‍್ಹಯುತೋಬಿ ಅಪ್ಣೆ ಎಕ್ಕಸ್ ಶರೀರ್‌ನ ಹುಯಿರಾಸ್. ಶನಕತೊ ಅಪ್ಣೆಖ್ಹಾರು ಯೋ ಎಕ್ಕಸ್ ರೋಟಾಮ ಭಾಗ್‌ಲಿಯೆಸ್. 18ತುಮೆ ಇಸ್ರಾಯೇಲ್ ಅದ್ಮಿಯೇವ್‍ನ ಬಾರೇಮ ಸೋಚೊ. ಬಲಿ ಕರ‍್ಯಾಹುಯಾನ ಖಾವವಾಳು ಬಲಿಪೀಠ್ಮ ಭಾಗ್‌ಲ್ಯಾವಾಳು ಹುಯುಕೊಯ್ನಿಕಿ ಶು? 19ಇಮ್‍ಕತೊ ಮೇ ಶಾತ್‌ ಬೋಲುಕರುಸ್? ಮೂರತ್ನ ಚ಼ಢಾಯಹುಯ ಖಾಣುನು ಚೀಜ಼್ ಖ್ಹಾಚು಼ ಕರಿ ಬೋಲಾನ ಹುವಾಸ್ಕಿ? ಕೊಯ್ನಿ, ಮೂರತ್ ಖ್ಹಾಚು಼ ದೇವ್‌ಕರಿ ಬೋಲಸ್. 20ಕತೋಬಿ ಅಲ್ಹಾವ್‌ ಚ಼ಢಾವಾತೆ ಬಲಿ ದೇವ್‍ನಕಾಹೆ. ಭೂತ್‌ನ ಅಖ್ಖಾನಿ ಜೋ಼ಡ್ಮ ವಾಟೊ ನಾ ಹುಯಿರ‍್ಹೇಣು ಮಾರಿ ಆಖ್ಹ್.4 21ತುಮೆ ಪ್ರಭುನ ಕಟೋರಮಾಬಿ ಭೂತ್ ಅಖ್ಖಾನ ಕಟೋರಮಾಬಿ ಪೀಶುಕೊಯ್ನಿ. ತುಮೆ ಪ್ರಭುನಿ ಪಂತಿಮಾಬಿ ಶೈತಾನ್ನ ಅಖ್ಖಾನಿ ಪಂತಿಮಾಬಿ ಖಾಣುಖಾವಾಳ ಹುಯಿರ‍್ಹಿಶುಕೊಯ್ನಿ. 22ಅಪ್ಣೆ ಪ್ರಭುನ ಇರಾದೊ ಆವನಿತರ ಛೇಡಾವ್ಣು ಕಿಶು? ಅಪ್ಣೆ ಇನೇಥಿಬಿ ತಾಖತ್‍ವಾಳ ಹುಯಿರಾಸ್‍ ಕಿಶು?

ತುಮಾರಿ ಛುಟ್ಕಾರ್ ದೇವ್ನಿ ಮಹಿಮೆನಖ್ಹಾಜೆ

23“ಅಖ್ಖಾಸ್ ಕಾಮ್ನಾಬಿ ಕರಾನ ಛುಟ್ಕಾರ್ ಛಾ಼” ಕತೋಬಿ ಅಪ್ಣೆ ಕರಿಯೇತೆ ಖ್ಹಾರು ಕಾಮ್‍ಬಿ ಅಛ್ಛು಼ಕರಿ ಬೋಲಾನು ಬರೋಬರ್ ಕೊಯ್ನಿ.” ಖ್ಹಾರುಸ್ ಕಾಮ್ ಕರಾನ ಅದಿಕಾರ್‌ಛಾ಼ ಕತೋಬಿ ಅಖ್ಖೂಬಿ ಅದ್ಮಿವೋನ ಫಾಯಿದೊ ಕೊಹುಯಿರ‍್ಹೇಯ್ನಿ. 24ಹರೇಕ್‍ಜ಼ಣು ಇವ್ಣ ಅಛ್ಛಾ಼ನ ಖಲಿ ನಾ ಸೋಚ್ಣುತೆ ಬಿಜಾ಼ನ ಅಛ್ಛಾ಼ನಾಬಿ ಸೋಚಾದೆ. 25ಕಖ್ಹಯ್‌ಮ ವೇಚಾ಼ವತೆ ಶಾತ್‍ರ‍್ಹಿಯುತೋಬಿ ದಿಲ್ಮ ಕಚ಼್ ಹುವಾನಿಘೊಣಿ ವಿಚಾರ್ ಕರ್ನುನಾತೆ ಖಾವೊ. 26ಶನಕತೊ ಜ಼ಮೀನ್‍ಬಿ ಇನಾಮಛಾ಼ತೆ ಖ್ಹಾರುಬಿ ಪ್ರಭುನು ಹುಯಿರ‍್ಹುಸ್ನಿ.5 27ಕ್ರಿಸ್ತ ವಿಶ್ವಾಸಿ ಕಾಹೆತೆ ಕೋಣ್‌ತೋಬಿ ತುಮೂನ ಖಾಣನ ಬುಲಾಯೂತೊ ತುಮೂನ ಶಾತ್ ನಾಖ್ಯುತೋಬಿ ದಿಲ್ನಿಸಾಕ್ಷಿನ ವಿಚಾರ್‌ ಕರ್ನುನಾತೆ ಇನ ಖಾವೊ. 28ಕತೋಬಿ ಏಕ್‍ಜ಼ಣೊ ತುಮೂನ ಹೈರುತೆ ಮೂರತ್ನ ಬಲಿದಿದುಹುಯು ಕರಿ ಕೋಣ್‌ತೋಬಿ ತುಮೂನ ಬೋಲ್ಯುತೊ, ಆ ವಿಚಾರ‍್ನ ಬೋಲ್ಯೊತೆ ಇನಖ್ಹಾಜೇಬಿ ದಿಲ್ನಿಸಾಕ್ಷಿನಖ್ಹಾಜೇಬಿ ಇನ ಖಾವೊನಕೊ. 29ಕತೋಬಿ ಆ ತುಮಾರು ದಿಲ್ನಿಸಾಕ್ಷಿ ಕರಿ ಮೇ ಬೋಲುಕರುಕೊಯ್ನಿ. ರ‍್ಹಯುತೋಬಿ ಬಿಜೇಕ್‍ಜ಼ಣು ಇನ ಖಾವಾನು ಬರೋಬರ್ ಕರಿ ಮಾಲುಮ್ ಕರಿರಾಖ್ಯುತೆ ಇನಖ್ಹಾಜೆ ಇನಿ ದಿಲ್ನಿ ಸಾಕ್ಷಿನಖ್ಹಾಜೆ ಇವ್ಣಿ ಛುಟ್ಕಾರ್‌ನ ಶನ ತೀರ್ಪ್‌ ಹೋಣು? 30ಮೇ ದೇವ್ನ ಧನ್ಯವಾದ್ ಕರೀನ್ ಖಾದೋತೆ ಖಾಣನಖ್ಹಾಜೆ ಮಾರಪರ್ ದೂಷಣೆ ಶನ? 31ಹಮ್ಕೆ ಮಾರಿ ಜವಾಬ್‌ ಅತ್ರೇಸ್; ತುಮೆ ಖಾಣುಖಾದತೋಬಿ, ಪೀದತೋಬಿ ಶಾತ್‍ಕರ‍್ಯಾತೋಬಿ ದೇವ್ನಿ ಮಹಿಮೆನಖ್ಹಾಜೆ ಯೋ ಕರೊ. 32ಬಿಜ಼ ಅದ್ಮಿಯೇವ್‍ ಕತೊ, ಯೆಹೂದ್ಯರ್‌ರ‍್ಹೆವೊ, ಯೆಹೂದ್ಯಕಾಹೇತೆ ರ‍್ಹವೊ, ನತರ್ ದೇವ್ನಿ ಸಬೆವಾಳನರ‍್ಹೇವೊ; ಇವ್ಣೆ ಗಲತ್‍ಮ ಪಡಾನಿಘೋಣಿ ಕದೇಬಿ ನಕೊಕರ್ಷು. 33ಮೇತೊ ಮಾರಿ ಶೊಂತ್‍ ನಫ್ಫಾನಖ್ಹಾಜೆ ಢೂಂಡುಕೊಂತೆ ಖ್ಹಾರುಸ್ಜ಼ಣು ರಕ್ಷಣೆ ಲೇವ್ಣುಕರಿ ಇವ್ಣಿ ನಫ್ಫಾನಖ್ಹಾಜೆ ಅಖ್ಖಜ಼ಣಾಮ ಅಖ್ಖೀಸ್ ವಾತೇಮ ಖ್ಹರೈಲೆವುಸ್.