1 ಕೊರಿಂಥ 1

1ಪೌಲ ಲೀಖುಕರಾತೆ ಚಿಟ್ಟಿ. ಕ್ರಿಸ್ತಯೇಸುನೊ ಅಪೊಸ್ತಲ ಹುವಾನ ಮೇ ದೇವ್ನಿ ಖ್ಹಯಾಲ್‌ಥಿ ಚೂ಼ಣೈಗಯೊ. ಮೇ ಆ ಚಿಟ್ಟಿನ ಕ್ರಿಸ್ತಮ ಮಾರೊ ಭೈಹುಯಿರೋತೆ ಸೋಸ್ಥೆನನಿ ಜೋ಼ಡ್ಮ ಲೀಖುಕರುಸ್. 2ಕ್ರಿಸ್ತ ಯೇಸುಮ ಪವಿತ್ರ ಕರಿ ಬಣೈರಾಖ್ಯೊತೆ ಕೊರಿಂಥನಿ ದೇವ್ನಿ ಸಬೆವಾಳನ ಆ ಚಿಟ್ಟಿ ಲೀಖುಕರುಸ್. ತುಮೆ ದೇವ್ನು ಪವಿತ್ರ ಅದ್ಮಿಹುವಾನಖ್ಹಾಜೆ ಸ್ವೀಕಾರ್ ಹುಯಿರುತೆ ಇವ್ಣುನ ಪ್ರಭು ಹುಯಿರೋತೆ ಯೇಸುಕ್ರಿಸ್ತನ ನಾಮ್ಮ ವಿಶ್ವಾಸ್ ಕರಸ್ತೆ ಖ್ಹಾರಸ್ ಅದ್ಮಿನಿಜೋ಼ಡ್ಮ ತುಮೆ ಚೂ಼ಣೈರ‍್ಹಾಸ್. ಯೇಸುಕ್ರಿಸ್ತ ಇವ್ಣುನಾಬಿ ಅಪ್ಣುನಾಬಿ ಪ್ರಭು ಹುಯಿರ‍್ಹೊಸ್. 3ಅಪ್ಣೊ ಬಾ ಹುಯಿರ‍್ಹೋತೆ ದೇವ್‍ಥೀಬಿ ಪ್ರಭು ಯೇಸುಕ್ರಿಸ್ತಥೀಬಿ ತುಮೂನ ವಾರ್‌ಖ್ಹೊಬಿ, ಶಾಂತಿಬಿ ಮಳಾದೆ.

ಕ್ರಿಸ್ತಮ ಆಶೀರ್ವಾದ್‌

4ದೇವ್ ಕ್ರಿಸ್ತಯೇಸುಥಿ ತುಮೂನ ದೀರಾಖ್ಯೋತೆ ವಾರ್‌ಖ್ಹಾನಖ್ಹಾಜೆ ಮೇ ತುಮಾರಖ್ಹಾಜೆ ಮಾರ ದೇವ್ನ ಕದೇಬಿ ಧನ್ಯವಾದ್ ಕರುಸ್. 5ಶನಕತೊ ಯೇಸುಮ ಖ್ಹಾರೀಸ್‍ಥರಾನಿ ಅಖ್ಖಿ ಆಶೀರ್ವಾದ್‌ನ ಲೀರಾಖ್ಯಾತೆ ತುಮೆ ವಾತ್‍ಮಾಬಿ ಅಕ್ಕಲ್‌ಮಾಬಿ ಘಣ ಚಾ಼ತುರ್‌ವಾಳ ಹುಯಿರಾಸ್. 6ಕ್ರಿಸ್ತನು ಬಾರೇಮಾನಿ ಸಾಕ್ಷಿ ತುಮಾರಮ ಘಟ್ ಛಾ಼. 7ಅಮ್‍ರ‍್ಹವಾಪರ್, ಅಪ್ಣೊ ಪ್ರಭು ಯೇಸುಕ್ರಿಸ್ತ ಪಾಛೊ಼ ಆವಾನುಸ್ ಟಿವೈ ದೇಖುಕರಾತೆ ತುಮೆ, ದೇವ್‍ಥಿ ಆವಾತೆ ಹರೇಕ್ ವರಾನ ಲೀಲ್ಯಾವಾಳ ಹುಯಿರಾಸ್. 8ಯೊ ತುಮೂನ ಖ್ಹರ್ತಿಲಗು ಘಟ್‍ರಾಖಿನ್ ಬಚಾ಼ಡ್‍ಷೆ. ಅಮ್ಮಸ್ ಅಪ್ಣೊ ಪ್ರಭು ಯೇಸುಕ್ರಿಸ್ತ ಬಿಜು಼ ಪಾಛೊ಼ ಆವಾನ ವೇಳ್ಮ ತುಮೆ ನಿರ್ದೋಷಿ ಹುಯಿರ‍್ಹಿಶು. 9ದೇವ್‌ನೊ ಛಿಯ್ಯೋಬಿ ಅಜು಼ ಅಪ್ಣೊ ಪ್ರಭು ಹುಯಿರೋತೆ ಯೇಸುಕ್ರಿಸ್ತನಿ ಜೋ಼ಡ್ಮ ಮಳಿನ್ ರ‍್ಹವಾನಖ್ಹಾಜೆ ತುಮೂನ ಬುಲಾಯೋತೆ ದೇವ್ ವಿಶ್ವಾಸ್‌ವಾಳೊ ಹುಯಿರ‍್ಹೊಸ್.

ಸಬೆಮ ಭಾಗ್‌ ಹುಯುತೆ

10ಬೇನೆ, ಭೈಯೇವೊ, ಅಪ್ಣೊ ಪ್ರಭು ಯೇಸುಕ್ರಿಸ್ತನ ನಾಮ್‍ಥಿ ಮೇ ತುಮೂನ ಬಿಂತಿ ಕರುಸ್ತೆ ಶಾತ್‍ಕತೊ, ಅಬ್ಬಾಜ಼ಬ್ಬಿ ನಾ ಬೋಲ್ನುತೆ, ಅಷಿಲ್ ಕಮ್‍ಶಿಲ್ ಕರಿ ಬೇಭಾಗ್‌ ನಾ ರ‍್ಹೇವ್ಣು. ಎಕ್ಕಸ್ ದಿಲ್‌ಥಿ ಎಕ್ಕಸ್ ಖ್ಹಯಾಲ್‌ಥೀಬಿ ಎಕ್ಟುರ‍್ಹೀನ್ ಜಿವ್ಣು ಕರೊ, 11ಶನಕತೊ ಭೇನೆ ಭೈಯೇವೊ ಖ್ಲೋಯೆನ ಘರ್‌ಥು ಆಯುಹುಯು ಥೋಡ ಜ಼ಣಾನೆ ತುಮಾರ ಇಚ಼್‌ಮ ಲಡೈ ಚಾ಼ಲುಕರಸ್‍ಕರಿ ಮನ ಬೋಲ್ಯು. 12ಕತೊ ತುಮಾರಮ ಏಕ್‍ಜ಼ಣೊ, “ಮೇ ಪೌಲನ ಪೀಠೆ ಜ಼ವುಸ್‌” ಕರಿ ಬೋಲಸ್, ಬಿಜೇಕ್‍ಜ಼ಣೊ “ಮೇ ಅಪೊಲ್ಲೋಸನ ಪೀಠೆ ಜ಼ವುಸ್‌” ಕರಿ ಬೋಲಸ್. ಅಜು಼ ಬಿಜೇಕ್ ಜ಼ಣು, “ಮೇ ಕೇಫನ ಪೇತ್ರನ ಪೀಠೆ ಜವುಸ್‌ ಕರಿ ಬೋಲಸ್. ಅಜೇಕ್‌ಜ಼ಣೊ, “ಮೇ ಕ್ರಿಸ್ತನ ಪೀಠೆ ಜ಼ವುಸ್‌” ಕರಿ ಬೋಲಸ್. 13ಕ್ರಿಸ್ತ ವಾಟಪಡಿರ‍್ಹೋಸ್‍ ಕಿಶು? ಪೌಲ ತುಮಾರಖ್ಹಾಜೆ ಶಿಲ್‌ಬೇಪರ್ ಮರ‍್ಯೊಕಿಶು? ತುಮೆ ಪೌಲನ ನಾಮ್‍ಥಿ ಬ್ಯಾಪ್ತಿಸ್ಮ ಕರೈಲಿದ ಕಿಶು? 14ತುಮಾರಮ ಕ್ರಿಸ್ಪನ ಬಿಜು಼ ಗಾಯನ ಮ್ಹೇಲ್ಯುತೊ ಬಿಜು಼ ಕಿನಾಬಿ ಮೇ ಬ್ಯಾಪ್ತಿಸ್ಮ ಕರಾಯೊಕೊಂತೆ ಇನಖ್ಹಾಜೆ ದೇವ್ನ ಧನ್ಯವಾದ್‌ ಕರುಸ್. 15ಇನೇಥಿ ಮಾರ ನಾಮ್‍ಪರ್ ಬ್ಯಾಪ್ತಿಸ್ಮ ಕರೈರಾಖ್ಯಸ್‍ಕರಿ ಬೋಲಾನ ತುಮಾರಮ ಕಿನೇಥೀಬಿ ಹಮ್ಕೆ ಉಷೆಕೊಯ್ನಿ. 16ಮೇ ಸ್ತೆಫನನ ಘರ್‌ವಾಳಾನ ಮ್ಹೇಲಿನ್, ಬಿಜು಼ ಕಿನಾಬಿ ಬ್ಯಾಪ್ತಿಸ್ಮ ಕರಾವನಿತರ ಮನ ದೇಖಾವಕೊಯ್ನಿ. 17ಕ್ರಿಸ್ತನೆ ಮನ ಮೋಕ್‍ಲ್ಯೊತೆ ಬ್ಯಾಪ್ತಿಸ್ಮ ದ್ಯವಾನ ಕಾಹೆ. ಸುವಾರ್ತೆನ ಖ್ಹಮ್‍ಜಾ಼ಡನಖ್ಹಾಜೆ ಎತ್ರೇಸ್. ಕತೋಬಿ ಖಾಲಿ ಅದ್ಮಿನಿ ಅಕ್ಕಲ್‍ಥಿ ಬೋಲಿ ಖ್ಹಮ್‌ಜಾ಼ಡನ ಮನ ಮೋಕ್‌ಲ್ಯೊ ಕೊಯ್ನಿ. ಮೇ ಕಾಯ್‌ತೋಬಿ ಲೋಕ್‌ನಿ ಗ್ಯಾನ್‌ಥಿ ಸುವಾರ್ತೆ ಬೋಲ್ಯೊಹೊತ್ತೊ ಕ್ರಿಸ್ತನಿ ಶಿಲ್‌ಬೇನಿ ಶಕತ್ ಫಾಯಿದೊಕೊಂತೆ ಹುಯುಹೊತ್ತ್.

ಕ್ರಿಸ್ತ ದೇವ್ನಿ ಶಕತ್ ಅಜು಼ ದೇವ್ನಿ ಗ್ಯಾನ್

18ಶನಕತೊ ನಾಶನ ಮಾರಗ್‍ಮಛಾ಼ತೆ ಅದ್ಮಿಖ್ಹಾರಾನ ಶಿಲ್‌ಬೇನು ಬೋಧನೆ ಪಾಗಲ್‍ಪನ್ ಹುಯಿರ‍್ಹೂಸ್. ಕತೋಬಿ ರಕ್ಷಣೆನ ಮಾರಗ್‍ಮ ಛಾ಼ತೆ ಅಪ್ಣುನತೋ ಯೋ ದೇವ್ನಿ ಶಕತ್ ಹುಯಿರ‍್ಹೀಸ್. 19ಪವಿತ್ರ ದಪ್ತರ್‌ಮ ಅಮ್ ಲಿಖೈರ‍್ಹುಸ್, ‘ಗ್ಯಾನ್ನಿ ಗ್ಯಾನ್ ನಾಶ್ ಕರೀಸ್. ಬುದ್ದಿವಾಳನಿ ಬುದ್ದಿನ ಫಾಯಿದೊ ನಾ ರ‍್ಹೇವ್ಣುತೆ ತಿಮ್ ಕರೀಶ್’.1 20ಅಮ್‌ರ‍್ಹವಾಪರ್ ಅಕ್ಲಿ ಕಿಜ಼್ಜಛಾ಼? ಪಢಂತಿ ಕಿಜ಼್ಜ ಛಾ಼? ಆ ಹಗಾಮ್‍ನೊ ನವಿ ಗ್ಯಾನ್ನ ಢುಂಡಾವಾಳೊ ಕಿಜ಼್ಜ ಛಾ಼, ದೇವ್ ಜಗತ್ನಿ ಗ್ಯಾನ್ನ ಘೈಲು ಕರಿನಾಖ್ಯೊ! 21ಹೈರೂತೆ ದೇವ್ನಿ ಗ್ಯಾನ್ನಿ ಖ್ಹೂಜ಼್ ಹುಯಿರ‍್ಹುಥು. ಜಗತ್‌ ಇನಿ ಶೊಂತ್ ಗ್ಯಾನ್‌ಥಿ ದೇವ್ನ ಖ್ಹಮ್‍ಜಿರಾಖ್ಯುಥು ಕೊಯ್ನಿ. ಇನಖ್ಹಾಜೆ ಘೈಲಾನಿತರ ದೆಖಾವತೆ ಬೋಧನ್‍ಥಿ ವಿಶ್ವಾಸ್ ಕರವಾಳನಿ ರಕ್ಷಣೆ ಕರಾನು ದೇವ್ನ ಅಛ್ಛು಼ಕರಿ ದೆಖಾಯು. 22ಯೆಹೂದ್ಯರ್‌ಖ್ಹಾರು ಸಾಕ್ಷಿನಖ್ಹಾಜೆ ಖ್ಹಣೇದ್‌ನಕಾಮ್ನ ಖ್ಹಮ್‍ಜ಼ಸ್. ಗ್ರೀಕ್‍ವಾಳಾನ ಗ್ಯಾನ್ನ ಢೂಂಡಸ್. 23ಅಪ್ಣೆತೋಬಿ ಶಿಲ್‌ಬೇಪರ್ ಮರೈಗಯೋತೆ ಕ್ರಿಸ್ತನಿ ಬಾರೇಮ ಬೋಲಿಯೇಸ್. ಆ ಹೈರುತೆ ಯೆಹೂದ್ಯರ್‌ನ ಅಡ್ಡಿ ಹುಯಿರ‍್ಹೂಸ್. ಯೆಹೂದ್ಯರ್‌ಕಾಹೆತೆ ಅದ್ಮಿನ ಘೈಲಾನಿತರ ದೇಖಾವಸ್. 24ಕತೋಬಿ ದೇವ್‍ಥಿ ಬುಲೈಲಿದಹುಯ ಅದ್ಮಿ ಯೆಹೂದ್ಯರ್ ಹುಯಿರ‍್ಹತೋಬಿ ಯೆಹೂದ್ಯರ್‌ಕಾಹೇತೆ ಹುಯಿರ‍್ಹುತೋಬಿ ಇವ್ಣುನ ಕ್ರಿಸ್ತಾಸ್ ದೇವ್ನಿ ಶಕತ್‍ ಹುಯಿರ‍್ಹೋಸ್. ಅಜು಼ ದೇವ್ನಿ ಅಕ್ಕಲ್ ಹುಯಿರೊಸ್. 25ಶನಕತೊ ದೇವ್ನಿ ಕಮ್‍ಜೋ಼ರ್ ಅದ್ಮಿನಿ ಅಕ್ಕಲ್‍ಥಿ ಮಹಾನ್ ಹುಯಿರುಸ್. ದೇವ್ನಿ ಕಮ್‍ಜೋ಼ರಿಕತೊ ಅದ್ಮಿನಿ ತಾಖಥಿಬಿ ಘಣು ಶಕತ್ನು ಹುಯಿರುಸ್. 26ಭೇನೆ, ಭೈಯೇವೊ, ದೇವ್ ತುಮೂನ ಬುಲಾವನಿ ವಖ್ಹತ್‌ಮ ತುಮೆ ಕಿಮ್‍ಥಾಕರಿ, ಯಾದ್ ಕರಿಲೆವೊ. ಜಗತ್ನಿ ಗಣ್ತಿಮ ತುಮಾರಮ ಕೈಏಕ್ ಜ಼ಣು ಅಕ್ಕಲ್‍ವಾಳು ಕೋ ಹುಯಿರ‍್ಹಾಥಾನಿ: ಅದಿಕಾರಿ ಕೋ ಹುಯಿರ‍್ಹಾಥಾನಿ; ಮರ್ಯಾದಿನೊ ಕೋ ಹುಯಿರ‍್ಹಾಥಾನಿ. 27ಕತೋಬಿ ಆ ಜಗತ್ನ ಅಕ್ಲಿಖ್ಹಾರಾನ ಖ್ಹರಮ್‌ ಕಾಡಾನಖ್ಹಾಜೆ ದೇವ್ನೆ ಕಮ್‍ಜೋ಼ರ್ ಛಾ಼ತೆ ಇವ್ಣುನ ಚೂ಼ಣಿರಾಖ್ಯೊಸ್; ಶಕತ್‍ವಾಳಾನ ಖ್ಹರಮ್‌ ಕಾಡಾನಖ್ಹಾಜೆ ಕಮ್‍ಜೋ಼ರಿ ಶಕತ್‍ವಾಳನ ಚೂ಼ಣಿರಾಖ್ಯೊಸ್. 28ಜಗತ್‌ ಖೆವಾನ ಮುಖ್ಯಕರಿ ಸೋಚಸ್ಕಿ ಇನ ನಾಶ್‍ಕರಾನ ದೇವ್ನೆ ಲ್ಹಾಯೇಕ್‍ಕೊಯ್ನಿ ಕರಿ ಸೋಚಾತೆ ಇವ್ಣುನ ದೇವ್ನೆ ಚೂ಼ಣಿಲಿದೊ. 29ಅಮ್‍ರ‍್ಹವಾಪರ್ ದೇವ್ನ ಖ್ಹಾಮ್ಣೆ ಮೋಟೊಕರಿ ಖ್ಹರೈಲ್ಯವಾನ ಕಿನಾಬಿ ಮೋಕಕೊಯ್ನಿ. 30ತುಮೂನ ಕ್ರಿಸ್ತಯೇಸುಮ ಏಕ್‌ಭಾಗ್ ಕರಿ ಬಣಾಯೋತೆ ದೇವ್ನೇಸ್. ಕ್ರಿಸ್ತ ಅಪ್ಣಖ್ಹಾಜೆ ದೇವ್‌ಕಂಥು ಆಯೋತೆ ಗ್ಯಾನಿ ಹುಯಿರೊಸ್. ಅಪ್ಣೆ ನೀತಿವಾಳ ಹುಯಿರ‍್ಹವಾನ, ಅಪ್ಣೆ ಅಖ್ಖು ಪವಿತ್ರಹುಯಿರ‍್ಹಾಸ್. 31ಇನಖ್ಹಾಜೆ ಪವಿತ್ರ ದಪ್ತರ್ ಬೋಲಸ್ತೆ ಇಮ್‌ ಭಡವಾಳೊ ಪ್ರಭುಮಾಸ್ ಭಡಾದೆ2.