Muⱪeddes Kalam (yǝngi yeziⱪ)
Rut 3
Rutning hamanƣa berip, Boaz bilǝn kɵrüxüx
Xu künlǝrdǝ, ⱪeynanisi Naomi uningƣa: — Əy ⱪizim, ⱨal-ǝⱨwalingning yahxi boluxi üqün, sening aram-bǝhtingni izdimǝymǝnmu? 1 Sǝn dedǝkliri bilǝn ixligǝn Boaz bizgǝ tuƣⱪan kelidu ǝmǝsmu? Mana, bügün ahxam u hamanda arpa soruydu. Əmdi sǝn yuyunup-tarinip, ɵzünggǝ ǝtirlik may sürüp, esil kiyimliringni kiyip, hamanƣa qüxkin; lekin u ǝr kixi yǝp-iqip bolmiƣuqǝ, ɵzüngni uningƣa kɵrsǝtmigin. 2 U yatⱪanda uning uhlaydiƣan yerini kɵrüwal. Andin sǝn kirip, ayaƣ tǝripini eqip, xu yǝrdǝ yetiwalƣin. Andin u sanga nemǝ ⱪilix kerǝklikini eytidu, — dedi.
Rut uningƣa: — Sǝn nemǝ desǝng mǝn xuni ⱪilimǝn, — dedi. U hamanƣa qüxüp, ⱪeynanisi uningƣa tapiliƣandǝk ⱪildi. Boaz yǝp-iqip, kɵnglini hux ⱪilip qǝxning ayiƣiƣa berip yatti. Andin Rut xǝpǝ qiⱪarmay kelip, ayaƣ tǝripini eqip, xu yǝrdǝ yatti. Yerim keqidǝ Boaz qɵqüp, aldiƣa engixkǝndǝ, mana bir ayal ayiƣida yatatti! 3
Kim sǝn?! — dǝp soridi u.
Rut jawabǝn: — Mǝn hizmǝtkaring Rut bolimǝn. Sǝn mening ⱨǝmjǝmǝt-nijatkarim bolƣining üqün hizmǝtkaringning üstigǝ tonungning etikini yeyip ⱪoyƣaysǝn, — dedi. 4
U jawabǝn: — Əy ⱪizim, Pǝrwǝrdigardin bǝht-bǝrikǝt tapⱪaysǝn! Sening keyin kɵrsǝtkǝn sadaⱪǝt-meⱨribanliⱪing ilgiri kɵrsǝtkiningdinmu artuⱪtur; qünki seni izdigǝn yigitlǝr, mǝyli kǝmbǝƣǝl bolsun, bay bolsun, ularning kǝynidin kǝtmiding. 5 I ⱪizim, ǝmdi ⱪorⱪmiƣin! Deginingning ⱨǝmmisini orundap berimǝn; qünki pütkül xǝⱨirimizdiki mɵtiwǝrlǝr seni pǝzilǝtlik ayal dǝp bilidu. 6
Durus, sanga ⱨǝmjǝmǝt-nijatkar bolƣinim rast; lekin sening mǝndin yeⱪinraⱪ yǝnǝ bir ⱨǝmjǝmǝting bar. Əmdi keqiqǝ bu yǝrdǝ ⱪalƣin; ǝtǝ sǝⱨǝrdǝ ǝgǝr u ⱨǝmjǝmǝtlik ⱨoⱪuⱪini ixlitip seni elixni halisa, u alsun; lekin ⱨǝmjǝmǝtlik ⱨoⱪuⱪi boyiqǝ seni almisa, Pǝrwǝrdigarning ⱨayati bilǝn ⱪǝsǝm ⱪilimǝnki, mǝn sanga ⱨǝmjǝmǝtlik ⱪilip seni alay. Tang atⱪuqǝ bu yǝrdǝ yetip turƣin! — dedi.
U uning ayiƣida tang atⱪuqǝ yetip, kixilǝr bir-birini tonuƣudǝk boluxtin burun ⱪopti. Qünki Boaz: — bir ayalning hamanƣa kǝlginini ⱨeqkim bilmisun, dǝp eytⱪanidi. 7
U yǝnǝ Rutⱪa: — Sǝn kiygǝn yepinqini eqip turƣin, dedi. U uni eqip turuwidi, Boaz arpidin altǝ kǝmqǝn kǝmlǝp berip, uning ɵxnisigǝ artip ⱪoydi. Andin u xǝⱨǝrgǝ kirdi. 8 Rut ⱪeynanisining yeniƣa kǝldi. U: — Əy ⱪizim, sǝn ⱨazir kim?! — dǝp soridi. Xuning bilǝn u ⱪeynanisiƣa u kixining ⱪilƣanlirining ⱨǝmmisini dǝp bǝrdi. 9 U: — U bu altǝ kǝmqǝn arpini manga bǝrdi, qünki u: «ⱪeynanangning yeniƣa ⱪuruⱪ ⱪol ⱪaytip barmiƣin» dedi, — dedi.
Naomi: — Əy ⱪizim, bu ixning ahirining ⱪandaⱪ bolidiƣinini bilgüqǝ muxu yǝrdǝ tǝhir ⱪilƣin; qünki u adǝm bügün muxu ixni pütküzmǝy aram almaydu, dedi.
Source notes (9)
- Footnote ◼ «Sening aram-bǝhtingni izdimǝymǝnmu?» - Naomining muxu «aram-bǝht» degini Rutni ⱪaytidin ɵy-oqaⱪliⱪ ⱪilixni kɵrsitidu.
- Footnote ◼ «Ɵzünggǝ ǝtirlik may sürüp» - ibraniy tilida «ɵzüngni mǝsiⱨ ⱪilip» yaki «ɵzüngni mǝsiⱨlǝp».
- Footnote ◼ «Qɵqüp, ...» - baxⱪa birhil tǝrjimisi «titrǝp ketip, ...». Ⱨeqbolmiƣanda, Boaz putliriƣa soƣuⱪ urulƣanda oyƣinip kǝtkǝn bolsa kerǝk. «Engixkǝndǝ» - baxⱪa birhil tǝrjimisi «ɵrülgǝndǝ»
- Footnote ◼ «Hizmǝtkaring» — oⱪurmǝnlǝrning esidǝ barki, ibraniy tilida «dedǝk»ni tǝswirlǝydiƣan ikki sɵz bar. Bu ayǝttǝ Rut ornini yuⱪiriraⱪ kɵrsitidiƣan sɵzni ɵzigǝ ixlǝtti (2:13ni wǝ izaⱨatni kɵrüng) «Ⱨǝmjǝmǝt-nijatkar» degǝn uⱪum toƣruluⱪ 2:20ni wǝ izaⱨatni kɵrüng. «Toningning etikini hizmǝtkaringning üstigǝ yepip ⱪoyƣaysǝn» - Rut eytⱪan «Toningning etikini hizmǝtkaringning üstigǝ yepip ⱪoyƣaysǝn» degǝn ibarǝ: — «Meni sayǝngning astiƣa alƣin, meni ǝmringgǝ alƣin» degǝnni wǝ ɵzining Boazning ayali boluxⱪa razi ikǝnlikini bildüridu. Hudamu Israilni ɵz ⱪaniti astiƣa alƣanliⱪi toƣruluⱪ xu sɵzni ⱪilƣan — «Əz.» 16:8ni kɵrüng.
- Footnote ◼ «Seni izdigǝn yigitlǝr» - Boazning sɵzigǝ ⱪariƣanda (xübⱨisizki, u ⱨǝm tirixqan ⱨǝm qirayliⱪ bolƣaqⱪa) Rutni birⱪanqǝ yigit izdǝp kǝlgǝn. Lekin Rut ɵz mǝyligǝ ǝgixip ularni tallimay, bǝlki orniƣa ⱪeynanisi Naomiƣa yahxi bolsun dǝp rǝⱨmǝtlik erigǝ «ⱨǝmjǝmǝt-nijatkar» bolƣan Boazning panaⱨliⱪini izdigǝn. Xuning bilǝn Boaz Rutning ⱪilƣini toƣruluⱪ: «Sening keyin kɵrsǝtkǝn sadaⱪǝt-meⱨribanliⱪing ilgiri kɵrsǝtkiningdinmu artuⱪtur» dǝydu. Rutning «ilgiri kɵrsǝtkǝn (sadaⱪǝt-meⱨribanliⱪi)» bolsa ⱪeynanisiƣa bolƣan sadaⱪǝtlikini, uningƣa ⱨǝmraⱨ bolup ɵz yurtini taxlap Israillarning arisiƣa kǝlgǝnlikini kɵrsitidu. Boazning «Sǝn keyin kɵrsǝtkǝn sadaⱪǝt-meⱨribanliⱪ» degini bolsa ɵzini izdigǝnlikini kɵrsitidu.
- Footnote ◼ «Pütkül xǝⱨirimizdiki mɵtiwǝrlǝr» - ibraniy tilida «hǝlⱪimning xǝⱨirining dǝrwazisidiki kixilǝr» — ⱪǝdimki zamanda «xǝⱨǝrning dǝrwazisi» aⱪsaⱪallar wǝ mɵtiwǝrlǝr olturidiƣan jay idi; xu yǝrdǝ sot eqilatti. Xunga Boazning sɵzining toluⱪ mǝnisi «Mening xǝⱨirimdiki barliⱪ mɵtiwǝrlǝr seni pǝzilǝtlik ayal dǝp ⱪaraydu».
- Footnote ◼ «Eytⱪanidi» - ibraniy tilida «eytⱪanidi» yaki «oyliƣanidi» degǝn mǝnǝ birla sɵz bilǝn ipadilinidu. Biz bu yǝrdǝ «eytⱪanidi» dǝp tǝrjimǝ ⱪilduⱪ.
- Footnote ◼ «Altǝ kǝmqǝn» - bǝlkim «altǝ ǝfaⱨ», yǝni 27-45 kilogramni kɵrsitixi mumkin.
- Footnote ◼ «Sǝn ⱨazir kim?» - Naomining bu soali bilǝn Rutning ⱨazirⱪi salaⱨiyitini soraydu: u: «Ⱨazir sǝn Boazning ayali boldungmu-yoⱪ?» degǝn mǝnini bildüridu.
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.