Muⱪeddes Kalam (yǝngi yeziⱪ)

Wǝⱨiy 5

Ⱪozining oram yazmini ⱪoliƣa elixi

Andin tǝhttǝ olturƣuqining ong ⱪolida iq wǝ tax tǝripigǝ hǝt pütülgǝn wǝ yǝttǝ mɵⱨür bilǝn peqǝtlǝngǝn bir oram yazmini kɵrdüm. 1 2 Yuⱪiri awaz bilǝn: «Oram yazmini eqip, peqǝtlǝrni yexixkǝ kim layiⱪtur?» dǝp towliƣan ⱪawul bir pǝrixtinimu kɵrdüm. Lekin nǝ ǝrxtǝ nǝ yǝr yüzidǝ nǝ yǝr astida oram yazmini aqalaydiƣan yaki iqigǝ ⱪariyalaydiƣan ⱨeqkim qiⱪmidi. 3 Oram yazmini eqixⱪa yaki iqigǝ ⱪaraxⱪa layiⱪ birǝrsi tepilmiƣaqⱪa, ⱪattiⱪ yiƣliwǝttim. Andin aⱪsaⱪallardin biri manga:

— Yiƣlima! Ⱪara, Yǝⱨuda ⱪǝbilisidin bolƣan xir — Dawutning yiltizi Bolƣuqi ƣǝlibǝ ⱪildi; xunga oram yazmini wǝ uning yǝttǝ peqitini eqixⱪa U ⱪadir, — dedi. 4 5

Andin ⱪarisam, tǝht bilǝn tɵt ⱨayat mǝhluⱪning ariliⱪida, aⱪsaⱪallar otturisida bir Ⱪoza ɵrǝ turatti. U yengila boƣuzlanƣandǝk ⱪilatti; Uning yǝttǝ münggüzi wǝ yǝttǝ kɵzi bolup, bu kɵzlǝr Hudaning pütkül yǝr yüzigǝ ǝwǝtkǝn yǝttǝ Roⱨi idi. 6 Ⱪoza berip, tǝhttǝ olturƣuqining ong ⱪolidin oram yazmini aldi. Yazmini alƣanda, tɵt ⱨayat mǝhluⱪ wǝ yigirmǝ tɵt aⱪsaⱪal ⱪozining ayiƣiƣa yiⱪildi; ularning ⱨǝrbirining qiltari wǝ huxbuy bilǝn tolƣan altun qiniliri bar idi (bu huxbuy muⱪǝddǝs bǝndilǝrning dualiri idi). 7 Ular yengi bir küy eytixti: —

«Oram yazmini elixⱪa,

Wǝ peqǝtlǝrni eqixⱪa layiⱪsǝn;

Qünki boƣuzlanding

Wǝ ⱨǝr ⱪǝbilidin, ⱨǝr tildin,

Ⱨǝr millǝttin, ⱨǝr ǝldin bolƣan insanlarni

Ɵz ⱪening bǝdili bilǝn setiwelip, Hudaƣa mǝnsup ⱪilding. 8

Ularni Hudayimiz üqün bir padixaⱨliⱪⱪa uyuxturup,

Kaⱨinlar ⱪilding.

Ular yǝr yüzidǝ ⱨɵküm süridu». 9

Andin kɵrdüm wǝ mana, tǝhtning, ⱨayat mǝhluⱪlarning wǝ aⱪsaⱪallarning ǝtrapida nurƣunliƣan pǝrixtilǝrning awazini anglidim. Ularning sani tümǝn ming-tümǝn ming, milyon-milyon idi. 10 11 Ular yuⱪiri awaz bilǝn: —

«Boƣuzlanƣan ⱪoza ⱪudrǝt, dɵlǝt, danaliⱪ, küq-ⱪuwwǝt, ⱨɵrmǝt, xan-xǝrǝp

Wǝ mǝdⱨiyigǝ layiⱪtur» deyixǝtti. 12

Andin mǝn ǝrx, yǝr yüzi, yǝr asti wǝ dengizdiki ⱨǝrbir mǝhluⱪ wǝ ularning iqidǝ bar bolƣanlarning ⱨǝmmisining: —

«Tǝhttǝ Olturƣuqiƣa wǝ Ⱪoziƣa

Mǝdⱨiyǝ, ⱨɵrmǝt, xan-xǝrǝp wǝ ⱨoⱪuⱪ-ⱪudrǝt

Əbǝdil’ǝbǝdgiqǝ mǝnsup bolƣay!» deginini anglidim.

Tɵt ⱨayat mǝhluⱪ «Amin!» dǝp jawab ⱪayturatti, aⱪsaⱪallar yǝrgǝ yiⱪilip sǝjdǝ ⱪilatti. 13

Source notes (13)

Footnote ◼ «munasiwǝtlik ayǝtlǝr» — «Zǝk.» 5:1-4.
Cross-reference ◘ Zǝk. 5:1-4; Əz. 2:10.
Cross-reference ◘ Fil. 2:10; Wǝⱨ. 5:13.
Footnote ◼ «Dawutning yiltizi bolƣuqi» — yaki «Dawutning yiltizining notisi» («Yǝx.» 11:1ni kɵrüng). Lekin bizningqǝ bu sɵz Dawutning Mǝsiⱨtin kelip qiⱪⱪanliⱪini ⱨǝm Mǝsiⱨning Dawutning Rǝbbi ikǝnlikini kɵrsitidu (22:16 wǝ «Mat.» 22:42-45).
Cross-reference ◘ Yar. 49:9,10; Yǝx. 11:10; Rim. 15:12; Wǝⱨ. 22:16.
Cross-reference ◘ Zǝk. 3:9; 4:10; Wǝⱨ. 4:5.
Cross-reference ◘ Zǝb. 141:2; Wǝⱨ. 14:2.
Cross-reference ◘ Ros. 20:28; Əf. 1:7; Kol. 1:14; Ibr. 9:12; 10:10; 1Pet. 1:19; 1Yuⱨ. 1:7; Wǝⱨ. 4:11.
Cross-reference ◘ Mis. 19:6; 1Pet. 2:5, 9; Wǝⱨ. 1:6.
Footnote ◼ «Ularning sani tümǝn ming-tümǝn ming, milyon-milyon idi» — ǝslidǝ «ularning sani yüz milyonliƣan, «milyonliƣan idi».
Cross-reference ◘ Dan. 7:10; Ibr. 12:22.
Cross-reference ◘ Wǝⱨ. 4:11.
Footnote ◼ «...Tɵt ⱨayat mǝhluⱪ «amin!» dǝp jawab ⱪayturatti, aⱪsaⱪallar yǝrgǝ yiⱪilip sǝjdǝ ⱪilatti» — bu muⱨim babning temisi toƣruluⱪ «ⱪoxumqǝ sɵz»imizdǝ azraⱪ tohtilimiz.

Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.